ചക്കയുപ്പേരി

ചക്കയുപ്പേരിയുണ്ടാക്കാൻ എളുപ്പമാണ്. ഇടിച്ചക്കയുപ്പേരിയുണ്ടാക്കാൻ എടുക്കുന്ന ചക്കയേക്കാൾ അല്പം കൂടെ മൂത്ത ചക്ക വേണം.




ഇടിച്ചക്കയുപ്പേരിയുണ്ടാക്കുമ്പോൾ, അതിൽ കുരു മൂത്തിട്ടുണ്ടാവില്ല. ഇതിൽ അല്പം കുരു ഉണ്ടാവും.




ചക്ക - നടുവേ മുറിച്ച്, നാലാക്കി മുറിച്ച്, തോലുകളഞ്ഞ്, ഉള്ളിലുള്ള കൂഞ്ഞ് കളഞ്ഞ്, ചെറുതാക്കി അരിഞ്ഞെടുക്കുക. എത്രയും ചെറുതാവുന്നോ അത്രയും നല്ലത്.
ഉഴുന്നുപരിപ്പ് - കുറച്ച്.
കടുക് - കുറച്ച്.
കറിവേപ്പില.
ഉപ്പ്.
മഞ്ഞൾപ്പൊടി.
തേങ്ങ.
വെളിച്ചെണ്ണ.
ഇത്രയും വസ്തുക്കളേ ആവശ്യമുള്ളൂ. പിന്നെ കുറച്ചു വെള്ളവും.

മുറിച്ചെടുത്ത ചക്കയ്ക്ക് ആവശ്യമായ വറവിടുക. വെളിച്ചെണ്ണ ചൂടാവുമ്പോൾ ആദ്യം ഉഴുന്ന് ഇടുക, ചുവന്നു വരുമ്പോൾ കടുകും, ചുവന്ന മുളകും, ഇടുക. കടുക് പൊട്ടിക്കഴിഞ്ഞാൽ കറിവേപ്പിലയും ഇടുക. അതിലേക്ക് മുറിച്ചുവെച്ചിരിക്കുന്ന ചക്കയിടണം. ഇളക്കി, ഉപ്പും മഞ്ഞളും ഇട്ട് വീണ്ടും ഇളക്കി അല്പം വെള്ളം ഒഴിച്ച്, അടച്ചുവെച്ച് വേവിക്കുക.




വെള്ളം, ചക്ക വേവാനുള്ളത് മാത്രമേ ഒഴിക്കാവൂ. വെന്ത്, വാങ്ങിയാൽ തേങ്ങയിട്ടിളക്കുക.





ചക്ക കുക്കറിൽ വെച്ചും വേവിക്കാം. ചക്കയിൽ വെള്ളമൊഴിക്കേണ്ട. ഉപ്പും മഞ്ഞളുമിട്ട് വേവിക്കണം. അതു കഴിഞ്ഞ് വറവിലേക്ക് ഇട്ടാൽ മതി.


ഈ ബ്ലോഗ് നോക്കുകയും, പാചകക്കുറിപ്പുകൾ പരീക്ഷിക്കുകയും ചെയ്യുന്ന എല്ലാവർക്കും നന്ദി.

പുതുവത്സരാശംസകൾ!

ചക്കപ്പപ്പടം

ചക്കപ്പപ്പടം തിന്നിട്ടുണ്ടോ? ഇല്ലെങ്കിൽ ഈ വേനൽക്കാലത്ത് ചക്കപ്പപ്പടം ഉണ്ടാക്കിത്തിന്നുക. വേനൽക്കാലമായി. ഉണക്കിയെടുത്ത് സൂക്ഷിക്കുന്നതൊക്കെ ഉണ്ടാക്കാനുള്ള കാ‍ലമായി. ചക്കക്കാലമായതുകൊണ്ട് ചക്കപ്പപ്പടം തന്നെ ആയിക്കോട്ടെ ആദ്യം. അമ്മായി കുറേ ഉണ്ടാക്കിവച്ച് ഞങ്ങൾക്കൊക്കെ തരാറുണ്ടായിരുന്നു. ഇപ്രാവശ്യം ഞാൻ തന്നെ തുനിഞ്ഞിറങ്ങി. അമ്മായിയോടും മറ്റുള്ളവരോടുമൊക്കെ അഭിപ്രായം ചോദിച്ചറിഞ്ഞു. വളരെക്കുറച്ച് ഉണ്ടാക്കി. വെയിലിനും ചക്കയ്ക്കും ക്ഷാമമില്ലല്ലോ തൽക്കാലം. സമയം കൂടുതലുള്ളപ്പോൾ കൂടുതലുണ്ടാക്കാം.

ചക്കപ്പപ്പടം ഉണ്ടാക്കാൻ ആവശ്യമുള്ളത്:-

പച്ചച്ചക്കച്ചുള - കുരു കളഞ്ഞ് എടുക്കുക.
കായം പൊടി
മുളക് അല്ലെങ്കിൽ മുളകുപൊടി
ജീരകം
എള്ള്
ഉപ്പ്

ഞാൻ 25 ചുളയാണെടുത്തത്.
ഒരു ടീസ്പൂൺ മുളകുപൊടിയിട്ടു. കുറച്ച് കായം ഇട്ടു. ജീരകം ഒരു ടീസ്പൂൺ ഇട്ടു. എള്ള് രണ്ട് ടീസ്പൂൺ ഇട്ടു. ഉപ്പിട്ടു.

