ഗോതമ്പുദോശ

അത്രയ്ക്കു വല്യ സ്വാദൊന്നും അവകാശപ്പെടാനില്ലെങ്കിലും എളുപ്പം ഉണ്ടാക്കിയെടുക്കാവുന്ന ദോശയാണീ ഗോതമ്പുദോശ. പാചകം വല്യ പിടിയില്ലാത്തവർക്കുപോലും പറ്റും. തിരക്കുപിടിച്ച് എന്തെങ്കിലും ഉണ്ടാക്കേണ്ടിവരുമ്പോൾ ഇത് ചെയ്യാം. എളുപ്പം കഴിയും, അധികം വസ്തുക്കളൊന്നും വേണ്ടതാനും.

ഗോതമ്പുപൊടി, ഉപ്പ്, ചിരവിയ തേങ്ങ, വെള്ളം. ഇത്രേം മതി.
ഒരു കപ്പ് ഗോതമ്പുപൊടി ആണെങ്കിൽ അതിലേക്ക് രണ്ട് ടേബിൾസ്പൂൺ നിറച്ചും തേങ്ങ വേണം.

ഗോതമ്പുപൊടി ആദ്യം എടുത്ത്, അതിൽ ആവശ്യത്തിനു ഉപ്പിട്ട്, വെള്ളമൊഴിച്ച് കലക്കുക. കൈകൊണ്ട് ഇളക്കുക. കട്ടയൊന്നും ഇല്ലാതിരിക്കും. ദോശമാവിന്റെ ചേർച്ചയിൽ ആയാൽ, അതിലേക്ക് തേങ്ങ ഇട്ട് ഒന്നുകൂടെ ഇളക്കുക. അധികം അയവായാൽ ശരിയാവില്ല. മാവ് അഞ്ചുപത്ത് മിനുട്ട് വയ്ക്കാൻ പറ്റുമെങ്കിൽ വയ്ക്കാം. നിർബന്ധമൊന്നുമില്ല.

ദോശത്തട്ട് ചൂടാവുമ്പോൾ മാവ് കുറച്ചൊഴിച്ച് ദോശയുണ്ടാക്കുക. മറിച്ചിടുന്നതിനുമുമ്പ് വെളിച്ചെണ്ണ അതിനുമുകളിൽ പുരട്ടുക. മറിച്ചിട്ടാൽ തീ വളരെക്കുറച്ച് വയ്ക്കുക. അടുത്ത ദോശയ്ക്കുള്ള മാവ് ഒഴിച്ചുകഴിഞ്ഞേ തീ കൂട്ടിവയ്ക്കാവൂ. ഇല്ലെങ്കിൽ മാവൊഴിക്കുമ്പോൾ ശരിക്കും പരത്താൻ കിട്ടില്ല. ഒക്കെ ചുരുണ്ട്ചുരുണ്ട് നിൽക്കും. മാവൊഴിച്ച് പരത്തിയാൽ അടച്ചുവെച്ചാലും നന്നായിരിക്കും. ഈ മാവിൽത്തന്നെ, പച്ചമുളക്, ഇഞ്ചി, കറിവേപ്പില ഒക്കെ മുറിച്ചിട്ട് ഉണ്ടാക്കിയാലും നന്നാവും. വെറും ഗോതമ്പുപൊടിയിൽ ഉപ്പ് മാത്രമിട്ടും ഉണ്ടാക്കാം.





ചമ്മന്തിയും കൂട്ടി കഴിക്കുക.

വഴുതനങ്ങ പച്ചടി

നീണ്ട വയലറ്റ് വഴുതനങ്ങ രണ്ടെണ്ണം - (ഉണ്ട വഴുതനങ്ങയും ഉപയോഗിക്കാം).
പച്ചമുളക് രണ്ടെണ്ണം,
മുളകുപൊടി കാൽ ടീസ്പൂണിലും കുറവ്,
കടുക് കാൽ ടീസ്പൂൺ,
ചിരവിയ തേങ്ങ മൂന്ന് ടേബിൾസ്പൂൺ,
തൈർ - കാൽ ലിറ്ററിലും അല്പം കുറവ്,
ഉപ്പ്,

വറവിടാൻ ആവശ്യമായതൊക്കെ - കടുക്, മുളക്, കറിവേപ്പില, വെളിച്ചെണ്ണ.

