നേന്ത്രപ്പഴം പച്ചടികൾ

നേന്ത്രപ്പഴം/ ഏത്തപ്പഴം കൊണ്ട് പലതരം വിഭവങ്ങൾ ഉണ്ടാക്കാറില്ലേ? ഞങ്ങൾ സാമ്പാർ, കാളൻ ഒക്കെ വയ്ക്കാറുണ്ട്. പച്ചടിയും ഇഷ്ടമാണെങ്കിൽ പരീക്ഷിക്കാം.
ഇവിടെ രണ്ടുതരത്തിൽ പച്ചടി വയ്ക്കുന്നത് പറയാം.

ആദ്യം തൈർ/മോർ ചേർത്ത് വയ്ക്കുന്ന പച്ചടി. അല്പം പുളിയുള്ള പച്ചടിയുണ്ടാക്കാം.



നേന്ത്രപ്പഴം ഒന്ന് തോലുകളഞ്ഞ് ചെറുതായി അരിയുക. നല്ലപോലെ പഴുത്തതാണ് കൂടുതൽ നല്ലത്. ചിത്രത്തിൽ ഉള്ളത് അത്രയ്ക്ക് പഴുത്തിട്ടില്ല.
പച്ചമുളക് രണ്ടെണ്ണം നടുവിൽ മുറിച്ച് നീളത്തിൽ അരിയുക.
മുളകുപൊടി - കാൽ ടീസ്പൂൺ. എരിവ് വേണ്ടാത്തവർക്ക് ഇടേണ്ടെന്നും വയ്ക്കാം.
തേങ്ങ - മൂന്ന്/നാലു ടേബിൾസ്പൂൺ.
കടുക് - കാൽ ടീസ്പൂൺ.
തേങ്ങയും കടുകും വെള്ളമില്ലാതെ മിനുസമായിട്ട് അരയ്ക്കുക. വെള്ളത്തിനു പകരം അല്പം മോരുവെള്ളം ചേർത്താൽ മതി.
തൈർ - കുറച്ച്. ഏകദേശം അര ഗ്ലാസ്സ്.
വറവിടാൻ കടുക്, കറിവേപ്പില, മുളക്.
വെളിച്ചെണ്ണ
ഉപ്പ്.



പഴം ഉപ്പും മുളകുപൊടിയും പച്ചമുളകും ഇട്ട് അല്പം വെള്ളം ചേർത്ത് നന്നായി വേവിക്കുക. വെന്തുകഴിഞ്ഞാൽ അതിൽ വെള്ളം ഇല്ലാത്തതാണ് നല്ലത്. വേവിയ്ക്കുമ്പോൾ അതിനനുസരിച്ചു മാത്രം വെള്ളം ഒഴിയ്ക്കുക. വെന്താൽ തണുക്കാൻ വയ്ക്കുക. തണുത്താൽ അതിൽ തൈർ ഒഴിക്കുക, തേങ്ങ ചേർക്കുക.



നന്നായി യോജിപ്പിച്ച ശേഷം വറവിടുക.

ഇനി നേന്ത്രപ്പഴം മധുരപ്പച്ചടി.

മുകളിൽ പറഞ്ഞതിൽ തൈർ ഒഴിച്ച് ബാക്കിയെല്ലാം വേണം.
ഒരു ആണി ശർക്കരയും വേണം.
മധുരപ്പച്ചടിയ്ക്ക് തേങ്ങ അരയ്ക്കുമ്പോൾ മോരുവെള്ളം ചേർക്കാനും പാടില്ല.

പഴം, മുളകുപൊടി, ഉപ്പ്, പച്ചമുളക് എന്നിവയൊക്കെ ഇട്ട് വേവിച്ച് ഉടയ്ക്കുക. അതിൽ ശർക്കരയിടുക. ശർക്കര കുറച്ചുനേരം വേവണം. വെന്ത് വെള്ളം വറ്റിയാൽ വാങ്ങിവെച്ച് തേങ്ങ ചേർക്കുക. വറവിടുക.



രണ്ടു പച്ചടികളും വെന്താൽ വാങ്ങുന്നതിനുമുമ്പ് കറിവേപ്പില ഒരുതണ്ട് അതിൽ ഇടണം. ഇവിടെ ഇട്ടിട്ടില്ല. അതുകൊണ്ട് നിങ്ങൾ ഉപേക്ഷ വിചാരിയ്ക്കരുത്.

കാമ്പ് പെരക്ക്

വാഴയുടെ ഉള്ളിലെ ഭാഗമാണ് കാമ്പ്. ട്യൂബ് പോലെയുണ്ടാവും. അത് പൊളിച്ചെടുക്കുക. പുറമെനിന്ന് കുറച്ച് പാളികൾ നീക്കണം. അങ്ങനെ ആക്കിയെടുത്താൽ കാമ്പ് പെരക്ക് ഉണ്ടാക്കാൻ തുടങ്ങാം. പെരക്ക്, പച്ചടി പോലെയാണ് ഏകദേശം. വ്യത്യാസം എന്താണെന്നു വെച്ചാൽ പച്ചടിയ്ക്ക് കഷണം വേവിക്കും, പെരക്കിനു വേവിക്കില്ല. കാമ്പ് പെരക്ക് ഉണ്ടാക്കാൻ എളുപ്പമാണ്.

വാഴക്കാമ്പ് - ഒരു കഷണം. ചിത്രത്തിൽ ഉള്ളതിന്റെ നാലിൽ ഒന്ന്.
തേങ്ങ ചിരവിയത് - മൂന്ന് ടേബിൾസ്പൂൺ.
കടുക് - കാൽ ടീസ്പൂൺ
തേങ്ങയും കടുകും അരയ്ക്കുക. വെള്ളത്തിനു പകരം മോരുവെള്ളം ഒഴിച്ച് അരയ്ക്കുക.

