ചൌ ചൌ മോരൂട്ടാൻ

 ചൌ ചൌ കിട്ടി. എളുപ്പമുള്ള എന്തെങ്കിലും ഉണ്ടാക്കാമെന്നു വിചാരിച്ചു. അതാണ് ചൌ ചൌ മോരു കറി അഥവാ മോരു കൂട്ടാൻ. എല്ലാ പച്ചക്കറികളേയും ചെയ്യുന്നതുപോലെ ആദ്യം ഇതിനേയും കുളിപ്പിക്കാൻ വെള്ളത്തിലിട്ടുവെച്ചു.

 

 അതുകഴിഞ്ഞ് ഇതിന്റെ തോലുകളഞ്ഞ് എനിക്ക് തോന്നിയപോലെയൊക്കെ മുറിച്ചു. ഏകദേശം ഒരു കപ്പ്.  അതുകഴിഞ്ഞ് ഒന്നൂടെ വെള്ളത്തിൽ ഇട്ടു കഴുകിയെടുത്ത്, കാൽ ടീസ്പൂണിലും കുറവ് മഞ്ഞളും, കാൽ ടീസ്പൂൺ കുരുമുളകുപൊടിയും, കുറച്ച് ഉപ്പും ഇട്ട്, കുറച്ചുമാത്രം വെള്ളവും ഒഴിച്ച് വേവിച്ചെടുത്തു. വെന്തുകഴിഞ്ഞാൽ വെള്ളമില്ലെങ്കിൽ നല്ലത്. മൂന്നു നാലു ടേബിൾസ്പൂൺ തേങ്ങ, അര ടീസ്പൂൺ ജീരകം, രണ്ട് പച്ചമുളക് എന്നിവയിട്ട് മിനുസമായി അരച്ചെടുത്തു. കുരുമുളക് ഇട്ടില്ലെങ്കിൽ പച്ചമുളകിന്റെ എണ്ണം കൂട്ടുക. പച്ചമുളക് വേണ്ടെങ്കിൽ, മുളകുപൊടി ഇടുകയോ ചുവന്ന മുളക് അരയ്ക്കുകയോ ചെയ്യുക. വെന്ത കഷണം കുറച്ച് മോരും ഒഴിച്ച് തിളയ്ക്കാൻ വെച്ചു. തിളച്ച്
കുറച്ചുകഴിഞ്ഞപ്പോൾ തേങ്ങയരച്ചത്  കൂട്ടി തിളപ്പിച്ചു.

 

വാങ്ങിവെച്ചു വറവിട്ടു. ചോറിന്റെ കൂടെ  കൂട്ടി.

കുമ്പളങ്ങയും മാങ്ങയും മോരും

കുമ്പളങ്ങ ഇഷ്ടമാണോ? ഇഷ്ടമാണെങ്കിൽ ചിത്രത്തിൽ കാണുന്നതുപോലെയുള്ള കുമ്പളങ്ങ വാങ്ങിക്കൊണ്ടുവരിക.



മാങ്ങയും വാങ്ങിക്കൊണ്ടുവരുക. വീട്ടിൽത്തന്നെയുണ്ടെങ്കിൽ നിങ്ങൾ ഭാഗ്യവതീഭാഗ്യവാന്മാർ. കുമ്പളങ്ങ, ഞങ്ങളുടെ ഒരു സുഹൃത്ത് തന്നതാണ്. അവരുടെ വീട്ടിലുണ്ടാക്കിയത്. അതു ലാഭം. മാങ്ങ അച്ഛൻ വാങ്ങിക്കൊണ്ടുത്തന്നു. അതും ലാഭം. തേങ്ങയുടെ കാര്യംപറയേണ്ടല്ലോ. അതു പറമ്പിലേതുതന്നെ. മോരും വീട്ടിലേതു തന്നെ. ഹോ...ഒന്നും പറയേണ്ട. ബാക്കിയൊക്കെ വാങ്ങേണ്ടിവന്നു. ഉപ്പു മുതൽ ജീരകം വരെ. മുളകുമുതൽ കടുകുവരെ.

കുമ്പളങ്ങ മാങ്ങ മോരു കൂട്ടാൻ ഉണ്ടാക്കാൻ ആവശ്യമായ വസ്തുക്കൾ:-



കുമ്പളങ്ങ - ഒരു കഷണം.
മാങ്ങ - ഒന്ന്.
ജീരകം - ഒരു ടീസ്പൂൺ.
ചുവന്ന മുളക് - മൂന്നോ നാലോ.
മഞ്ഞൾപ്പൊടി - കാൽ ടീസ്പൂൺ.
മോര് - കാൽ ലിറ്റർ. (പുളിയുണ്ടെങ്കിൽ കാൽ ലിറ്റർ വേണമെന്നില്ല). അല്ലെങ്കിൽ കുറച്ച് തൈര്.
ഉപ്പ്.
തേങ്ങ - നാലു ടേബിൾസ്പൂൺ. കുറച്ചും കൂടെ ആയാലും കുഴപ്പമൊന്നുമില്ല.
പിന്നെ വറവിടാൻ, കടുക്, കറിവേപ്പില, മുളക്.

കഷണം കുമ്പളങ്ങയെടുത്ത് തോലും കുരുവും കളഞ്ഞ് ചെറുതാക്കി മുറിയ്ക്കുക. മാങ്ങയും തോലു കളഞ്ഞ് മുറിച്ചെടുക്കുക.



രണ്ടും കൂടെ മഞ്ഞൾപ്പൊടിയും ഉപ്പും ഇട്ട് വേവിക്കുക.




