കൊണ്ടാട്ടമുളക്

മുളക് കൊണ്ടാട്ടം, തൈരുമുളക്, കൊണ്ടാട്ടമുളക് ഇങ്ങനെയൊക്കെപ്പേരുള്ള ഒന്നിനെക്കുറിച്ച് നിങ്ങള്‍ കേട്ടിട്ടില്ലേ? കണ്ടിട്ടില്ലേ? തിന്നിട്ടില്ലേ? കടയില്‍ നിന്ന് വാങ്ങി, അതു മുഴുവന്‍ ഉപ്പാണെന്ന് പറഞ്ഞിട്ടില്ലേ? ഉണ്ടെങ്കില്‍ നിങ്ങള്‍ക്ക് സ്വാദുള്ള കൊണ്ടാട്ടമുളക് കഴിക്കാന്‍ പറ്റിയ അവസരം ഇപ്പോഴുണ്ട്. വേനല്‍ക്കാലത്ത് ചൂട് ചൂട് എന്ന് പറയാതെ, മുളക് ഉണക്കുക.
പച്ചമുളക് വാങ്ങുക. കഴുകുക. അതിന്റെ തണ്ട് കളയേണ്ട കാര്യമൊന്നുമില്ല.

കഴുകിയിട്ട്, ഒരു കത്തിയോ, പപ്പടം കുത്തിയോ എടുത്ത് നടുവില്‍ തുളയ്ക്കുക. ഇങ്ങനെ തുളയ്ക്കുകയൊന്നും വേണ്ട. കത്തികൊണ്ട് ഒന്ന് വരഞ്ഞാലും മതി.

ആവശ്യത്തിനു ഉപ്പിട്ടിളക്കുക. ഒരു ദിവസം നല്ല വെയിലില്‍ വയ്ക്കുക. നല്ല വെയില്‍ ഇല്ലെങ്കില്‍ ഇപ്പരിപാടിയ്ക്ക് നില്‍ക്കരുത്. മുളക് കേടായിപ്പോവും. വെയിലത്തുവെച്ച് എടുത്തിട്ട്, നല്ല മോരിലോ, തൈരിലോ ഇടുക. കുറച്ച് ഉപ്പ് വേണമെങ്കില്‍ തൈരിലും ഇടാം. കുറേ ആവരുത്.

പിറ്റേ ദിവസം തൈരില്‍/ മോരില്‍ നിന്നെടുത്ത് വീണ്ടും വെയിലത്തിടുക. ആ തൈരു കളയരുത്. പ്ലാസ്റ്റിക് ഷീറ്റില്‍ ഇട്ടാല്‍ മതി. എന്തെങ്കിലും ഒരു പ്ലാസ്റ്റിക് കവര്‍ മതി. എന്നിട്ട് അന്നും വെയിലത്തുനിന്നെടുത്ത് അതേ മോരില്‍/തൈരില്‍ ഇടുക. പിറ്റേ ദിവസം വീണ്ടും വെയിലത്തുവയ്ക്കുക. പിന്നെ തൈരില്‍ ഇടേണ്ട. നന്നായി ഉണങ്ങുന്നതുവരെ ദിവസവും വെയിലത്തുവയ്ക്കുക. ഉണക്കാന്‍ തുടങ്ങിയിട്ട് കുറച്ച് ഉണങ്ങുന്നതിനിടയില്‍ വെയിലത്തുവയ്ക്കാന്‍ മറന്നുപോയാല്‍ മുളക് കേടാകും. പറഞ്ഞില്ലെന്ന് വേണ്ട.

ഉണങ്ങിയാല്‍ നന്നായി അടച്ചുസൂക്ഷിക്കുക. ആവശ്യം പോലെ വറുത്തു കൂട്ടുക.

അരിക്കൊണ്ടാട്ടം

കയ്പ്പക്കക്കൊണ്ടാട്ടം

കുമ്പളങ്ങ മൊളേഷ്യം

മൊളേഷ്യത്തിനു കുമ്പളങ്ങ/ഇളവന്‍ തോലും കുരുവുമൊക്കെക്കളഞ്ഞ് കഴുകി, ഉപ്പും, മഞ്ഞള്‍പ്പൊടിയും, കുരുമുളകുപൊടിയും ഇട്ട് വേവിക്കണം. ആവശ്യത്തിനുമാത്രമേ വെള്ളം വേണ്ടൂ. കുമ്പളങ്ങയ്ക്ക് അധികം വെള്ളമൊഴിച്ചാല്‍ വെള്ളം കുറേ അധികമാവും. വെന്തിട്ട് തേങ്ങ ചിരവിയിടണം. തേങ്ങയില്ലെങ്കിലും കുഴപ്പമില്ല. വെളിച്ചെണ്ണയൊഴിക്കണം. ഇത്രേ ഉള്ളൂ ജോലി. ഒക്കെ പാകത്തിനു ഇടുക. കുരുമുളക് അധികമായാല്‍ എരിയും. അതു ഞാന്‍ പറയണോ അല്ലേ? ;)