വഴുതനങ്ങ വളരെ ചെറുതായിട്ട് കഷണങ്ങളാക്കണം. കഴുകിയെടുക്കണം. പച്ചമുളക് ചീന്തിയിട്ടതും, മുളകുപൊടിയും, ഉപ്പും, വേവാൻ മാത്രം വെള്ളവുമൊഴിച്ച് വേവിച്ച് വാങ്ങിവെക്കുക. തണുക്കണം അത്. തണുത്താൽ, തേങ്ങ, കടുകും കൂട്ടി മിനുസത്തിൽ അരച്ച് ഇതിലേക്ക് ചേർക്കുക. അരയ്ക്കുമ്പോൾ മോരുവെള്ളം ഉപയോഗിക്കണമെന്ന് ഇതുവരെയുള്ള പച്ചടിപ്പോസ്റ്റിലൊക്കെ പറഞ്ഞിട്ടുണ്ടല്ലോ. തേങ്ങ വേവിച്ചു ചേർക്കാത്തതുകൊണ്ടാണ് അങ്ങനെ ചെയ്യാൻ പറയുന്നത്. വെള്ളം ഒഴിക്കേണ്ടല്ലോ വെറുതെ. തേങ്ങ ചേർത്ത് കുറച്ച് തൈരും ചേർത്ത് ഇളക്കി യോജിപ്പിച്ച് വറവിടുക.





ഇവിടെ ചുവന്ന(പഴുത്ത) പച്ചമുളകായിരുന്നു ഉള്ളത്. പച്ചമുളക് കഷണങ്ങളാക്കിയും ഇടാം. പക്ഷെ എരിവ് കൂടും. അല്ലെങ്കിൽ മുളകുപൊടി വേണ്ടെന്ന് വെച്ചാൽ മതി.

പാലക്ക്പരിപ്പ്കറി

ഇലകളൊക്കെ എനിക്കിഷ്ടമാണെന്ന് ഞാൻ ഇനീം പറയണോ? പാലക്ക്, ഉരുളക്കിഴങ്ങ് ചേർത്ത് കറിവെച്ചതുപോലെ പരിപ്പിട്ട് വെച്ചുനോക്കിയാൽ എന്താന്ന് വിചാരിച്ചു. ഞാൻ സാധാരണ ഉണ്ടാക്കുന്ന, ദാൽ ഫ്രൈ എന്ന് പേരിട്ട് വിളിക്കുന്ന വിഭവത്തിലേക്ക് പാലക്കും ചേർത്തു. അത്രേ ഉള്ളൂ ഇത്.

പാലക്ക് - ചെറിയ രണ്ട്കെട്ട്
തുവരപ്പരിപ്പ് - ആറ് ടേബിൾസ്പൂൺ
ഒരു തക്കാളി
രണ്ട് ചെറിയ സവാള
രണ്ട് പച്ചമുളക്
കുറച്ച് വെളുത്തുള്ളി
അര ടീസ്പൂൺ ഗരം മസാല
ഉപ്പ്
മഞ്ഞൾപ്പൊടി
എണ്ണ
ഇവയൊക്കെ അളവുപോലെ

പാലക്ക് നന്നായി കഴുകിവൃത്തിയാക്കി ചെറുതാക്കി കൊത്തിയരിഞ്ഞെടുക്കുക. പരിപ്പ് കഴുകിയെടുക്കുക. കുറച്ച്നേരം വെള്ളത്തിൽ ഇട്ടുവെച്ചാൽ വേഗം വെന്തുകിട്ടും. തക്കാളി മുറിച്ചെടുക്കുക. പാലക്ക്, തക്കാളി, പരിപ്പ് എന്നിവ മഞ്ഞൾപ്പൊടിയിട്ട്, ഒക്കെ മുങ്ങിക്കിടക്കാൻ മാത്രം വെള്ളമൊഴിച്ച് വേവിച്ചെടുക്കുക.