തേങ്ങയും ജീരകവും ചുവന്ന മുളകും കൂടെ നന്നായിട്ട് അരയ്ക്കുക. കഷണങ്ങൾ വെന്താൽ മോരൊഴിക്കുക. ഇളക്കി യോജിപ്പിച്ച് തിളപ്പിക്കുക. തിളച്ചാൽ തേങ്ങ ചേർക്കുക. തിളപ്പിക്കുക. ഉപ്പു പോരെങ്കിൽ പാകത്തിനിടുക. ഒരു തണ്ട് കറിവേപ്പിലയിടുക.




തിളച്ചു വാങ്ങിവെച്ച് വറവിടുക.

ചുവന്ന മുളക് അരയ്ക്കുന്നതിനുപകരം മുളകുപൊടി ഇടാം.

വെണ്ടയ്ക്ക മോരുകറി

എളുപ്പത്തിൽ ഉണ്ടാക്കാൻ പറ്റിയൊരു കറിയാണ്. എളുപ്പത്തിൽ കിട്ടുന്ന വസ്തുക്കളാണ് ഇതിൽ ഉള്ളത്. വെണ്ടയ്ക്ക ഇഷ്ടമുള്ളവർക്ക് പെട്ടെന്നുണ്ടാക്കാം. അല്ലാത്തവർക്കും ഉണ്ടാക്കിനോക്കാം.

വേണ്ടത് :-




വെണ്ടയ്ക്ക - ഏഴെട്ടെണ്ണം.
തേങ്ങ - നാലു ടേബിൾസ്പൂൺ.
ജീരകം - കാൽ ടീസ്പൂൺ.
കുരുമുളകുപൊടി - കാൽ ടീസ്പൂൺ.
പച്ചമുളക് - മൂന്ന്.
പുളിയുള്ള മോര് - കാൽ ലിറ്റർ.
ഉപ്പ്, മഞ്ഞൾപ്പൊടി ആവശ്യത്തിന്.
വറവിടാൻ, കടുക്, കറിവേപ്പില, ചുവന്ന മുളക്.



തേങ്ങയും ജീരകവും മിനുസമായി അരയ്ക്കുക. വെണ്ടയ്ക്ക കഴുകി മുറിക്കുക.
വെണ്ടയ്ക്ക, കുരുമുളകുപൊടി, ഉപ്പ്, മഞ്ഞൾപ്പൊടി എന്നിവ കുറച്ച് വെള്ളം ചേർത്ത് വേവിക്കുക. വെണ്ടയ്ക്ക വേഗം വേവും. കുക്കറിലൊന്നും വയ്ക്കരുത്. വെന്താൽ തേങ്ങ ചേർത്ത് ആവശ്യത്തിനു വെള്ളവും ചേർത്ത് തിളപ്പിക്കുക. മോരു ചേർക്കുക. തിളപ്പിച്ചാൽ നന്ന്. പുളിയുള്ള മോര് അല്ലെങ്കിൽ ശരിയാവില്ല. ഞാൻ മേമ്പൊടിയ്ക്ക് കുറച്ച് തൈര് ഒഴിച്ചു. അത് കട്ടയും വെള്ളവും പോലെ ആയി.




തിളച്ചാൽ കറിവേപ്പിലയിടുക. വാങ്ങി വറവിടുക. എളുപ്പമല്ലേ?

എരിവ് കൂടുതൽ വേണ്ടവർക്ക് കുറച്ച് കൂടുതൽ പച്ചമുളക് ഇടാം. വേണ്ടാത്തവർക്ക് കുറയ്ക്കാം.



ചോറെടുത്ത് കറിയൊഴിക്കുക, കഴിക്കുക.

മാങ്ങാക്കാളൻ

മാങ്ങാക്കാളൻ, മാമ്പഴക്കാളൻ, മാമ്പഴപ്പുളിശ്ശേരി, മധുരക്കാളൻ എന്നിങ്ങനെയൊക്കെയുള്ള പേരിട്ട് ഇതിനെ വിളിക്കാം. എന്തായാലും ഈ കൂട്ടാൻ അടിപൊളിയാണ്. ഉണ്ടാക്കിവെച്ചാൽ പെട്ടെന്ന് തീർന്നുപോകും. പഴുത്ത മാങ്ങ എന്നു പറഞ്ഞാൽത്തന്നെ മിക്കവർക്കും പ്രിയം. അപ്പോപ്പിന്നെ അതു വെറുതെ തിന്നുതീർക്കുന്നതിനു പകരം കൂട്ടാൻ വയ്ക്കാം. എന്നാൽ മാങ്ങയും തിന്നാം, കൂട്ടാനും കൂട്ടാം.

മാങ്ങാക്കാളൻ എളുപ്പത്തിലുണ്ടാക്കാം.





നല്ല പഴുത്ത മാങ്ങ വേണം - നാലെണ്ണം. ചിത്രത്തിൽ ഉള്ളതുപോലെ വലുതാണെങ്കിൽ നാലു മതി. അല്ലെങ്കിൽ നല്ല ചെറിയ നാടൻ മാങ്ങയാണെങ്കിൽ എട്ടെണ്ണം എടുക്കാം. നന്നായി പഴുത്തിട്ടുണ്ടെങ്കിൽ തോലു വലിച്ചുകളയാൻ പറ്റും. അല്ലെങ്കിൽ തോല് ചെത്തിക്കളയണം.

തേങ്ങ - ഒരു മുറി. അധികം വലുതും അധികം ചെറുതുമല്ലാത്ത തേങ്ങ ഒരു മുറി ചിരവിയെടുക്കുക. ഏതു കാളൻ ആയാലും തേങ്ങ നല്ലോണം വേണം.

ജീരകം - അര ടീസ്പൂൺ.

ചുവന്ന മുളക്/ വറ്റൽ മുളക് - 3 എണ്ണം.