കായമൊളേഷ്യം ഇവിടെ

ചക്കയട

അമ്മ, ഹൈസ്കൂളില്‍ കണക്ക് അദ്ധ്യാപിക ആയിരുന്നു. മക്കളൊക്കെ വലുതായി ഓരോവഴിക്കുപോയപ്പോള്‍ വളന്ററി റിട്ടയര്‍മെന്റ് എടുക്കുകയാണുണ്ടായത്. അതിരാവിലെ എണീറ്റ്, ചായപ്പലഹാരങ്ങളും, ഉച്ചയ്ക്കത്തേയ്ക്കുള്ള ചോറും കൂട്ടാനും ഉപ്പേരിയും ഒക്കെ തയ്യാറാക്കിയിട്ടാണ് സ്കൂളിലേക്ക് പോയിരുന്നത്. ഉച്ചഭക്ഷണം കൊണ്ടുപോവുകയും ചെയ്തിരുന്നു. ഒരു പാക്കറ്റ് ബ്രഡും തുറന്നുവെച്ച് കടിച്ചുതിന്നോന്ന് പറയാറില്ല അമ്മ. പനിക്കുമ്പോള്‍ തിന്നാനാണ് ബ്രഡ് എന്നാണ് അന്നും ഇന്നും സങ്കല്‍പ്പം. ;) എന്നും ജോലികഴിഞ്ഞുവന്ന്, അരച്ചും പൊടിച്ചും നല്ല രുചിയുള്ള ഭക്ഷണം ഉണ്ടാക്കിത്തന്നിരുന്നു. അങ്ങനെ, ഉദ്യോഗസ്ഥയായിരുന്ന അമ്മയെ സഹായിച്ചാണ് മക്കള്‍ നല്ല പാചകക്കാരായിത്തീര്‍ന്നത്. എല്ലാം ജോലിയും ചെയ്യാന്‍ പഠിക്കുന്നതില്‍ തെറ്റൊന്നുമില്ല, നിങ്ങള്‍ക്ക് പിന്നീട് ആവശ്യമില്ലെങ്കില്‍ എടുക്കേണ്ടെന്ന് വെച്ചാല്‍പ്പോരേന്നും പറഞ്ഞ് അമ്മ വീട്ടുജോലിയൊക്കെ പഠിപ്പിച്ചു. അതുകൊണ്ടുതന്നെ, കല്യാണം കഴിഞ്ഞപ്പോള്‍, ഒരു പാചകപുസ്തകവും പിടിച്ച് പാചകം ചെയ്യേണ്ട ഗതികേട് വന്നില്ല. പണ്ട് പാത്രം കഴുകാന്‍ മടിവരുമ്പോള്‍, ഇവിടെ കുറേ പാത്രം ഉണ്ട്, പിന്നീട് എന്റെ വീട്ടില്‍ ഒരു പ്ലേറ്റും, ഒരു പാത്രവും, ഒരു സ്പൂണും ഒരു ഗ്ലാസ്സും മാത്രേ ഉണ്ടാവൂ, അരിമാവുപോലും ഗ്ലാസ്സില്‍ വയ്ക്കുമെന്നൊക്കെപ്പറയുമായിരുന്നു ഞാന്‍. ;) അമ്മയ്ക്ക് പുറത്തെ ഭക്ഷണം അന്നും ഇന്നും ഇഷ്ടമല്ല. വല്ല ചിപ്സോ, മിക്സ്ചറോ കഴിച്ചാലായി. പിന്നെ പഴങ്ങളും. വീട്ടുഭക്ഷണം മാത്രമേ കഴിക്കൂ. ഞങ്ങളൊക്കെ പുറത്തുനിന്ന് ഇടയ്ക്ക് കഴിക്കുമ്പോള്‍, എന്തിനാ വെറുതെ, വീട്ടില്‍ വൃത്തിയില്‍ ഉണ്ടാക്കിക്കഴിച്ചൂടേന്ന് ചോദിക്കും. ഇന്ന് മാതൃദിനം ആണത്രേ. അമ്മയെ ഓര്‍മ്മിക്കാനും സ്നേഹിക്കാനും ഒന്നും ഒരു ദിനത്തിന്റെ ആവശ്യമില്ല. എന്നും മിണ്ടാറുണ്ട്. എന്നാലും ഇന്നത്തെ പാചകം അമ്മയ്ക്ക് വേണ്ടിയാവട്ടേന്ന് കരുതി. മക്കള്‍ തിന്നാലും മതിയല്ലോ അമ്മയ്ക്ക്.
അമ്മയുണ്ടാക്കുന്നതിന്റെ അയല്‍‌വക്കത്തൊന്നും വരില്ലെങ്കിലും ഞാനും അടയുണ്ടാക്കാന്‍ തീരുമാനിച്ചു. ചക്ക വരട്ടിത്തന്നത് അമ്മയാണ്. ഇക്കൊല്ലത്തേതല്ല, കഴിഞ്ഞ കൊല്ലത്തേതാണ് ചക്കപ്പേസ്റ്റ്. അമ്മയെ രാവിലെത്തന്നെ വിളിച്ച്, അടയുണ്ടാക്കുന്നുണ്ടെന്ന് അറിയിപ്പ് നടത്തുകയും ചെയ്തു.
ആദ്യം ശര്‍ക്കര പാവുകാച്ചി, അതിലേക്ക് ആവശ്യമുള്ള ചക്കപ്പേസ്റ്റും ഇട്ട് ഇളക്കണം. മധുരം നന്നായിട്ട് ഇഷ്ടമാണെങ്കില്‍, അടയുടെ എണ്ണത്തില്‍ ശര്‍ക്കര എടുക്കാം. പത്ത് അടയ്ക്ക്, ചക്കപ്പേസ്റ്റ് മൂന്ന് ടേബിള്‍സ്പൂണ്‍ മതിയാവും. അത് നന്നായി ഇളക്കിയിട്ട് വാങ്ങിവെച്ച്, ഏലക്കായ പൊടിച്ചതും, തേങ്ങ ചെറുതായി മുറിച്ചതും ഇടണം. മിനുസമായിട്ട് പൊടിച്ച അരിപ്പൊടിയും ഇടണം. പത്ത് ടേബിള്‍സ്പൂണ്‍ ഇട്ടുനോക്കുക. എന്നിട്ട് വെള്ളം പോലെയുണ്ടെങ്കില്‍ കുറച്ചും കൂടെ ഇടുക.

ഇല മുറിച്ച് കഴുകി വാട്ടിയെടുത്ത്, അതിലേക്ക് , അടയുടെ കൂട്ട് ഒഴിക്കുക.

സ്പൂണുകൊണ്ട് പരത്താം. ഇനി കൈകൊണ്ടാണെങ്കില്‍ അങ്ങനെ.

എല്ലാ ഇലക്കഷണത്തിലും ഇട്ട് പരത്തിക്കഴിഞ്ഞ്, ഒരു പാത്രമെടുത്ത്, അതിലേക്ക് മടക്കിമടയ്ക്കിവെയ്ക്കുക.

ഇവിടെ കുക്കറിന്റെ തട്ടില്‍ത്തന്നെ വെച്ചു.

നന്നായി വേവിച്ച് എടുക്കുക.

ഒന്ന് തണുത്തതിനുശേഷം ഇല നിവര്‍ത്തിനോക്കുക.

എന്നിട്ട് തിന്നുക.

ഇലയട ഇവിടെയുണ്ട്

ചക്കക്കുരു ഉപ്പേരി

ചക്കകൊണ്ട് ഉണ്ടാക്കിയെടുക്കുന്ന വിഭവങ്ങള്‍ ഏറെയുണ്ട്. അതിന്റെ തോലുപോലും ഉപയോഗിക്കുന്നുണ്ട്. ചക്കക്കുരു കൊണ്ടുണ്ടാക്കുന്ന വിഭവങ്ങളില്‍പ്പെട്ടതാണ് ചക്കക്കുരു മെഴുക്കുപുരട്ടി, ചക്കക്കുരു ഉപ്പേരി എന്നിവ. പല രീതിയിലും ഉണ്ടാക്കാം. പൊടിച്ചിട്ടും, കഷണമായിട്ടും, വറവിട്ടും, തേങ്ങ മാത്രം കൂട്ടിയും, വെളിച്ചെണ്ണയൊഴിച്ചും ഒക്കെ.

