തിന മുറുക്ക്

തിനയും ചാമയെപ്പോലെതന്നെയുള്ള ഒരു ധാന്യമാണ്. പണ്ടത്തെക്കാലത്തുതന്നെയാണ് അതും കൂടുതലായിട്ട് നമ്മുടെ നാട്ടുകാർ കഴിച്ചിരുന്നത് എന്നു തോന്നുന്നു.  തിന കൊണ്ട് ഉപ്പുമാവാണ്
കേട്ടിട്ടുള്ളത്. ഉപ്പുമാവിനോട് വല്യ പ്രിയം ഇല്ലാത്തതുകൊണ്ട് ഞാൻ ഉപ്പുമാവ് പരീക്ഷിച്ചില്ല. അമ്മ പരീക്ഷിച്ചു. തിനയ്ക്ക് നല്ല വേവുണ്ട് എന്നു കണ്ടുപിടിച്ചു. അതായത് തിന വേവാൻ സമയം
എടുക്കും. അല്ലെങ്കിൽ കുക്കറിൽ വയ്ക്കേണ്ടിവരും. ഇനി ഞാൻ പരീക്ഷിച്ചാൽ പറയാം. ഇപ്പോ, തിന കൊണ്ട് മുറുക്കു മതി എന്നുവെച്ചു. അതാവുമ്പോൾ കറുമുറെ ശബ്ദം ഉണ്ടാക്കി തിന്നാലോ.

ഇതാണ് തിന (Foxtail Millet) (Setaria Italica). തമിഴിൽ തിനൈ എന്നും തെലുങ്കിൽ കൊറല്ലു/കൊറാലു  എന്നും കന്നടയിൽ നവനെ (നവണെ) എന്നും പറയും (വിക്കിപീഡിയയോടു കടപ്പാട്).

മുറുക്കുണ്ടാക്കിയത് എങ്ങനെയെന്നു പറയാം. സാദാ മുറുക്കുണ്ടാക്കുന്നതുപോലെത്തന്നെ. തിന വെള്ളത്തിൽ നാലു മണിക്കൂർ കുതിർത്തിട്ടു. അരിച്ചുകഴുകി വെള്ളം ഉണങ്ങാൻ വെച്ചു. തുണിയിൽ
ഇടുകയോ അടച്ചു കമഴ്ത്തിയിടുകയോ ചെയ്യാം.

ഒന്ന് ഉണങ്ങിക്കഴിഞ്ഞ് പൊടിച്ചു. അരിപ്പയിൽ അരിച്ചു മിനുസപ്പൊടി എടുത്തു. ഉഴുന്നു വറുത്തുപൊടിച്ചു.

തിനപ്പൊടി രണ്ടു ഗ്ലാസും, ഉഴുന്നുപൊടി അര ഗ്ലാസും എടുത്തു. അര ടീസ്പൂൺ മുളകുപൊടി, ഒരു ടീസ്പൂൺ ജീരകം, ഒരു ടീസ്പൂൺ കറുത്ത എള്ള്, അല്പം കായം പൊടി, അല്പം ചൂടാക്കിയ വെളിച്ചെണ്ണ, ആവശ്യത്തിനു ഉപ്പ്, അല്പം അജ്വൈയ്ൻ/ഓമം/അയമോദകം ചേർത്തു.  നോർത്തിന്ത്യയിലൊക്കെ മിക്സ്ചറിലും മുറുക്കിലുമൊക്കെ ആ സംഗതി ചേർക്കും.

വെള്ളവും ചേർത്തു കുഴച്ചു.

മുറുക്കിന്റെ നാഴിയിൽ ഇട്ട് പ്ലാസ്റ്റിക് ഷീറ്റിലേക്കു പിഴിഞ്ഞു. വെളിച്ചെണ്ണയിൽ വറുത്തെടുത്തു.