തേങ്ങയും ജീരകവും മുളകും കൂടെ നന്നായി അരച്ചെടുക്കുക.

മഞ്ഞൾപ്പൊടി - കാൽ ടീസ്പൂൺ.
മോര്/ തൈര് - ഏകദേശം കാൽ ലിറ്റർ. മാങ്ങയ്ക്ക് പുളിയുണ്ടെങ്കിൽ പുളിയുള്ളത് ചേർക്കണ്ട. പുളി ഇഷ്ടമല്ലെങ്കിലും പുളിയില്ലാത്ത മോരോ തൈരോ ചേർക്കുന്നതാവും നല്ലത്. പക്ഷേ, കാളൻ എന്നു പറയുമ്പോൾ അതിന് കുറച്ച് പുളിയുണ്ടാവുന്നതാണ് നല്ലത്.

പച്ചമുളക് - മൂന്ന്. നീളത്തിൽ മുറിയ്ക്കുക.

വറവിടാൻ കടുക്, കറിവേപ്പില, മുളക്.

ഉലുവ വറുത്തുപൊടിച്ചത് - രണ്ടു നുള്ള്.

ഉപ്പ് - വേണ്ടതുപോലെ ചേർക്കാൻ.




ആദ്യം മഞ്ഞൾപ്പൊടി, ഉപ്പ്, പച്ചമുളക് എന്നിവ മാങ്ങയുടെ കൂടെ ഇട്ട്, കുറച്ച് വെള്ളവും ഒഴിച്ച് മാങ്ങ വേവിക്കുക.




കുക്കറിലാണ് വയ്ക്കുന്നതെങ്കിൽ മാങ്ങയിൽ വെള്ളം വേണ്ട. കൽച്ചട്ടിയിലോ പാത്രത്തിലോ വയ്ക്കുമ്പോൾ വെള്ളമില്ലാതെ പറ്റില്ല.



വെന്താൽ മോരു ചേർക്കുക.





മോരു തിളച്ചു യോജിച്ചാൽ തേങ്ങയരച്ചത് ചേർക്കുക.

തേങ്ങയും തിളച്ചാൽ ഒരു തണ്ട് കറിവേപ്പില ഇടുക.




വാങ്ങിവെച്ച് വറവിടുക.

ഉലുവപ്പൊടിയും ഇടുക.




അരയ്ക്കുമ്പോൾ പച്ചമുളക് ചേർക്കാം. അല്ലെങ്കിൽ മുളകുപൊടി ചേർക്കാം. മുളകു ചേർത്തരയ്ക്കാൻ കഴിയുമെങ്കിൽ അതാണ് നല്ലത്. മുളക് ഓരോരുത്തരുടെ ഇഷ്ടം പോലെ കൂട്ടുകയോ കുറയ്ക്കുകയോ ചെയ്യുക. വേവിക്കുമ്പോൾ പച്ചമുളക് ഇടുന്നത് മാത്രമായാലും മതി, നിങ്ങൾ എരിവ് പ്രിയർ അല്ലെങ്കിൽ.

കൈതച്ചക്ക മോരുകറി

കൈതച്ചക്ക മോരുകറിയാണ് ഇത്. ഇതിനു വേണമെങ്കിൽ കൈതച്ചക്ക പുളിശ്ശേരി, കൈതച്ചക്ക കാളൻ, കൈതച്ചക്ക മോരുകൂട്ടാൻ എന്നൊക്കെ വിളിക്കാം. അല്ലെങ്കിൽ നിങ്ങൾക്ക് ഇഷ്ടമുള്ളത് വിളിക്കാം.

കൈതച്ചക്ക/പൈനാപ്പിൾ
മോര്/ തൈര്
ഉപ്പ്
പച്ചമുളക്
മുളകുപൊടി
മഞ്ഞൾപ്പൊടി
തേങ്ങ
കടുക് കറിവേപ്പില, ചുവന്ന മുളക് - വറവിടാൻ. ഇതൊക്കെയാണ് വേണ്ടത്.





ചിത്രത്തിലേതുപോലെയുള്ള കൈതച്ചക്കയുണ്ടെങ്കിൽ എടുക്കുക. അത് രണ്ടു ദിവസം ഫ്രിഡ്ജിൽ വ്ച്ചിരുന്നു. നിങ്ങൾ അങ്ങനെ ചെയ്യരുത്. ;) കടയിൽ നിന്ന് അധികം പുളിയില്ലാത്ത, അധികം പഴുക്കാത്ത കൈതച്ചക്ക വാങ്ങിക്കൊണ്ടുവരിക. പുളിയുണ്ടാവില്ല എന്ന് കടക്കാരൻ പറയുന്നത് വിശ്വസിക്കണം.

കൈതച്ചക്കയുടെ പകുതി നന്നായി കഴുകി, തോലുകളഞ്ഞ് ചെറുതായി മുറിക്കുക. കൂഞ്ഞുപോലെയുള്ള ഭാഗം എടുക്കുന്നതുകൊണ്ട് കുഴപ്പമൊന്നുമില്ല. പക്ഷേ പഴുക്കാറായ ഭാഗത്തിനും, ആ ഭാഗത്തിനും വേറെ വേറെ വേവ് ആണ്.




മുറിച്ചുകഴിഞ്ഞാൽ കാൽ ടീസ്പൂൺ മഞ്ഞൾപ്പൊടിയും, കാൽ ടീസ്പൂൺ മുളകുപൊടിയും, ഉപ്പും ഇട്ട് ആവശ്യത്തിനുമാത്രം വെള്ളമൊഴിച്ച് വേവിക്കുക.