ആരോ പറഞ്ഞ കഥയില്‍, പഴങ്ങളൊക്കെ തിന്നുന്നതിനിടയ്ക്ക് ഒരു സായിപ്പ്, ചക്കച്ചുള പൊളിച്ചുകളഞ്ഞ് കുരു മാത്രം തിന്നുവെന്നുണ്ട്. ചുളയെന്നാല്‍ തോലാണെന്നാണ് സായിപ്പ് ധരിച്ചുവെച്ചിട്ടുള്ളതെന്ന്. ചക്കക്കുരുവിന്റെ തോലുകളയാന്‍ പലര്‍ക്കും മടിയുണ്ടാവും. ചക്കക്കുരു വിഭവം കഴിക്കാന്‍ ഇഷ്ടവും ഉണ്ടാവും. ഞാന്‍ എളുപ്പവിദ്യയില്‍ തോലുകളയുന്നതെങ്ങനെയാണെന്നുവെച്ചാല്‍, ചക്കക്കുരു കഴുകി, ഒരു പാത്രത്തിലിട്ട് കുക്കറില്‍ ഇട്ട് ഒന്നു വേവിക്കും. എന്നിട്ട് തണുത്തുകഴിയുമ്പോള്‍ തോലുകളയാന്‍
എളുപ്പമാവും. അധികം വെന്തുചീഞ്ഞുപോകരുത്. പിന്നെ ഉപ്പും മുളകും മഞ്ഞളും ഒക്കെ പിടിക്കാനുള്ളതല്ലേ. അതൊക്കെയിട്ട് നന്നായി വേവിച്ചാല്‍ മതി.
തോലൊക്കെക്കളഞ്ഞ് ചക്കക്കുരു നീളത്തില്‍ നീളത്തില്‍ മുറിയ്ക്കണം. അതാണ് ഉപ്പേരി സ്റ്റൈല്‍. എന്നിട്ട് വറവിടുന്നുണ്ടെങ്കില്‍ വറവൊക്കെയിട്ട്, ഉപ്പും മഞ്ഞള്‍പ്പൊടിയും, വേണമെങ്കില്‍ മുളകുപൊടിയും ഇട്ട്, വെള്ളവും ഒഴിച്ച് അടച്ചുവെച്ച് വേവിക്കുക. തോലുകളയാന്‍ ആദ്യം വേവിച്ചതാണെങ്കില്‍പ്പിന്നെ കുറച്ച് വെള്ളമേ ഒഴിക്കാവൂ. വെന്താല്‍ തേങ്ങ ചിരവിയിടുക. ഇനി മെഴുക്കുപുരട്ടിയാണെങ്കില്‍ വെറുതെ വേവിച്ച് വെളിച്ചെണ്ണയൊഴിച്ച് എടുത്താലും മതി.

ഞാനിതില്‍ വറവിട്ടില്ല. വേവിച്ച് തേങ്ങ ചിരവിയിട്ടു. കുറച്ച് വെളിച്ചെണ്ണയും ഒഴിച്ചു.

മാങ്ങാമധുരം

മധുരമുള്ള മാങ്ങകൊണ്ടൊരു ഇരട്ടിമധുരം. അതാണീ മാങ്ങാമധുരം. പഴുത്ത്, മധുരിക്കുന്ന, എന്നാല്‍ അല്പം പുളിയ്ക്കുന്ന മാങ്ങ ഇഷ്ടമില്ലാത്തവര്‍ ഉണ്ടോ? ഇനിയും കൂടുതല്‍ മധുരം ആവട്ടെ എന്നുവിചാരിക്കുന്നുണ്ടാവും അല്ലേ? ഇപ്പോഴാണെങ്കില്‍ ഇഷ്ടം പോലെ മാങ്ങകള്‍. വീട്ടിലില്ലെങ്കിലെന്താ വാങ്ങാന്‍ കിട്ടുമല്ലോ. പുളിയുള്ള മാങ്ങയാണെങ്കിലും ഇതിനുപറ്റും.

മാങ്ങ കുറേ കണ്ടപ്പോള്‍ ഞാന്‍ വിചാരിച്ചു, മാങ്ങയല്ലേ, പാവമല്ലേ കുറച്ചും കൂടെ മധുരം കൊടുത്തേക്കാംന്ന്. അങ്ങനെയാണ് ഇതുണ്ടാക്കുന്നത്.

മാങ്ങയെടുത്ത് കഴുകി, തോലുകളയണം.

അത് കൈകൊണ്ട് പിഴിഞ്ഞോ കഷണങ്ങളാക്കി മിക്സിയില്‍ അടിച്ചോ, അതിന്റെ സത്ത്/ചാറെടുക്കണം. കുറച്ച് വെള്ളം ചേര്‍ക്കുകയൊക്കെ ചെയ്യാം. തണുത്ത വെള്ളം ചേര്‍ക്കൂ.

അതുകഴിഞ്ഞ് അളവ് ഏകദേശം കണക്കാക്കി അതിലേക്ക് ശര്‍ക്കര/വെല്ലം പൊടിച്ച് ഇടുക. കുറച്ച് ഏലയ്ക്ക പൊടിച്ചതും ഇടുക. തോലുകളഞ്ഞ് പൊടിച്ചിട്ടാല്‍ മതി. നന്നായി ഇളക്കി യോജിപ്പിക്കുക.

തയ്യാറായി.

ഇനി സ്വാദ് നോക്കുക. തീര്‍ക്കുക.
എത്ര മാങ്ങയുണ്ടോ അത്രയും ഗ്ലാസ്സ് ഇത് ഉണ്ടാക്കാം. അല്ലെങ്കില്‍ അധികം വെള്ളം പോലെ ഇഷ്ടമല്ലെങ്കില്‍ വെള്ളമൊഴിക്കരുത്. ഒരുപ്രാവശ്യം നോക്കിയാല്‍ എല്ലാ കണക്കും മനസ്സിലാവും.

എന്റെ കസിന്റെ വീട്ടില്‍ പോയപ്പോള്‍ അവള്‍ തന്നതാണ് ചില്ലുപാത്രം. നല്ല ഭംഗിയില്ലേ? നിങ്ങളുടെയൊക്കെ വീട്ടില്‍ വരുമ്പോള്‍ ഇതുപോലെ എന്തെങ്കിലും തരട്ടെ എന്നു കരുതി പറഞ്ഞു എന്നേയുള്ളൂ. ;)

സംഭാരം

കാരണവര്‍ക്ക് പനിച്ചാലും മോരുകൂട്ടാം എന്നു കേട്ടിട്ടില്ലേ? കാരണവര്‍ക്ക് എന്തും ചെയ്യാം എന്നര്‍ത്ഥം. പക്ഷെ മറ്റുള്ളവര്‍ പനിക്കുമ്പോള്‍ മോരുകൂട്ടരുത് എന്നൊരു കാര്യം കൂടെ അതിലുണ്ട്. മോര് കറികള്‍ ഉണ്ടാക്കാന്‍ മാത്രമല്ല, വെറുതേ കുടിക്കാനും നല്ലത്. ചൂടുകാലത്ത്, മോരും വെള്ളം കുടിക്കുന്നത് നല്ലതാണെന്ന് അറിയില്ലേ?
വീട്ടില്‍, അത്യാവശ്യസന്ദര്‍ഭങ്ങളിലല്ലാതെ ഒരിക്കലും മോര് പുറത്തുനിന്ന് വാങ്ങിയിരുന്നില്ല. എത്രയോ കാലമായി അങ്ങനെത്തന്നെ. തൈരുണ്ടാക്കുക. കലക്കിയെടുക്കുക. ഇതാണ് പരിപാടി.