മുളകുപൊടി - കാൽ ടീസ്പൂണിലും അല്പം കുറവ്
പച്ചമുളക് വട്ടത്തിൽ അരിഞ്ഞത് - രണ്ടെണ്ണം. (നിർബ്ബന്ധമില്ല).
ഉപ്പ്
തൈർ - അരഗ്ലാസ്സ്.
പുളിയുള്ളത് ഇഷ്ടമാണെങ്കിൽ അത് ഒഴിക്കുക.
മോരായാലും മതി.



കാമ്പ്, വട്ടത്തിൽ, അധികം കനമില്ലാതെ മുറിക്കുക. മുറിക്കുമ്പോൾ, ഒരു വിരലുകൊണ്ട് അതിന്റെ മുകളിൽ തൊട്ടാൽ നൂല് ചുറ്റിയെടുക്കാം. അങ്ങനെയുള്ള നൂല്/നാര് കളയണം. കഴുകിയെടുക്കാം.



പിന്നെ ചെറുതായി അരിയുക. വളരെ ചെറുതാക്കുന്നതാവും നല്ലത്.



അതിലേക്ക് മുളകുപൊടിയിടുക. ഉപ്പിടുക. പച്ചമുളക് അരിഞ്ഞത് ഇടുക. തേങ്ങയരച്ചത് ചേർക്കുക. തൈർ ഒഴിക്കുക. പിന്നെ നിങ്ങൾക്ക് വേണമെങ്കിൽ വറവിടുക.

ചിലർ, കാമ്പ് ചെറുതാക്കി മുറിച്ചതിനുശേഷം, അതിൽ ഉപ്പിട്ടുവെച്ച്, കുറച്ചുനേരം കഴിഞ്ഞ് ആ വെള്ളം പിഴിഞ്ഞുകളഞ്ഞതിനുശേഷമാണ് പെരക്ക് ഉണ്ടാക്കുക. അങ്ങനെ വേണമെങ്കിൽ അങ്ങനെ ചെയ്യുക. അതിന്റെ ആവശ്യം ഇല്ലെന്നാണ് പുതിയ കണ്ടുപിടുത്തം.

പപ്പായപ്പച്ചടി

ഞങ്ങളൊക്കെ കറുമൂസ എന്നു വിളിക്കുന്ന പപ്പായകൊണ്ട് ഒരു പച്ചടി. പപ്പായകൊണ്ട് പല വിഭവങ്ങളും ഉണ്ടാക്കിക്കഴിഞ്ഞു. ഇനിയും പല വിഭവങ്ങളും ഉണ്ടാക്കാനുണ്ട്. പപ്പായകൊണ്ട് തോരനോ ഓലനോ ഒക്കെയാണ് സ്ഥിരം പാചകം. പച്ചടിയുണ്ടാക്കുന്നത് അപൂർവ്വം. പച്ചടി എന്ന വിഭവം ഇഷ്ടമുള്ളവർക്ക് പപ്പായപ്പച്ചടിയും ഇഷ്ടമാവും എന്നു കരുതുന്നു.

അധികം പഴുക്കാത്ത അല്ലെങ്കിൽ മുഴുവൻ പച്ചയായ കറുമൂസ - ചിത്രത്തിൽ ഉള്ളപോലെ
പച്ചമുളക് - എരിവുള്ളത്. മൂന്നോ നാലോ. രണ്ടാക്കി പൊട്ടിച്ചോ, വെറുതേ ഒന്ന് ചീന്തിയോ ഇടാം
പുളിച്ച തൈര് - അര ഗ്ലാസ്സ്.
തേങ്ങ - നാല് ടേബിൾസ്പൂൺ.
കടുക് - കാൽ ടീസ്പൂൺ
തേങ്ങയും കടുകും മോരും വെള്ളം ചേർത്ത് മിനുസമായിട്ട് അരയ്ക്കണം.
മുളകുപൊടി - കാൽടീസ്പൂൺ. എരിവ് വേണ്ടെങ്കിൽ പച്ചമുളക് മാത്രം ഇട്ടാൽ മതി. മുളകുപൊടി വേറെ ഇടരുത്.
ഉപ്പ്
വറവിടാൻ ആവശ്യമുള്ളത് - കടുക്, കറിവേപ്പില, ചുവന്നമുളക്.

കറുമൂസ തോലൊക്കെക്കളഞ്ഞ്, കുരുവൊക്കെക്കളഞ്ഞ് ചെറുതാക്കി മുറിച്ച് കഴുകിയെടുക്കുക. കഷണങ്ങളും പച്ചമുളകും ഉപ്പും ഇട്ട് ആവശ്യത്തിനുമാത്രം വെള്ളമൊഴിച്ച് നന്നായി വേവിക്കണം. വെന്താൽ അതിൽ വെള്ളം വേണ്ട. അതിൽ ഒരുതണ്ട് കറിവേപ്പില രണ്ടാക്കി മുറിച്ച് ഇടുക.

വെന്തത് തണുത്താൽ കഷണങ്ങൾ ഒന്നുടച്ച് അതിൽ അരച്ചുവെച്ചത് ചേർക്കുക. ഇളക്കുക. തൈരും ഒഴിക്കുക.
വറവിടുക.