നാലു ടേബിൾസ്പൂൺ (അഞ്ച് ആയാലും മോരുകറിയ്ക്ക് കുഴപ്പമൊന്നുമില്ല) തേങ്ങയും അര ടീസ്പൂൺ ജീരകവും ഒന്നോ രണ്ടോ പച്ചമുളകും ഇട്ട് നന്നായി അരച്ചെടുക്കുക. പച്ചമുളക് കൂട്ടുമ്പോൾ ആദ്യം മുളകുപൊടി ഇട്ടത് ഓർക്കുക. എരിവ് വേണ്ടെങ്കിൽ പച്ചമുളക് അധികം ഇടരുത്.

വെന്തതിൽ, കാൽ ലിറ്റർ മോരൊഴിക്കുക. തൈരായാലും മതി. നന്നായി യോജിപ്പിക്കണം. തേങ്ങയും അതോടൊപ്പം ചേർത്ത് തിളപ്പിക്കാൻ വയ്ക്കുക. അധികം വെള്ളം ചേർക്കണമെന്നില്ല. ആവശ്യമുള്ളത് മാത്രം ചേർക്കുക. തീ കുറച്ചു വച്ച് തിളപ്പിക്കുക.

ഒക്കെ തിളച്ച് യോജിച്ചാൽ വാങ്ങിവയ്ക്കുക. കുറച്ച് തൈർ കൂടെ ചേർക്കാം വേണമെങ്കിൽ.

വറവിടുക.




കൈതച്ചക്ക പുളിയുള്ളതാണെങ്കിൽ അധികം പുളിയില്ലാത്ത മോരും തൈരും ചേർക്കാം. കൈതച്ചക്ക പഴുത്തത് ആയാലും കുഴപ്പമൊന്നുമില്ല.

മുളകുപൊടിക്കു പകരം കുരുമുളകുപൊടിയും ചേർക്കാം.

ചേമ്പ് കുറുക്കുകാളൻ

ചേമ്പ് കൊണ്ട് ഒരുപാട് വിഭവങ്ങൾ ഉണ്ടാക്കാം. കാളൻ, ഓലൻ, മൊളേഷ്യം, സാമ്പാർ ഒക്കെ. ബാക്കിയൊക്കെ ഉണ്ടാക്കിക്കഴിഞ്ഞതുകൊണ്ട് കാളൻ വെച്ചേക്കാംന്ന് കരുതി. കുറുക്കുകാളൻ. കാളൻ, കുറുക്കിയുണ്ടാക്കിക്കഴിഞ്ഞാൽ അതിൽനിന്ന് അല്പാല്പമായിട്ട് കുറച്ചു നാളോളം എടുത്തുകൂട്ടാം. കേടാവില്ല.





ചേമ്പ് ചിത്രത്തിൽ ഉള്ളത്രേം വേണം.



കഷണങ്ങളാക്കുക. നന്നായി കഴുകുക. മഞ്ഞൾപ്പൊടിയും കുരുമുളകുപൊടിയും (അര ടീസ്പൂൺ), ആവശ്യത്തിന് ഉപ്പും ഇട്ട് വേവാൻ ആവശ്യമായത്ര വെള്ളവും ഒഴിച്ച് വേവിക്കാൻ വയ്ക്കുക. കുക്കറിൽ വേവിച്ചെടുക്കാം.





കുറച്ചുവലുപ്പമുള്ള ഒരു മുറിത്തേങ്ങയുടെ മുക്കാൽഭാഗം ചിരവിയെടുത്ത് ഒന്നോ ഒന്നരയോ ടീസ്പൂൺ ജീരകവും മൂന്ന് പച്ചമുളകും (എരിവ് വേണമെങ്കിൽ കൂടുതൽ ചേർക്കാം) ചേർത്ത് നല്ല മിനുസമായി അരയ്ക്കുക. അധികം വെള്ളം ആവരുത് അരഞ്ഞുകഴിഞ്ഞാൽ.




ചേമ്പ് വെന്തു കഴിഞ്ഞാൽ അതിൽ അര ലിറ്റർ, നന്നായി പുളിച്ച മോരും ഒഴിച്ച് തിളപ്പിക്കുക. വറ്റിക്കുക. വലിയൊരു പാത്രം എടുക്കുന്നതാവും നല്ലത്. അല്ലെങ്കിൽ മോര് തിളയ്ക്കുമ്പോൾ താഴേക്ക് തെറിക്കും. ഉപ്പും കുറച്ചും കൂടെ ഇടാം. വറ്റാറായാൽ അതിലേക്ക് തേങ്ങ ചേർത്ത് തിളപ്പിക്കുക. തേങ്ങയും കൂടെ ചേർത്തുകഴിഞ്ഞാല്‍പ്പിന്നെ അതിൽ വെള്ളം മിക്കവാറും ഉണ്ടാവില്ല. തേങ്ങ തിളയ്ക്കാൻ ആവശ്യമായതേ ഉണ്ടാവൂ. തേങ്ങയും ചേർന്നുകഴിഞ്ഞാൽ അതിലേക്ക് കറിവേപ്പില വെറുതേ ഇടുക.




വാങ്ങിവെച്ച് വറവിടുക. ഉലുവപ്പൊടി വളരെ സ്വല്പം വേണമെങ്കിൽ ഇടാം. കുറേയിട്ടാൽ കയ്ക്കും.




കൽച്ചട്ടിയാണെങ്കിൽ കാളൻ തണുക്കുമ്പോഴേക്കും ഒരിറ്റുപോലും വെള്ളം കാണില്ല. മറ്റു പാത്രങ്ങളാണെങ്കിൽ വറ്റിക്കുന്നതുപോലിരിക്കും.