നല്ല കട്ടത്തൈരുണ്ടാക്കാന്‍ ഒരു സൂത്രമുണ്ട്. പാലിന് ഇളംചൂടുള്ളപ്പോള്‍ അതിലേക്ക് മോരൊഴിച്ച് ഉറയൊഴിക്കുക. ഒരു ലിറ്റര്‍ പാലിന്, രണ്ട് ടീസ്പൂണ്‍ പുളിച്ച മോരൊഴിച്ച് വെച്ചാല്‍, പിറ്റേന്നാവുമ്പോഴേക്കും മുറിച്ചെടുക്കാന്‍ കഴിയുന്ന തരത്തില്‍ തൈരു കിട്ടും. മോരൊഴിച്ച് ഒന്ന് ഇളക്കിവയ്ക്കാന്‍ മറക്കരുത്. തണുപ്പുകാലത്ത് കൂടുതല്‍ മോര് ഒഴിക്കേണ്ടിവരും.
തൈരെടുത്ത് നന്നായി കലക്കുക. കടകോലുകൊണ്ടോ, മിക്സിയില്‍ ഒഴിച്ചോ. എന്നിട്ട് അതില്‍ കുറച്ചെടുത്ത്, നല്ല തണുത്ത വെള്ളം ഒഴിക്കുക. ഐസുകട്ട ഇട്ടാലും മതി. മോരും വെള്ളമായാല്‍, ഉപ്പിട്ട് ഇളക്കുക. കുറച്ച് കറിവേപ്പില, ഒരു കഷണം ഇഞ്ചി, കുറച്ച് നാരകത്തിന്റെ ഇല, പച്ചമുളക് എന്നിവ, അരച്ചോ, ചതച്ചോ മോരിലേക്കിട്ട് യോജിപ്പിക്കുക. സംഭാരം റെഡി. കുറേ മോരുണ്ടെങ്കില്‍, ഇതൊക്കെ ഒരു കിഴികെട്ടി അതിലേക്ക് ഇട്ടാലും മതി. എന്നാല്‍ ഇതൊക്കെ, മോരും വെള്ളം കുടിക്കുമ്പോള്‍ വായില്‍പ്പെടാതെ ഇരിക്കും. സ്വാദുമുണ്ടാകും. ഒന്നോ രണ്ടോ ഗ്ലാസ്സ് ആണെങ്കില്‍ കിഴി കെട്ടാനൊന്നും നില്‍ക്കരുത്.

ഇഞ്ചിയുടേയും പച്ചമുളകിന്റേയും എരിവും, പുളിച്ച മോരിന്റെ സ്വാദും, തണുപ്പും, കറിവേപ്പിലയുടേയും, നാരകത്തിന്റേയും രുചിയും ഒക്കെക്കൂടെ ഈ സംഭാരം അടിപൊളിയാവും.

ഞാന്‍ മോരില്‍ തണുത്ത വെള്ളത്തിനുപകരം തിളപ്പിച്ചാറ്റിയ വെള്ളമൊഴിക്കും. എന്നിട്ട് അത് ഫ്രിഡ്ജില്‍ വയ്ക്കും. എന്നിട്ട് തണുത്തിട്ട് കുടിക്കും. അല്ലെങ്കില്‍ തിളപ്പിച്ച് തണുത്ത വെള്ളം ഫ്രിഡ്ജില്‍ വയ്ക്കും. അത് മോരിലൊഴിക്കും. പച്ചവെള്ളം ഒഴിക്കാത്തത് അമ്മ ചെയ്യുന്നത് കണ്ട് ശീലിച്ചതാണ്.

ചക്കച്ചുള വറുക്കേണ്ടേ?

ചക്ക വറുത്തിട്ട്, കറുമുറെ തിന്നാന്‍ ഇഷ്ടമില്ലാത്തവര്‍ ഉണ്ടോ? വിഷുവൊക്കെ കഴിഞ്ഞ് അച്ഛനേയും അമ്മയേയും സന്ദര്‍ശിക്കാന്‍ പോയപ്പോള്‍ അവിടെയിരിക്കുന്നു ഒരു പകുതിച്ചക്ക.

അതെങ്കില്‍ അത്. അമ്മ പറഞ്ഞു, അത്രയ്ക്ക് മൂത്തിട്ടൊന്നുമില്ല, എന്നാലും വേണമെങ്കില്‍ വറുക്കാം. വേണ്ടതുകൊണ്ടാണല്ലോ വേരിലും കായ്ക്കുന്നത്.
അങ്ങനെ എല്ലാരും കൂടെ വെട്ടിക്കീറി.

ചുളയെടുത്ത് വേറെയിട്ടു.

ചുളയുടെ മുകളിലും താഴെയും കുറച്ച് കളഞ്ഞ്, കുരുകളഞ്ഞ് മുറിച്ചു. നീളവും വീതിയുമൊക്കെ കൃത്യം കൃത്യം ആവണം. അല്ലെങ്കില്‍ വറവ് ഒരുപോലെ ആകില്ല. എന്നാലും ടേപ്പ് വെച്ച് അളക്കുകയൊന്നും വേണ്ട.

അരിഞ്ഞു പകുതിയായപ്പോ അമ്മ അടുപ്പത്ത് ഉരുളി വെച്ചു. വെളിച്ചെണ്ണയൊഴിച്ചു ചൂടാക്കാന്‍ വെച്ചു.

വലിയ ചീനച്ചട്ടി ഉണ്ടെങ്കിലും അതിലും കുറച്ചുകൂടെ ഇട്ടുവറുക്കാന്‍ ഉരുളിയല്ലേ സൌകര്യം.
ഉപ്പും പുരട്ടി, ചൂടായ വെളിച്ചെണ്ണയിലേക്കിട്ടു.

കുറേ മൊരിഞ്ഞപ്പോള്‍ തിരിച്ചും മറിച്ചുമിട്ടു.

പാകമായപ്പോള്‍ എടുത്തും വച്ചു.

ഇനി തിന്നാന്‍ ആരുണ്ടെന്ന് ചോദിക്കേണ്ടല്ലോ. വേറെ അരിഞ്ഞുവെച്ചിരിക്കുന്ന, ചുളയുടെ മുകളിലുള്ള മൂക്ക് എന്നു പറയുന്ന ഭാഗവും വറുക്കും.
അങ്ങനെ അമ്മയുടെ അടുക്കളയില്‍ നിന്ന് കറിവേപ്പിലയിലേക്ക് ചക്ക വറുത്തിട്ടു.

വിഷു എത്തിയപ്പോള്‍

വിഷുവും, ക്രിസ്മസ്സും, പെരുന്നാളും, ഓണവുമൊക്കെ വെറും ആഘോഷങ്ങളും ഒഴിവുദിനങ്ങളുമല്ല. അതൊക്കെ ദൈവം നമുക്കായി തന്നിട്ടുള്ള സന്തോഷങ്ങളാണ്. തിരക്കുപിടിച്ച ജീവിതത്തിനിടയില്‍, ഈ ആഘോഷങ്ങളൊക്കെ നമ്മുടെ മനസ്സിനൊരു ഉണര്‍വ്വു തരും. കൂട്ടുകാരേയും വീട്ടുകാരേയും ഒക്കെ ഒന്നിച്ചുകൂട്ടുന്ന, പലപ്പോഴും മന:പൂര്‍വ്വമല്ലെങ്കിലും മറന്നുപോകുന്ന സൌഹൃദങ്ങള്‍ ഓര്‍മ്മിക്കുന്ന ഇത്തരം അവസരങ്ങള്‍ നമുക്ക് പിന്നേയ്ക്കും ഓര്‍മ്മിക്കാനൊരു സന്തോഷം ബാക്കിവെച്ചിട്ടാണ് കടന്നുപോവുക. എത്ര തിരക്കായാലും, സ്വന്തക്കാരൊക്കെ ദൂരെയായാലും അവരൊക്കെ സന്തോഷിക്കുന്നതും ആഘോഷിക്കുന്നതുമായ ആഘോഷം, നമ്മുടെ മനസ്സിലെങ്കിലും ആഘോഷം തന്നെ.