കുമ്പളങ്ങ പച്ചടി

കുമ്പളങ്ങ ഇഷ്ടമാണോ? കൃഷിസ്ഥലത്തുനിന്ന് നേരിട്ട് പറിച്ചെടുത്ത് കറികൾ ഉണ്ടാക്കിയാൽ എന്തൊരു സ്വാദായിരിക്കും അല്ലേ? തൽക്കാലം അതിനു നിവൃത്തിയില്ല. അതുകൊണ്ട് കടയിൽനിന്ന് വാങ്ങി കറികൾ ഉണ്ടാക്കുകയേ നിവൃത്തിയുള്ളൂ. മൊളേഷ്യവും എരിശ്ശേരിയും ഓലനും മോരുകറിയും ഒക്കെ വെക്കാം കുമ്പളങ്ങ കൊണ്ട്.

പച്ചടി വെക്കാൻ കുമ്പളങ്ങയും, തേങ്ങയും, ഉപ്പും മുളകുപൊടിയും പച്ചമുളകും കടുകും വേണം. പിന്നെ വറവിടാനുള്ളതും.





ചിത്രത്തിലുള്ളതുപോലെ ഒരു കഷണം കുമ്പളങ്ങ എടുക്കുക. തോലുകളഞ്ഞ് മുറിക്കുക. കഴുകുക.




വെന്താൽ ഉടച്ചെടുക്കാം എന്ന് വിചാരിച്ച് ഞാൻ കുറച്ച് വലുപ്പത്തിലാണ് മുറിച്ചത്. ചെറുതാക്കി മുറിക്കുന്നതാണ് നല്ലത്.

കഴുകിയെടുത്ത് മൂന്നോ നാലോ പച്ചമുളക് ചീന്തിയിട്ടോ മുറിച്ചിട്ടോ എടുക്കുക.

ഉപ്പും, അല്പം മുളകുപൊടിയും ഇടുക. മുളകുപൊടി ഇല്ലെങ്കിലും പ്രശ്നമൊന്നുമില്ല. എരിവ് ഇഷ്ടമെങ്കിൽ മുളകുപൊടി ചേർക്കാം.

വേവിക്കുക. നല്ലോണം വേവണം. കുക്കറിൽ ആണെങ്കിൽ വെള്ളം ഒഴിച്ചു എന്നു വരുത്തിയാൽ മതി. വെന്ത കഷണങ്ങളിൽ വെള്ളം ഉണ്ടാവരുത്. ഉണ്ടെങ്കിൽ വറ്റിച്ചെടുക്കാം.



മൂന്ന് ടേബിൾസ്പൂൺ തേങ്ങയെടുത്ത് കാൽ ടീസ്പൂൺ കടുകും കൂട്ടി മിനുസമായിട്ട് അരച്ചെടുക്കുക. അരയ്ക്കുമ്പോൾ വെള്ളത്തിനുപകരം മോരും വെള്ളം ഉപയോഗിക്കുക.

വെന്തത് തണുത്തിട്ട് മാത്രമേ തേങ്ങയരച്ചത് അതിലേക്ക് ഇടാവൂ. അതുകൊണ്ട് പച്ചടിയുണ്ടാക്കുമ്പോൾ, എത്രയും നേരത്തെ കഷണങ്ങൾ അവിടെ വേവിച്ചുവയ്ക്കുക.

തണുത്താൽ കഷണങ്ങളൊക്കെ ഒന്നുടച്ചിട്ട് തേങ്ങയരച്ചത് ചേർക്കുക. അര ഗ്ലാസ്സ് തൈരും ചേർക്കുക. തേങ്ങയും തൈരുമൊക്കെ കുറച്ച് കൂടിപ്പോയാൽ പ്രശ്നമൊന്നുമില്ല. പക്ഷേ അധികം വെള്ളം പോലെ ആവാതെയിരിക്കുന്നതാണ് നല്ലത്.




കഷണം വെന്താൽ അതിൽ കറിവേപ്പില, തണ്ടോടെ ഇടണം. ഒരു തണ്ട് ഇല രണ്ടാക്കി മുറിച്ച് ഇട്ടാൽ മതി. കടുകും മുളകും കറിവേപ്പിലയും വറവിടുക.

എല്ലാവർക്കും കുമ്പളങ്ങപ്പച്ചടി ഇഷ്ടമാവും എന്നു കരുതുന്നു.

വഴുതനങ്ങ പച്ചടി

നീണ്ട വയലറ്റ് വഴുതനങ്ങ രണ്ടെണ്ണം - (ഉണ്ട വഴുതനങ്ങയും ഉപയോഗിക്കാം).
പച്ചമുളക് രണ്ടെണ്ണം,
മുളകുപൊടി കാൽ ടീസ്പൂണിലും കുറവ്,
കടുക് കാൽ ടീസ്പൂൺ,
ചിരവിയ തേങ്ങ മൂന്ന് ടേബിൾസ്പൂൺ,
തൈർ - കാൽ ലിറ്ററിലും അല്പം കുറവ്,
ഉപ്പ്,

വറവിടാൻ ആവശ്യമായതൊക്കെ - കടുക്, മുളക്, കറിവേപ്പില, വെളിച്ചെണ്ണ.

വഴുതനങ്ങ വളരെ ചെറുതായിട്ട് കഷണങ്ങളാക്കണം. കഴുകിയെടുക്കണം. പച്ചമുളക് ചീന്തിയിട്ടതും, മുളകുപൊടിയും, ഉപ്പും, വേവാൻ മാത്രം വെള്ളവുമൊഴിച്ച് വേവിച്ച് വാങ്ങിവെക്കുക. തണുക്കണം അത്. തണുത്താൽ, തേങ്ങ, കടുകും കൂട്ടി മിനുസത്തിൽ അരച്ച് ഇതിലേക്ക് ചേർക്കുക. അരയ്ക്കുമ്പോൾ മോരുവെള്ളം ഉപയോഗിക്കണമെന്ന് ഇതുവരെയുള്ള പച്ചടിപ്പോസ്റ്റിലൊക്കെ പറഞ്ഞിട്ടുണ്ടല്ലോ. തേങ്ങ വേവിച്ചു ചേർക്കാത്തതുകൊണ്ടാണ് അങ്ങനെ ചെയ്യാൻ പറയുന്നത്. വെള്ളം ഒഴിക്കേണ്ടല്ലോ വെറുതെ. തേങ്ങ ചേർത്ത് കുറച്ച് തൈരും ചേർത്ത് ഇളക്കി യോജിപ്പിച്ച് വറവിടുക.