അളവൊക്കെ കുറച്ച് മാറിയാലും പ്രശ്നമൊന്നുമില്ല. മുളകുപൊടി അധികമാക്കാം.  വേണ്ടെങ്കിൽ
ചേർത്തില്ലെങ്കിലും സാരമില്ല. അങ്ങനെ എല്ലാം കുറച്ച് അങ്ങോട്ടുമിങ്ങോട്ടും മാറ്റണമെങ്കിൽ മാറ്റാം. ഈ അളവിൽ മുറുക്കു നന്നായിരുന്നു.

തിന വെള്ളത്തിലിടാതെ പൊടിച്ചും മുറുക്കുണ്ടാക്കിയാൽ കുഴപ്പമില്ലെന്നു തോന്നുന്നു.

റാഗിമുറുക്ക്

റാഗി കൊണ്ട് പുട്ടുണ്ടാക്കിയിട്ടിട്ടുണ്ട് . ആന്ധ്രാക്കാരുടെ ഒരു പലഹാരമാണ് റാഗിമുദ്ദ. കൊഴുക്കട്ട പോലെയിരിക്കും. അതു ഞാൻ ഇതുവരെ പരീക്ഷിച്ചിട്ടില്ല. ഒരിക്കൽ ഒരു സൂപ്പർ മാർക്കറ്റിൽ പോയപ്പോഴാണ് റാഗി മുറുക്ക് കാണുന്നത്. കഷണം കഷണം മുറുക്ക്. വാങ്ങിയില്ല. എനിക്കു പരീക്ഷിക്കാമല്ലോ എന്നു വിചാരിച്ചു. പരീക്ഷിച്ചു. ഞാൻ പരീക്ഷിച്ചവിധം താഴെ.

മുറുക്കിന്റെ കൂട്ട് അരിപ്പൊടിയും ഉഴുന്നും ആണ്. ഇതിൽ ഞാൻ റാഗിപ്പൊടിയും, അരിപ്പൊടിയും സമാസമം ഇട്ടു. ഉഴുന്ന് നാലിലൊന്നും. ഉഴുന്ന് വറുത്ത് പൊടിച്ചു.




അര കപ്പ് അരിപ്പൊടി
അര കപ്പ് റാഗിപ്പൊടി
കാൽക്കപ്പ് ഉഴുന്നുപൊടി
എള്ള്, വെളുത്തതോ കറുത്തതോ ഒരു ടീസ്പൂൺ
ജീരകം ചതച്ചെടുത്തത് - ഒരു ടീസ്പൂൺ.
ഉപ്പ് പാകത്തിന്

എള്ളും ജീരകവും കുറച്ച് കൂടിയാലും കുഴപ്പമൊന്നുമില്ല.
കായം പൊടി കുറച്ച്.
പിന്നെ എരുവിന് കുരുമുളകുപൊടിയോ, മുളകുപൊടിയോ ഏകദേശം അളവ് കണക്കാക്കി ഇടുക. എരിവ് വേണ്ടതനുസരിച്ച്. നല്ല എരിവ് വേണ്ടവർ കുരുമുളകുപൊടിയും, മുളകുപൊടിയും ഇടാവുന്നതാണ്.
ഞാൻ കുരുമുളകുപൊടിയിട്ടു. രണ്ട് ടീസ്പൂൺ. അധികം എരിവൊന്നും ഇല്ലായിരുന്നു.



ഒക്കെക്കൂടെ രണ്ട് ടീസ്പൂൺ വെളിച്ചെണ്ണയും, കുറച്ച് വെള്ളവും ചേർത്ത് കുഴയ്ക്കുക. ചിത്രത്തിൽ ഉള്ളതിലും കുറച്ചും കൂടെ വെള്ളം വേണം. നാഴിയിൽ പിഴിയുമ്പോൾ ഏകദേശം മനസ്സിലാവും. അധികം വെള്ളമൊഴിക്കരുത്.