വിഷു, വിളവെടുപ്പിന്റെ ഉത്സവമാണത്രേ. വിളകളൊക്കെ നശിച്ച് ദാരിദ്ര്യത്തില്‍ ജീവിക്കേണ്ടി വരുന്നവര്‍ പോലും വിഷു വരുമ്പോള്‍, അല്‍പ്പമെങ്കിലും പ്രതീക്ഷയുടെ കിരണം മുന്നില്‍ക്കണ്ട് ആഘോഷിക്കും.

വിഷുവിന് കണിവയ്ക്കുകയാണ് പ്രധാനം. പടക്കം പൊട്ടിക്കലും സദ്യയും അതിനോടൊപ്പമുള്ളതും. തലേന്നു തന്നെ കണിയൊക്കെ ഒരുക്കിവെച്ച് അതിരാവിലെ എണീറ്റ് വിളക്കുതെളിച്ച് കണികണ്ട്, കൈനീട്ടം, കൊടുത്തും, വാങ്ങിയും, പടക്കം പൊട്ടിക്കുകയും, ക്ഷേത്രങ്ങളിലൊക്കെ പോയി വന്ന്, സദ്യയുണ്ടാക്കുകയും കഴിക്കുകയും ചെയ്യുക. ഇതൊക്കെയാണ് വിഷുവിന് മുഖ്യം. ഓട്ടുരുളിയും, സകല പഴവും പച്ചക്കറികളും, ചക്കയും മാങ്ങയും, കൊന്നപ്പൂവും ഒക്കെ ഒരുക്കിവയ്ക്കാനില്ലാതെ എന്ത് കണി എന്നു ചോദിക്കുന്നവര്‍ ഉണ്ടാവും. അതിനൊന്നും സൌകര്യമില്ലാത്തവര്‍ കണി കാണരുതെന്ന് എവിടെയെങ്കിലും പറഞ്ഞിട്ടുണ്ടോ? ഇല്ല. ഇതൊക്കെയൊരുക്കിവെച്ച് കാണാന്‍ പറ്റാത്തവര്‍ക്കും വിഷുപ്പുലരിയില്‍ കണികണ്ട് പ്രാര്‍ത്ഥിക്കാം. ഒരു വിളക്കെടുത്ത് കത്തിച്ചുവയ്ക്കുക. ദൈവത്തിനോട് പ്രാര്‍ത്ഥിക്കുക. തന്ന നന്മയ്ക്കൊക്കെ നന്ദിയും, തരാന്‍
പോകുന്ന സൌഭാഗ്യങ്ങള്‍ക്കു വേണ്ടി അപേക്ഷയും നല്‍കുക. വീട്ടുകാരേയും കൂട്ടുകാരേയും ചെന്നുകണ്ടോ, ഫോണ്‍ ചെയ്തോ, അവരുടെ സന്തോഷങ്ങളില്‍ പങ്കുചേരുക. ഇതൊക്കെയാണ് വിഷുവിന്റെ നന്മ. അടുത്തവര്‍ഷം ഇതിനേക്കാളും നന്നായി വിഷു ആഘോഷിക്കാന്‍ കഴിയണമെന്നുകൂടെ പ്രാര്‍ത്ഥിക്കുക. വീട്ടുകാരേയും കൂട്ടുകാരേയും ഒക്കെ വിളിച്ച് സന്തോഷിക്കുമ്പോള്‍, ലോകത്തുള്ള മറ്റുള്ളവരെക്കുറിച്ചും ചിന്തിക്കുക. ഇത്രയൊക്കെയേ വേണ്ടൂ വിഷു ആഘോഷിക്കാന്‍.
ഞങ്ങള്‍ ഒരു ആഘോഷവും ഒരു കാരണം കൊണ്ടും മുടക്കാറില്ല. കഴിയുന്നതുപോലെയൊക്കെ ആഘോഷിക്കും. പ്രിയപ്പെട്ടവരാരെങ്കിലും ഈ ലോകം വിട്ടുപോകുമ്പോള്‍, അതുകഴിഞ്ഞ് തൊട്ടടുത്ത് വരുന്ന വിശേഷദിനം മാത്രമാണ് ആഘോഷിക്കാതെയിരിക്കുക. അല്ലെങ്കില്‍, സന്തോഷിക്കാനും ഒരുമിച്ച് കാണാനും ഉള്ള ഒരവസരവും ഞങ്ങളിലാരും പാഴാക്കാറില്ല. ദൈവം തരുന്ന സമ്മാനമായിട്ടാണ് ഓരോ ആഘോഷവും ഞങ്ങള്‍ കരുതുന്നത്. അതുകൊണ്ടുതന്നെ ദൈവനിന്ദ കാണിക്കാറില്ല. ഇന്നുള്ളതൊക്കെ നാളെയുണ്ടാവുമോയെന്നും അറിയില്ല. ജന്മദിനങ്ങള്‍ പോലും ആരും ആഘോഷിക്കാതെയിരിക്കില്ല. ഇനി വേണ്ടെന്നുവെച്ചാലും കുടുംബത്തിലെ മുതിര്‍ന്ന ആള്‍ക്കാര്‍, ആഘോഷിക്കാതെയിരിക്കാന്‍ അനുവദിക്കുകയുമില്ല. നമുക്കു തരുന്ന സൌഭാഗ്യങ്ങള്‍ക്കൊക്കെ നന്ദി പറഞ്ഞ്, ഇതൊന്നും ഇല്ലാത്തവര്‍ക്കുവേണ്ടി പ്രാര്‍ത്ഥിക്കുകയും ചെയ്യുക. ദാനം ചെയ്യാന്‍ കഴിയുന്നത് ചെയ്യുക. ഇതൊക്കെ എപ്പോഴും ചെയ്യും.

ഇവിടെ വിഷുവെത്തിക്കൊണ്ടിരിക്കുന്നു. ചില പച്ചക്കറികളൊക്കെ എത്തി. ഇനിയും എന്തൊക്കെയോ ഉണ്ട് ഒരുക്കാന്‍. പച്ചക്കറിയ്ക്ക് വിലകൂടി എന്നും പറഞ്ഞ് വാങ്ങാതെ ഇരുന്നിട്ട് കാര്യമില്ലല്ലോ. അടുത്തവര്‍ഷം ഇതൊക്കെ കിട്ടുമോന്നുതന്നെ ആര്‍ക്കറിയാം. അല്ലെങ്കില്‍ വീട്ടുവളപ്പില്‍ ഉണ്ടാക്കേണ്ടിവരും.