ഇവിടെ ചുവന്ന(പഴുത്ത) പച്ചമുളകായിരുന്നു ഉള്ളത്. പച്ചമുളക് കഷണങ്ങളാക്കിയും ഇടാം. പക്ഷെ എരിവ് കൂടും. അല്ലെങ്കിൽ മുളകുപൊടി വേണ്ടെന്ന് വെച്ചാൽ മതി.

തക്കാളിപ്പെരക്ക്

പെരക്ക്, പച്ചടി പോലൊരു വിഭവമാണ്. വ്യത്യാസമെന്താണെന്നുവെച്ചാൽ പച്ചടിയ്ക്ക് വേവിക്കും, പെരക്കിനു വേവിക്കില്ല. എളുപ്പം ഉണ്ടാക്കിയെടുക്കാം.



തക്കാളി മൂന്നെണ്ണം വളരെ ചെറുതാക്കി മുറിക്കണം.
പച്ചമുളക് രണ്ടെണ്ണം വട്ടത്തിൽ വട്ടത്തിൽ ചെറുതായി മുറിക്കണം.
മൂന്നു ടേബിൾസ്പൂൺ തേങ്ങ, കാൽ ടീസ്പൂ‍ണിലും കുറവ് കടുകും ചേർത്ത് മിനുസമായി അരയ്ക്കണം.
അരയ്ക്കുമ്പോൾ വെള്ളത്തിനുപകരം മോരും‌വെള്ളം ഉപയോഗിക്കുക.
അരച്ചത്, തക്കാളി, പച്ചമുളക്, കാൽ ടീസ്പൂൺ മുളകുപൊടി, ആവശ്യത്തിന് ഉപ്പ് എന്നിവയുമായി നല്ലപോലെ യോജിപ്പിക്കുക.
മൂന്ന് അല്ലെങ്കിൽ നാലു ടേബിൾസ്പൂൺ തൈർ ചേർക്കുക. പുളിയുള്ള തൈരാണ് സാധാരണയായി ചേർക്കുക. ഇഷ്ടമുള്ളവർ പുളിത്തൈര് ചേർക്കുക. തക്കാളിയ്ക്കും പുളി ആയതുകൊണ്ട്, അധികം പുളി ഇഷ്ടമില്ലാത്തവർ പുളിയില്ലാത്ത തൈര് ചേർക്കുക.
പച്ചമുളകും മുളകുപൊടിയും ഇഷ്ടമനുസരിച്ച് കൂട്ടുകയോ കുറയ്ക്കുകയോ ചെയ്യാം.

തക്കാളിപ്പെരക്ക് തയ്യാർ.





കക്കിരിക്കപ്പെരക്ക് ഇവിടെ.

ചീരപ്പച്ചടി

കുറേ തരം പച്ചടികളുണ്ടാക്കിക്കഴിച്ചു. ഇലക്കറികളെല്ലാം എനിക്കിഷ്ടമാണ് എന്നെപ്പോഴും പറഞ്ഞാൽ ബാക്കിയുള്ളവർക്ക് ബോറടിക്കും. ചീര വീട്ടിലുണ്ടാക്കാൻ എളുപ്പമുള്ള ഒന്നാണ്. ഞാനിവിടെ ചീരത്തോട്ടം നോക്കിനടത്തുന്നുണ്ടോന്നൊന്നും ചോദിക്കരുത്. ;) ഞാൻ ചമ്മും.

കുറച്ചുകാലം മുമ്പ് ടെറസ്സിൽ, അമ്മ നട്ടുവളർത്തിയ ചീരയിലൊന്നാണ് ചിത്രത്തിൽ. എന്നും ഒന്നോ രണ്ടോ രണ്ട് തണ്ട് പറിച്ചെടുത്ത് കറി വെച്ചാൽ നന്നായിരിക്കും അല്ലേ?
എന്തായാലും ചീരപ്പച്ചടിയെക്കുറിച്ച് പറയാം. ചീര കുറച്ച് കഴുകിവൃത്തിയാക്കി കുഞ്ഞുകുഞ്ഞായി മുറിച്ചെടുക്കണം. തണ്ടും കിടന്നോട്ടെ.




ചിത്രത്തിലുള്ള അത്രേം ആണെങ്കിൽ മൂന്ന് പച്ചമുളക് ചീന്തിയിടാം. എന്നിട്ട് ഉപ്പും ഇട്ട് വേവിക്കണം. വെന്തുകഴിയുമ്പോൾ അത് വളരെക്കുറച്ചേ ഉണ്ടാകൂ. അതുകൊണ്ട് ഉപ്പിടുമ്പോൾ സൂക്ഷിക്കുക. കുറേ വെള്ളം ഒഴിക്കരുത്. വെന്താൽ വെള്ളം ഇല്ലാത്തതാണ് നല്ലത്. വെന്ത് തണുക്കാൻ വയ്ക്കണം.
തേങ്ങ രണ്ട് ടേബിൾസ്പൂൺ, കാൽ ടീസ്പൂൺ കടുകും ചേർത്ത് മിനുസമായി അരയ്ക്കുക.
വെന്ത ചീര തണുത്താൽ അതിലേക്ക് തേങ്ങയും, മൂന്ന് ടേബിൾസ്പൂൺ തൈരും ചേർക്കണം. എല്ലാം ചേർത്തതിനുശേഷം വറവിടുക.