പപ്പടം ഉണ്ടാക്കുന്ന വിധം വളരെ എളുപ്പമാണ്.




ആദ്യം ചുള വേവിക്കണം.



അത് തണുത്താൽ അരച്ചെടുക്കണം.




എന്നിട്ട് ബാക്കി ചേരുവകളൊക്കെ ചേർക്കണം.
അല്ലെങ്കിൽ മുളകും ഉപ്പുമൊക്കെ അരയ്ക്കുമ്പോൾ ചേർക്കാം. അരയ്ക്കുമ്പോൾ ചേർത്താൽ ഒരു ഗുണം കൂടെയുണ്ട്. അവിടവിടെയായിട്ട് ആവില്ല ഒന്നും. എല്ലായിടത്തും ഒരുപോലെ ഉപ്പും മുളകുമൊക്കെ പിടിക്കും.
മുളകുപൊടിയ്ക്കും മുളകിനും പകരം പച്ചമുളക് ചേർക്കാം അരയ്ക്കുമ്പോൾ.





എല്ലാം യോജിപ്പിച്ച ശേഷം, പായയിലോ തുണിയിലോ പരത്തി വെയിലത്ത് വച്ച് ഉണക്കിയെടുക്കുക. പ്ലാസ്റ്റിക് കടലാസിൽ ആയാലും മതി. കനം കുറച്ച് പരത്താൻ കഴിയുമെങ്കിൽ നല്ലത്.



നല്ല വെയിലു വേണം. നല്ല പോലെ ഉണങ്ങുകയും വേണം.



കുറച്ചുദിവസം ഉണക്കിയെടുക്കാം. കൂടുതൽ ദിവസം ഇരിക്കണമെങ്കിൽ നല്ലപോലെ ഉണക്കുന്നതാവും നല്ലത്.

ചേരുവകളൊക്കെ ഏകദേശം ഒരു അളവുനോക്കി ഇടുന്നതാവും നല്ലത്. എരിവും ഉപ്പുമൊക്കെ. 25 ചുളയ്ക്ക് ഒരു ടീസ്പൂൺ മുളകുപൊടി ഇട്ടാൽ എരിവുണ്ട്. എരിവു തീരെ വേണ്ടെന്നുള്ളവർ മുളകൊന്നും ചേർക്കണമെന്നുമില്ല.

നന്നായി ഉണക്കിക്കഴിഞ്ഞാൽ വേണ്ടപ്പോൾ വെളിച്ചെണ്ണയിലിട്ട് വറുത്തെടുക്കുക.

ചക്ക പെരട്ടിയുപ്പേരി

ചക്ക കാണാത്ത മലയാളിയുണ്ടോ? കഴിക്കാത്ത മലയാളിയുണ്ടോ? ഇഷ്ടമില്ലാത്തവർ എന്തായാലും ഉണ്ടാവും. ഇഷ്ടമുള്ളവർ അതിലേറെ ഉണ്ടാവും. ചക്കക്കാലമായി. ഇടിച്ചക്കയുടെ കാലം കഴിഞ്ഞ് മൂത്ത ചക്കയിലേക്കെത്തി. ഒരു ചക്കയ്ക്ക് എത്ര ഭാഗമുണ്ടെന്ന് അറിയാമോ?

കരൂൾ - ചക്കയുടെ മുള്ളുള്ള ഭാഗത്തിന് പറയുന്നതാണ്.
മടൽ - മുള്ളു കഴിഞ്ഞ ഭാഗം.
കൂഞ്ഞ് - നടുവിലുള്ള ഭാഗം. അവിടെയാണ് ചക്കപ്പശ/ചക്കവിളഞ്ഞി/ചക്കമുളഞ്ഞ് ഉണ്ടാവുക.
ചവിണി/ചകിണി - വെളുത്ത നൂലുപോലെയുള്ള ഭാഗം.
ചുള - ചക്കയുടെ ശരിക്കുപയോഗിക്കുന്ന ഭാഗം.
പോണ്ടി - കുരുവിന്റെ മുകളിലുള്ള വെളുത്ത ഭാഗം
തോല് - കുരുവിനു മുകളിലുള്ളത്
പിന്നെ ചക്കക്കുരു - ചക്കക്കുള്ളിലെ കുരു.

ചക്ക അപ്പാടെയും, ഭാഗം ഭാഗമായും പല വിഭവങ്ങളും ഉണ്ടാക്കാം. എന്തായാലും ചക്കക്കാലത്ത് ചക്കവിഭവമില്ലെങ്കിൽ പിന്നെന്ത് പാചകം.

ഇത് ചക്കയുപ്പേരിയാണ്. ചോറിനു മാത്രമല്ല ചായപ്പലഹാരമായും ഇതുണ്ടാക്കാം. ചക്ക പെരട്ടി ഉപ്പേരി എന്നാണ് പറയുന്നത്. ചക്ക മെഴുക്കുപുരട്ടി, ചക്കത്തോരൻ എന്നൊക്കെപ്പറയാം.