കുറുക്കുകാളൻ ഉണ്ടാക്കിയിട്ട് രണ്ടു പാത്രങ്ങളിൽ എടുത്തുവയ്ക്കുക. ഒന്നിലുള്ളത് കൂട്ടിക്കഴിക്കാൻ എടുക്കുക. ഒന്നിലുള്ളത് പിന്നേയ്ക്ക് വയ്ക്കുക. എടുത്തതിൽനിന്നു തന്നെ എടുത്ത് അടച്ചുവെച്ചു പിന്നേം എടുത്തുകൊണ്ടിരിക്കുന്നത് ശരിയല്ല.

വലിയ ചേമ്പ് കിട്ടാനില്ലെങ്കിൽ, കുട്ടിച്ചേമ്പുകൊണ്ടും കാളൻ ഉണ്ടാക്കാം.

പപ്പായ മോരുകറി

ചിത്രത്തിലെ ചെറിയ ഒരു പപ്പായയുടെ പകുതി, തോലുകളഞ്ഞ് കഷണങ്ങളാക്കിയെടുത്ത് കഴുകുക. പപ്പായ ആദ്യവും ഒന്നും കഴുകണം. കറ പോവും.
നാലു ടേബിൾ‌സ്പൂൺ ചിരവിയ തേങ്ങ വേണം.
കാൽ ടീസ്പൂൺ ജീരകം വേണം.
മൂന്ന് പച്ചമുളക് വേണം. (അളവ് കൂട്ടുകയോ കുറയ്ക്കുകയോ ചെയ്യാം). പച്ചമുളകില്ലെങ്കിൽ എരിവ് വേണ്ടത് അനുസരിച്ച് മുളകുപൊടി ചേർക്കാം.

മഞ്ഞൾപ്പൊടി വേണം.
കാൽ ലിറ്റർ തൈരോ കലക്കിയ മോരോ വേണം. പുളിച്ചത്. തൈരിന്റെ അളവ് വേണമെങ്കിൽ കുറയ്ക്കാം. പകുതി ചേർത്താലും മതി.
ഉപ്പ് ആവശ്യത്തിനു വേണം. വറവിടാൻ കുറച്ച് വെളിച്ചെണ്ണയോ പാചകയെണ്ണയോ വേണം. പിന്നെ കറിവേപ്പിലയും ചുവന്ന മുളകും, കടുകും വേണം.
തേങ്ങ, ജീരകവും പച്ചമുളകും ചേർത്ത് നന്നായി അരയ്ക്കണം.
കഷണങ്ങൾ ഉപ്പും മഞ്ഞൾപ്പൊടി, (പച്ചമുളകല്ല ചേർക്കുന്നതെങ്കിൽ മുളകുപൊടിയും) ഇട്ട് വേവിക്കുക. ആവശ്യത്തിനേ വെള്ളം വേണ്ടൂ. വെന്തതിലേക്ക് തേങ്ങയരച്ചത് ചേർത്ത് തിളപ്പിക്കുക. വാങ്ങിവെച്ച് തൈരൊഴിക്കുക. വറവിടുക.

ഞാൻ, വെന്ത കഷണങ്ങളിൽ മോരൊഴിച്ച് നന്നായി തിളപ്പിച്ചതിനുശേഷം തേങ്ങ ചേർത്ത് തിളപ്പിച്ചു വാങ്ങുകയേ ഉള്ളൂ. എന്നിട്ട് വറവിടും.

കുമ്പളങ്ങ മോരുകറി

ഇതിനെ കുമ്പളങ്ങക്കാളൻ, കുമ്പളങ്ങപ്പുളിശ്ശേരി എന്നൊക്കെ വേണമെങ്കിൽ പറയാം. ചേനയും കായയും പഴവും പിന്നെ പുതിയ പച്ചമുളകുകാളനും കഴിഞ്ഞാൽ ഈയൊരു മോരുകറിയുണ്ടാക്കാം. കുമ്പളങ്ങ എല്ലാ സമയത്തും മിക്കവാറും കിട്ടും. പക്ഷെ അധികം പേർക്ക് വേണ്ടെങ്കിൽ ഒരു കഷണം വാങ്ങുന്നതു തന്നെ നല്ലത്. അല്ലെങ്കിൽ വേഗം കേടാവും. കുമ്പളങ്ങ ഒരു കഷണം, തോലും കുരുവുമൊക്കെക്കളഞ്ഞ് ചിത്രത്തിലെപ്പോലെ മുറിക്കുക. ഇനിയും ചെറുതാക്കാൻ കഴിയുമെങ്കിൽ നല്ലത്. ചെറുതായിരിക്കുന്നതാണ് നല്ലത്. കുറച്ച് മഞ്ഞൾപ്പൊടിയും ഉപ്പും ഇട്ട് വേവിക്കുക. വെള്ളം അത്യാവശ്യത്തിനുമാത്രം ഒഴിച്ച് വേവിക്കുക. മൂന്ന് അല്ലെങ്കിൽ നാലു ടേബിൾസ്പൂൺ ചിരവിയ തേങ്ങയും കാൽ ടീസ്പൂൺ ജീരകവും കൂട്ടി വെള്ളം ചേർത്ത് മിനുസമായി അരച്ചെടുക്കുക. വെന്ത കഷണത്തിലേക്ക് നന്നായി കലക്കിയെടുത്ത പുളിച്ച മോര് കാൽ ലിറ്റർ ചേർക്കുക. അതു തിളച്ചാൽ, അതിലേക്ക് തേങ്ങയും ആവശ്യമെങ്കിൽ വെള്ളവും ചേർത്ത് തിളച്ചാൽ വാങ്ങിവയ്ക്കുക. അതിലേക്ക് ഒരു തണ്ട് കറിവേപ്പില ഇടുക. തേങ്ങ തിളയ്ക്കുമ്പോൾ ഇടാം. വാങ്ങിവച്ച് കടുകും കറിവേപ്പിലയും ചുവന്നമുളകും വറുത്തിടുക. മോര് ശരിക്കും പുളിച്ചില്ലെങ്കിൽ, തേങ്ങ ചേർത്ത് തിളച്ചതിനുശേഷം മോരൊഴിച്ച് ഒന്ന് പത വന്നാൽ വാങ്ങുക. മോരിനു പുളിയില്ലെങ്കിൽ കാളനു വല്യ സ്വാദുണ്ടാവില്ല. പാൽ ഉറയൊഴിച്ച് പിറ്റേന്ന് നന്നായി കലക്കിയെടുത്ത് ഫ്രിഡ്ജിൽ വയ്ക്കാതെ രണ്ട് ദിവസം കൂടെ ആയാൽ നല്ലപോലെ പുളിക്കും.