കുറച്ച് മോരുമൊഴിച്ചതുകൊണ്ട് വെള്ളം പോലെ ആയി ഇത്. കട്ടിയിൽ ഇരിക്കുന്നതാണ് പച്ചടി നല്ലത്. തേങ്ങ മൂന്ന് ടേബിൾസ്പൂൺ ആയിപ്പോയാലും കുഴപ്പമൊന്നുമില്ല. വേവിക്കുമ്പോൾ മുളകുപൊടിയിടാം. പതിവില്ല. പിന്നെ പച്ചമുളക് ചീന്തിയിടുന്നതിനുപകരം മുറിച്ചുമുറിച്ചും ഇടാം.

മത്തങ്ങപ്പച്ചടി

ഒരു ചെറിയ കഷണം മത്തങ്ങയെടുത്ത് തോലൊക്കെക്കളഞ്ഞ് കഴുകി, ചിത്രത്തിലെപ്പോലെ, അല്ലെങ്കിൽ അതിലും കുഞ്ഞായി മുറിക്കുക.

ഉപ്പും ഇട്ട്, മൂന്ന് പച്ചമുളക് ചീന്തിയോ, അല്ലെങ്കിൽ രണ്ടോ മൂന്നോ ആക്കി മുറിച്ചോ ഇട്ട് വേവിക്കുക. മുളകുപൊടി വേണമെങ്കിൽ ഇടാം. വെന്താൽ വെള്ളം ഇല്ലാതിരിക്കുന്നത് നല്ലത്. തേങ്ങ ചിരവിയത് മൂന്ന് ടേബിൾസ്പൂൺ എടുത്ത് കാൽ ടീസ്പൂൺ കടുകും ഇട്ട് അരയ്ക്കുക. മിനുസമായിട്ട് അരയ്ക്കണം. അരയ്ക്കുമ്പോൾ പച്ചവെള്ളത്തിനുപകരം മോരും വെള്ളം ചേർക്കുക. വെന്തത് തണുത്താൽ കുറച്ച് തൈരും, തേങ്ങയരച്ചതും ചേർത്ത് ഇളക്കിയോജിപ്പിച്ച്, ഉപ്പു നോക്കി, വേണമെങ്കിൽ ചേർത്തിളക്കി വറവിടുക. പുളിച്ച മോരായാലും മതി, തൈരിനു പകരം. പക്ഷെ കൂടുതൽ വെള്ളം പോലെ ആകരുത്. തൈരായാലും മോരായാലും.

ഓണപ്പാചകം - 7. വെള്ളരിപ്പച്ചടി

ഒരു കഷണം വെള്ളരി മതി. ഒരു ചെറിയ വെള്ളരിക്കയുടെ കാൽഭാഗം. തോലും കുരുവും ഒക്കെക്കളഞ്ഞ് കുഞ്ഞുകുഞ്ഞായി അരിഞ്ഞെടുക്കണം. മൂന്ന് പച്ചമുളക് ചീന്തിയിടുക. മുറിച്ചും ഇടാം. മുളകുപൊടി നിങ്ങൾക്ക് വേണമെങ്കിൽ ഇടാം. ഉപ്പും ഇട്ട് വെള്ളം അല്പം മാത്രം ഒഴിച്ചാണ് വേവിക്കേണ്ടത്. വെന്തുകഴിയുമ്പോഴേക്കും വെള്ളം മുഴുവൻ പോയ്ക്കോട്ടെ. കഷണം ബാക്കി മതി. അതിലേക്ക് ഒരു കറിവേപ്പില തണ്ടോടെ ഇടണം. തേങ്ങ ഒരു മൂന്നാലു ടേബിൾസ്പൂൺ, കാൽ ടീസ്പൂൺ കടുകും കൂട്ടി മോരും വെള്ളവും ഒഴിച്ച് അരയ്ക്കണം. വെന്തത് തണുത്താൽ ഈ അരച്ചത് അതിലിട്ട് ഇളക്കുക. പിന്നെ ഒരു മൂന്ന് ടേബിൾസ്പൂൺ തൈരും ഒഴിക്കുക. പിന്നേം ഇളക്കുക. ആദ്യം തൈരൊഴിച്ചാലും കുഴപ്പമൊന്നുമില്ല കേട്ടോ. കടുകും കറിവേപ്പിലയും ചുവന്ന മുളകും വറത്തിട്ടാൽ ആയല്ലോ വെള്ളരിപ്പച്ചടി. പുളിയുള്ള തൈരാണ് നല്ലത്. അല്ലെങ്കിൽ കുറച്ച് പുളിയുള്ള മോരായാലും മതി.

മധുരപ്പച്ചടി

പച്ചടി, മോരുമൊഴിച്ചേ വയ്ക്കാവൂ എന്ന് ധരിക്കരുത്. പുളിപ്പച്ചടിയല്ലാതെ മധുരപ്പച്ചടിയും ഉണ്ടാക്കാം.

പഴുത്ത മാങ്ങ വേണം, (നാടന്‍ മാങ്ങ ആയാല്‍ നല്ലത്.) ശര്‍ക്കര വേണം, തേങ്ങ, പച്ചമുളക്, കടുക്, ചുവന്ന മുളക്, ഉപ്പ് എന്നിവയും വേണം. വറവിടാന്‍ വെളിച്ചെണ്ണയും.




