Tuesday, October 05, 2010

ചെറുപയർ വട

ചെറുപയർ ഇഷ്ടമാണോ? ചെറുപയർ ആരോഗ്യത്തിനു നല്ലതാണ്. എന്നും ചെറുപയർ വേവിച്ച് കഴിക്കാം. ചെറുപയർ കൊണ്ടുണ്ടാക്കുന്ന വട ദിവസവും കഴിക്കാൻ പറ്റില്ല. എന്നാലും ഇടയ്ക്കൊരുദിവസം ഉണ്ടാക്കിക്കൂടേ? എളുപ്പം കഴിയും വടയുണ്ടാക്കുന്ന ജോലി.



ചെറുപയർ ഏകദേശം 100 ഗ്രാം എടുക്കണം. വെള്ളത്തിലിട്ട് മൂന്നോ നാലോ മണിക്കൂർ കുതിർക്കാൻ വയ്ക്കണം.





വലിയ ഉള്ളി - രണ്ട് ചെറുത്/ ഒന്ന് വലുത്. തോലുകളഞ്ഞ് ചെറുതാക്കി അരിയുക.
പച്ചമുളക് - രണ്ടെണ്ണം. വട്ടത്തിൽ ചെറുതായി മുറിയ്ക്കുക.
ഇഞ്ചി - ഒരു കഷണം. തോലുകളഞ്ഞ് ചെറുതാക്കി അരിഞ്ഞുവയ്ക്കുക.
ചുവന്ന മുളക് - രണ്ടെണ്ണം.
കായം പൊടി- കുറച്ച്.
കറിവേപ്പില - ഒരു വല്യ തണ്ടിലെ ഇല. ചെറുതാക്കി മുറിയ്ക്കുക.
ഉപ്പ്.
അരിപ്പൊടി - ഒരു ടേബിൾസ്പൂൺ.
വെളിച്ചെണ്ണ - വട വറുക്കാൻ.




ചെറുപയർ കഴുകിയെടുത്ത് ചുവന്ന മുളക് ഇട്ട് അരയ്ക്കുക. തീരെ വെള്ളം ഉണ്ടാവരുത്. അധികം പേസ്റ്റുപോലെ ആവരുത്. അരച്ചുകഴിഞ്ഞാൽ അതിലേക്ക് പച്ചമുളക്, കറിവേപ്പില, ഉള്ളി, ഇഞ്ചി, കായം പൊടി, അരിപ്പൊടി, ആവശ്യത്തിന് ഉപ്പ് എന്നിവയൊക്കെച്ചേർത്ത് കുഴയ്ക്കുക. വെള്ളമൊന്നും ചേർക്കല്ലേ. അഞ്ചുമിനുട്ട് വയ്ക്കാം. വെളിച്ചെണ്ണ ചൂടാക്കുക. കൂട്ട് എടുത്ത് ഉരുട്ടുക. അത് കൈയിൽ വച്ച് ഒന്നു പരത്തി വെളിച്ചെണ്ണയിൽ ഇട്ട് വറുത്തെടുക്കുക.



എണ്ണ ചൂടാക്കുന്നതിനുമുമ്പ് ഉരുട്ടി വയ്ക്കാം. അധികം വലുപ്പം വേണ്ട. ഒരു ചെറിയ ചെറുനാരങ്ങ വലുപ്പത്തിൽ ആയാൽ കുഴപ്പമില്ല. കൈയിൽ പരത്തുമ്പോൾ നടുവിലുള്ള ഭാഗം നന്നായി അമർത്തി പരത്തുന്നതാവും നല്ലത്. എണ്ണ കുറേ ചൂടാക്കി വയ്ക്കരുത്. അധികം ചൂടായാൽ പുറം കരിയുകയും അകത്ത് ശരിക്കും വേവാതെയും ഇരിക്കും. പയറ് അരച്ചാൽ അല്പം പശപോലെ ഇരിക്കും. അതുകൊണ്ടാണ് അരിപ്പൊടി ചേർത്തത്. ചേർത്തില്ലെങ്കിലും കുഴപ്പമില്ല. മല്ലിയില ഇഷ്ടമുണ്ടെങ്കിൽ അതും ചേർക്കാം.


(ഞങ്ങളുടെ ക്യാമറ തൽക്കാലം ഇവിടെയില്ല. അതുകൊണ്ട് ഇപ്പോ ഉള്ള പോസ്റ്റുകളിലെ ചിത്രങ്ങളൊക്കെ ചേട്ടന്റെ നോക്കിയ 5800 എക്സ്പ്രസ്സ് മ്യൂസിക്കിലാണ്).

5 comments:

ജിജിIIGG said...

thu kollaalo...try cheythu nokkeettu ineem comment idaam

Jishnu said...

വടതിന്നാന്‍ മോഹിച്ചിരുന്ന നേരത്ത് ദാ ഒരു പോസ്റ്റ്‌......

സു | Su said...

ജിജി :) ശരി.

ജിഷ്ണു :) എന്നാൽ വേഗം ഉണ്ടാക്കിത്തിന്നൂ.

ശ്രീ said...

ആഹാ. ചെറുപയറു കൊണ്ടും വടയോ? :)

സു | Su said...

ശ്രീ :) നല്ലതാണ്.

 
Creative Commons License
This work is licensed under a Creative Commons Attribution-NonCommercial-NoDerivs 2.5 License.

Copyright 2006-2015 [സു | Su]