ഉപ്പ് ഇടുക.




വലിയ ഉള്ളി അഥവാ സവാള ചെറുതായി മുറിച്ചെടുക്കുക. പച്ചമുളകും. വെളുത്തുള്ളിയും കുഞ്ഞുകഷണങ്ങളാക്കുകയോ ചതച്ചെടുക്കുകയോ ചെയ്യുക. ഒക്കെക്കൂടെ എണ്ണ ചൂടാക്കി വഴറ്റുക. മൊരിഞ്ഞാൽ, ഗരം മസാല ഇട്ട് യോജിപ്പിക്കുക. അതിലേക്ക് വേവിച്ചുവെച്ചിരിക്കുന്ന പാലക്കും പരിപ്പും ഒഴിക്കുക. തീ കുറച്ച് തിളപ്പിക്കുക. കുറച്ചുനേരം. വെള്ളം അധികം ഉണ്ടെങ്കിൽ വറ്റിക്കുക. ചോറിനാണെങ്കിൽ വെള്ളം നിന്നോട്ടെ. ചപ്പാത്തിയ്ക്കാണെങ്കിൽ അധികം വെള്ളം ഇല്ലാത്തതാണ് നല്ലത്. പാകമായാൽ വാങ്ങിവെച്ച് മല്ലിയില അരിഞ്ഞത് ഉണ്ടെങ്കിൽ ഇടാം.




ഗരം മസാലയ്ക്കു പകരം കുറച്ച് മുളകുപൊടി ഇട്ടാലും മതി. പരിപ്പൊക്കെ വേവിക്കുമ്പോൾ ഇടുന്നതാവും നല്ലത്. തക്കാളി, പരിപ്പിന്റെ കൂടെ വേവിക്കാതെ, ഉള്ളി വഴറ്റിക്കഴിഞ്ഞ്, അതിലിട്ട് വഴറ്റിയാലും മതി.

നേന്ത്രപ്പഴം സാമ്പാർ

പഴം കൊണ്ട് സാമ്പാർ വെച്ചിട്ടുണ്ടോ? പഴം കാളൻ പോലെ ഉണ്ടാക്കിയെടുക്കാൻ എളുപ്പമുള്ള ഒന്നാണ് പഴം സാമ്പാറും. അധികം വസ്തുക്കൾ ഒന്നും വേണ്ട.



രണ്ട്, നന്നായി പഴുത്ത നേന്ത്രപ്പഴം - മുറിച്ചെടുക്കുക



തുവരപ്പരിപ്പ് - മൂന്ന് ടേബിൾസ്പൂൺ
പച്ചമുളക് - രണ്ടെണ്ണം.
മല്ലി - മൂന്ന് ടീസ്പൂൺ
മുളക് - നാലെണ്ണം. (എരിവ് വേണ്ടെങ്കിൽ കുറയ്ക്കുക)
തേങ്ങ ചിരവി വറുത്തെടുത്തത് - രണ്ട് ടേബിൾസ്പൂൺ.
മല്ലിയും മുളകും വറുത്തെടുക്കുക.
തേങ്ങയും കൂട്ടി മിനുസമായി അരയ്ക്കുക.
പുളി - വല്യൊരു നെല്ലിക്കാവലുപ്പത്തിൽ എടുത്ത് കുറച്ച് വെള്ളത്തിലിട്ട് പുളി പിഴിഞ്ഞ് അതിന്റെ വെള്ളം മാത്രം എടുക്കുക.
കായം പൊടി
ഉപ്പ്
എണ്ണ
വറവിടാൻ ഒക്കെ

പരിപ്പും പഴവും മഞ്ഞൾപ്പൊടിയും പച്ചമുളക് നടുവേ ചീന്തിയിട്ടതും ചേർത്ത് വേവിക്കുക. ആദ്യം പരിപ്പ് വേവിച്ചെടുത്ത്, പഴം ഒന്ന് വേവുമ്പോൾ പരിപ്പ് ചേർത്താലും മതി. പഴം അധികം വെന്തുപോകും എന്നു തോന്നുന്നുവെങ്കിൽ.




