തിന മുറുക്ക്

തിനയും ചാമയെപ്പോലെതന്നെയുള്ള ഒരു ധാന്യമാണ്. പണ്ടത്തെക്കാലത്തുതന്നെയാണ് അതും കൂടുതലായിട്ട് നമ്മുടെ നാട്ടുകാർ കഴിച്ചിരുന്നത് എന്നു തോന്നുന്നു.  തിന കൊണ്ട് ഉപ്പുമാവാണ്
കേട്ടിട്ടുള്ളത്. ഉപ്പുമാവിനോട് വല്യ പ്രിയം ഇല്ലാത്തതുകൊണ്ട് ഞാൻ ഉപ്പുമാവ് പരീക്ഷിച്ചില്ല. അമ്മ പരീക്ഷിച്ചു. തിനയ്ക്ക് നല്ല വേവുണ്ട് എന്നു കണ്ടുപിടിച്ചു. അതായത് തിന വേവാൻ സമയം
എടുക്കും. അല്ലെങ്കിൽ കുക്കറിൽ വയ്ക്കേണ്ടിവരും. ഇനി ഞാൻ പരീക്ഷിച്ചാൽ പറയാം. ഇപ്പോ, തിന കൊണ്ട് മുറുക്കു മതി എന്നുവെച്ചു. അതാവുമ്പോൾ കറുമുറെ ശബ്ദം ഉണ്ടാക്കി തിന്നാലോ.

ഇതാണ് തിന (Foxtail Millet) (Setaria Italica). തമിഴിൽ തിനൈ എന്നും തെലുങ്കിൽ കൊറല്ലു/കൊറാലു  എന്നും കന്നടയിൽ നവനെ (നവണെ) എന്നും പറയും (വിക്കിപീഡിയയോടു കടപ്പാട്).

മുറുക്കുണ്ടാക്കിയത് എങ്ങനെയെന്നു പറയാം. സാദാ മുറുക്കുണ്ടാക്കുന്നതുപോലെത്തന്നെ. തിന വെള്ളത്തിൽ നാലു മണിക്കൂർ കുതിർത്തിട്ടു. അരിച്ചുകഴുകി വെള്ളം ഉണങ്ങാൻ വെച്ചു. തുണിയിൽ
ഇടുകയോ അടച്ചു കമഴ്ത്തിയിടുകയോ ചെയ്യാം.

ഒന്ന് ഉണങ്ങിക്കഴിഞ്ഞ് പൊടിച്ചു. അരിപ്പയിൽ അരിച്ചു മിനുസപ്പൊടി എടുത്തു. ഉഴുന്നു വറുത്തുപൊടിച്ചു.

തിനപ്പൊടി രണ്ടു ഗ്ലാസും, ഉഴുന്നുപൊടി അര ഗ്ലാസും എടുത്തു. അര ടീസ്പൂൺ മുളകുപൊടി, ഒരു ടീസ്പൂൺ ജീരകം, ഒരു ടീസ്പൂൺ കറുത്ത എള്ള്, അല്പം കായം പൊടി, അല്പം ചൂടാക്കിയ വെളിച്ചെണ്ണ, ആവശ്യത്തിനു ഉപ്പ്, അല്പം അജ്വൈയ്ൻ/ഓമം/അയമോദകം ചേർത്തു.  നോർത്തിന്ത്യയിലൊക്കെ മിക്സ്ചറിലും മുറുക്കിലുമൊക്കെ ആ സംഗതി ചേർക്കും.

വെള്ളവും ചേർത്തു കുഴച്ചു.

മുറുക്കിന്റെ നാഴിയിൽ ഇട്ട് പ്ലാസ്റ്റിക് ഷീറ്റിലേക്കു പിഴിഞ്ഞു. വെളിച്ചെണ്ണയിൽ വറുത്തെടുത്തു.

അളവൊക്കെ കുറച്ച് മാറിയാലും പ്രശ്നമൊന്നുമില്ല. മുളകുപൊടി അധികമാക്കാം.  വേണ്ടെങ്കിൽ
ചേർത്തില്ലെങ്കിലും സാരമില്ല. അങ്ങനെ എല്ലാം കുറച്ച് അങ്ങോട്ടുമിങ്ങോട്ടും മാറ്റണമെങ്കിൽ മാറ്റാം. ഈ അളവിൽ മുറുക്കു നന്നായിരുന്നു.

തിന വെള്ളത്തിലിടാതെ പൊടിച്ചും മുറുക്കുണ്ടാക്കിയാൽ കുഴപ്പമില്ലെന്നു തോന്നുന്നു.

വള്ളിച്ചീര

ഇന്ത്യൻ സ്പിനാച്ച് (Indian spinach) എന്നറിയപ്പെടുന്ന ചീരയാണിത്. Basella rubra എന്നാണ് ഇതിന്റെ ശാസ്ത്രീയനാമം. ഇത് ആരോഗ്യത്തിനു വളരെ ഗുണം ചെയ്യുന്ന ഒരു ഇലവർഗ്ഗമാണ്. വള്ളിച്ചീര എന്നാണ് ഇതിന്റെ മലയാളത്തിലെ പേര്. വീട്ടിൽ വളർത്താൻ വളരെ എളുപ്പമാണ്. ഇതിന്റെ തണ്ടിന്റെ ഒരു കഷണം മുറിച്ച് നടുകയേ വേണ്ടൂ. ഇതിന്റെ പാകം വന്ന തണ്ട് മുരിങ്ങാക്കോലുപോലെയാണ്. ഉള്ളിൽ മാംസളമായ ഭാഗവും, പുറത്ത് കുറച്ചു കട്ടിയിൽ തോലും. സ്വാദ്, സാദാ ചീരയുടെ സ്വാദ് തന്നെയാണ്. ഉപോദിക എന്നാണ് സംസ്കൃതത്തിൽ ഇതിന്റെ പേരെന്ന് ഒരു പുസ്തകത്തിൽ കണ്ടു. അമരകോശത്തിൽ, ഉപോദകീ എന്നതിനു വശളച്ചീര എന്നു കൊടുത്തിട്ടുണ്ട്. അത് ഇതാവാനാണ് സാദ്ധ്യത. (അല്ലെങ്കിൽ എന്നെ ഒന്നും പറയരുത്. ഞാനൊരു പാവമാണ്.)





ഇത് വള്ളിപോലെ വളരും. ഇതുകൊണ്ട് വളരെയധികം വിഭവങ്ങളുണ്ടാക്കാം. ചീര കൊണ്ടുണ്ടാക്കുന്നതുപോലെത്തന്നെ. പിന്നെ പാലക്ക് കൊണ്ടുണ്ടാക്കുന്നതുപോലെയും അനവധി വിഭവങ്ങൾ തയ്യാറാ‍ക്കാം.



അതിന്റെ ഇലകൾ.




തണ്ടുകൾ.






വള്ളിച്ചീര പുളിങ്കറി.