ചക്കച്ചുളയെടുത്ത്, കുരുവും, മുകളിലും താഴെയുള്ള ഭാഗവും മുറിച്ച്, നീളത്തിൽ മുറിച്ചെടുക്കുക. മൂക്കും വാലും ഉപ്പേരിയിൽ ഇടുന്നതുകൊണ്ട് കുഴപ്പമൊന്നുമില്ല.

പാത്രം അടുപ്പത്ത് വച്ച്, അതിൽ രണ്ടു ടേബിൾസ്പൂൺ വെളിച്ചെണ്ണയൊഴിക്കുക. ഒരു ടീസ്പൂൺ ഉഴുന്നിടുക. ഉഴുന്ന് ചുവന്നു വന്നാൽ കടുക്, ചുവന്ന മുളക് പൊട്ടിച്ചത് എന്നിവയിടുക. അത് പൊട്ടി പാകമായാൽ കറിവേപ്പിലയിടുക. അതിലേക്ക് ചക്കച്ചുള മുറിച്ചുവച്ചതിടുക. ഉപ്പിടുക, മഞ്ഞളിടുക. അടച്ചുവയ്ക്കുക.
തീ കുറച്ചുവെച്ച് വേവിച്ചാൽ വെള്ളം മിക്കവാറും ഒഴിക്കേണ്ടിവരില്ല. ഇനി കരിഞ്ഞുപോകും എന്നു തോന്നുന്നെങ്കിൽ അല്പം മാത്രം വെള്ളം ചേർക്കാം.

വെന്ത് പാകമായാൽ വാങ്ങിവച്ച് ചിരവിയ തേങ്ങ ചേർക്കുക.

കുക്കർ ചക്കയപ്പം

ഇലയട ആയിരുന്നു വീട്ടിൽ മിക്കപ്പോഴും ഉണ്ടാക്കിയിരുന്ന മധുരം. എല്ലാവരും കൂടെയാണ് പാചകം. ഇലയടയ്ക്കുള്ളിൽ വയ്ക്കുന്ന കൂട്ടിനെ ഞങ്ങൾ “പണ്ടം” എന്നാണ് വിളിക്കുന്നത്. പണ്ടം എന്നതിന് ആഭരണം എന്നുകൂടെയുണ്ട് ഞങ്ങളുടെ നാട്ടിൽ അർത്ഥം. എന്നിട്ട്, ഞങ്ങൾ അരിമാവ് പരത്തിയതിലേക്ക് പണ്ടം വയ്ക്കുമ്പോൾ, ഇതിനു കുറച്ച് പണ്ടം കൂടുതൽ കൊടുത്തേക്കാം എന്നും പറഞ്ഞ് ചിരിക്കുമായിരുന്നു. ഇലയട കഴിഞ്ഞാൽ ചക്കയപ്പവും ചക്കയടയും ഇടയ്ക്കൊക്കെ ഉണ്ടാക്കിയിരുന്നു.

ചക്കയട, അമ്മ മിക്കവാറും ഉണ്ടാക്കുന്നത്, കുക്കറിലാണ്. അതായത് ഇലയൊന്നുമില്ലാതെ. മാവുകലക്കി, കുക്കറിന്റെ തട്ടുകളിലേക്ക് ഒഴിച്ച് വേവിച്ചെടുക്കും. ആദ്യം വെന്തോന്ന് നോക്കിയിട്ട്, വെന്തില്ലെങ്കിൽ, കുറച്ചുസമയംകൂടെ വേവിക്കും. അടയുടെ സ്വാദുതന്നെ. അത്രത്തോളം വരില്ലെങ്കിലും. എളുപ്പത്തിൽ ജോലികഴിയും എന്നതാണ് ഗുണം.
മിനുസമായിപ്പൊടിച്ച അരിപ്പൊടി, (അരിപ്പൊടി വറുത്തെടുക്കും ഇവിടെ) ശർക്കര, ചക്കവരട്ടിയത്, ഏലയ്ക്ക പൊടിച്ചത്, തേങ്ങ ചെറുതായി നുറുക്കിയത് എന്നിവ വേണം. ചിത്രത്തിൽ ഉള്ളതുപോലെ മതി അളവ്. ശർക്കരയും ഏലയ്ക്കയും ചിത്രത്തിൽ ഇല്ല. ഏകദേശം കണക്കാക്കി എടുക്കുക. ആറേഴ് ആണി മതിയാവും. മധുരം വേണ്ടതനുസരിച്ച് കൂട്ടുകയും കുറയ്ക്കുകയും ചെയ്യാം.