വെന്തുകഴിഞ്ഞാൽ അതിൽ ഉപ്പും പുളിവെള്ളവും ഒഴിച്ച് നന്നായി തിളപ്പിക്കുക. പുളി കുറച്ച്നേരം കിടന്ന് വേവണം.
അതിലേക്ക് അരച്ച തേങ്ങയൊക്കെച്ചേർത്ത് വീണ്ടും തിളപ്പിക്കുക. കായം(പൊടി) ഇടുക. വാങ്ങിവെച്ച് വറവിടുക.



പഴം സാമ്പാർ തയ്യാർ. ഞാൻ കണ്ടുപിടിച്ചതൊന്നുമല്ല. കാലാകാലങ്ങളായിട്ട് വീട്ടിൽ വയ്ക്കുന്നതാണ്. പഴത്തിന്റെ കൂടെ തക്കാളിയും ഇടാം വേണമെങ്കിൽ. മല്ലിയുടെ സ്വാദ് അധികമായാൽ ഇഷ്ടമല്ലെങ്കിൽ മല്ലിയും മുളകും കുറയ്ക്കുക. അതിനുപകരം, തേങ്ങയുടെ കൂടെ അല്പം സാമ്പാർപൊടിയുണ്ടെങ്കിൽ ചേർത്ത് അരച്ചാലും മതി.

വത്തക്ക ഷേക്ക്/ തണ്ണീർമത്തൻ ഷേക്ക്

തണ്ണീർമത്തൻ അഥവാ ഞങ്ങളുടെ വത്തയ്ക്ക കൊണ്ട് എളുപ്പം ഉണ്ടാക്കാവുന്ന പാനീയം ആണിത്. ഉത്സവത്തിനാണ് വത്തയ്ക്ക വീട്ടിലെത്തുന്നത്. വെറുതേ തിന്നുകയാണ് പതിവ്. ഇപ്രാവശ്യം പരീക്ഷിച്ചേക്കാംന്ന് കരുതി. എന്റെ കസിൻസാണ് ഇതുണ്ടാക്കാൻ തോന്നിപ്പിച്ചത്. അവരാണ് വീട്ടിൽ ഇതൊക്കെ ഉണ്ടാക്കിക്കുടിക്കുന്നവർ. എനിക്കു വല്യ പ്രിയമില്ല. കടയിൽ കിട്ടുന്ന ഷേക്ക് ഇങ്ങനെയാണോന്ന് എനിക്കറിയില്ല. ഞാൻ കുടിച്ചിട്ടില്ല. ഇത് ഞാൻ എളുപ്പരീതിയിൽ ഒന്ന് തയ്യാറാക്കിയെന്നേയുള്ളൂ. ഞങ്ങൾക്ക് ഇഷ്ടമായി. അധികം വസ്തുക്കളൊന്നും ആവശ്യമില്ലാത്തതിനാൽ നിങ്ങൾക്കും ഉണ്ടാക്കാം.




വത്തയ്ക്ക ചിത്രത്തിൽ ഉള്ളത്രേം കഷണങ്ങൾ. കുരു കളഞ്ഞെടുത്തതാണ്. കുരുവുണ്ടാവരുത്. കുറച്ച് അധികമായാലും സാരമില്ല.
പഞ്ചസാര എട്ട് ടീസ്പൂൺ ഇടാം. പിന്നെ ഒന്ന് രുചിച്ച് നോക്കിയിട്ട് വേണമെങ്കിൽ ചേർക്കാം. വത്തയ്ക്കയ്ക്ക് മധുരമുണ്ടെങ്കിൽ വേണ്ടിവരില്ല. എന്നാലും നിങ്ങളുടെ അളവ് വ്യത്യാസം ആയിരിക്കും.

പാൽ കാൽ ലിറ്ററിൽ അല്പം കുറവ്.