നാഴിയിൽ നിറച്ച്, ഒരു തുണിയിലോ പ്ലാസ്റ്റിക് കടലാസ്സിലോ പരത്തുക. വെളിച്ചെണ്ണയിൽ അല്ലെങ്കിൽ ഏതെങ്കിലും പാചകയെണ്ണയിൽ വറത്തെടുക്കുക. വട്ടത്തിൽ പിഴിയാൻ കഴിയുന്നില്ലെങ്കിൽ നീളത്തിൽ പിഴിഞ്ഞിട്ട് ചുറ്റിച്ചുറ്റിയെടുത്താൽ മതി. ഞാൻ നേരിട്ട് വട്ടത്തിൽ പിഴിഞ്ഞതുകൊണ്ട് അതിന്റെ ആകൃതിയൊക്കെ ഒരു വഴിക്കു പോയി. ;)





അരി മുറുക്ക് ഇവിടെ

അരിമുറുക്ക്

കൈകൊണ്ട് ഉണ്ടാക്കുന്ന മുറുക്കുണ്ട്. വെറുതെ കുഴച്ച മാവെടുത്ത് കൈകൊണ്ട് വട്ടത്തില്‍ ചുറ്റിച്ചുറ്റിവെച്ച്. ഇപ്പോ, പലതരം മുറുക്കുനാഴികള്‍ വന്നുകഴിഞ്ഞു. എളുപ്പമായി ജോലിയൊക്കെ.

അരിപ്പൊടി - 1 കപ്പ് പച്ചരി (അരി, നാലഞ്ച് മണിക്കൂര്‍ വെള്ളത്തിലിട്ട്, ഉണക്കി, വളരെ മിനുസമായി പൊടിച്ച് വറുത്തെടുക്കണം.)
ഉഴുന്ന് പൊടി - 1/4 കപ്പ് (ഉഴുന്ന് വറുത്ത് നന്നായി പൊടിച്ചെടുക്കുക.)
കുരുമുളക്- 10 എണ്ണം. (ഉഴുന്നിന്റെ കൂടെ പൊടിച്ചെടുക്കാം). (കുരുമുളകില്ലെങ്കില്‍ കുരുമുളക് ‍പൊടി ഏകദേശം ഒന്നോ രണ്ടോ ടീസ്പൂണ്‍ചേര്‍ക്കാം.)
മുളകുപൊടി - 1 ടീസ്പൂണ്‍.
കായം- ഒരു നുള്ള്.
ജീരകം- 1/2 ടീസ്പൂണ്‍.
എള്ള് - 1-2 ടീസ്പൂണ്‍. (ഇതില്‍ കറുത്ത എള്ളാണ് ചേര്‍ത്തിരിക്കുന്നത്.)
ഉപ്പ് - പാകം നോക്കി ചേര്‍ക്കുക.
വെളിച്ചെണ്ണ- മാവ് യോജിപ്പിക്കുമ്പോള്‍ കുറച്ച് വെളിച്ചെണ്ണയും ചേര്‍ത്ത് യോജിപ്പിക്കുക. രണ്ടോ മൂന്നോ ടേബിള്‍ സ്പൂണ്‍.
വറുത്തെടുക്കാന്‍ വെളിച്ചെണ്ണ. ഏതെങ്കിലും പാചകയെണ്ണ ആയാലും മതി. പക്ഷെ വെളിച്ചെണ്ണയിലാണ് സ്വാദ് കൂടുതല്‍.
എല്ലാ വസ്തുക്കളും ചേര്‍ത്ത് കൈകൊണ്ട് യോജിപ്പിക്കുക.

മുറുക്ക് ഉണ്ടാക്കുന്ന പാത്രത്തിലിട്ട് ഇലയിലോ, ഒരു പ്ലാസ്റ്റിക് കടലാസ്സിലോ അല്പം എണ്ണ പുരട്ടി ആകൃതിയില്‍ പിഴിഞ്ഞ് എടുക്കുക.

വെളിച്ചെണ്ണയിലിട്ട് വറുക്കുക.