കുറച്ചു തുവരപ്പരിപ്പും ചീരത്തണ്ടും മഞ്ഞൾപ്പൊടിയും മുളകുപൊടിയും ഇട്ട് വേവിച്ചു. അല്പം പുളിവെള്ളവും, ചീര ഇലകളും ഉപ്പിട്ട് വേവിച്ചു. അത് പാതി വേവായപ്പോൾ ആദ്യം വേവിച്ചതും ഇതിന്റെ കൂടെ ഇട്ടു. നന്നായി വെന്തപ്പോൾ, തേങ്ങയരച്ചത് ചേർത്തു. തിളച്ചപ്പോൾ വാങ്ങിവെച്ച് വറവിട്ടു. തേങ്ങയുടെ കൂടെ ജീരകവും കൂട്ടാം.



വള്ളിച്ചീര ഇഡ്ഡലി

സാദാ ഇഡ്ഡലിമാവിൽ ചീരയില, പച്ചമുളക്, ഇഞ്ചി, കറിവേപ്പില എന്നിവ ചെറുതായി അരിഞ്ഞിട്ടു. എന്നിട്ട് ഇഡ്ഡലിയുണ്ടാക്കി.




വള്ളിച്ചീര ബജ്ജി.

കടലമാവ്, അരിപ്പൊടി, ഉപ്പ്, മുളകുപൊടി, എന്നിവ അല്പം വെള്ളത്തിൽ കുഴച്ച് അതിൽ ചീരയില ചെറുതായി മുറിച്ചിട്ടു. ചൂടായ വെളിച്ചെണ്ണയിൽ കുറേശ്ശെ ഒഴിച്ച് ബജ്ജിയുണ്ടാക്കിയെടുത്തു.

ചീരത്തണ്ട് ഞാനിവിടെ നട്ടിട്ടുണ്ട്. ശരിയാവുകയാണെങ്കിൽ ഇനിയും വിഭവങ്ങൾ പ്രതീക്ഷിക്കാം. എല്ലാർക്കും വീട്ടിൽ നടാൻ ഓരോ ചീരത്തണ്ടും തരാം.

(വിക്കിപീഡിയയോട് കുറച്ചു കടപ്പാട്.)

ചോളം കട്‌ലറ്റ്

ചോളം(കോൺ) കഴിച്ചിട്ടുണ്ടോ? ഇഷ്ടമാണെങ്കിൽ ഈ കട്‌ലറ്റും ഇഷ്ടമാവും. ചോളം പായ്ക്കറ്റുകളിലും കിട്ടും. അപ്പാടെയുള്ളത് കിട്ടിയില്ലെങ്കിൽ അതുപയോഗിച്ചാൽ മതി. സാധാരണയായി കട്‌ലറ്റ് ഉണ്ടാക്കുന്നതുപോലെത്തന്നെയാണ്. വല്യ വിഷമം ഒന്നുമില്ല.




ചോളം - ഒന്ന്. (ചിത്രത്തിൽ ഉള്ളതുപോലെ). പായ്ക്കറ്റിലുള്ളതാണെങ്കിൽ ഏകദേശം അളവു കണക്കാക്കിയെടുക്കാം.
കാരറ്റ് - ഒന്ന്.
വലിയ ഉള്ളി - ഒന്ന്.
പച്ചമുളക് - രണ്ട്.
ഇഞ്ചി - ചെറിയ ഒരു കഷണം.
കാപ്സിക്കം - ഒന്ന്.
ഉരുളക്കിഴങ്ങ് - ഒന്ന്. വലുത്.
വെജിറ്റബിൾ മസാലപ്പൊടി - അര ടീസ്പൂൺ.
ഉപ്പ്
വെളിച്ചെണ്ണ.
കറിവേപ്പില.
റൊട്ടിപ്പൊടി - ബ്രഡിന്റെ അരികു കളഞ്ഞ് ബാക്കിയുള്ളത് പൊടിച്ചെടുക്കുക. മിക്സിയിൽ ഇട്ടാൽ മതി.





ചോളം വേവിക്കുക. ഉരുളക്കിഴങ്ങും വേവിക്കുക. ഉരുളക്കിഴങ്ങ് വേവിച്ച് ഉടച്ചുവയ്ക്കുക. തോലോടെ പുഴുങ്ങിയിട്ട്, പിന്നെ തോലു കളഞ്ഞാൽ മതി. ചോളവും ഉരുളക്കിഴങ്ങും നന്നായി വേവണം.




കാരറ്റ്, ഉള്ളി, പച്ചമുളക്, ഇഞ്ചി, കാപ്സിക്കം എന്നിവ വളരെച്ചെറുതാക്കി അരിയുക. ഞാൻ കാരറ്റ് ചീവിയെടുത്തു. കറിവേപ്പിലയും ചെറുതാക്കി മുറിച്ചുവയ്ക്കുക.

വെളിച്ചെണ്ണയോ, അല്ലെങ്കിൽ ഏതെങ്കിലും ഒരു പാചകയെണ്ണയോ ചൂടാക്കുക. അതിലേക്ക് പച്ചക്കറികളും (കാരറ്റ്, ഉള്ളി തുടങ്ങിയവ) കറിവേപ്പിലയും ഇട്ട് നന്നായി വഴറ്റി വേവിക്കുക.





വെന്താൽ ഉപ്പും മസാലപ്പൊടിയും ചേർക്കുക. ചോളവും ഉരുളക്കിഴങ്ങും ചേർക്കുക. നന്നായി വഴറ്റി യോജിപ്പിച്ച് വാങ്ങിവയ്ക്കുക.









ദോശക്കല്ല് ചൂടാക്കി, വഴറ്റിയ പച്ചക്കറികൾ കുറേശ്ശെയെടുത്ത് ഉരുട്ടിപ്പരത്തി, റൊട്ടിപ്പൊടിയിൽ ഇട്ട് പൊതിഞ്ഞ്, ദോശക്കല്ലിൽ ഇട്ട് വെളിച്ചെണ്ണയൊഴിച്ച് അപ്പുറവും ഇപ്പുറവും വേവിച്ചെടുക്കുക.


റൊട്ടിപൊടിയിൽ പൊതിഞ്ഞിട്ടും, പച്ചക്കറികൾ വേർപെട്ടു പോകുന്നുണ്ടെങ്കിൽ, അല്പം കോൺഫ്ലോറോ മൈദയോ കലക്കി അതിൽ മുക്കിയ ശേഷം റൊട്ടിപ്പൊതിയിൽ പൊതിഞ്ഞ് വേവിക്കാൻ വയ്ക്കുക.

പച്ചക്കറികൾ വഴറ്റി വേവിക്കുന്നില്ലെങ്കിൽ, ഒന്നു വഴറ്റിയശേഷം, ഉപ്പും, മസാലയും, ചോളവും, ഉരുളക്കിഴങ്ങും ചേർത്ത് യോജിപ്പിച്ചശേഷം മൈദയിലോ കോൺഫ്ലോറിലോ പൊതിഞ്ഞ്, റൊട്ടിപ്പൊടിയിലോ, റവയിലോ പൊതിഞ്ഞ് എണ്ണയിൽ വറുത്തെടുക്കുകയും ചെയ്യാം.

