ചെറുപയർ വട

ചെറുപയർ ഇഷ്ടമാണോ? ചെറുപയർ ആരോഗ്യത്തിനു നല്ലതാണ്. എന്നും ചെറുപയർ വേവിച്ച് കഴിക്കാം. ചെറുപയർ കൊണ്ടുണ്ടാക്കുന്ന വട ദിവസവും കഴിക്കാൻ പറ്റില്ല. എന്നാലും ഇടയ്ക്കൊരുദിവസം ഉണ്ടാക്കിക്കൂടേ? എളുപ്പം കഴിയും വടയുണ്ടാക്കുന്ന ജോലി.



ചെറുപയർ ഏകദേശം 100 ഗ്രാം എടുക്കണം. വെള്ളത്തിലിട്ട് മൂന്നോ നാലോ മണിക്കൂർ കുതിർക്കാൻ വയ്ക്കണം.





വലിയ ഉള്ളി - രണ്ട് ചെറുത്/ ഒന്ന് വലുത്. തോലുകളഞ്ഞ് ചെറുതാക്കി അരിയുക.
പച്ചമുളക് - രണ്ടെണ്ണം. വട്ടത്തിൽ ചെറുതായി മുറിയ്ക്കുക.
ഇഞ്ചി - ഒരു കഷണം. തോലുകളഞ്ഞ് ചെറുതാക്കി അരിഞ്ഞുവയ്ക്കുക.
ചുവന്ന മുളക് - രണ്ടെണ്ണം.
കായം പൊടി- കുറച്ച്.
കറിവേപ്പില - ഒരു വല്യ തണ്ടിലെ ഇല. ചെറുതാക്കി മുറിയ്ക്കുക.
ഉപ്പ്.
അരിപ്പൊടി - ഒരു ടേബിൾസ്പൂൺ.
വെളിച്ചെണ്ണ - വട വറുക്കാൻ.




ചെറുപയർ കഴുകിയെടുത്ത് ചുവന്ന മുളക് ഇട്ട് അരയ്ക്കുക. തീരെ വെള്ളം ഉണ്ടാവരുത്. അധികം പേസ്റ്റുപോലെ ആവരുത്. അരച്ചുകഴിഞ്ഞാൽ അതിലേക്ക് പച്ചമുളക്, കറിവേപ്പില, ഉള്ളി, ഇഞ്ചി, കായം പൊടി, അരിപ്പൊടി, ആവശ്യത്തിന് ഉപ്പ് എന്നിവയൊക്കെച്ചേർത്ത് കുഴയ്ക്കുക. വെള്ളമൊന്നും ചേർക്കല്ലേ. അഞ്ചുമിനുട്ട് വയ്ക്കാം. വെളിച്ചെണ്ണ ചൂടാക്കുക. കൂട്ട് എടുത്ത് ഉരുട്ടുക. അത് കൈയിൽ വച്ച് ഒന്നു പരത്തി വെളിച്ചെണ്ണയിൽ ഇട്ട് വറുത്തെടുക്കുക.



എണ്ണ ചൂടാക്കുന്നതിനുമുമ്പ് ഉരുട്ടി വയ്ക്കാം. അധികം വലുപ്പം വേണ്ട. ഒരു ചെറിയ ചെറുനാരങ്ങ വലുപ്പത്തിൽ ആയാൽ കുഴപ്പമില്ല. കൈയിൽ പരത്തുമ്പോൾ നടുവിലുള്ള ഭാഗം നന്നായി അമർത്തി പരത്തുന്നതാവും നല്ലത്. എണ്ണ കുറേ ചൂടാക്കി വയ്ക്കരുത്. അധികം ചൂടായാൽ പുറം കരിയുകയും അകത്ത് ശരിക്കും വേവാതെയും ഇരിക്കും. പയറ് അരച്ചാൽ അല്പം പശപോലെ ഇരിക്കും. അതുകൊണ്ടാണ് അരിപ്പൊടി ചേർത്തത്. ചേർത്തില്ലെങ്കിലും കുഴപ്പമില്ല. മല്ലിയില ഇഷ്ടമുണ്ടെങ്കിൽ അതും ചേർക്കാം.