ചക്കവരട്ടിയിൽ ശർക്കര കുറവായിരിക്കും. അതുകൊണ്ട് കുറച്ച് ശർക്കര എടുത്ത്, അരിപ്പൊടിക്കു മധുരം വരാനും കണക്കാക്കി, പാവുകാച്ചുക. (വെള്ളമൊഴിച്ച് അടുപ്പത്തുവെച്ച് ഉരുക്കുക). മിനുസമായി പൊടിച്ച അരിപ്പൊടിയെടുക്കുക. ആ ഉരുകിയത് അരിച്ചിട്ടാണെങ്കിൽ അരിച്ചിട്ട് അല്ലെങ്കിൽ അപ്പാടെ അരിപ്പൊടിയിലേക്ക് ഒഴിക്കുക. ഏലയ്ക്ക പൊടിച്ചിടുക. തേങ്ങാക്കഷണങ്ങൾ ഇടുക. ചക്കവരട്ടിയതും ഇട്ട് ഒന്നായി ഇളക്കി കുറച്ച് വെള്ളമായി എടുത്ത് കുക്കറിന്റെ തട്ടിലോ, കുക്കറിൽ വെക്കാവുന്ന പാത്രത്തിലോ കുറച്ച് നെയ് പുരട്ടിയിട്ട് ഒഴിയ്ക്കുക. (നെയ് പുരട്ടിയില്ലെങ്കിലും സാരമില്ല. പക്ഷെ വെന്താൽ അപ്പാടെ എടുക്കണമെങ്കിൽ ചിലപ്പോൾ കിട്ടിയെന്നുവരില്ല). കുക്കറിന്റെ കൂടെ കിട്ടുന്ന തട്ടിൽത്തന്നെയാണ് ഞാൻ വെച്ചിരിക്കുന്നത്. വലുതിൽ.

ഒരു പ്ലേറ്റുകൊണ്ട് അടയ്ക്കുക. കുക്കർ അടയ്ക്കുക. വേവിക്കുക.


കുക്കർ ചക്കയപ്പം തയ്യാർ. ഇതൊരു എളുപ്പപ്പണിയാണ്. വെന്തോന്ന് നോക്കാൻ ഒരു ഈർക്കിലോ പപ്പടം കുത്തിയോ എടുത്ത് അപ്പത്തിൽ ഒന്ന് കുത്തിയെടുത്ത് നോക്കുക. പറ്റിപ്പിടിച്ചാൽ വെന്തില്ല.

ഒന്നു തണുത്താൽ പ്ലേറ്റിലേക്ക് മാറ്റാം.


മുറിച്ചെടുക്കാം. ഇഷ്ടമുള്ളതുപോലെ.



കുക്കറിൽ വെക്കുമ്പോൾ ശ്രദ്ധിക്കേണ്ടത്, കുറച്ചുനേരം എടുക്കും ഇത് വേവാൻ എന്നുള്ളതുകൊണ്ട് കുക്കറിൽ നല്ലപോലെ വെള്ളം ഒഴിക്കണം. കൂട്ടൊഴിച്ച പാത്രത്തിനടിയിൽ വേറൊരു പാത്രം (അതിൽ വെള്ളം ഒഴിക്കാം. നീങ്ങിപ്പോകാതിരിക്കാൻ കനത്തിന്) വെക്കാം. എന്നാൽ കുക്കറിലൊഴിച്ച വെള്ളം തിളച്ചുപൊന്തി കൂട്ടിലേക്ക് കയറില്ല.
ചക്കവരട്ടിയത്, ശർക്കര വെള്ളത്തിലേക്കിട്ടിളക്കി ഒന്ന് യോജിപ്പിച്ചാലും നന്നായിരിക്കും. ചൂടോടെ.

ചക്കവരട്ടിയത് കടയിൽ ഇഷ്ടം പോലെ കിട്ടാനുണ്ടല്ലോ. അതുകൊണ്ട് എളുപ്പമായി ഇത് ചെയ്യാം. അരിപ്പൊടിയും കിട്ടും.

ഇവിടെ ചക്കവരട്ടിയത് വീട്ടിൽത്തന്നെയുണ്ട്. അരിപ്പൊടിയും മിക്കവാറും വീട്ടിൽ ഉണ്ടാക്കിയെടുക്കുകയാണ് ചെയ്യാറ്. ഇടയ്ക്ക് കടയിൽ നിന്നു വാങ്ങും.