പാൽ ഫ്രീസറിൽ വെച്ച് തണുപ്പിക്കുക. പാൽ ചൂടാക്കി തണുപ്പിച്ചാണ് ഫ്രീസറിൽ വെച്ചത്. പച്ചപ്പാലും പറ്റുമായിരിക്കും.
പാൽ കട്ടിയായാലും കുഴപ്പമില്ല. പൊടിച്ചിടാം.

വത്തയ്ക്ക, പഞ്ചസാരയും ഇട്ട് മിക്സിയിൽ അടിക്കുക. വെള്ളം ഒഴിക്കാനേ പാടില്ല. വത്തയ്ക്ക അലിഞ്ഞ് വെള്ളമാവും. നന്നായി കഷണങ്ങളൊക്കെ വെള്ളമാവുന്നതുവരെ കറക്കണം. അതുകഴിഞ്ഞാൽ പാലും ഒഴിച്ച് കറക്കുക. മധുരം നോക്കുക. പോരെങ്കിൽ കുറച്ചും കൂടെ ഇടുക.



പിന്നെ ഫ്രിഡ്ജിൽ വെച്ച് തണുപ്പിക്കാം. അല്ലെങ്കിൽ അപ്പോത്തന്നെ കുടിക്കാം. പാലിന്റെ തണുപ്പുണ്ടാവുമല്ലോ.

ഉരുളക്കിഴങ്ങ് പാലക്ക് കറി

ഞാൻ പരീക്ഷിച്ച ഒന്നാണിത്. ഉരുളക്കിഴങ്ങിന്റെ കൂടെ പലതും ഇട്ട് പരീക്ഷണം നടത്താറുണ്ട്. പാലക്ക് ഇട്ട് ആവാം കറി എന്നു കരുതി. ആദ്യം വിചാരിച്ചു, കുറുമ പോലെ വയ്ക്കാംന്ന്. തേങ്ങ ചേർത്തിട്ട്. പിന്നെ വേണ്ടെന്ന് വെച്ചു.



ഉരുളക്കിഴങ്ങ് - നാലെണ്ണം തോലുകളഞ്ഞ് ചെറുതാക്കി മുറിച്ച് പുഴുങ്ങുക. അപ്പാടെ പുഴുങ്ങിയാൽ അധികം വേവാനും എല്ലാ ഭാഗങ്ങളും ഒരുപോലെ ആവാതെയിരിക്കാനും സാദ്ധ്യതയുണ്ട്.



പാലക് - ഒരു കെട്ട്. ചിത്രത്തിൽ ഉള്ളത്രേം. ഒന്ന് കഴുകിവൃത്തിയാക്കി, ചൂടുള്ള വെള്ളത്തിൽ ഒരുമിനുട്ട് മുക്കിവെച്ച് എടുത്ത് വീണ്ടും പച്ചവെള്ളത്തിൽ കഴുകി തണ്ടൊക്കെ കളഞ്ഞ് അരയ്ക്കണം. ചൂടുവെള്ളത്തിൽ കൂടുതൽ സമയം മുക്കിയിട്ടാൽ പാലക് അരച്ചാൽ അതിന്റെ നിറം പച്ചയായിരിക്കില്ല. അതുകൊണ്ട് പെട്ടെന്ന് ചെയ്യുക.



ഇഞ്ചി, കറുവാപ്പട്ട എന്നിവ വളരെച്ചെറിയ കഷണം. രണ്ട് കുഞ്ഞുവെളുത്തുള്ളിയല്ലിയുടെ വലുപ്പം മതി. രണ്ടും അധികമായാൽ എരിവ് കൂടും.
ഗ്രാമ്പൂ - രണ്ടെണ്ണം.
ജീരകം - അര ടീസ്പൂൺ
വെളുത്തുള്ളി - ചെറിയ അല്ലി എട്ടെണ്ണം.
എല്ലാം കൂടെ ചതച്ചെടുക്കുക.

പച്ചമുളക് - രണ്ടെണ്ണം വട്ടത്തിലരിഞ്ഞത്.

വലിയ ഉള്ളി/ സവാള - രണ്ടെണ്ണം ചെറുതായി അരിഞ്ഞത്.