പഴുത്ത നാലഞ്ച് ചെറിയ മാങ്ങ കഴുകി തോലൊക്കെക്കളഞ്ഞ് വയ്ക്കുക.
തിന്നരുത്.



അടുപ്പത്ത് അഥവാ തീയ്ക്കു മുകളില്‍, പാകത്തിനു ഉപ്പും, മൂന്നാല് പച്ചമുളക് ചീന്തിയിട്ടതും ചേര്‍ത്ത് വയ്ക്കുക. കുറച്ച് മുളകുപൊടിയും നിങ്ങള്‍ക്ക് വേണമെങ്കില്‍ ഇടാം. വെള്ളവുമൊഴിച്ച് വയ്ക്കുക. അതൊന്ന് തിളച്ചാല്‍ മൂന്ന് നാല് ആണി ശര്‍ക്കര അഥവാ അതിനു തുല്യം ശര്‍ക്കര ഇടുക. വെന്താല്‍ വാങ്ങിവയ്ക്കുക. തണുക്കട്ടെ. മൂന്ന് ടേബിള്‍സ്പൂണ്‍ ചിരവിയ തേങ്ങ നന്നായി അരയ്ക്കുക. അര ടീസ്പൂണ്‍ കടുകും ഇട്ട് അരയ്ക്കുക. വെന്ത മാങ്ങ തണുത്താല്‍ അരച്ചത് കൂട്ടിച്ചേര്‍ക്കുക. കടുകും കറിവേപ്പിലയും മുളകുമൊക്കെ വറവിടുക.




മാങ്ങയും തേങ്ങയും കറിവേപ്പിലയും വീട്ടുവളപ്പില്‍. അതിനു പ്രത്യേക സ്വാദു തന്നെ. അടുപ്പത്ത് കല്‍ച്ചട്ടിയില്‍ വെച്ചാല്‍പ്പിന്നെ പറയേണ്ടല്ലോ.

മാങ്ങാപ്പച്ചടി

മാങ്ങാക്കാലം വന്നു എന്നൊന്ന് പറയാനുണ്ടോ? ഇനി പഴുത്ത മാങ്ങയുടെ മണമൊക്കെ കിട്ടിത്തുടങ്ങും. എവിടെപ്പോയാലും മാങ്ങാവിഭവങ്ങള്‍ കൊണ്ടുള്ള സല്‍ക്കാരവും. മാങ്ങാ ഐസ്ക്രീം എനിക്കെന്തോ ഇഷ്ടമല്ല. പക്ഷെ ബാക്കി വിഭവങ്ങളൊക്കെ നല്ല ഇഷ്ടവും. പണ്ടൊക്കെ കാറ്റും മഴയും വന്നുപോയാല്‍ മാങ്ങ പെറുക്കാന്‍ ഓടുമായിരുന്നു. തിന്നാലും തിന്നാലും തീരാത്തത്ര വിവിധതരം മാങ്ങകള്‍. ഇന്നിപ്പോ ഓടാറൊന്നുമില്ലെങ്കിലും കിട്ടും മാങ്ങകള്‍. മാങ്ങാക്കാലത്ത് എന്നും ഒരു മാങ്ങാവിഭവം ഉണ്ടാക്കണം എല്ലാവരും. മാങ്ങാപ്പച്ചടി, പഴുത്തമാങ്ങ കൊണ്ടാണ് ഉണ്ടാക്കുക. അതും വല്യ വല്യ മാങ്ങ കൊണ്ടുള്ളതിനേക്കാള്‍ സ്വാദ് ചെറിയ നാടന്‍ മാങ്ങ കൊണ്ട് ഉണ്ടാക്കിയാലാണ്. മധുരം അതിമധുരം. അതിന്റെ കൂടെ തൈരിന്റെ പുളിയും മുളകിന്റേയും ഉപ്പിന്റേയുമൊക്കെ സ്വാദും. എല്ലാം കൂടെ പഴുത്ത മാങ്ങാപ്പച്ചടി ഒരു സ്വാദ് തന്നെ. എന്റെ കസിന്‍ ചെറുതായിരിക്കുമ്പോള്‍ നഴ്സറിക്ലാസ്സിലോ മറ്റോ സ്കൂള്‍ ഡേയ്ക്ക് പാടിയഭിനയിച്ച പാട്ടുണ്ട്. “മാങ്ങാപ്പച്ചടിയാണെങ്കില്‍ മുക്കാല്‍പ്പാത്രം ചോറിങ്ങെടുത്തോ, മക്കളെയെല്ലാമകറ്റിക്കോ” എന്ന പാട്ട്. ആ പരിപാടി കാണാന്‍ പോയിരുന്നു ഞാന്‍. മാങ്ങാപ്പച്ചടി ഉണ്ടാക്കുമ്പോള്‍ ഓര്‍മ്മവരും അത്.

ഈ വര്‍ഷത്തെ ആദ്യത്തെ പഴുത്തമാങ്ങകള്‍ അമ്മാമന്റേയും അമ്മായിയുടേയും വക.

അഞ്ചാറ് ചെറിയ, പഴുത്ത മാങ്ങയെടുത്ത് തോലുകളഞ്ഞ് അതിന്റെ പുറത്തൊക്കെ ഒന്ന് കത്തികൊണ്ട് വരഞ്ഞിടുക. വേവാനും, മറ്റു വസ്തുക്കളുടെ സ്വാദ് പിടിക്കാനും. തോലു കളയണം എന്നു നിങ്ങള്‍ക്ക് നിര്‍ബ്ബന്ധമില്ലെങ്കില്‍ അങ്ങനേയും ആവാം. പക്ഷെ, കളയുന്നതാവും നല്ലത്.