(ഞങ്ങളുടെ ക്യാമറ തൽക്കാലം ഇവിടെയില്ല. അതുകൊണ്ട് ഇപ്പോ ഉള്ള പോസ്റ്റുകളിലെ ചിത്രങ്ങളൊക്കെ ചേട്ടന്റെ നോക്കിയ 5800 എക്സ്പ്രസ്സ് മ്യൂസിക്കിലാണ്).

ഉഴുന്നുവട

മിക്കവാറും എല്ലാ ചടങ്ങുകൾക്കും ഞങ്ങളുടെ വീട്ടിൽ ഉഴുന്നുവടയുണ്ടാക്കും. ഇഡ്ഢലിയുടെ കൂടെയാണ് ഉഴുന്നുവട പതിവ്. വലിയ പാത്രം വെച്ച് എണ്ണ ചൂടാക്കി അതിലേക്ക് മാവിട്ട് കുറേയെണ്ണം ഒരുമിച്ചിട്ട് വറുത്തുകോരിയെടുക്കുന്നതുകാണാൻ ഒരു രസം തന്നെ. അഥവാ ഇഡ്ഡലി മാത്രമേ ഉള്ളൂ എന്നു പറഞ്ഞാൽ ഞങ്ങൾ പറയും പാവം ഇഡ്ഡലി വിഷമിച്ച് പാട്ടുപാടും എന്ന്. “അരികിൽ നീ ഉണ്ടായിരുന്നെങ്കിൽ” എന്ന പാട്ട്.

ഉഴുന്നുവടയുണ്ടാക്കാൻ എളുപ്പമാണ്. അല്പം ചേരുവകളേ വേണ്ടൂ. വേഗം കിട്ടുകയും ചെയ്യും.

ഉഴുന്ന്
പച്ചമുളക്
കറിവേപ്പില
ഇഞ്ചി
കുരുമുളക്
വെളിച്ചെണ്ണ
ഉപ്പ്
ബേക്കിംഗ് പൗഡർ (നിർബ്ബന്ധമില്ല).


ഒരു കപ്പ് ഉഴുന്ന് രണ്ടോ മൂന്നോ മണിക്കൂർ വെള്ളത്തിലിടുക.
സമയം ആയാൽ ഒട്ടും വെള്ളമില്ലാതെ അരയ്ക്കുക.
അരയ്ക്കുമ്പോൾ അതിൽ ഉപ്പും പത്ത് - പന്ത്രണ്ട് മണി കുരുമുളകും ഇടുക.
ഉഴുന്ന് ഒന്ന് അരഞ്ഞിട്ടേ കുരുമുളക് ഇടാവൂ. കുരുമുളക് മുഴുവൻ അരഞ്ഞുപോകരുത്. തരിതരിയായി കിടക്കണം. തിന്നുമ്പോൾ കടിക്കണം.
അഞ്ച് പച്ചമുളക് ചെറുതായി വട്ടത്തിൽ മുറിച്ചെടുക്കുക.
കുറച്ച് കറിവേപ്പിലയും ചെറുതായി അരിഞ്ഞെടുക്കുക.
ഒരു കഷണം ഇഞ്ചിയും ചെറുതായി മുറിച്ചെടുക്കണം.



ഒക്കെ ഉഴുന്നുകൂട്ടിലേക്ക് ഇടുക. അല്പം കായം (പൊടി) ചേർക്കുക. വളരെ സ്വല്പം ബേക്കിംഗ് പൗഡറും ചേർക്കുക. വീട്ടിൽ ചേർക്കാറില്ല.
ഉള്ളിയും തേങ്ങ ചെറുതായി അരിഞ്ഞതും ചേർക്കുന്നതു കണ്ടിട്ടുണ്ട്. ഞാൻ ചേർത്തിട്ടില്ല.



ഒക്കെ യോജിപ്പിച്ച്, കൈയിൽ അല്പം വെള്ളം പുരട്ടി കൂട്ട് എടുത്തുവെച്ച് തുളയുണ്ടാക്കി ചൂടുള്ള വെളിച്ചെണ്ണയിലേക്ക് ഇടുക. ശ്രദ്ധിച്ചില്ലെങ്കിൽ ഉഴുന്നുകൂട്ടിനുപകരം വിരലും കൈയും ഒക്കെ വെളിച്ചെണ്ണയിൽ മുങ്ങും. ഞാൻ പറഞ്ഞില്ലെന്ന് പിന്നെപ്പറയരുത്.