വിഷുസംക്രമത്തിനും സദ്യ വേണം എന്നൊക്കെയാണ്. അടുത്തൊരിടത്ത് ഉത്സവം ഉണ്ടായപ്പോള്‍ അച്ഛന്‍ വാങ്ങിച്ചുതന്ന കല്‍ച്ചട്ടി ഉദ്ഘാടനം കഴിച്ചത് വിഷുസംക്രമത്തിന് കാളന്‍ വെച്ചാണ്. അടുപ്പത്തൊക്കെ വെച്ച് കറുകറുപ്പിക്കണം എന്നൊക്കെ മോഹമുണ്ട്. സ്റ്റൌവില്‍ കച്ചട്ടിവയ്ക്കുന്നു, നിനക്കു വേറെ ജോലിയില്ലേന്ന് എല്ലാരും ചോദിക്കും. എന്നാലും അതിനൊരു സ്വാദ് വേറെ തന്നെ.

വിഷുവിന് മാത്രമല്ല എല്ലാ സദ്യകള്‍ക്കും, പപ്പടവും, പുളിയിഞ്ചിയും, വറുത്തുപ്പേരിയും, ഉപ്പിലിട്ട കറികളും പ്രധാനം തന്നെ. പുളിയിഞ്ചി രണ്ടുദിവസം മുമ്പുതന്നെ വയ്ക്കുന്നതാണ് നല്ലത്. അതിന്റെ ജോലി തീരുമല്ലോ.

പിന്നെ സദ്യ വേണ്ടതുതന്നെ. ചുരുക്കത്തിലെങ്കില്‍ ചുരുക്കത്തില്‍. ഇവയൊക്കെക്കൂടാതെ,
പച്ചടിയും, മാങ്ങാപ്പച്ചടിയും, ചീരക്കറികളും, വറുത്തുപ്പേരിയും, ഓലനും‍, എരിശ്ശേരിയും, സാമ്പാറും

അവിയലും, കാളനും, കൂട്ടുകറിയും പിന്നെ പായസവും ആവാം. ഇതൊന്നുമില്ലെങ്കിലും ഇഷ്ടമുള്ളത് കഴിക്കുക. അതുതന്നെ സദ്യ!

ഇനി വിഷുവിങ്ങോട്ട് വരുകയേ വേണ്ടൂ. വിളക്കുകത്തിച്ച്, കണികണ്ട് എല്ലാ നന്മയും എല്ലാവര്‍ക്കും കൊടുക്കണം എന്നു പറയും. വിഷുക്കണി കാണാന്‍ തന്നതിനു നന്ദിയും പറയും. എല്ലാ കൂട്ടുകാര്‍ക്കു വേണ്ടിയും ആഘോഷിക്കാന്‍ പറ്റാത്തവര്‍ക്ക് വേണ്ടിയും പ്രാര്‍ത്ഥിക്കും.

വിഷുവിന് കൈനീട്ടമാണ് പ്രധാനമെങ്കിലും കോടിയുണ്ടെങ്കില്‍പ്പിന്നെ ഉടുക്കാതിരിക്കുന്നതെന്തിന്? രണ്ട് അനിയത്തിക്കുട്ടികളുടെ പുത്തന്‍ വിഷുവാണ് ഇക്കൊല്ലം. വിവാഹം കഴിഞ്ഞ് ആദ്യം വരുന്ന വിഷു. അവരൊക്കെ ആഘോഷിക്കുമ്പോള്‍, എന്ത് വിഷു? ഏത് വിഷു എന്നൊന്നും പറഞ്ഞിരിക്കാന്‍ എന്നെ കിട്ടില്ല. ദൂരെയാണെങ്കിലും അവരെ വിളിക്കും. വിഷു കഴിഞ്ഞാല്‍ വിരുന്നുവരുമ്പോള്‍ കാണുകയും ചെയ്യും.

വിഷു മാത്രമല്ല, എല്ലാ വിശേഷാവസരങ്ങളും ആഘോഷിക്കുന്നതാണ് നല്ലത്. കവി പാടിപ്പോയതുപോലെ, “നാളെയാരെന്നുമെന്തെന്നുമാര്‍ക്കറിയാം?”

എല്ലാവര്‍ക്കും വിഷു ആശംസകള്‍. എല്ലാവരും കണികണ്ടു പ്രാര്‍ത്ഥിക്കുക. ആര്‍ഭാടങ്ങളൊന്നും വേണ്ട. എവിടെ ആണെങ്കിലും കണി കാണാം. പ്രാര്‍ത്ഥിക്കാം. സൌകര്യം പോലെ, സമയം പോലെ സദ്യയൊരുക്കാം. ഇന്നത്തെ വിഷു വേണ്ട എന്നുവെക്കരുത്. ഇന്നാണ് ജീവിതം. നാളെ എന്നത് വെറും വാക്ക് മാത്രമാണ്. ഇന്നു ദൈവം നമുക്ക് തന്നിരിക്കുന്നതാണ് വിഷു. എല്ലാവരും ആഘോഷിക്കുക. ഒപ്പം മറ്റുള്ളവരെക്കുറിച്ചോര്‍ക്കുക.

കുഞ്ഞുണ്ണിമാഷ് പാടിപ്പോയിട്ടുണ്ട്.

“ചടപടപടകം ചടപടപടകം

ചടപടചടപട ചടപട പടകം

കത്തും പൂത്തിരിയിത്തിരിനേര-

ത്തത്തറ നേരത്തെത്ര വിചിത്രം

മത്താപ്പൂവിനു മഞ്ഞവെളിച്ചം

മത്താപ്പൂവിനു പച്ചവെളിച്ചം

പടകം പൂത്തിരി മത്താപ്പൂവേ

വിഷുവിങ്ങോട്ടു വരട്ടെ വേഗം.” എന്ന്.

അതുകൊണ്ട് വിഷുവരട്ടെ. നന്മയുടെ, സന്തോഷത്തിന്റെ കണിയുമായിട്ട്.

വിഷുക്കാലം പ്രമാണിച്ച് ആദ്യം കണ്ട ചിത്രം ക്രേസി4 ആണ്. അതില്‍ ഷാരൂഖ്ഖാനുണ്ടെന്ന് നിങ്ങള്‍ക്കറിയില്ല അല്ലേ? ;)

ചേമ്പ് സാമ്പാര്‍

വലിയ ചേമ്പും ചെറിയ ചേമ്പും വാങ്ങാന്‍ കിട്ടും. പലതരം വിഭവങ്ങള്‍ ഉണ്ടാക്കാം. അതിലൊന്നാണ് ചേമ്പ് സാമ്പാറും.

ചേമ്പ്

തുവരപ്പരിപ്പ്
നെല്ലിക്കാവലുപ്പത്തിലും അല്‍പ്പം കൂടുതല്‍ പുളി വെള്ളത്തിലിട്ട്, കുറച്ചുനേരം കഴിഞ്ഞ് പുളി പിഴിഞ്ഞ് ആ വെള്ളം എടുക്കുക.

തേങ്ങ കരിയാതെ, ചുവക്കെ വറുത്തത്.

ചുവന്ന മുളക്.

മല്ലി/കൊത്തമല്ലി.

നാലഞ്ച് മണി ഉലുവ.

കായം - പൊടി.

ഉപ്പ്.

വറവിടാന്‍ കടുക്, മുളക്, കറിവേപ്പില ഇവയൊക്കെയാണ് വേണ്ടത്.