ഈ അളവിൽ അത്യാവശ്യം എരുവൊക്കെയുണ്ട്. കൂടുതൽ വേണ്ടവർക്ക് അല്പം മുളകുപൊടിയോ, പച്ചമുളകോ ഒക്കെ ചേർക്കാവുന്നതാണ്.




സോസ് കൂട്ടിക്കഴിക്കുന്നതാവും നല്ലത്.

കാബേജു ബജ്ജി

കാബേജ് എന്നു കേട്ടാൽ മുഖം ചുളിയില്ലെങ്കിൽ നിങ്ങൾക്കു ധൈര്യമായി ഈ ബജ്ജിയുണ്ടാക്കാം. എളുപ്പം കഴിയും, സ്വാദും നന്ന്.



കാബേജ് - ഒരു നൂറ് ഗ്രാം വേണം. വയലറ്റോ പച്ചയോ ഏതെങ്കിലും മതി.

കടലപ്പൊടി അഥവാ കടലമാവ് അഥവാ ബേസൻ - മുക്കാൽ കപ്പ്. ഒരു ഏഴ് ടേബിൾസ്പൂൺ എടുത്താലും മതി.

അരിപ്പൊടി - മൂന്ന് ടേബിൾസ്പൂൺ.

വലിയ ഉള്ളി - ഒന്ന് ചെറുത്.

പച്ചമുളക് - രണ്ട്.

മുളകുപൊടി - കാൽ ടീസ്പൂൺ.

കായം - കുറച്ച് പൊടി.

ഉപ്പ്

വെളിച്ചെണ്ണ/ വേറെ ഏതെങ്കിലും പാചകയെണ്ണ.



കാബേജ് കഴുകിയിട്ട് ചെറുതായി നുറുക്കുക/അരിയുക/മുറിക്കുക. ഉപ്പേരിക്ക് അരിയുന്നതുപോലെയൊന്നും ചെറുതാക്കേണ്ട. ചിത്രത്തിലുള്ളതുപോലെ മതി. പച്ചമുളകും ഉള്ളിയും ചെറുതാക്കിത്തന്നെ അരിയണം.




എന്നിട്ട് കടലമാവ്, അരിപ്പൊടി, ഉപ്പ്, കായം, മുളകുപൊടി, പച്ചമുളക്, ഉള്ളി എന്നിവയൊക്കെ ഒരു പാത്രത്തിലിട്ട് യോജിപ്പിക്കുക.




അതിൽ അല്പാല്പമായി വെള്ളമൊഴിച്ച് കലക്കുക. അധികം വെള്ളം വേണ്ട. അധികം കട്ടിയിലും വേണ്ട.

എണ്ണ ചൂടാക്കി, തയ്യാറാക്കിയ കാബേജുമാവിൽ നിന്ന് ഓരോ സ്പൂണായി കോരിയൊഴിച്ച് വറുത്തെടുക്കുക. അധികം വലുതും നന്നെ ചെറുതും ആയ സ്പൂൺ ആവണ്ട. മാവൊഴിച്ചു, ഒരു ഭാഗം വെന്താൽ ഒന്നു തിരിച്ചിട്ടും വേവിക്കുക. തീ വളരെക്കൂട്ടിവെച്ച് ഉണ്ടാക്കിയാൽ ഉള്ള് വേവില്ല.




വെറുതേ തിന്നുക. സോസും ചമ്മന്തിയുമൊക്കെ ഉണ്ടെങ്കിൽ കൂട്ടുക.

മാവിൽ, മല്ലിയില, കറിവേപ്പില എന്നിവ ചെറുതായി അരിഞ്ഞിടാം. അല്പം പഞ്ചസാരയും ബേക്കിംഗ് പൌഡറും വേണമെങ്കിൽ ചേർക്കാം.

പനീർ മഞ്ചൂരിയൻ

മഞ്ചൂരിയൻ കഴിച്ചിട്ടുണ്ടോ? മഞ്ചൂരിയൻ, കറി ആയിട്ടുള്ളതും അല്ലാതെ, ഡ്രൈ ആയിട്ടുള്ളതും കിട്ടും. ഇവിടെ പനീർ കൊണ്ട് ഡ്രൈ ആയിട്ടുള്ളതാണ് ഉണ്ടാക്കിയിരിക്കുന്നത്. അത്ര വിഷമമൊന്നുമില്ല ഉണ്ടാക്കാൻ.

ആവശ്യമുള്ളത് :‌-

പനീർ - 200 ഗ്രാം.

വലിയ ഉള്ളി/സവാള - രണ്ടെണ്ണം.

പച്ചമുളക് - രണ്ടെണ്ണം.
ഇഞ്ചി - ഒരു ചെറിയ കഷണം.
വെളുത്തുള്ളി - ചെറുത്. പതിനഞ്ച് അല്ലി.

മല്ലിപ്പൊടി - കാൽ ടീസ്പൂൺ.
മുളകുപൊടി - അല്പം. നിർബ്ബന്ധമില്ല.
മൈദപ്പൊടിയും കോൺഫ്ലോറും - കാൽ കപ്പ് വീതം.
പാചകയെണ്ണ - കുറച്ച്.
ഉപ്പ് - കുറച്ച്.
മല്ലിയില - കുറച്ച്.



സോയ സോസ്, ചില്ലി സോസ്, തക്കാളി സോസ് എന്നിവ നാലു ടേബിൾസ്പൂൺ വീതം.



ഉള്ളി, പച്ചമുളക്, ഇഞ്ചി, വെളുത്തുള്ളി എന്നിവ ചെറുതാക്കി മുറിച്ചുവയ്ക്കുക.





മൈദയും കോൺഫ്ലോറും വെള്ളത്തിൽ അയവിൽ കലക്കിവയ്ക്കുക. ഒരു തുള്ളി സോയസോസും ഒഴിക്കുക. അല്പം ഉപ്പും. പനീർ കഷണങ്ങൾ മുഴുവൻ മുക്കിവറുക്കാൻ മാവ് തികഞ്ഞില്ലെങ്കിൽ അല്പം കൂടി കലക്കിയെടുക്കുന്നതാവും, ആദ്യം തന്നെ കുറേ ഉണ്ടാക്കിവെക്കുന്നതിനേക്കാൾ നല്ലത്.




പനീർ ചെറിയ ചെറിയ കഷണങ്ങളാക്കുക. പനീർ കഷണങ്ങളാണ് വാങ്ങിയത്. അതിനു ഇത്രേം വലുപ്പം ഉള്ളതുകൊണ്ട് ഒന്നുകൂടെ ചെറുതാക്കിയിരുന്നു.




അത് മൈദ കോൺഫ്ലോർ മാവിൽ മുക്കിയെടുത്ത്, ചൂടാക്കിയ എണ്ണയിൽ വറുക്കുക.

അല്പം പാചകയെണ്ണയൊഴിച്ച്, ഉള്ളി, പച്ചമുളക്, ഇഞ്ചി, വെളുത്തുള്ളി എന്നിവയൊക്കെ നന്നായി വഴറ്റുക. അതിൽ മല്ലിപ്പൊടി, മുളകുപൊടി എന്നിവയിടുക. അത്യാവശ്യം ഉപ്പ് ഇടുക. അതിൽ സോസുകൾ മൂന്നും ചേർക്കുക. വറുത്തുവെച്ചിരിക്കുന്ന പനീർ അതിലേക്ക് ഇട്ട് യോജിപ്പിക്കുക.