കാളൻ

രാവിലെ എണീറ്റപ്പോൾത്തോന്നി, അത്തമൊക്കെയല്ലേ ഇന്നൊരു കാളൻ ആയിക്കളയാംന്ന്. മനസ്സെന്നോട് ചോദിച്ചു എന്തു കാളൻ? കുറേ കാളൻ അവിടേം, ഇവിടേം, പിന്നിവിടേം ഉണ്ട്. പിന്നെന്തുകാളൻ. അപ്പോഴാണ് ആശയം വന്നത്. കാളനിലൊക്കെ പച്ചമുളക് ചേർക്കും. സകലതിലും വേണം. പക്ഷെ അതിനൊരു പ്രാധാന്യവും ഇല്ല. എനിക്കു പാവം തോന്നി. എന്നാലതിനെയൊന്നു സന്തോഷിപ്പിച്ചിട്ടു തന്നെ കാര്യം. പച്ചമുളക് കുറുക്കുകാളൻ പിറന്നുവീഴുന്നത് അങ്ങനെയാണ്. എന്റെ സ്വന്തം പാചകമാണിത്. ആരും വെച്ചത് കണ്ടില്ല, ആരും പറഞ്ഞുതന്നിട്ടുമില്ല.

പച്ചമുളക് തീരെ എരുവില്ലാത്തത് (ചള്ള് എന്ന് വീട്ടിലൊക്കെ പറയാറുണ്ട്) - ഒരു 20 എണ്ണം. ഓരോന്നും അതിന്റെ വാലു കളഞ്ഞ് മൂന്ന് ആയി മുറിക്കാം. തിന്നുമ്പോൾ എന്തെങ്കിലും ഇല തിന്നുന്നതുപോലെ ഉണ്ടാവും എരുവില്ലാത്തത്.



ഉപ്പ് - പാകത്തിന്.
മഞ്ഞൾപ്പൊടി - കാൽ ടീസ്പൂൺ.
ജീരകം - അര ടീസ്പൂൺ. (നിങ്ങൾക്കതിന്റെ സ്വാദ് ഇഷ്ടമല്ലെങ്കിൽ കുറയ്ക്കുക).
തേങ്ങ ചിരവിയെടുക്കണം - കൃത്യം 5 ടേബിൾസ്പൂൺ നിറച്ചും. അല്പം കൂടെ ആയാലും ദോഷമില്ല. കുരുമുളക് - 5 എണ്ണം.
ഉലുവ 10 മണി ചൂടാക്കി പൊടിക്കണം. ഒരു പാത്രത്തിലിട്ട് വെറുതെ ചൂടാക്കുക. ഒരു കടലാസ്സിൽ ഇട്ട് എന്തെങ്കിലും കൊണ്ട് പൊടിച്ച് എടുക്കുക. മിക്സിയൊന്നും വേണ്ട.
കടുകും കറിവേപ്പിലയും ചുവന്ന മുളകും വറവിടാൻ വേണം.
ആദ്യം തന്നെ മഞ്ഞളും ഉപ്പും (ഉപ്പു കൂടിയാൽ സാരമില്ല. മോരിനും തേങ്ങയ്ക്കുമുള്ള ഉപ്പും കൂടെ ഇടാം) ഇട്ട് പച്ചമുളക് വേവിക്കുക. കുക്കറിലാണെങ്കിൽ, പച്ചമുളകിൽ വെള്ളം തീരെ ഒഴിക്കേണ്ട. ഒരു പാത്രത്തിലിട്ട് ഒന്ന് മഞ്ഞളൊക്കെ ഒന്ന് ഇളക്കിയിട്ട് വെച്ചാൽ മതി. വെന്തുകഴിഞ്ഞപ്പോൾ കണ്ടോ? ഒട്ടും വെള്ളമില്ല.



തേങ്ങയും ജീരകവും കുരുമുളകും കൂടെ അല്പം വെള്ളവും കൂട്ടി അരയ്ക്കുക. കുറേ വെള്ളം വേണ്ട. അരച്ചുകഴിഞ്ഞാൽ അത് വെണ്ണ തോൽക്കുന്ന വിധത്തിൽ മിനുസം ആയിരിക്കണം. വെന്ത പച്ച മുളകിൽ, അര ലിറ്റർ വളരെ പുളിയുള്ള മോരും, കാൽ ലിറ്റർ വെള്ളവും ഒഴിച്ച് അടുപ്പത്ത് വെച്ച് വറ്റിക്കുക. അര മണിക്കൂർ വേണ്ടിവരും. മോരും, വെള്ളവും കുറുകിക്കുറുകി ആവും. അപ്പോൾ ഉപ്പ് ഒന്നു നോക്കാം.