ചക്കയട

അമ്മ, ഹൈസ്കൂളില്‍ കണക്ക് അദ്ധ്യാപിക ആയിരുന്നു. മക്കളൊക്കെ വലുതായി ഓരോവഴിക്കുപോയപ്പോള്‍ വളന്ററി റിട്ടയര്‍മെന്റ് എടുക്കുകയാണുണ്ടായത്. അതിരാവിലെ എണീറ്റ്, ചായപ്പലഹാരങ്ങളും, ഉച്ചയ്ക്കത്തേയ്ക്കുള്ള ചോറും കൂട്ടാനും ഉപ്പേരിയും ഒക്കെ തയ്യാറാക്കിയിട്ടാണ് സ്കൂളിലേക്ക് പോയിരുന്നത്. ഉച്ചഭക്ഷണം കൊണ്ടുപോവുകയും ചെയ്തിരുന്നു. ഒരു പാക്കറ്റ് ബ്രഡും തുറന്നുവെച്ച് കടിച്ചുതിന്നോന്ന് പറയാറില്ല അമ്മ. പനിക്കുമ്പോള്‍ തിന്നാനാണ് ബ്രഡ് എന്നാണ് അന്നും ഇന്നും സങ്കല്‍പ്പം. ;) എന്നും ജോലികഴിഞ്ഞുവന്ന്, അരച്ചും പൊടിച്ചും നല്ല രുചിയുള്ള ഭക്ഷണം ഉണ്ടാക്കിത്തന്നിരുന്നു. അങ്ങനെ, ഉദ്യോഗസ്ഥയായിരുന്ന അമ്മയെ സഹായിച്ചാണ് മക്കള്‍ നല്ല പാചകക്കാരായിത്തീര്‍ന്നത്. എല്ലാം ജോലിയും ചെയ്യാന്‍ പഠിക്കുന്നതില്‍ തെറ്റൊന്നുമില്ല, നിങ്ങള്‍ക്ക് പിന്നീട് ആവശ്യമില്ലെങ്കില്‍ എടുക്കേണ്ടെന്ന് വെച്ചാല്‍പ്പോരേന്നും പറഞ്ഞ് അമ്മ വീട്ടുജോലിയൊക്കെ പഠിപ്പിച്ചു. അതുകൊണ്ടുതന്നെ, കല്യാണം കഴിഞ്ഞപ്പോള്‍, ഒരു പാചകപുസ്തകവും പിടിച്ച് പാചകം ചെയ്യേണ്ട ഗതികേട് വന്നില്ല. പണ്ട് പാത്രം കഴുകാന്‍ മടിവരുമ്പോള്‍, ഇവിടെ കുറേ പാത്രം ഉണ്ട്, പിന്നീട് എന്റെ വീട്ടില്‍ ഒരു പ്ലേറ്റും, ഒരു പാത്രവും, ഒരു സ്പൂണും ഒരു ഗ്ലാസ്സും മാത്രേ ഉണ്ടാവൂ, അരിമാവുപോലും ഗ്ലാസ്സില്‍ വയ്ക്കുമെന്നൊക്കെപ്പറയുമായിരുന്നു ഞാന്‍. ;) അമ്മയ്ക്ക് പുറത്തെ ഭക്ഷണം അന്നും ഇന്നും ഇഷ്ടമല്ല. വല്ല ചിപ്സോ, മിക്സ്ചറോ കഴിച്ചാലായി. പിന്നെ പഴങ്ങളും. വീട്ടുഭക്ഷണം മാത്രമേ കഴിക്കൂ. ഞങ്ങളൊക്കെ പുറത്തുനിന്ന് ഇടയ്ക്ക് കഴിക്കുമ്പോള്‍, എന്തിനാ വെറുതെ, വീട്ടില്‍ വൃത്തിയില്‍ ഉണ്ടാക്കിക്കഴിച്ചൂടേന്ന് ചോദിക്കും. ഇന്ന് മാതൃദിനം ആണത്രേ. അമ്മയെ ഓര്‍മ്മിക്കാനും സ്നേഹിക്കാനും ഒന്നും ഒരു ദിനത്തിന്റെ ആവശ്യമില്ല. എന്നും മിണ്ടാറുണ്ട്. എന്നാലും ഇന്നത്തെ പാചകം അമ്മയ്ക്ക് വേണ്ടിയാവട്ടേന്ന് കരുതി. മക്കള്‍ തിന്നാലും മതിയല്ലോ അമ്മയ്ക്ക്.
അമ്മയുണ്ടാക്കുന്നതിന്റെ അയല്‍‌വക്കത്തൊന്നും വരില്ലെങ്കിലും ഞാനും അടയുണ്ടാക്കാന്‍ തീരുമാനിച്ചു. ചക്ക വരട്ടിത്തന്നത് അമ്മയാണ്. ഇക്കൊല്ലത്തേതല്ല, കഴിഞ്ഞ കൊല്ലത്തേതാണ് ചക്കപ്പേസ്റ്റ്. അമ്മയെ രാവിലെത്തന്നെ വിളിച്ച്, അടയുണ്ടാക്കുന്നുണ്ടെന്ന് അറിയിപ്പ് നടത്തുകയും ചെയ്തു.
ആദ്യം ശര്‍ക്കര പാവുകാച്ചി, അതിലേക്ക് ആവശ്യമുള്ള ചക്കപ്പേസ്റ്റും ഇട്ട് ഇളക്കണം. മധുരം നന്നായിട്ട് ഇഷ്ടമാണെങ്കില്‍, അടയുടെ എണ്ണത്തില്‍ ശര്‍ക്കര എടുക്കാം. പത്ത് അടയ്ക്ക്, ചക്കപ്പേസ്റ്റ് മൂന്ന് ടേബിള്‍സ്പൂണ്‍ മതിയാവും. അത് നന്നായി ഇളക്കിയിട്ട് വാങ്ങിവെച്ച്, ഏലക്കായ പൊടിച്ചതും, തേങ്ങ ചെറുതായി മുറിച്ചതും ഇടണം. മിനുസമായിട്ട് പൊടിച്ച അരിപ്പൊടിയും ഇടണം. പത്ത് ടേബിള്‍സ്പൂണ്‍ ഇട്ടുനോക്കുക. എന്നിട്ട് വെള്ളം പോലെയുണ്ടെങ്കില്‍ കുറച്ചും കൂടെ ഇടുക.

ഇല മുറിച്ച് കഴുകി വാട്ടിയെടുത്ത്, അതിലേക്ക് , അടയുടെ കൂട്ട് ഒഴിക്കുക.

സ്പൂണുകൊണ്ട് പരത്താം. ഇനി കൈകൊണ്ടാണെങ്കില്‍ അങ്ങനെ.

എല്ലാ ഇലക്കഷണത്തിലും ഇട്ട് പരത്തിക്കഴിഞ്ഞ്, ഒരു പാത്രമെടുത്ത്, അതിലേക്ക് മടക്കിമടയ്ക്കിവെയ്ക്കുക.