നന്നായി ഇളകിയോജിച്ചാൽ വാങ്ങിവെച്ച് മല്ലിയിലയിടുക. തക്കാളി സോസും ചേർത്ത് ചൂടോടെ കഴിക്കുക. എരിവ് അധികം വേണ്ടെങ്കിൽ ചില്ലിസോസും മുളകുപൊടിയും കുറയ്ക്കുക.

പനീർ വറുത്താൽ മിക്കവാറും കട്ടിയിൽ നിൽക്കും. അതുകൊണ്ട് മൃദു ആവണമെങ്കിൽ മാവിൽ മുക്കി വറുത്തശേഷം അല്പം വെള്ളത്തിൽ ഇട്ടുവെച്ച് പിഴിഞ്ഞെടുക്കുക. പക്ഷേ, കറുമുറു ആവില്ല പിന്നെ. പനീർ ഫ്രീസറിലാണു വെച്ചിരിക്കുന്നതെങ്കിൽ പാചകത്തിനു കുറച്ചുമുൻപേ എടുത്ത് പുറത്തുവയ്ക്കുകയും വേണം.

വെളിച്ചെണ്ണയേക്കാളും നല്ലത് വേറെ ഏതെങ്കിലും പാചകയെണ്ണയാണ്. കാബേജും ഉള്ളിത്തണ്ടും ഒക്കെയുണ്ടെങ്കിൽ അവസാനം മുറിച്ചിടാവുന്നതാണ്.

ചെറുപയർ വട

ചെറുപയർ ഇഷ്ടമാണോ? ചെറുപയർ ആരോഗ്യത്തിനു നല്ലതാണ്. എന്നും ചെറുപയർ വേവിച്ച് കഴിക്കാം. ചെറുപയർ കൊണ്ടുണ്ടാക്കുന്ന വട ദിവസവും കഴിക്കാൻ പറ്റില്ല. എന്നാലും ഇടയ്ക്കൊരുദിവസം ഉണ്ടാക്കിക്കൂടേ? എളുപ്പം കഴിയും വടയുണ്ടാക്കുന്ന ജോലി.



ചെറുപയർ ഏകദേശം 100 ഗ്രാം എടുക്കണം. വെള്ളത്തിലിട്ട് മൂന്നോ നാലോ മണിക്കൂർ കുതിർക്കാൻ വയ്ക്കണം.





വലിയ ഉള്ളി - രണ്ട് ചെറുത്/ ഒന്ന് വലുത്. തോലുകളഞ്ഞ് ചെറുതാക്കി അരിയുക.
പച്ചമുളക് - രണ്ടെണ്ണം. വട്ടത്തിൽ ചെറുതായി മുറിയ്ക്കുക.
ഇഞ്ചി - ഒരു കഷണം. തോലുകളഞ്ഞ് ചെറുതാക്കി അരിഞ്ഞുവയ്ക്കുക.
ചുവന്ന മുളക് - രണ്ടെണ്ണം.
കായം പൊടി- കുറച്ച്.
കറിവേപ്പില - ഒരു വല്യ തണ്ടിലെ ഇല. ചെറുതാക്കി മുറിയ്ക്കുക.
ഉപ്പ്.
അരിപ്പൊടി - ഒരു ടേബിൾസ്പൂൺ.
വെളിച്ചെണ്ണ - വട വറുക്കാൻ.




ചെറുപയർ കഴുകിയെടുത്ത് ചുവന്ന മുളക് ഇട്ട് അരയ്ക്കുക. തീരെ വെള്ളം ഉണ്ടാവരുത്. അധികം പേസ്റ്റുപോലെ ആവരുത്. അരച്ചുകഴിഞ്ഞാൽ അതിലേക്ക് പച്ചമുളക്, കറിവേപ്പില, ഉള്ളി, ഇഞ്ചി, കായം പൊടി, അരിപ്പൊടി, ആവശ്യത്തിന് ഉപ്പ് എന്നിവയൊക്കെച്ചേർത്ത് കുഴയ്ക്കുക. വെള്ളമൊന്നും ചേർക്കല്ലേ. അഞ്ചുമിനുട്ട് വയ്ക്കാം. വെളിച്ചെണ്ണ ചൂടാക്കുക. കൂട്ട് എടുത്ത് ഉരുട്ടുക. അത് കൈയിൽ വച്ച് ഒന്നു പരത്തി വെളിച്ചെണ്ണയിൽ ഇട്ട് വറുത്തെടുക്കുക.



എണ്ണ ചൂടാക്കുന്നതിനുമുമ്പ് ഉരുട്ടി വയ്ക്കാം. അധികം വലുപ്പം വേണ്ട. ഒരു ചെറിയ ചെറുനാരങ്ങ വലുപ്പത്തിൽ ആയാൽ കുഴപ്പമില്ല. കൈയിൽ പരത്തുമ്പോൾ നടുവിലുള്ള ഭാഗം നന്നായി അമർത്തി പരത്തുന്നതാവും നല്ലത്. എണ്ണ കുറേ ചൂടാക്കി വയ്ക്കരുത്. അധികം ചൂടായാൽ പുറം കരിയുകയും അകത്ത് ശരിക്കും വേവാതെയും ഇരിക്കും. പയറ് അരച്ചാൽ അല്പം പശപോലെ ഇരിക്കും. അതുകൊണ്ടാണ് അരിപ്പൊടി ചേർത്തത്. ചേർത്തില്ലെങ്കിലും കുഴപ്പമില്ല. മല്ലിയില ഇഷ്ടമുണ്ടെങ്കിൽ അതും ചേർക്കാം.


(ഞങ്ങളുടെ ക്യാമറ തൽക്കാലം ഇവിടെയില്ല. അതുകൊണ്ട് ഇപ്പോ ഉള്ള പോസ്റ്റുകളിലെ ചിത്രങ്ങളൊക്കെ ചേട്ടന്റെ നോക്കിയ 5800 എക്സ്പ്രസ്സ് മ്യൂസിക്കിലാണ്).

പപ്പടബജ്ജി

പപ്പടബജ്ജിയുണ്ടാക്കുന്നത് മറ്റു ബജ്ജികൾ ഉണ്ടാക്കുന്നതുപോലെത്തന്നെയാണ്. കടലമാവിന്റെ കൂട്ടിൽ മുക്കിപ്പൊരിച്ച്. എന്നാൽ കുറച്ച് വ്യത്യാസം വരുത്തിയിട്ട് ഉണ്ടാക്കാമെന്ന് ഞാൻ കരുതി.