ആ കുറുകിയതിലേക്ക് തേങ്ങ കൂട്ടുക. വെള്ളം വേണ്ട. തേങ്ങ നല്ലപോലെ ഇളക്കിയിളക്കിച്ചേർക്കണം. തേങ്ങ ചൂടായി തിളച്ച് ഡിസ്കോ കളിക്കാൻ തുടങ്ങും. അപ്പോൾ വാങ്ങിവെച്ച് ഉലുവപ്പൊടി ഇടുക. വറവിടുക.

ശ്രദ്ധിക്കേണ്ട കാര്യങ്ങൾ :- മോരു വളരെ പുളിയുള്ളത് വേണം. കടകോലുകൊണ്ടോ മിക്സിയിലോ കലക്കിയെടുത്തതാവണം. വെറുതെ ഒരു സ്പൂണെടുത്ത് കലക്കിയൊഴിച്ചാൽ അതുപോലെയിരിക്കും.
പാകം ചെയ്യുമ്പോൾ തീ എപ്പോഴും വളരെക്കുറവിൽ ആയിരിക്കണം. കൽച്ചട്ടി ആയാലും വേറെ പാത്രമായാലും.
പച്ചമുളക് തീരെ എരുവില്ലാത്തത് വേണം. അല്ലെങ്കിൽ കാളൻ എരിയും. ഒരു പച്ചമുളക് തിന്നുനോക്കീട്ട് മതി. ;)

കുറുക്കുകാളൻ വിളമ്പിയാൽ അവിടെയിരിക്കണം. കാശിക്ക് പോകരുത്. ഈ കാളൻ ഓരോ സ്പൂൺ എന്നും കൂട്ടിക്കഴിക്കുക. അധികം വേണ്ട. പച്ചമുളകല്ലേ.

ഈ കുറിപ്പിന് എനിക്ക് ദക്ഷിണ വേണ്ടേ വേണ്ട. വെറ്റിലയിൽ പച്ചമുളക് ചുരുട്ടിത്തരാൻ അല്ലേ?

ഇടിച്ചക്ക മോരൂട്ടാന്‍

ഒരു ഇടിച്ചക്കയുടെ നാലിലൊന്ന് എടുത്ത് തോലൊക്കെക്കളഞ്ഞ് നല്ലപോലെ ചെറുതാക്കി മുറിക്കുക. അതില്‍ ആവശ്യത്തിനു ഉപ്പും മഞ്ഞളും ഇടുക. നല്ലപോലെ വേവിക്കണം. വെന്തു കഴിഞ്ഞാല്‍ അതിലേക്ക് ഒരു മൂന്നുനാലു ടേബിള്‍സ്പൂണ്‍ തേങ്ങയും, ജീരകവും, മൂന്ന് പച്ചമുളകും ചേര്‍ത്തരച്ചത് ചേര്‍ക്കുക. മോരും കുറച്ച് ഒഴിക്കുക. മോര് ആദ്യം ഒഴിച്ച് തിളപ്പിച്ചാലും മതി. തേങ്ങ കൂട്ടുന്നതിനുമുമ്പ്. ഒന്നു തിളച്ചാല്‍ വാങ്ങിവെച്ച് വറവിടുക.



പച്ചമുളക് വേണ്ടെങ്കില്‍ വേവിക്കുമ്പോള്‍ മുളകുപൊടി ഇടണം.

നേന്ത്രപ്പഴം കാളന്‍

വേണ്ടത്:-

നേന്ത്രപ്പഴം,

കുരുമുളകുപൊടി,

ഉപ്പ്, മഞ്ഞള്‍,

പച്ചമുളക്,

തേങ്ങ,

പുളിയുള്ള തൈര്‍ - കാല്‍ ലിറ്റര്‍,

കടുകും, മുളകും, കറിവേപ്പിലയും, വറവിടാന്‍.

ഒരു നേന്ത്രപ്പഴം, ചിത്രത്തില്‍ കാണുന്നതുപോലെ മുറിക്കുക. അതില്‍, അര ടീസ്പൂണ്‍ കുരുമുളകുപൊടിയും, ഉപ്പും, മഞ്ഞളും ഇട്ട് വേവിക്കുക. വേവാനുള്ള വെള്ളമേ വേണ്ടൂ. വെന്തുകഴിഞ്ഞാല്‍ വെള്ളമില്ലെങ്കില്‍ അത്രയും നല്ലത്. അധികം പഴുത്തത് അല്ലെങ്കില്‍ സ്പൂണ്‍ കൊണ്ട്, ഒന്ന് ഉടയ്ക്കുക. കാല്‍മുറിയില്‍ അല്‍പ്പം അധികം തേങ്ങ ചിരവി, രണ്ട് പച്ചമുളകും, കുറച്ച് ജീരകവും (അര ടീസ്പൂണ്‍) ചേര്‍ത്ത് നന്നായി അരയ്ക്കുക. വെള്ളത്തിനു പകരം, മോരും വെള്ളം ചേര്‍ത്ത് അരച്ചാല്‍ നല്ലത്. അരച്ചത്, വെന്ത കഷണങ്ങളില്‍ ചേര്‍ക്കുക. നന്നായി തിളച്ച് യോജിച്ച ശേഷം, തൈര്‍ ചേര്‍ത്ത് വാങ്ങിവെച്ച് വറവിടുക. തൈരിനു പകരം മോരായാലും കുഴപ്പമില്ല. പക്ഷെ വെള്ളമൊഴിച്ചത് ആവരുത്. എരിവ്, നിങ്ങളുടെ അളവിന് കൂട്ടുകയോ കുറയ്ക്കുകയോ ചെയ്യുക.

നേന്ത്രക്കായ മോരുകറി

വേണ്ടത്:-

നേന്ത്രക്കായ - ഒന്ന്, നാലാക്കി, ചീന്തി അധികം വലുപ്പവും, അധികം ചെറുപ്പവും അല്ലാതെ കഷണങ്ങളാക്കിയത്. തൊലി കളയേണ്ട കാര്യമില്ല.