മുളകുപൊടി - കുറച്ച് - കാൽ ടീസ്പൂൺ പോലും വേണ്ട.

മഞ്ഞൾപ്പൊടി, ഉപ്പ് - ആവശ്യത്തിന്.

പാചകയെണ്ണ - സൺഫ്ലവർ എണ്ണയാണ് നല്ലത്.

ആദ്യം എണ്ണ ചൂടാക്കി ഉള്ളി വഴറ്റുക. പച്ചമുളക് വഴറ്റുക. അതിലേക്ക് ചതച്ചുവെച്ച മസാല ഇടുക. തീ വളരെക്കുറച്ച് വയ്ക്കണം. കറിക്കാവശ്യമുള്ള ഉപ്പ്, മുളകുപൊടി, മഞ്ഞൾപ്പൊടി ഇടുക. വേവിച്ച ഉരുളക്കിഴങ്ങ് മുങ്ങാൻ വെള്ളം കണക്കാക്കി ഒഴിക്കുക. വെള്ളം തിളച്ചാൽ ഉരുളക്കിഴങ്ങ് ഇടുക. കുറച്ചുനേരം യോജിച്ചോട്ടെ. പിന്നെ പാലക്ക് അരച്ചത് ഒഴിക്കുക. അതിൽ വെള്ളം കുറച്ച് ഉണ്ടാവും. എല്ലാം കൂടെ ഒത്തുചേരുന്നതുവരെ തിളപ്പിക്കുക. വെള്ളവും വറ്റും. വെള്ളം നിങ്ങൾക്ക് വേണ്ടത്ര ആവുമ്പോൾ വാങ്ങിവയ്ക്കുക. ചപ്പാത്തിയുടെ കൂടെ കഴിക്കാം. അല്ലെങ്കിൽ പത്തിരിയോ പൂരിയോ പൊറോട്ടയോ ഒക്കെ ആവാം.

ചതച്ച മസാല ഒഴിവാക്കി, മുളകുപൊടി ഒഴിവാക്കി, ഗരം‌മസാല ഇടാം. പക്ഷേ വെളുത്തുള്ളിയും ഇഞ്ചിയും ചതച്ച് ഇടണം. തക്കാളിയിട്ടും ഉണ്ടാക്കാം. ഉരുളക്കിഴങ്ങ് നല്ലോണം വേവണം. എന്നാലേ യോജിച്ച് നിൽക്കൂ.

കടലപ്പരിപ്പ് പായസം

കടലപ്പരിപ്പുകൊണ്ട് പായസം ഉണ്ടാക്കുന്നത് പല തരത്തിലും കണ്ടിട്ടുണ്ട്. ചിലർ പരിപ്പ് വെന്താൽ നല്ലപോലെ ഉടച്ച് പേസ്റ്റാക്കിയുണ്ടാക്കും. ചിലർ പരിപ്പ് വേവിച്ച് ശർക്കര പാവ് കാച്ചി ഊറ്റിയെടുത്ത് അതിലേക്കിട്ട് ഉണ്ടാക്കും. ഞാനിവിടെയുണ്ടാക്കിയത് എങ്ങനെയാണെന്ന് വിശദീകരിച്ചാൽ മതിയല്ലോ ഇപ്പോ.




കടലപ്പരിപ്പ് - ഇരുന്നൂറ് ഗ്രാം എടുക്കാം.

ശർക്കര - ഏഴ് വല്യ ആണി. അല്ലെങ്കിൽ ആ അളവിൽ. അല്ലെങ്കിൽ ചെറിയ ആണി പത്തെണ്ണം.

ശർക്കര ചിലപ്പോൾ നിങ്ങളുടെ പാകത്തിനായിരിക്കില്ല. അതുകൊണ്ട് വെച്ചുനോക്കിയിട്ട് അടുത്ത പ്രാവശ്യം മാറ്റുക.

സാവൂനരി/സാഗോ/സാബൂദാന/ചൗവ്വരി - അമ്പത് ഗ്രാം

തേങ്ങാപ്പാൽ - നാനൂറ്റമ്പത് എം എൽ. (കട്ടിയുള്ളത്) അഞ്ഞൂറ് ആയാലും പ്രശ്നമില്ല.