പാത്രത്തില്‍ മാങ്ങയിട്ട്, അരടീസ്പൂണ്‍ മുളകുപൊടിയും, ഉപ്പും, രണ്ട് പച്ചമുളക് ചീന്തിയിട്ടതും കുറച്ച് വെള്ളവും ഒഴിച്ച് വേവിക്കുക. എന്നും പറയുന്നതുപോലെ വേവാനുള്ള വെള്ളമേ പച്ചടിയ്ക്ക് വേവിയ്ക്കുമ്പോള്‍ ഒഴിക്കാവൂ.

ഞാന്‍ കച്ചട്ടിയിലാണ് വേവിച്ചത്. അതിന്റെ സ്വാദൊന്നു വേറെ തന്നെ. പക്ഷെ വെള്ളം വറ്റാനായി എന്നു തോന്നുന്നതിനുമുമ്പു തന്നെ സ്റ്റൌവില്‍ നിന്ന് ഇറക്കിവയ്ക്കണം. സ്റ്റൌ ഓഫാക്കിയിട്ടും കാര്യമൊന്നുമില്ല. അല്ലെങ്കില്‍ കാര്യം പോയി. വാങ്ങിവെച്ചാല്‍ത്തന്നെ അവിടെയിരുന്നു വെള്ളം മുഴുവന്‍ വറ്റും.

മുളകുപൊടിയോ മുളകോ നിങ്ങള്‍ക്ക് വേണ്ടെങ്കില്‍ ഒഴിവാക്കാം. മധുരം ആയിക്കോട്ടെ. അഞ്ച് ടേബിള്‍സ്പൂണ്‍ ചിരവിയ തേങ്ങയെടുത്ത് അരടീസ്പൂണ്‍ കടുകും ഇട്ട് മിനുസമായി അരയ്ക്കുക.
അരയ്ക്കുമ്പോള്‍ മോരുവെള്ളം ചേര്‍ക്കുക. വെള്ളത്തിനുപകരം. മാങ്ങ വെന്ത് അതു തണുത്തതിനുശേഷം തേങ്ങയരച്ചതും കാല്‍ ലിറ്റര്‍ മോരും ചേര്‍ക്കുക. അല്ലെങ്കില്‍ തൈര്‍. വെള്ളമായിട്ട് ഇരിക്കാത്തതാവും നല്ലത്. ഉപ്പുനോക്കി പാകത്തിനു വീണ്ടും ഇടണമെങ്കില്‍ ഇടണം. കറിവേപ്പിലയും, കടുകും, ചുവന്ന മുളകും വറത്തിടുക. ചൂടുള്ള ചോറെടുക്കാന്‍ സമയം ആയി. ഈ പച്ചടിയുടെ സ്വാദ് ഞാന്‍ പറയണോ?

തക്കാളിപ്പച്ചടി

തക്കാളി കൊണ്ടുണ്ടാക്കാവുന്ന വിഭവങ്ങള്‍ കുറേയുണ്ട്. അതിലൊന്നാണ് തക്കാളിപ്പച്ചടി. സദ്യയ്ക്കൊക്കെ പച്ചടി ഉണ്ടാവും. തക്കാളി കൊണ്ട് അല്ലെങ്കില്‍ വേറെ പച്ചക്കറി കൊണ്ട്.

മൂന്ന് തക്കാളിയെടുത്ത്, കഴുകി, വളരെച്ചെറുതായി മുറിക്കുക. മൂന്ന് നാലു പച്ചമുളക് ഒന്ന് ചീന്തി എടുക്കുക. അരമുറിത്തേങ്ങ, മിനുസമായി അരയ്ക്കുക. അരടീസ്പൂണ്‍ കടുകും ഇട്ട് അരയ്ക്കുക. വെള്ളത്തിനുപകരം മോരുവെള്ളം എടുത്ത് അരയ്ക്കുമ്പോള്‍ ഒഴിക്കുക.

തക്കാളി വേവാന്‍ മാത്രം വെള്ളമെടുത്ത്, പച്ചമുളകും, ഉപ്പും ഇട്ട് വേവിക്കാന്‍ വയ്ക്കുക. വേണമെങ്കില്‍ അല്‍പ്പം മുളകുപൊടിയും ഇടാം. നന്നായി വെന്ത് വെള്ളം വറ്റിയാല്‍, വാങ്ങിവെച്ച് നന്നായി തണുത്ത ശേഷം, തേങ്ങയരച്ചതും, തൈരും യോജിപ്പിക്കുക. തൈരു കുറേയൊന്നും വേണ്ട. കടുകും, വറ്റല്‍ മുളകും, കറിവേപ്പിലയും വറുത്തിടുക. കറിവേപ്പില, ഒരു തണ്ട്, വെന്ത് വാങ്ങുമ്പോള്‍‌ ഇടുക. വേവിയ്ക്കാന്‍ അല്ലാതെ വേറെ വെള്ളം ഒഴിക്കരുത്.

കയ്പ്പക്കപ്പച്ചടി

കയ്പ്പക്ക അഥവാ പാവയ്ക്ക എന്ന് പറയുമ്പോള്‍ മുഖം ചുളിയരുത്. ഔഷധഗുണം ഉള്ള ഒരു വസ്തുവാണ് കയ്പ്പക്ക. അല്‍പ്പം കയ്പ്പാണെന്ന് മാത്രം. ആരോഗ്യം മധുരിക്കും എന്ന് കരുതി കഴിക്കുക. കയ്പ്പക്ക കൊണ്ട്
പച്ചടി. അതായത് പാവയ്ക്കാപ്പച്ചടി.
പാവയ്ക്ക കഴുകിവൃത്തിയാക്കി കൊത്തിയരിഞ്ഞ് കുഞ്ഞുകുഞ്ഞു കഷണങ്ങളാക്കണം. കുരു കളയണം. ഒരു വലിയത് മതി.