അധികം വലുപ്പമില്ലാത്ത ഒരു തേങ്ങയുടെ അര മുറി ചിരവിയത്.

ജീരകം, കുറച്ച്. കാല്‍ ടീസ്പൂണ്‍ മുഴുവന്‍ വേണ്ട.

(തേങ്ങയും ജീരകവും ചേര്‍ത്ത് മിനുസമായി അരച്ചുവെയ്ക്കുക.)

മഞ്ഞള്‍പ്പൊടി, മുളകുപൊടി, ഉപ്പ് ആവശ്യത്തിന്

നല്ല പുളിയുള്ള മോര്, കാല്‍ ലിറ്റര്‍.

വറവിടാന്‍, കടുകും, കറിവേപ്പിലയും, ചുവന്ന മുളകും.

നേന്ത്രക്കായ, ഉപ്പും, മഞ്ഞളും മുളകുപൊടിയുമിട്ട് വേവിക്കുക. വെന്താല്‍, മോരു ചേര്‍ത്ത് തിളപ്പിക്കുക. തേങ്ങയും ജീരകവും, നന്നായി അരച്ച് വെച്ചത്, അതില്‍ ചേര്‍ക്കുക. അതും നന്നായി തിളച്ചാല്‍, വാങ്ങിവെച്ച്, വറവിടുക. വറവിട്ട ഉടനെ ഇളക്കിമറിച്ചുവയ്ക്കരുത്. അല്‍പ്പം കഴിഞ്ഞശേഷം ഇളക്കുക. എല്ലാ കറികളും.

മറ്റു കാര്യങ്ങള്‍:-

മുളകുപൊടിയ്ക്കുപകരം, പച്ചമുളക്, തേങ്ങയുടെ കൂടെച്ചേര്‍ത്ത് അരച്ച് ചേര്‍ക്കാം. കുരുമുളകുപൊടി ചേര്‍ക്കുകയും ചെയ്യാം.

തേങ്ങ ചേര്‍ത്ത് നന്നായി വെന്തതിനുശേഷം, തൈര്‍ ഒഴിച്ച് ഒന്നു പതപ്പിച്ച് വാങ്ങിവെക്കുകയും ചെയ്യാം.

മോരു കുറവോ കൂടുതലോ ഉപയോഗിക്കാം, നിങ്ങളുടെ ഇഷ്ടം പോലെ. പക്ഷെ, വെള്ളം അധികം ചേര്‍ക്കാത്തതാണ് നല്ലത്.

ഉലുവ വറുത്തുപൊടിച്ച് ചേര്‍ക്കാം വേണമെങ്കില്‍.

ശരിക്കുള്ള കാളനില്‍ വേവാനുള്ള വെള്ളമേ പാടുള്ളൂ. ഇത് അങ്ങനെ വേണമെന്നില്ല. എന്നാലും കുറേ വേണ്ട.

കുറുക്ക് കാളന്‍

ചേന കൊണ്ട് ഉണ്ടാക്കാവുന്ന വിഭവങ്ങള്‍ ഏറെ. എന്നാലും കാളനില്‍ ചേന സ്വാദ് തന്നെ.

ചേന - 500 ഗ്രാം.

മോര് - നല്ല പുളിയുള്ളത് - രണ്ട് ലിറ്റര്‍.

തേങ്ങ - ഒരു വലിയ മുറി തേങ്ങ.

പച്ചമുളക് - 5- 8 എണ്ണം. നല്ല എരിവ് വേണമെങ്കില്‍ പച്ചമുളകിന്റെ എണ്ണം കൂട്ടേണ്ടി വരും. എരിവനുസരിച്ച്.

ജീരകം- 1 ടീസ്പൂണ്‍. കുറച്ചുകൂടെ ആയാലും കുഴപ്പമില്ല.

മഞ്ഞള്‍പ്പൊടിയും ഉപ്പും ആവശ്യത്തിന്.

ചേന കഷണങ്ങളാക്കി ഉപ്പും മഞ്ഞളുമിട്ട് നന്നായി വേവിക്കുക. വെന്ത് കഴിഞ്ഞാല്‍ അതില്‍ വെള്ളം ഉണ്ടാവരുത്.

തേങ്ങ, പച്ചമുളകും, ജീരകവും ചേര്‍ത്ത് നല്ലപോലെ അരയ്ക്കുക.

ചേന, മോരൊഴിച്ച് അടുപ്പത്ത് വെച്ച് നല്ലപോലെ വറ്റിക്കുക.

തേങ്ങ അരച്ചതും ചേര്‍ക്കുക.

തിളച്ച് വാങ്ങിയാല്‍ കടുകും, വറ്റല്‍മുളകും, കറിവേപ്പിലയും മൊരിച്ചിടുക.

ഇത് തയ്യാറായാല്‍, അധികം വെള്ളം ഉണ്ടാവില്ല. കുറച്ച് ദിവസം കേടാകാതെ ഇരിക്കും.

പുളിയിഷ്ടമുള്ളവര്‍ക്ക് പറ്റും.

മോരിന്റെ പുളി അനുസരിച്ചും, അത് വറ്റുന്നതിന് അനുസരിച്ചും സ്വാദ് കൂടും.

ഉലുവ കുറച്ച് വേണമെങ്കില്‍ മൊരിച്ചിടാം.

ചേന വേവിക്കുമ്പോള്‍ കൂടെ കുരുമുളക്പൊടി ഇടാം. പച്ചമുളകിന്റെ അളവ് കുറയ്ക്കുക. കുരുമുളക് ഇഷ്ടമില്ലാത്തവര്‍ ചേര്‍ക്കരുത്.