ഇവിടെ കുക്കറിന്റെ തട്ടില്‍ത്തന്നെ വെച്ചു.

നന്നായി വേവിച്ച് എടുക്കുക.

ഒന്ന് തണുത്തതിനുശേഷം ഇല നിവര്‍ത്തിനോക്കുക.

എന്നിട്ട് തിന്നുക.

ഇലയട ഇവിടെയുണ്ട്

ചക്കച്ചുള വറുക്കേണ്ടേ?

ചക്ക വറുത്തിട്ട്, കറുമുറെ തിന്നാന്‍ ഇഷ്ടമില്ലാത്തവര്‍ ഉണ്ടോ? വിഷുവൊക്കെ കഴിഞ്ഞ് അച്ഛനേയും അമ്മയേയും സന്ദര്‍ശിക്കാന്‍ പോയപ്പോള്‍ അവിടെയിരിക്കുന്നു ഒരു പകുതിച്ചക്ക.

അതെങ്കില്‍ അത്. അമ്മ പറഞ്ഞു, അത്രയ്ക്ക് മൂത്തിട്ടൊന്നുമില്ല, എന്നാലും വേണമെങ്കില്‍ വറുക്കാം. വേണ്ടതുകൊണ്ടാണല്ലോ വേരിലും കായ്ക്കുന്നത്.
അങ്ങനെ എല്ലാരും കൂടെ വെട്ടിക്കീറി.

ചുളയെടുത്ത് വേറെയിട്ടു.

ചുളയുടെ മുകളിലും താഴെയും കുറച്ച് കളഞ്ഞ്, കുരുകളഞ്ഞ് മുറിച്ചു. നീളവും വീതിയുമൊക്കെ കൃത്യം കൃത്യം ആവണം. അല്ലെങ്കില്‍ വറവ് ഒരുപോലെ ആകില്ല. എന്നാലും ടേപ്പ് വെച്ച് അളക്കുകയൊന്നും വേണ്ട.

അരിഞ്ഞു പകുതിയായപ്പോ അമ്മ അടുപ്പത്ത് ഉരുളി വെച്ചു. വെളിച്ചെണ്ണയൊഴിച്ചു ചൂടാക്കാന്‍ വെച്ചു.

വലിയ ചീനച്ചട്ടി ഉണ്ടെങ്കിലും അതിലും കുറച്ചുകൂടെ ഇട്ടുവറുക്കാന്‍ ഉരുളിയല്ലേ സൌകര്യം.
ഉപ്പും പുരട്ടി, ചൂടായ വെളിച്ചെണ്ണയിലേക്കിട്ടു.

കുറേ മൊരിഞ്ഞപ്പോള്‍ തിരിച്ചും മറിച്ചുമിട്ടു.

പാകമായപ്പോള്‍ എടുത്തും വച്ചു.

ഇനി തിന്നാന്‍ ആരുണ്ടെന്ന് ചോദിക്കേണ്ടല്ലോ. വേറെ അരിഞ്ഞുവെച്ചിരിക്കുന്ന, ചുളയുടെ മുകളിലുള്ള മൂക്ക് എന്നു പറയുന്ന ഭാഗവും വറുക്കും.
അങ്ങനെ അമ്മയുടെ അടുക്കളയില്‍ നിന്ന് കറിവേപ്പിലയിലേക്ക് ചക്ക വറുത്തിട്ടു.

ഇടിച്ചക്ക മോരൂട്ടാന്‍

ഒരു ഇടിച്ചക്കയുടെ നാലിലൊന്ന് എടുത്ത് തോലൊക്കെക്കളഞ്ഞ് നല്ലപോലെ ചെറുതാക്കി മുറിക്കുക. അതില്‍ ആവശ്യത്തിനു ഉപ്പും മഞ്ഞളും ഇടുക. നല്ലപോലെ വേവിക്കണം. വെന്തു കഴിഞ്ഞാല്‍ അതിലേക്ക് ഒരു മൂന്നുനാലു ടേബിള്‍സ്പൂണ്‍ തേങ്ങയും, ജീരകവും, മൂന്ന് പച്ചമുളകും ചേര്‍ത്തരച്ചത് ചേര്‍ക്കുക. മോരും കുറച്ച് ഒഴിക്കുക. മോര് ആദ്യം ഒഴിച്ച് തിളപ്പിച്ചാലും മതി. തേങ്ങ കൂട്ടുന്നതിനുമുമ്പ്. ഒന്നു തിളച്ചാല്‍ വാങ്ങിവെച്ച് വറവിടുക.



പച്ചമുളക് വേണ്ടെങ്കില്‍ വേവിക്കുമ്പോള്‍ മുളകുപൊടി ഇടണം.

ഇടിച്ചക്കസ്സാമ്പാര്‍

ഇടിച്ചക്ക കൊണ്ട് അനേകം വിഭവങ്ങള്‍ ഉണ്ടാക്കാം. ചക്ക കൊണ്ടുള്ള സാമ്പാറിനും നല്ല സ്വാദാണ്. ഇടിച്ചക്ക രണ്ടായി മുറിച്ച് അതിന്റെ പശ കളഞ്ഞ്, തോലുചെത്തിക്കളഞ്ഞ്, ഉളളിലുള്ള കൂഞ്ഞ് എന്നതും കളഞ്ഞ് ചെറുതായി മുറിയ്ക്കണം. കൈയില്‍ എണ്ണ പുരട്ടിയാല്‍ പറ്റിപ്പിടിക്കില്ല.