പച്ചമുളക് മൂന്നെണ്ണം വട്ടത്തില്‍ അരിയണം. സാധാരണ പച്ചടികളില്‍ മുളക് ഒന്ന് ചീന്തിയിടുകയേ ഉള്ളൂ. ഇതിനു കയ്പ്പല്ലേ കുറച്ച് എരിഞ്ഞോട്ടെ എന്ന് കരുതി.

പിന്നെ ഇത് രണ്ടും കൂടെ വേവിയ്ക്കാന്‍ മാത്രം വെള്ളമെടുത്ത്, ഉപ്പും ഇട്ട് നന്നായി വേവിയ്ക്കുക. ഉടയ്ക്കുക.

വെന്തുകഴിഞ്ഞാല്‍ വെള്ളം വേണ്ടേ വേണ്ട.

ഇതിലേക്ക് ഒരു കപ്പ് പുളിയുള്ള തൈരോ മോരോ ഒഴിക്കുക.

അരമുറിത്തേങ്ങ മിനുസമായി അരയ്ക്കുക. കുറച്ച് കുറഞ്ഞാലും പ്രശ്നമൊന്നുമില്ല. തേങ്ങ ഒന്ന് അരഞ്ഞാല്‍ അരടീസ്പൂണ്‍ കടുകും ഇട്ട് അരയ്ക്കുക.

അരയ്ക്കുമ്പോള്‍‌ വെള്ളത്തിനുപകരം മോരുംവെള്ളം ഒഴിയ്ക്കണം.

ഈ അരച്ചത് കൂട്ടിലേക്ക് യോജിപ്പിക്കുക. പച്ചടി തയ്യാര്‍. കഷണങ്ങള്‍ മാത്രമേ വേവിക്കൂ.

മോരും തേങ്ങയും ചൂടാക്കില്ല.

വറവിടുക. കടുക്, കറിവേപ്പില, ചുവന്ന മുളക്.

വേണമെങ്കില്‍ അല്‍പ്പം മുളകുപൊടിയും ഇടാം. വേവിക്കുമ്പോള്‍.

ഇവിടെ പൈനാപ്പിള്‍‌ പച്ചടി

വെണ്ടയ്ക്ക പച്ചടി

വെണ്ടയ്ക്ക - 10-12 എണ്ണം, വട്ടത്തില്‍, കനം കുറച്ച് അരിഞ്ഞത്.

ചിരവിയ തേങ്ങ - 4-5 ടേബിള്‍‌സ്പൂണ്‍.

കുറച്ച് പുളിയുള്ള തൈര്‍- 1/2 കപ്പ്

കടുക് - 1/4 ടീസ്പൂണ്‍.

പച്ചമുളക് - 3 എണ്ണം.

മഞ്ഞള്‍പ്പൊടി- 1/4 ടീസ്പൂണ്‍

ഉപ്പ്.

പാചകയെണ്ണ.

വെണ്ടയ്ക്ക മുറിച്ച് ഉപ്പും, മഞ്ഞള്‍പ്പൊടിയും ചേര്‍ത്ത് നന്നായി യോജിപ്പിച്ച് എണ്ണയില്‍ നന്നായി മൊരിച്ചെടുക്കുക. തണുത്താല്‍, തേങ്ങയും കടുകും പച്ചമുളകും ഒന്നിച്ച് അരച്ച് വെണ്ടയ്ക്കയില്‍ ചേര്‍ക്കുക. തൈര്‍ ചേര്‍ത്ത് യോജിപ്പിക്കുക. കുറച്ച് കടുകും, കറിവേപ്പിലയും മൊരിച്ചിടുക.

പൈനാപ്പിള്‍ പച്ചടി

നന്നായി പഴുത്ത പൈനാപ്പിള്‍ വളരെ ചെറുതായി
അരിഞ്ഞത് - 1കപ്പ്

ചിരവിയ തേങ്ങ - 1/4 കപ്പ്

തൈര്‍ -1/4 കപ്പ്

ഉപ്പ്- പാകത്തിന്

കടുക് - 1/2 ടീസ്പൂണ്‍

‍പച്ചമുളക് - വട്ടത്തില്‍ അരിഞ്ഞത് - 3 എണ്ണം

പൈനാപ്പിള്‍ കുറച്ച് വെള്ളവും പച്ചമുളകും ഉപ്പും ഇട്ട് വേവിക്കുക. വെന്തുകഴിഞ്ഞാല്‍ ഒട്ടും വെള്ളം
ഉണ്ടായിരിക്കരുത്. വറ്റിച്ചെടുക്കുക. വെള്ളം അതിലുള്ളത് കളയരുത്. തേങ്ങയും കടുകും കുറച്ച് തൈര്‍ ഒഴിച്ച് നന്നായി അരച്ചെടുക്കുക. നന്നായി തണുത്തതിനുശേഷം തേങ്ങ അരച്ചതും ചേര്‍ത്ത് യോജിപ്പിക്കുക. തൈരും ചേര്‍ക്കുക.

കുറച്ച് പാചകയെണ്ണയില്‍ കടുകും, വറ്റല്‍ മുളകും,
കറിവേപ്പിലയും മൊരിച്ച് പച്ചടിയില്‍ ഇടുക.

പൈനാപ്പിള്‍ വേവിക്കുമ്പോള്‍ കുറച്ച് മുളകുപൊടിയും
ഇടാവുന്നതാണ്. 1/4 ടീസ്പൂണ്‍.