നന്നായി മൊരിച്ച് വറുത്തെടുക്കുക. വെറുതേ തിന്നുക. ചമ്മന്തിയും സാമ്പാറും ഉണ്ടാക്കിയിട്ടുണ്ടെങ്കിൽ അതു കൂട്ടിത്തിന്നുക.

പരിപ്പുവടയും

സാബൂദനവടയും

കടലപ്പരിപ്പ് വടയും ഇവിടെയുണ്ട്.


ഉഴുന്നുവട, ഹോട്ടലിൽ കിട്ടുന്നതുപോലെ ആകൃതിയിൽ കിട്ടിയില്ലെങ്കിൽ വിഷമിക്കേണ്ട കാര്യമൊന്നുമില്ല. ചിലപ്പോളതിൽ, തലേന്നത്തെ ചോറോ അല്ലെങ്കിൽ അരിപ്പൊടിയോ, റവയോ ഒക്കെ കൂട്ടിയിട്ടുണ്ടാകും. നമ്മളുണ്ടാക്കുമ്പോൾ ഉഴുന്ന് മാത്രം ഉപയോഗിച്ചാൽ മതി. ഉണ്ടാക്കിയുണ്ടാക്കി ശരിയാവും.

പണ്ടൊരു ചടങ്ങിന് വീട്ടിലുണ്ടാക്കിയത്.

സാവൂനരി വട

സാവൂനരി വട ഉണ്ടാക്കാന്‍ വല്യ വിഷമം ഒന്നുമില്ലെന്ന് കരുതുക. (ഹും...വിഷമം ആയാലും സഹിച്ചൂടേ? തിന്നാനല്ലേ?)

സാവൂനരി, സാഗോ (Sago), സാബൂദന ഒരു കപ്പ്, അല്ലെങ്കില്‍ രണ്ട് കപ്പ് എടുത്ത് വെള്ളത്തിലിട്ട് വയ്ക്കുക. മൂന്ന് മണിക്കൂര്‍ മതിയാവും. അത് കുതിര്‍ന്നുവരും. അര കപ്പ് ആയാലും മതി. പരീക്ഷണം കഴിഞ്ഞിട്ട് വല്യ തോതില്‍ മതി.

സാവൂനരി - ഒരു കപ്പ്, മൂന്ന് മണിക്കൂര്‍ വെള്ളത്തിലിട്ട് കുതിര്‍ക്കുക. വെള്ളം ഊറ്റിക്കളഞ്ഞ് എടുക്കുക.

ഉരുളക്കിഴങ്ങ് 2 (രണ്ട്) എണ്ണം വേവിച്ച് തൊലികളഞ്ഞ് നന്നായി ഉടച്ചെടുക്കുക.

പച്ചമുളക് രണ്ടെണ്ണം ചെറുതായി വട്ടത്തിലരിഞ്ഞെടുക്കുക.

ഉപ്പ് പാകം പോലെ ഇടുക.

മുളകുപൊടി കാല്‍ ടീസ്പൂണ്‍ ചേര്‍ക്കുക. വേണ്ടെങ്കില്‍ ഒഴിവാക്കാം.

റവ ഒരു ടേബിള്‍സ്പൂണ്‍ ചേര്‍ക്കുക. പഞ്ചസാര രണ്ട് ടീസ്പൂണ്‍ ചേര്‍ക്കുക. മൊരിഞ്ഞ് വരും.

മല്ലിയിലയും കറിവേപ്പിലയും അരിഞ്ഞ് ചേര്‍ക്കുക.

എല്ലാം കൂടെ നന്നായി യോജിപ്പിക്കുക. സാവൂനരിയിലെ വെള്ളം മുഴുവന്‍ പോയി എന്നുറപ്പുവരുത്തിയിട്ടേ, ബാക്കിയുള്ളതൊക്കെ ചേര്‍ക്കാവൂ.

പാചക എണ്ണ ചൂടാക്കിയ ശേഷം, വടയുടെ ആകൃതിയില്‍ പരത്തിവെച്ച് വറുത്തെടുക്കുക.

ഇഞ്ചി അരിഞ്ഞ് ചേര്‍ക്കാം. ചെറിയ ഉള്ളിയോ സവാളയോ ചേര്‍ക്കാം.