ഒരു പകുതിച്ചക്കയുടെ മുക്കാല്‍ ഭാഗം മതി. മുറിച്ച ശേഷം, രണ്ട് ടേബിള്‍സ്പൂണ്‍ പരിപ്പിന്റെ കൂടെ, ഇടിച്ചക്കയും, ആവശ്യത്തിനു മഞ്ഞളും ഇട്ട് വേവിക്കുക. കുക്കറില്‍ വേവിയ്ക്കാം. നന്നായി വേവുന്നതാണ് നല്ലത്. ഒരു നെല്ലിക്കാവലുപ്പത്തിലും അല്പം കൂടെ പുളി വെള്ളത്തിലിട്ട്, കുറച്ചുകഴിയുമ്പോള്‍ ആ വെള്ളം എടുക്കുക. കഷണങ്ങള്‍ വെന്തുകഴിഞ്ഞാലാണ് പുളിവെള്ളം ഒഴിച്ച് തിളപ്പിക്കേണ്ടത്. ഒന്നര ടേബിള്‍സ്പൂണ്‍, വറുത്ത തേങ്ങ (വറുത്തതിനുശേഷം ഒന്നര ടേബിള്‍സ്പൂണ്‍) എടുക്കുക. ഒന്നര ടീസ്പൂണ്‍ മല്ലിയും, എട്ട് മണി ഉലുവയും, ഒരു ചെറിയ കഷണം കായവും, മൂന്ന് ചുവന്ന മുളകും, ഒരു തണ്ട് കറിവേപ്പിലയിലെ ഇലയും, വറുത്തെടുത്തതിനുശേഷം തേങ്ങയോടൊപ്പം അരച്ചെടുക്കുക. നന്നായി, മിനുസമായി. ഇവിടെ ഒരു പൊടി പൊടിച്ചുവെച്ചിട്ടുണ്ട്. അത് വറുത്തെടുത്ത തേങ്ങയുടെ കൂടെ അരയ്ക്കുമ്പോള്‍ ഇടുകയേ ഞാന്‍ ചെയ്യാറുള്ളൂ.

വെന്ത കഷണവും പരിപ്പും, ആദ്യം എടുത്തുവെച്ച് പുളിവെള്ളം ഒഴിച്ച്, ഉപ്പും ഇട്ട്, പുളി വേവാവുന്നതുവരെ തിളപ്പിക്കുക. ഞാന്‍ കച്ചട്ടിയിലാണ് വേവിച്ചത്. അതിലാവുമ്പോള്‍ അടുപ്പത്ത് വെച്ച് ഒന്നു തിളയ്ക്കുമ്പോള്‍, സ്റ്റൌ ഓഫ് ചെയ്യണം. പുളിവെള്ളം അങ്ങനെ വെന്തോളും. പിന്നെ തേങ്ങ ചേര്‍ക്കാന്‍ വയ്ക്കുമ്പോഴും, തീ നന്നായി കുറച്ച് വയ്ക്കുക. അല്‍പ്പം വെള്ളവും ചേര്‍ക്കാം. തേങ്ങ ചേര്‍ക്കുമ്പോള്‍, ആവശ്യത്തിനുവെള്ളവും ചേര്‍ക്കണം. അതുകഴിഞ്ഞ് തേങ്ങ ചേര്‍ത്ത് തിളച്ചാല്‍ വാങ്ങിവെച്ച് വറവിടുക. തേങ്ങ ചേര്‍ത്ത് ഒന്നു തിള വന്നാല്‍ വാങ്ങിവയ്ക്കണം. കച്ചട്ടി ആണെങ്കില്‍. ബാക്കി താഴെയിരുന്നു തിളച്ചോളും. മുളക്, വറുത്ത് അരയ്ക്കുന്നില്ലെങ്കില്‍, കഷണങ്ങള്‍ വേവിയ്ക്കുമ്പോള്‍, ആവശ്യത്തിനു മുളകുപൊടി ഇടുക.

ഇടിച്ചക്കസാമ്പാറിനൊപ്പം ഇഡ്ഡലി. അതാ ഇപ്പോ ഫാഷന്‍!

ചക്കയപ്പം

ചക്ക കുറച്ചുകാലം സൂക്ഷിച്ചുവെയ്ക്കാനുള്ള പരിപാടിയാണ് ചക്ക വരട്ടി വയ്ക്കുന്നത്. തിന്നുമടുക്കുമ്പോള്‍, ഇനി കിട്ടാത്ത കാലത്തേക്ക് ആയിക്കോട്ടെ എന്നുവിചാരിച്ചാല്‍ ഇങ്ങനെ ചെയ്തുവയ്ക്കാം. ചക്കവരട്ടിയത് പായ്ക്കറ്റിലൊക്കെ കിട്ടിത്തുടങ്ങിയതുകൊണ്ട് അപ്പമുണ്ടാക്കാന്‍ വല്യ വിഷമം ഒന്നുമില്ല. കുറച്ച് സമയം വേണം. സാധാരണ ഉണ്ണിയപ്പം/നെയ്യപ്പം ഒക്കെയുണ്ടാക്കുന്നതുപോലെത്തന്നെ ഇതിന്റേം പരിപാടി.