പിന്നെ വറവിടാൻ നെയ്യും തേങ്ങാക്കഷണങ്ങളും അണ്ടിപ്പരിപ്പും മുന്തിരിയും.

വെറുതേയിടാൻ നേന്ത്രപ്പഴവും.



ആദ്യം തന്നെ കടലപ്പരിപ്പ് ഒന്നു നോക്കി, വൃത്തിയിൽ കഴുകിയെടുക്കുക. സാവൂനരിയും ഒന്ന് കഴുകി കടലപ്പരിപ്പിന്റെ കൂടെ ഇടുക. വേവാനുള്ള വെള്ളം ഒഴിക്കുക. കുക്കറിൽ വേവിക്കാം. നന്നായി വെന്തോട്ടെ. വെള്ളം കുറച്ച് വേണം അതിൽ വെന്തതിനുശേഷവും. ശർക്കര അലിയാൻ എളുപ്പമാവും.





അത് കുറച്ചൊരു വല്യ പാത്രത്തിലേക്ക് മാറ്റുക. ശർക്കരയിട്ട് തിളപ്പിക്കുക. ആണിശർക്കരയാണെങ്കിൽ പത്തുമിനുട്ടോളം നിന്നോട്ടെ. തീ കുറച്ച് വയ്ക്കണം. ശർക്കര നല്ലോണം യോജിച്ചാൽ അതിലേക്ക് തേങ്ങാപ്പാൽ ഒഴിച്ച് തിളപ്പിക്കുക.




വെന്തുകഴിഞ്ഞാൽ വാങ്ങി വയ്ക്കുക.




നെയ്യിൽ തേങ്ങ ചെറുതായി നുറുക്കിയെടുത്തത് വറുത്ത് ഇടുക. അണ്ടിപ്പരിപ്പും മുന്തിരിയും വറുത്തിടുക. (ഞാൻ ഇട്ടില്ല).

പഴം ചെറുതാക്കി നാലാക്കി മുറിച്ച് മുകളിൽ ഇടുക. ചുക്കുപൊടി വിതറാം.

ചൂടോടെ കുടിക്കുക. കട്ടിയുണ്ടാവും ഈ പായസത്തിന്. സാവൂനരിയും പിന്നെ കട്ടിയുള്ള തേങ്ങാപ്പാലും അല്ലേ ചേർത്തിരിക്കുന്നത്. കട്ടി വേണ്ടെങ്കിൽ തേങ്ങാപ്പാൽ നേർപ്പിച്ചൊഴിക്കാം.

ചേമ്പ് കുറുക്കുകാളൻ

ചേമ്പ് കൊണ്ട് ഒരുപാട് വിഭവങ്ങൾ ഉണ്ടാക്കാം. കാളൻ, ഓലൻ, മൊളേഷ്യം, സാമ്പാർ ഒക്കെ. ബാക്കിയൊക്കെ ഉണ്ടാക്കിക്കഴിഞ്ഞതുകൊണ്ട് കാളൻ വെച്ചേക്കാംന്ന് കരുതി. കുറുക്കുകാളൻ. കാളൻ, കുറുക്കിയുണ്ടാക്കിക്കഴിഞ്ഞാൽ അതിൽനിന്ന് അല്പാല്പമായിട്ട് കുറച്ചു നാളോളം എടുത്തുകൂട്ടാം. കേടാവില്ല.





ചേമ്പ് ചിത്രത്തിൽ ഉള്ളത്രേം വേണം.



കഷണങ്ങളാക്കുക. നന്നായി കഴുകുക. മഞ്ഞൾപ്പൊടിയും കുരുമുളകുപൊടിയും (അര ടീസ്പൂൺ), ആവശ്യത്തിന് ഉപ്പും ഇട്ട് വേവാൻ ആവശ്യമായത്ര വെള്ളവും ഒഴിച്ച് വേവിക്കാൻ വയ്ക്കുക. കുക്കറിൽ വേവിച്ചെടുക്കാം.