പപ്പടബജ്ജിയ്ക്ക് വേണ്ട വസ്തുക്കൾ:-




പപ്പടം - അധികം വലുതല്ലാത്തത് 5. (ചിത്രത്തിലേതുപോലെയുള്ളത്).
കടലപ്പൊടി/ കടലമാവ് - 3 ടേബിൾസ്പൂൺ.
അരിപ്പൊടി - 1 1/2 ടേബിൾസ്പൂൺ.
മഞ്ഞൾപ്പൊടി - ഒരുനുള്ള്.
കായം (പൊടി) - അല്പം.
കുരുമുളകുപൊടി - കാൽ ടീസ്പൂണിലും അല്പം കുറവ്. (കുരുമുളക് പൊടി ഇഷ്ടമല്ലാത്തവർ മുളകുപൊടി ചേർക്കുക).
എള്ള് - കാൽ ടീസ്പൂൺ. (നിർബ്ബന്ധമില്ല. ഇട്ടാൽ സ്വാദുണ്ടാവും).
ഉപ്പ് - കുറച്ചുമാത്രം (പപ്പടത്തിന് ഉപ്പുണ്ടാവുമല്ലോ).
പഞ്ചസാര - അര ടീസ്പൂൺ. (മൊരിയുന്നതിനും, അധികം ഉപ്പുണ്ടെങ്കിൽ പാകമാക്കുന്നതിനും സഹായിക്കും. നിർബ്ബന്ധമില്ല).



എല്ലാം ഒരുമിച്ച് അല്പം വെള്ളം ചേർത്ത് കുഴയ്ക്കുക. മാവ് തയ്യാറായാൽ എവിടെയെങ്കിലും ഒഴിച്ചാൽ പരക്കുന്ന രീതിയിൽ ആവരുത്. കട്ടിയിൽ വേണം. അതുകൊണ്ട് വെള്ളം ചേർക്കുമ്പോൾ ശ്രദ്ധിക്കുക.

വെളിച്ചെണ്ണ ചൂടാക്കുക. ഒരു പപ്പടം എടുക്കുക. മാവിൽ മുക്കുക. ചുരുട്ടുകയും മടക്കുകയും ചെയ്യരുത്. മാവ് പപ്പടത്തിന്റെ രണ്ടുവശത്തും ആയാൽ വെളിച്ചെണ്ണയിലേക്ക് ഇടുക. വറുത്തെടുക്കുക. ഓരോന്നായി അങ്ങനെ മുക്കി വറുത്തെടുക്കുക. എണ്ണയിലിട്ടു ഒന്നു വെന്താൽ ചട്ടുകം കൊണ്ടോ സ്പൂൺ കൊണ്ടോ ഒന്ന് തൊട്ടാൽ നന്ന്.




വെളിച്ചെണ്ണയിലേക്ക് ഇടുമ്പോൾ ശ്രദ്ധിക്കുക. അധികം ചൂടായിട്ട് പുക വരുന്നുണ്ടെങ്കിൽ തീ കുറയ്ക്കുക. മാവിൽ മുക്കിയാൽ പെട്ടെന്ന് വെളിച്ചെണ്ണയിൽ ഇടണം.

വല്യ പപ്പടം ആണെങ്കിൽ നാലാക്കി മുറിച്ചും ബജ്ജിയുണ്ടാക്കാം. വീട്ടിൽ മിക്കവാറും ഉണ്ടാവുന്ന വസ്തുക്കളേ ഇതിന് ആവശ്യമുള്ളൂ. അതുകൊണ്ട് എല്ലാവർക്കും ബജ്ജിയുണ്ടാക്കിയെടുക്കാൻ എളുപ്പമായിരിക്കും. എരിവ് ആവശ്യം പോലെ ചേർക്കാം. വെളിച്ചെണ്ണയിലാണ് സ്വാദ്. അതില്ലെങ്കിൽ വേറെ പാചകയെണ്ണ ആയാലും മതി.

തേൻ‌കുഴൽ

തേനുമായിട്ട് വല്യ ബന്ധമൊന്നുമില്ലെങ്കിലും ഈ പലഹാരത്തിന്റെ പേരു തേൻ‌കുഴൽ എന്നാണ്. അനിയത്തിക്കുട്ടിയുടെ വീട്ടിൽ പോയപ്പോൾ അവിടെയിരിക്കുന്നു തേൻ‌കുഴൽ. തിന്നുന്ന ജോലിയല്ലേ പിന്നെ ഉള്ളൂ. അവിടത്തെ അമ്മ പാചകനിപുണയാണ്. അവിടിരുന്ന് തിന്നുനിറച്ചതിന്റെ രുചി നാവിൽ ഉള്ളതുകൊണ്ട് ഞാനും തേൻ‌കുഴൽ തന്നെ ഉണ്ടാക്കാംന്ന് വെച്ചു. തിന്നണംന്ന് വിചാരം ഉണ്ടെങ്കിൽ ഉണ്ടാക്കാനും എളുപ്പം.

ഇതിനാവശ്യമുള്ളത് വീട്ടിൽത്തന്നെ മിക്കവാറും ഉള്ളതുതന്നെയാവും. പറയാം. ഏറ്റവും ആദ്യം ചെയ്യേണ്ടത് കുറച്ച് ഉഴുന്ന് വെള്ളത്തിൽ കുതിർത്തുവയ്ക്കണം. കുതിർക്കുന്നതിനുമുമ്പ് അളവെടുത്തില്ല. കുതിർന്ന് അരച്ചെടുത്താൽ ഉള്ള അളവേ എടുത്തുള്ളൂ. ഇതിനു വേണ്ടി ഉഴുന്ന് എടുത്തശേഷം, ബാക്കിയുള്ളത് കൊണ്ട് വേറെ എന്തെങ്കിലുമുണ്ടാക്കാം. രണ്ടോ മൂന്നോ മണിക്കൂർ കുതിർന്നാൽ മിനുസമായി വെണ്ണപോലെ അരയ്ക്കണം.



അരിപ്പൊടി - മുന്നൂറ് -300 - ഗ്രാം എടുത്തു.
അരച്ചെടുത്ത ഉഴുന്ന് - 12 ടേബിൾസ്പൂൺ.
ജീരകം - ഒരു ടീസ്പൂൺ
എള്ള് - ഒരു ടീസ്പൂൺ.
എള്ളും ജീരകവും കുറയ്ക്കണമെങ്കിൽ കുറയ്ക്കാം.
കായം പൊടി - കുറച്ച് ഇടണം
പിന്നെ ഉപ്പ്
മുളകുപൊടി - കാൽടീസ്പൂൺ - അധികം വേണമെങ്കിൽ നിങ്ങൾക്ക് ചേർക്കാം. തീരെ വേണ്ടെങ്കിൽ ഒഴിവാക്കാം.

അരിപ്പൊടിയിലേക്ക് ഉഴുന്നരച്ചതും ബാക്കിയുള്ളതും ഒക്കെക്കൂട്ടി കുഴയ്ക്കുക. ചപ്പാത്തിയ്ക്ക് കുഴയ്ക്കുന്നതുപോലെ ആവും. നല്ല കട്ടിയായിപ്പോവരുത്. അങ്ങനെ ആയാൽ ഉഴുന്ന് കുറച്ചും കൂടെ കൂട്ടണം. ഉഴുന്നരച്ചതിൽ ഉള്ള വെള്ളം മതിയാവും കൂട്ടിന്. ഇവിടെ അതുമതിയായി. വേറെ വെള്ളം കൂട്ടിയില്ല. ഉഴുന്നിൽ വെള്ളം കൂട്ടി അരയ്ക്കണം എന്നു വിചാരിച്ചിട്ട് ഒരുപാട് വെള്ളം ചേർക്കരുത്. അത് മിനുസമായി അരയാൻ പാകത്തിനുള്ള വെള്ളം മതി.