ഇഞ്ചി ചട്ണിയുടെ കൂടെ കഴിക്കുക.

ഇതിനു വേണ്ട ഇഞ്ചി ചട്ണിയുണ്ടാക്കുന്നത് ഇങ്ങനെ

തേങ്ങ ചിരവിയെടുക്കുക. ഉപ്പ് ഇടുക. ഇഞ്ചി ഒരു വല്യ കഷ്ണം എടുത്ത്, ചെറുതായരിഞ്ഞ് മിക്സിയില്‍, തേങ്ങയുടെ കൂടെ ഇടുക. (മിക്സി കേടാവാതിരിക്കാന്‍ ഇഞ്ചി കഷ്ണം ആക്കി ഇടുന്നതാവും നല്ലത്). നന്നായി അരച്ചുകഴിഞ്ഞാല്‍ രണ്ട് ടേബിള്‍സ്പൂണ്‍ തൈര്‍ ചേര്‍ക്കുക. മുളകും മുളകുപൊടിയും ഒന്നും വേണ്ട. വടയില്‍ ഉണ്ടല്ലോ.

വട ചൂടോടെ ഈ ചട്ണി കൂട്ടി കഴിക്കുക.

(എങ്ങനെയുണ്ട് വട?

എങ്ങനെ തോന്നി?

ങേ...ഇങ്ങോട്ട് ചോദിക്കുന്നോ?

കുട്ടാ, സംഗതികള്‍ വല്യ കൊഴപ്പമില്ല.

പിന്നെ?

ശ്രുതി അവിടവിടെ പോയിട്ടുണ്ട്.

ശ്രുതിയോ? വടയിലോ?

അല്ല ഉപ്പ്. എന്നാലും മൊത്തത്തില്‍ കൊള്ളാം.)

(സംഗീതപരിപാടി കണ്ട്കണ്ട് ഇങ്ങനെ ആയി. എന്താ ചെയ്യ? ;)

പരിപ്പ് വട

തുവരപ്പരിപ്പ്- 1കപ്പ്

സവാള - 1 ചെറുതായി അരിഞ്ഞത്

പച്ചമുളക് - 3 ചെറുതായി അരിഞ്ഞത്

കറിവേപ്പില - കുറച്ച് . ചെറുതായി അരിഞ്ഞത്

ഇഞ്ചി- ചെറിയ കഷണം ചെറുതായി അരിഞ്ഞത്

വറ്റല്‍ മുളക് - 1

കായം - പൊടി കുറച്ച്

ഉപ്പ്, വെളിച്ചെണ്ണ ഇവ ആവശ്യത്തിന്

തുവരപ്പരിപ്പ് കഴുകി 1-2 മണിക്കൂര്‍ വെള്ളത്തില്‍ ഇട്ടു വെയ്ക്കുക. അതിനു ശേഷം തീരെ വെള്ളമില്ലാതെ വറ്റല്‍ മുളകും ആവശ്യത്തിന് ഉപ്പും ചേര്‍ത്ത് അരച്ചെടുക്കുക. പേസ്റ്റുപോലെ ആകരുത്. കുറച്ച് അരയാനേ പാടുള്ളൂ. കുറച്ച് പരിപ്പായിട്ട് തന്നെ ഉണ്ടാകണം. അതില്‍ സവാളയും പച്ചമുളകും ഇഞ്ചിയും കറിവേപ്പിലയും കായവും ചേര്‍ത്ത് നന്നായി മിക്സ് ചെയ്തു വെക്കുക. ചെറിയ ഉരുളകള്‍ ആക്കി കൈയില്‍ എടുത്ത് വടയുടെ ആകൃതിയില്‍ അമര്‍ത്തി വെളിച്ചെണ്ണയില്‍ വറുത്തെടുക്കുക.

Tur dal ( thuvarapparipp) - 1 cup

Onion -big one- 1 chopped

10 Curryleaves - chopped

Ginger small piece - chopped

Greenchilli - 3 chopped

Red chilli- 1

Salt to taste

Asafoetida powder- a pinch

Coconut oil for frying

Wash and soak dal for 1-2 hours. Grind dal coarsely, without water, along with red chilly and salt . Then add ginger, green chilli, onion , curry leaves , asafoetida and mix . Make vada shape and deep fry.