മിനുസമായി പൊടിച്ച അരിപ്പൊടി വേണം. ഏകദേശം കാല്‍ക്കിലോ. പിന്നെ തേങ്ങ വളരെച്ചെറുതായി മുറിച്ചതും വേണം. അത് നിങ്ങളുടെ ഇഷ്ടം പോലെ ഇടുക. എന്തായാലും ഒരു മുറിത്തേങ്ങയില്‍ അധികം പോകരുത്. ഇത് തേങ്ങായപ്പം ഒന്നുമല്ലല്ലോ. ഏലയ്ക്ക നാലെണ്ണം തോലൊക്കെ കളഞ്ഞ് പൊടിക്കുക. പഞ്ചസാരയിട്ട് പൊടിച്ചാല്‍ വേഗം പൊടിയും. രണ്ടര ടേബിള്‍ സ്പൂണ്‍ ചക്കവരട്ടിയത്. ആറേഴ് ആണി ശര്‍ക്കര/വെല്ലം.
ശര്‍ക്കര പാവുകാച്ചുന്നത് ഇങ്ങനെ.

അതിലേക്ക് ചക്കപേസ്റ്റിട്ട് ഇളക്കി യോജിപ്പിച്ചാല്‍ ഇങ്ങനെ.

വാങ്ങി അതിലേക്ക് അരിപ്പൊടി,തേങ്ങ മുറിച്ചതും, ഏലയ്ക്കയും ഇട്ട് ആവശ്യത്തിനു വെള്ളവും ഒഴിച്ച് ഇളക്കി വയ്ക്കുക. അധികം വെള്ളം വേണ്ട. തീരെ ഇല്ലാതെയും ആവരുത്.

അപ്പക്കാര കഴുകിവൃത്തിയാക്കി എടുക്കുക. പലതരത്തിലുള്ളത് കിട്ടും. ഒറ്റയടിയ്ക്ക് കുറേ ഉണ്ടാക്കിയെടുക്കാനുള്ളതും കിട്ടും. നോണ്‍-സ്റ്റിക്കും ഇഷ്ടം പോലെ തരത്തില്‍ ഇറങ്ങിയിട്ടുണ്ട്. ഞാനിത് പണ്ടേ വാങ്ങിയതുകൊണ്ടും, വല്ലപ്പോഴുമേ ഈ പരിപാടി ഉള്ളൂ എന്നതുകൊണ്ടും നോണ്‍-സ്റ്റിക്കിന്റെ പിന്നാലെ പോയില്ല.

അപ്പക്കാരയില്‍ വെളിച്ചെണ്ണ ചൂടായാല്‍ കുറച്ച് കുറച്ച് ചക്കക്കൂട്ട് എല്ലാത്തിലും ഒഴിച്ച്, കുറച്ചുകഴിയുമ്പോള്‍ ഒന്നു തിരിച്ചിട്ട് വേവിച്ച് പപ്പടം കുത്തി കൊണ്ട് വേണമെങ്കില്‍ കുത്തിനോക്കി എടുക്കുക.

എന്തെങ്കിലും കുഴപ്പമുണ്ടോന്ന് നോക്കിയിട്ട് വെള്ളമോ അരിപ്പൊടിയോ ചേര്‍ക്കുക. നല്ല ക്ഷമയുണ്ടെങ്കിലേ ഇതുണ്ടാക്കാന്‍ നില്‍ക്കേണ്ടൂ. വേവുന്നതിനു മുമ്പ് തിരിച്ചിടാന്‍ പോയാല്‍ ഒക്കെ മുറിഞ്ഞുമുറിഞ്ഞുപോയെന്നു വരും. വെന്താല്‍ ഒരു സ്പൂണുകൊണ്ട് പതുക്കെ നന്നായി തിരിച്ചിടാന്‍ കഴിയും. ആദ്യത്തെ പ്രാവശ്യം നന്നായില്ലെങ്കില്‍ അതിന്റെ കുറ്റവും കുറവുമൊക്കെ കണ്ടുപിടിച്ച് രണ്ടാമത് നന്നാക്കുക. അപ്പമായാല്‍ കരിഞ്ഞും മൊരിഞ്ഞും ഒക്കെ ഇരുന്നെന്നു വരും.

അടച്ചുവയ്ക്കുന്നുണ്ടെങ്കില്‍ തണുത്തതിനുശേഷം മതി.
ഇതും ചക്കവരട്ടിയതുകൊണ്ടുണ്ടാക്കുന്നത്

കറിവേപ്പിലയെന്ന ഈ ബ്ലോഗിനെ കറിവേപ്പില പോലെ തള്ളിക്കളയാതെ മുന്നോട്ട് പോകാന്‍ എല്ലാ പ്രോത്സാഹനങ്ങളും തന്ന എല്ലാ കൂട്ടുകാര്‍ക്കും നന്ദി. ഇനിയും പ്രോത്സാഹനം പ്രതീക്ഷിച്ചുകൊണ്ട്,

കറിവേപ്പില രണ്ടുവര്‍ഷം പിന്നിട്ട് മൂന്നാം വര്‍ഷത്തിലേക്ക്.