എല്ലാം യോജിപ്പിച്ച് അഞ്ചുമിനുട്ട് വയ്ക്കാം. നിർബന്ധമൊന്നുമില്ല. കുഴയ്ക്കുമ്പോൾ കുറച്ച് വെളിച്ചെണ്ണയും ചേർക്കാം. വെളിച്ചെണ്ണ വല്യൊരു ചീനച്ചട്ടിയിലോ ഉരുളിയിലോ ചൂടാവാൻ വയ്ക്കുക.



പിന്നെ നാഴിയെടുത്ത്/പ്രെസ്സ് എടുത്ത് (മുകളിൽ ഉള്ള ചില്ലാണ് ഇടേണ്ടത്. അങ്ങനെ ഒറ്റയ്ക്കുള്ള ഒരു ചില്ലും ഉണ്ടാവും. അതെടുത്താലും മതി. അപ്പോ വേഗം തീരില്ല) അതിൽ നിറച്ച് ചൂടായ വെളിച്ചെണ്ണയിലേക്ക് നേരിട്ട് പിഴിയുക. കുറേ വട്ടത്തിൽ വട്ടത്തിൽ പിഴിയരുത്. കുറച്ച് പിഴിഞ്ഞ് നിർത്തുക. അല്ലെങ്കിൽ ഒട്ടിപ്പിടിക്കുന്നിടത്ത് ശരിക്കും വേവില്ല. പിന്നെ തിരിച്ചും മറിച്ചുമൊക്കെ ഇട്ട് എടുത്തുവയ്ക്കുക. എണ്ണ നന്നായി ചൂടായാൽ തീ കുറയ്ക്കണം. പിന്നെ അടുത്തത് പിഴിഞ്ഞുകഴിഞ്ഞിട്ട് തീ കൂട്ടിയാൽ മതി. തീ കുറയ്ക്കുകയും കൂട്ടുകയും ചെയ്യേണ്ടിവരും.




വെറുതെയൊന്ന് നോക്കാൻ‌വേണ്ടി പ്ലേറ്റിലേക്കു പിഴിഞ്ഞുനോക്കി. അതാണിത്.


ഏറ്റവും കൂടുതൽ ശ്രദ്ധിക്കേണ്ടത് എണ്ണയിലേക്കാണ് പിഴിയുന്നത് എന്ന കാര്യമാണ്. അപകടങ്ങളൊന്നും ഇല്ലാതെ സൂക്ഷിക്കുക. തീ കുറച്ച്, കൈ മുകളില്‍പ്പിടിച്ച് പിഴിയുക. പിഴിയുന്നതിനിടയ്ക്ക് എണ്ണപ്പാത്രമൊന്നും തട്ടിപ്പോകാതെ സൂക്ഷിക്കുക.




പിഴിഞ്ഞുകോരിയെടുത്ത് എണ്ണയൊക്കെ പോയാൽ, തണുത്താൽ, പാത്രത്തിലോ കുപ്പിയിലോ ഇട്ട് അടച്ചുവയ്ക്കുക. അല്ലെങ്കിൽ അപ്പോത്തന്നെ തിന്നുക.

ഇതിൽ വ്യത്യാസം വേണമെങ്കിൽ കുറച്ച് കടലമാവ് ചേർക്കാം. പക്ഷേ ഉഴുന്നും അരിയും പോലെയല്ല കടലമാവ്. ആരോഗ്യത്തിനു അത്ര നല്ലതല്ല. അരിപ്പൊടിയ്ക്കു പകരം പുഴുങ്ങലരി വെള്ളത്തിലിട്ട് അരച്ചും എടുക്കാം. അപ്പോപ്പിന്നെ എന്തായാലും മുറുക്കത്തിനുവേണ്ടി കടലമാവ് കൂട്ടേണ്ടിവരും. ഉഴുന്നിലും അരിയിലും വെള്ളം ആയിരിക്കുമല്ലോ.

ചില്ല് വ്യത്യാസം ഉണ്ടെങ്കിൽ കുറച്ചും‌കൂടെ വലുപ്പം ഉണ്ടാവും. മുറുക്കിന്റെ ചില്ല് പോലുള്ള ഒരു ചില്ലുണ്ട്. അതിൽ പിഴിഞ്ഞാലും കുറച്ച് വലുപ്പക്കൂടുതൽ ഉണ്ടാവുമായിരിക്കും.

പനീർ പച്ചക്കറി വട

പരിപ്പുവട, ഉഴുന്നുവട തുടങ്ങി പല പലഹാരങ്ങളും ഇടയ്ക്കൊക്കെ തിന്നാറുണ്ട്. അതുകൊണ്ട് ഒരു പച്ചക്കറി വട ആയാലോന്ന് വിചാരിച്ചു. പനീർ വാങ്ങിയതുണ്ടായിരുന്നു. അതും ചേർക്കാമെന്ന് വെച്ചു. അങ്ങനെയൊരു വിഭവം തയ്യാറായി. പനീർ പച്ചക്കറി വട. സ്വാദുണ്ടെന്ന് ഞാൻ പറഞ്ഞതുകൊണ്ട് കാര്യമില്ലല്ലോ.




പനീർ വേണം - ചിത്രത്തിലെപ്പോലെ പത്തു പന്ത്രണ്ട് കഷണങ്ങൾ.
കാപ്സിക്കം - ഒന്ന് വലുത്.
കാബേജ് - ഒരു ചെറിയ കഷണം. (അരിഞ്ഞാൽ ചിത്രത്തിലുള്ളത്രേം. അല്ലെങ്കിൽ മൂന്ന് വലിയ ഉള്ളി വലുപ്പത്തിലും ആവാം).
വലിയ ഉള്ളി/സവാള - രണ്ട് വലുത്.
പച്ചമുളക് - ആറ്.
ഇഞ്ചി - രണ്ടു പച്ചമുളകിന്റെ വലുപ്പത്തിൽ ഒരു കഷണം.
കറിവേപ്പില - മൂന്ന് തണ്ട്
(വെളുത്ത ചെറിയ) സൂചി റവ - മൂന്ന് ടേബിൾസ്പൂൺ.
കടലപ്പൊടി/കടലമാവ് - ആറ് ടേബിൾസ്പൂൺ.
ഉപ്പ്.
മഞ്ഞൾപ്പൊടി - ഒരു നുള്ള്.
കായം - കുറച്ച് പൊടി.
മുളകുപൊടി - കാൽ ടീസ്പൂൺ.
വെളിച്ചെണ്ണ


കാപ്സിക്കവും കാബേജും ഉള്ളിയും പൊടിയായി അരിയണം. എത്ര ചെറുതാവുന്നോ അത്രയും നല്ലത്. പച്ചമുളക് വട്ടത്തിൽ ചെറുതായി മുറിക്കുക. ഇഞ്ചിയും തോലു കളഞ്ഞ് ചെറുതാക്കി മുറിക്കുക. കറിവേപ്പിലയും മുറിച്ചിടണം. പനീർ കൈകൊണ്ട് പൊടിക്കുക.