ഒരു വലിയ ചേമ്പ് മതി. തോലൊക്കെക്കളഞ്ഞ് ചെറുതാക്കി മുറിക്കുക. കഴുകുക. മൂന്ന് ടേബിള്‍ സ്പൂണ്‍ തുവരപ്പരിപ്പ് കഴുകിവൃത്തിയാക്കി എടുക്കുക. മഞ്ഞള്‍പ്പൊടിയും ഇട്ട്, പരിപ്പും, ചേമ്പും വേവിക്കുക. വേഗം വേവും ചേമ്പ്. ഒന്നൊന്നര ടേബിള്‍സ്പൂണ്‍ വറുത്തെടുത്ത തേങ്ങയും (വറുത്തെടുത്തതിനു ശേഷം ഒന്നര ടേബിള്‍സ്പൂണ്‍) വറുത്തെടുത്തിട്ടുള്ള, രണ്ട് ടീസ്പൂണ്‍ മല്ലിയും, രണ്ടോ മൂന്നോ ചുവന്ന മുളകും നന്നായരച്ചെടുക്കുക. മിനുസമായിട്ട് വേണം. നാലഞ്ച് മണി ഉലുവയും വറുത്തെടുത്ത് ഇതിനോടൊപ്പം അരയ്ക്കണം. മല്ലി നിങ്ങള്‍ക്ക് കൂടുതല്‍ ഇഷ്ടമാണെങ്കില്‍ കൂടുതല്‍ എടുക്കാം. എന്നുവെച്ച് അധികമൊന്നും ആവരുത്.

വേവിച്ചത്, ഉപ്പും ഇട്ട്, പുളിവെള്ളവും ഒഴിച്ച് തിളപ്പിക്കുക. കായപ്പൊടി കുറച്ച് ഇടുക.

തേങ്ങ കൂട്ടുക. വെള്ളം വേണ്ടതുപോലെ കൂട്ടുക. ചേമ്പും പരിപ്പും കൊഴുത്തിരിക്കും. എന്നാലും കുറേ വെള്ളം ചേര്‍ക്കരുത്. പുളിവെള്ളം ഒഴിച്ചതിന്റെ കൂടെ ഒഴിച്ചാലും മതി.

വറവിടുക.

മമ്പയര്‍‍ കറി

മമ്പയര്‍ എന്നാണ് ഇതിനെ ഞങ്ങള്‍ പറയാറുള്ളത്. ഓലനിലാണ് മിക്കവാറും ഇടാറുള്ളതും. ചുവന്നതും വെളുത്തതും ഉണ്ട്. തേങ്ങയര‍ച്ചുകൂട്ടിയും, അരച്ചുകൂട്ടാതേയും ചപ്പാത്തിയുടേയും, ചോറിന്റേയും കൂടെ മമ്പയര്‍ കറി വെച്ച് കൂട്ടാം.





ഇത് അധികനേരമൊന്നും വെള്ളത്തിലിട്ടില്ലെങ്കിലും, വേവും. പക്ഷെ രാവിലെ വയ്ക്കാന്‍ രാത്രിയില്‍ത്തന്നെ വെള്ളത്തിലിട്ടുവയ്ക്കുന്നതാണ് നല്ലത്. മൂന്നോ നാലോ ടേബിള്‍സ്പൂണ്‍ മമ്പയര്‍ വെള്ളത്തിലിട്ടു കുതിര്‍ത്ത്, കുക്കറിലിട്ട്, മഞ്ഞളും, അര ടീസ്പൂണ്‍ മുളകുപൊടിയും ഇട്ട് നന്നായി വേവിക്കുക. വെന്തുകഴിഞ്ഞാല്‍ ഉപ്പും ഇട്ട് ഒന്ന് ഉടച്ചുവയ്ക്കുക. ചപ്പാത്തിക്കറി ആണെങ്കില്‍ നല്ലപോലെ വേവുന്നതാണ് നല്ലത്. പാത്രമോ ഫ്രൈയിംഗ് പാനോ എടുത്ത് വെളിച്ചെണ്ണ/ പാചകയെണ്ണ ഒഴിക്കുക. ചൂടായാല്‍ അതില്‍ മമ്പയറിന് വേണ്ട കണക്കില്‍ കടുകും, ജീരകവും, കറിവേപ്പിലയും വറവിടുക. ഉഴുന്നിഷ്ടമാണെങ്കില്‍ അതും ഇടാം. വലിയ ഉള്ളി/ അഥവാ സവാള രണ്ടെണ്ണം ചെറുതായി അരിഞ്ഞതും ഇട്ട് നന്നായി ഇളക്കുക. അത് വെന്തതിനു ശേഷം, രണ്ടുമൂന്ന് വെളുത്തുള്ളി ചതച്ചതും ചേര്‍ക്കുക. വലുതാണെങ്കില്‍ മൂന്നല്ലി. ചെറിയ വെളുത്തുള്ളി ആണെങ്കില്‍ അഞ്ചാറെണ്ണം. കാല്‍ ടീസ്പൂണ്‍ ഗരം മസാലപ്പൊടി ഉണ്ടെങ്കില്‍ ഇടുക. ഗരം മസാല ഇല്ലെങ്കില്‍ ഏതെങ്കിലും വെജിറ്റബിള്‍ മസാലയോ മീറ്റ് മസാലയോ ഉണ്ടെങ്കില്‍ ഇടാം. പക്ഷെ മുളകുപൊടി ആദ്യം ഇട്ടത് ഓര്‍മ്മിച്ചിട്ട് ഇത് ഇടുക. അല്ലെങ്കില്‍ എല്ലാം കൂടെ ഒരു എരുപ്പരുവം ആവും. വെന്ത മമ്പയറും കൂടെ യോജിപ്പിച്ച് അല്‍പ്പം വെള്ളവും ചേര്‍ത്ത് അടച്ചുവെച്ച് അഞ്ചാറ് മിനുട്ട് വേവിക്കുക. ആദ്യം മമ്പയര്‍ വെന്തുകഴിഞ്ഞപ്പോള്‍, അതില്‍ വെള്ളം ഇല്ലെങ്കില്‍ വേറെ വെള്ളം ചേര്‍ത്താല്‍ മതി. അല്ലെങ്കില്‍ ആ വെള്ളം മതിയാവും. മല്ലിയില അരിഞ്ഞത് ഇടുക. മസാലയൊക്കെ ഉണ്ടെങ്കില്‍ മല്ലിയില ഇല്ലെങ്കിലും സാരമില്ല. തയ്യാറായി.


മുളകുപൊടി ഇല്ലെങ്കില്‍ പച്ചമുളക് ഇട്ടാലും മതി. ചതച്ചോ അല്ലെങ്കില്‍ ചെറുതായി അരിഞ്ഞോ. തേങ്ങ ഇടാന്‍ പറ്റുമെങ്കില്‍ വാങ്ങിവെച്ചതിനു ശേഷം ഇടാം. വെറുതെ ചിരവിയിട്ട്. ചപ്പാത്തിയുടെ കൂടെയോ, ചോറിന് തോരന്‍ പോലെയോ കഴിക്കുക.