വെളിച്ചെണ്ണ ഒഴിവാക്കി, ബാക്കി ഒക്കെക്കൂടെ ഒരുമിച്ച് ചേർക്കുക. ഒന്ന് യോജിപ്പിച്ചശേഷം അല്പം വെള്ളം ചേർത്ത് കുഴയ്ക്കുക. വടയ്ക്കൊക്കെ അരച്ചെടുത്താൽ കിട്ടുന്ന പാകം പോലെ വെള്ളം ചേർത്ത് കുഴയ്ക്കുക. ഉരുട്ടി കൈയിൽ എടുത്ത് പരത്താൻ കിട്ടണം. അതുകൊണ്ട് വെള്ളം നോക്കി ചേർക്കുക. അധികം വെള്ളമായെന്ന് തോന്നിയാൽ, കുറച്ചും കൂടെ കടലമാവ് ചേർക്കാം. ഉപ്പും അതിനനുസരിച്ച് വീണ്ടും ചേർക്കണം.




കുഴച്ച് അഞ്ചുമിനുട്ട് വെച്ച് വെളിച്ചെണ്ണ ചൂടാക്കി വറുത്തെടുക്കുക. ഉരുട്ടിയെടുത്ത് കൈയിൽ പരത്തിയിട്ട് വെളിച്ചെണ്ണയിലേക്ക് ഇടുക. കനം കുറച്ച് പരത്തിയാലേ ഉള്ള് നന്നായി വേവൂ. അതുകൊണ്ട് കഴിയുന്നതും കനം കുറച്ച് പരത്തി എണ്ണയിലേക്കിടുക.



മല്ലിയില, ബേക്കിംഗ് പൗഡർ, വെളുത്തുള്ളി എന്നിവയൊക്കെ ചേർക്കാം വേണമെങ്കിൽ. കടലപ്പൊടിയ്ക്ക് പകരം, കടലപ്പരിപ്പ് ഒന്നു രണ്ടുമണിക്കൂർ വെള്ളത്തിലിട്ടുവെച്ച് അരച്ചും ചേർത്തുനോക്കാവുന്നതാണ്. എരിവു വേണ്ടത് അനുസരിച്ച് മുളകുപൊടി വേണ്ടെന്ന് വയ്ക്കുകയോ, കൂടുതൽ ഇടുകയോ, പച്ചമുളക് കൂടുതലോ കുറവോ ഇടുകയോ ഒക്കെ ചെയ്യാവുന്നതാണ്. ഉപ്പ് അധികമാവാതിരിക്കാൻ ശ്രദ്ധിക്കുക.

മധുരക്കിഴങ്ങ് ബജ്ജി

മറ്റെല്ലാ ബജ്ജികളും ഉണ്ടാക്കുന്നതുപോലെ, വളരെ എളുപ്പമുള്ളൊരു പലഹാരമാണ് മധുരക്കിഴങ്ങ് ബജ്ജി. മധുരക്കിഴങ്ങ് വാങ്ങിക്കൊണ്ടുവെച്ചിട്ടുണ്ടെങ്കിൽ അതിഥികൾ ആരെങ്കിലും വന്നാൽ, അല്ലെങ്കിൽ കൂട്ടുകാർ ആരെങ്കിലും വന്നാലുടനെ ഇത് തയ്യാറാക്കി കൊടുക്കാം. സ്വാദുമുണ്ട്.

ഇത് ഉണ്ടാക്കാൻ

കടലമാവ്
അരിപ്പൊടി
ഉപ്പ്
മധുരക്കിഴങ്ങ്
മുളകുപൊടി
കായം (പൊടി)
വെളിച്ചെണ്ണ (ഏതെങ്കിലും പാചകയെണ്ണയായാലും മതി).




രണ്ട് മധുരക്കിഴങ്ങ് എടുത്ത് ആദ്യം വൃത്തിയായി കഴുകുക. ചിത്രത്തിൽ ഉള്ളതുപോലെ മിക്കവാറും മണ്ണ് കാണും അതിൽ.
കഴുകിക്കഴിഞ്ഞാൽ തോലു കളയുക. പെട്ടെന്ന് കളയാൻ പറ്റിയെന്നുവരില്ല.
തോലു കളഞ്ഞിട്ട് ഒന്നുകൂടെ കഴുകാം.




എന്നിട്ട് വട്ടത്തിലോ ചിത്രത്തിലുള്ളപോലെ ഒരു വശത്തുനിന്ന് ചെത്തിയോ മുറിക്കണം.
മുറിച്ച് വീണ്ടും കഴുകണം. കറയുണ്ടെങ്കിൽ പോകും.

അഞ്ച് ടേബിൾസ്പൂൺ കടലപ്പൊടി (കടലമാവ്) എടുക്കുക. ഒരു ടേബിൾസ്പൂൺ അരിപ്പൊടിയും. കുറച്ച് കൂടിയാലും കുഴപ്പമില്ല.
കാൽ ടീസ്പൂൺ മുളകുപൊടിയിടുക. കുറച്ച് ഉപ്പും. അല്പം കായവും (പൊടി).
വെള്ളമൊഴിച്ച് അധികം വെള്ളം പോലെയാവാതെ കുഴയ്ക്കുക.
അഞ്ചുമിനുട്ട് വയ്ക്കുക.
അതിൽ ഓരോ മധുരക്കിഴങ്ങ് കഷണങ്ങളും ഇട്ട് മുക്കിയെടുത്ത് ചൂടായ വെളിച്ചെണ്ണയിൽ ഇട്ട് വറുത്തെടുക്കുക.



അധികം തണുക്കുന്നതിനുമുമ്പ് കഴിക്കുക.

മസാലപ്പൊരി

പൊരി കണ്ടിട്ടില്ലേ? എല്ലാവരും തിന്നിട്ടുമുണ്ടാവും. പണ്ടൊക്കെ ഉത്സവച്ചന്തയിൽ വരുമായിരുന്നു പൊരി. വാങ്ങിക്കൊണ്ടുവന്ന് തേങ്ങയും ശർക്കരയുമൊക്കെക്കൂട്ടി കഴിക്കുമായിരുന്നു. ഇപ്പോ എല്ലായിടത്തും കടകളിൽ കാണാം. മസാലപ്പൊരിയുണ്ടാക്കിയാൽ, യാത്രയ്ക്കൊക്കെ കൊണ്ടുപോകാം. വെറുതേ പൊരി തിന്നുന്നതിനേക്കാൾ സ്വാദുമുണ്ടാവും. എരിവ് ഇഷ്ടമുള്ളവർക്കേ ഇത് പറ്റൂ. എളുപ്പം തയ്യാറാക്കിയെടുക്കാം.




പൊരി - നൂറ്റമ്പത് ഗ്രാം.

വെളുത്തുള്ളി ചെറിയ അല്ലി - പത്ത്/പന്ത്രണ്ട്.

പാചകയെണ്ണ (സൂര്യകാന്തിയെണ്ണയാണ് വെളിച്ചെണ്ണയേക്കാൾ ഇതിന് നല്ലത്) - രണ്ടോ മൂന്നോ ടേബിൾസ്പൂൺ.

മുളകുപൊടി - എരിവ് ഇഷ്ടമാണെങ്കിൽ അര ടീസ്പൂൺ ചേർക്കുക. അല്ലെങ്കിൽ വളരെക്കുറച്ച്.

നിലക്കടല - രണ്ട് ടേബിൾസ്പൂൺ.

കറിവേപ്പില കുറച്ച്.

പൊരിയിൽ ഉപ്പുണ്ടാവും മിക്കവാറും. ഇല്ലെങ്കിൽ മാത്രം ആവശ്യത്തിനു ചേർക്കുക.

എണ്ണ ചൂടാക്കുക. ഒരു വല്യ പാത്രം തന്നെ എടുക്കണം. അല്ലെങ്കിൽ ഇളക്കാൻ കഴിയില്ല. എണ്ണ ചൂടായാൽ നിലക്കടല പൊരിക്കുക. അതിലേക്ക് വെളുത്തുള്ളിയിട്ട് വറുക്കുക. പിന്നെ കറിവേപ്പിലയിടുക. തീ നന്നായി കുറച്ചുവേണം ഒക്കെ ചെയ്യാൻ. അതിലേക്ക് മുളകുപൊടിയിടുക. പൊരിയിട്ട് നന്നായി ഇളക്കിയോജിപ്പിച്ച് വാങ്ങിവയ്ക്കുക.




മസാലപ്പൊരി തയ്യാർ. മുളകുപൊടി വേണ്ടെങ്കിൽ ചുവന്നമുളക് ചെറുതാക്കി മുറിച്ചിട്ടാലും മതി.

തേങ്ങയോ സേവയോ മിക്സ്ചറോ ഒക്കെ ഇതിലിട്ട് തിന്നാം. വേണ്ടതിൽ മാത്രമേ ഇടാവൂ. ഉണ്ടാക്കിയതിൽ മുഴുവൻ തേങ്ങയിട്ടാല്‍പ്പിന്നെ അത് പിന്നേയ്ക്ക് എടുത്തുവയ്ക്കാൻ പറ്റില്ല. അല്ലെങ്കിൽ പ്ലാസ്റ്റിക് കവറിലാക്കി നന്നായി അടച്ചുവച്ചാൽ കുറച്ചുനാൾ ഇരിക്കും.

ബോണ്ട

ബോണ്ടയുണ്ടാക്കാൻ അത്രയെളുപ്പം കഴിയുമോന്നു ചോദിച്ചാൽ കഴിയില്ല്ല. എന്നാലും അധികം വിഷമമില്ലാതെയുണ്ടാക്കിയെടുക്കാം. ഇതിനുവേണ്ട വസ്തുക്കളൊക്കെ വീട്ടിൽ ഉണ്ടായിരിക്കും എന്നു കരുതാം.

ഉരുളക്കിഴങ്ങ് വലുത് നാലെണ്ണം - പുഴുങ്ങുക. പൊടിക്കുക. അധികം പൊടിഞ്ഞുകുഴയരുത്.
വലിയ ഉള്ളി അഥവാ സവാള - രണ്ടെണ്ണം ചെറുതായി അരിഞ്ഞുമുറിച്ചെടുക്കണം.
പച്ചമുളക് നാലെണ്ണം - വട്ടത്തിൽ, ചെറുതായി മുറിച്ചെടുക്കണം
കറിവേപ്പില - കുറച്ച് അരിഞ്ഞെടുക്കണം.

കടലപ്പൊടി/ബേസൻ/ കടലമാവ് - അരക്കപ്പ്
അരിപ്പൊടി - രണ്ട് ടേബിൾസ്പൂൺ.
കായവും, മുളകുപൊടിയും കുറച്ച്
ഉപ്പ് ആവശ്യത്തിന്.


വലിയ ഉള്ളി, അല്പം വെളിച്ചെണ്ണ ചൂടാക്കി നന്നായി വഴറ്റുക. പച്ചമുളകും അതിന്റെ കൂടെയിടാം. പിന്നെ കറിവേപ്പിലയും ഇട്ട് വഴറ്റുക. അതുകഴിഞ്ഞ് ഉപ്പുചേർത്ത്, ഉരുളക്കിഴങ്ങ് ഉടച്ചതും ചേർത്തൊന്ന് വഴറ്റി വാങ്ങിവയ്ക്കുക. തണുക്കട്ടെ.



കടലപ്പൊടിയും, അരിപ്പൊടിയും വളരെക്കുറച്ച് ഉപ്പും, കായം, മുളക് എന്നീ പൊടികളും ഇട്ട് കുറച്ചുമാത്രം വെള്ളം ചേർത്ത് കുഴയ്ക്കുക. ഇഡ്ഡലിമാവിന്റെ കൂട്ടുപോലെ ആയാൽ മതി. ഒഴിച്ചാൽ ഓടിപ്പോകരുത്.



ഉരുളക്കിഴങ്ങ് കൂട്ട് തണുത്തുകഴിഞ്ഞാൽ, കുറച്ചെടുത്ത്, ചെറിയ ഉരുളകളാക്കി, കടലമാവുകൂട്ടിൽ മുക്കിപ്പൊക്കി, ചൂടായ വെളിച്ചെണ്ണയിൽ ഇട്ട് വറുത്തെടുക്കുക. വെന്തു തുടങ്ങിയാൽ തിരിച്ചും മറിച്ചുമൊക്കെ ഇടണം. ഉള്ളിലുള്ളത് വെന്തതല്ലേ. എന്നാലും അകവും പുറവുമൊക്കെ വെന്തുവെന്നു തോന്നിയാൽ കോരിയെടുക്കുക.



കടലമാവു കൂട്ട് പോരെങ്കിൽ വീണ്ടും ഉണ്ടാക്കിയെടുക്കാം. കുറേ ഉണ്ടാക്കിവെച്ചിട്ട് കാര്യമില്ല.

ഉരുളക്കിഴങ്ങ് കൂട്ട് തയ്യാറാക്കുമ്പോൾ കടുകൊക്കെ വേണമെങ്കിൽ വറുത്തിടാം, ആദ്യം. പിന്നെ ഗ്രീൻപീസും ഇടാം, വേവിച്ചിട്ട്. കാരറ്റ് ഇടാം. അങ്ങനെ പലതരത്തിൽ പരീക്ഷിക്കാം. മൈദപ്പൊടിയിലും പരീക്ഷിച്ചുനോക്കാം വേണമെങ്കിൽ. ഞാൻ പരീക്ഷിച്ചിട്ടില്ല.

ഉപ്പിടുമ്പോൾ ശ്രദ്ധിക്കുക. ഉരുളക്കിഴങ്ങിനുള്ളത്, അത് വഴറ്റുമ്പോൾ ഇടും. പിന്നെ കടലമാവു കൂട്ടിൽ, അതിലെ ചേരുവകൾക്ക് ഉള്ള ഉപ്പ് ഇട്ടാൽ മതി.

ചൂടോടെ തിന്നുക.