ഇടിച്ചക്ക മോരൂട്ടാന്‍

ഒരു ഇടിച്ചക്കയുടെ നാലിലൊന്ന് എടുത്ത് തോലൊക്കെക്കളഞ്ഞ് നല്ലപോലെ ചെറുതാക്കി മുറിക്കുക. അതില്‍ ആവശ്യത്തിനു ഉപ്പും മഞ്ഞളും ഇടുക. നല്ലപോലെ വേവിക്കണം. വെന്തു കഴിഞ്ഞാല്‍ അതിലേക്ക് ഒരു മൂന്നുനാലു ടേബിള്‍സ്പൂണ്‍ തേങ്ങയും, ജീരകവും, മൂന്ന് പച്ചമുളകും ചേര്‍ത്തരച്ചത് ചേര്‍ക്കുക. മോരും കുറച്ച് ഒഴിക്കുക. മോര് ആദ്യം ഒഴിച്ച് തിളപ്പിച്ചാലും മതി. തേങ്ങ കൂട്ടുന്നതിനുമുമ്പ്. ഒന്നു തിളച്ചാല്‍ വാങ്ങിവെച്ച് വറവിടുക.



പച്ചമുളക് വേണ്ടെങ്കില്‍ വേവിക്കുമ്പോള്‍ മുളകുപൊടി ഇടണം.

കായുപ്പേരി

കായ മിക്കകാലത്തും കിട്ടും. ചെറിയ ചെറിയ കായകള്‍ കറിവെച്ചുകൂട്ടുന്നതിലും അധികം എല്ലാവരും പഴുത്ത് തിന്നുകയാണ് ചെയ്യുക. മഴക്കാലത്ത് കായക്കുലയ്ക്ക് മുകളിലെ അവസ്ഥയാവും. മൈസൂര്‍പ്പഴം, പൂവമ്പഴം, കദളിപ്പഴം അങ്ങനെയങ്ങനെ ചെറുപഴങ്ങള്‍.

ചെറിയ കായകിട്ടുമ്പോള്‍ മെഴുക്കുപുരട്ടി ഉണ്ടാക്കിനോക്കൂ. ചോറിനൊപ്പം, കഞ്ഞിയ്ക്കൊപ്പം ഒക്കെ നല്ലതാണ്. ചെറുതാക്കി, നാലാക്കി മുറിയ്ക്കണം. മുറിക്കുമ്പോള്‍, വെള്ളത്തിലേക്ക് മുറിച്ചിട്ടാല്‍ മതി. അതിന്റെ കറ എളുപ്പത്തില്‍ പോകും. വെറുതെ ഉപ്പും മഞ്ഞളും, നിങ്ങള്‍ക്ക് വേണമെങ്കില്‍ മുളകുപൊടിയും ഇട്ട്, അതിനുവേണ്ട വെള്ളം മാത്രം ഒഴിച്ച് വേവിക്കുക. വേവിക്കുക. ഇവിടെ മെഴുക്കുപുരട്ടിയ്ക്ക് മുളകുപൊടി
ഇടാറില്ല. വെന്തുകഴിഞ്ഞിട്ട് അതിലേക്ക് വെളിച്ചെണ്ണ കുറച്ച് ഒഴിച്ച് ഇളക്കി വയ്ക്കുക. തയ്യാര്‍! അതാണ് കായ ഉപ്പേരി, കായുപ്പേരി, അഥവാ കായ മെഴുക്കുപുരട്ടി. നേന്ത്രക്കായകൊണ്ടും ഇങ്ങനെ ഉണ്ടാക്കാം.

വേണമെങ്കില്‍ തേങ്ങ ചിരവിയും ഇടാം. എളുപ്പമല്ലേ ഇപ്പരിപാടി? ചീനച്ചട്ടിയില്‍ വെച്ചാല്‍ കറുപ്പുനിറവും സ്വാദ് അധികവും ഉണ്ടാവും എന്ന് എനിക്കു തോന്നുന്നു.

അവിയല്‍‌ 2

ഇതാണ് ഇടിച്ചക്കയുള്ള കാലത്തുണ്ടാക്കാന്‍ പറ്റിയ അവിയല്‍. ചക്ക മാത്രമല്ല മാങ്ങയും ഇടാം. ഇതില്‍ കാരറ്റ്, കയ്പ്പക്ക, ഇടിച്ചക്ക, മാങ്ങ, മുരിങ്ങാക്കായ, കായ എന്നിവ ഇട്ടു. പിന്നെ തേങ്ങയും, ജീരകവും, പച്ചമുളകും, കറിവേപ്പിലയും വെളിച്ചെണ്ണയും വേണം. വേറെ കഷണങ്ങളും നിങ്ങളുടെ ഇഷ്ടം പോലെ ഇടാം. ചക്കയാവുമ്പോള്‍, ചേനയൊന്നും ഇട്ടില്ലെങ്കിലും കുഴപ്പമില്ല.

കഷണങ്ങളൊക്കെ ചിത്രത്തില്‍ കാണുന്നതുപോലെ മുറിയ്ക്കണം. മാങ്ങ മുറിയ്ക്കുന്നതിനുമുമ്പാണ് ചിത്രത്തില്‍. അല്‍പ്പം പോലും നീളം കൂടാനോ കുറയാനോ പാടില്ല. അങ്ങനെ ആയാല്‍ അത് വേറെ അവിയല്‍ ആയിപ്പോകും. ;) കഷണങ്ങളൊക്കെ കഴുകിയും മുറിച്ചും, മുറിച്ചും കഴുകിയും എടുക്കുക. അതിനാവശ്യമായ മഞ്ഞള്‍പ്പൊടിയും ഉപ്പും ഇട്ട് നന്നായി വേവിയ്ക്കുക. വെള്ളം, വേവാന്‍ ആവശ്യമുള്ളത് മാത്രം ഒഴിക്കുക. വെന്തുടയുന്നതാണിഷ്ടമെങ്കില്‍ അങ്ങനെ വേവിയ്ക്കണം. ഒരു വലിയ തേങ്ങയുടെ ഒരു മുറിത്തേങ്ങയുടെ പകുതി ചിരവിയെടുക്കുക. അതില്‍ മുന്നുനാല് പച്ചമുളകും, ഒന്നോ രണ്ടോ ടീസ്പൂണ്‍ ജീരകവും ഇട്ട് ഒന്ന് ചതച്ചെടുക്കുക. (മുളക് കൂട്ടുകയോ കുറയ്ക്കുകയോ ചെയ്യുക. എരിവ് വേണ്ടുന്ന പാകത്തില്‍). കഷണങ്ങളിലേക്ക് തേങ്ങ കൂട്ടി തിളപ്പിക്കുക. കുറച്ച് പുളിത്തൈര്‍ ഒഴിക്കുക. തിളയ്ക്കരുത് പിന്നെ. വാങ്ങിവയ്ക്കുക.

വെളിച്ചെണ്ണ മുകളില്‍ ഒഴിയ്ക്കുക. കറിവേപ്പില തണ്ടോടെ ഇടുക. മാങ്ങയിട്ടാല്‍പ്പിന്നെ മോരിന്റെ, തൈരിന്റെ ആവശ്യം ഇല്ല. ഞാന്‍ ഇതില്‍ തൈരു കൂട്ടിയതുകൊണ്ടാണ് അങ്ങനെ എഴുതിയത്.

ഒരു അവിയല്‍ ഇവിടെ