കുറച്ചുവലുപ്പമുള്ള ഒരു മുറിത്തേങ്ങയുടെ മുക്കാൽഭാഗം ചിരവിയെടുത്ത് ഒന്നോ ഒന്നരയോ ടീസ്പൂൺ ജീരകവും മൂന്ന് പച്ചമുളകും (എരിവ് വേണമെങ്കിൽ കൂടുതൽ ചേർക്കാം) ചേർത്ത് നല്ല മിനുസമായി അരയ്ക്കുക. അധികം വെള്ളം ആവരുത് അരഞ്ഞുകഴിഞ്ഞാൽ.




ചേമ്പ് വെന്തു കഴിഞ്ഞാൽ അതിൽ അര ലിറ്റർ, നന്നായി പുളിച്ച മോരും ഒഴിച്ച് തിളപ്പിക്കുക. വറ്റിക്കുക. വലിയൊരു പാത്രം എടുക്കുന്നതാവും നല്ലത്. അല്ലെങ്കിൽ മോര് തിളയ്ക്കുമ്പോൾ താഴേക്ക് തെറിക്കും. ഉപ്പും കുറച്ചും കൂടെ ഇടാം. വറ്റാറായാൽ അതിലേക്ക് തേങ്ങ ചേർത്ത് തിളപ്പിക്കുക. തേങ്ങയും കൂടെ ചേർത്തുകഴിഞ്ഞാല്‍പ്പിന്നെ അതിൽ വെള്ളം മിക്കവാറും ഉണ്ടാവില്ല. തേങ്ങ തിളയ്ക്കാൻ ആവശ്യമായതേ ഉണ്ടാവൂ. തേങ്ങയും ചേർന്നുകഴിഞ്ഞാൽ അതിലേക്ക് കറിവേപ്പില വെറുതേ ഇടുക.




വാങ്ങിവെച്ച് വറവിടുക. ഉലുവപ്പൊടി വളരെ സ്വല്പം വേണമെങ്കിൽ ഇടാം. കുറേയിട്ടാൽ കയ്ക്കും.




കൽച്ചട്ടിയാണെങ്കിൽ കാളൻ തണുക്കുമ്പോഴേക്കും ഒരിറ്റുപോലും വെള്ളം കാണില്ല. മറ്റു പാത്രങ്ങളാണെങ്കിൽ വറ്റിക്കുന്നതുപോലിരിക്കും.

കുറുക്കുകാളൻ ഉണ്ടാക്കിയിട്ട് രണ്ടു പാത്രങ്ങളിൽ എടുത്തുവയ്ക്കുക. ഒന്നിലുള്ളത് കൂട്ടിക്കഴിക്കാൻ എടുക്കുക. ഒന്നിലുള്ളത് പിന്നേയ്ക്ക് വയ്ക്കുക. എടുത്തതിൽനിന്നു തന്നെ എടുത്ത് അടച്ചുവെച്ചു പിന്നേം എടുത്തുകൊണ്ടിരിക്കുന്നത് ശരിയല്ല.

വലിയ ചേമ്പ് കിട്ടാനില്ലെങ്കിൽ, കുട്ടിച്ചേമ്പുകൊണ്ടും കാളൻ ഉണ്ടാക്കാം.

ഉഴുന്നുവട

മിക്കവാറും എല്ലാ ചടങ്ങുകൾക്കും ഞങ്ങളുടെ വീട്ടിൽ ഉഴുന്നുവടയുണ്ടാക്കും. ഇഡ്ഢലിയുടെ കൂടെയാണ് ഉഴുന്നുവട പതിവ്. വലിയ പാത്രം വെച്ച് എണ്ണ ചൂടാക്കി അതിലേക്ക് മാവിട്ട് കുറേയെണ്ണം ഒരുമിച്ചിട്ട് വറുത്തുകോരിയെടുക്കുന്നതുകാണാൻ ഒരു രസം തന്നെ. അഥവാ ഇഡ്ഡലി മാത്രമേ ഉള്ളൂ എന്നു പറഞ്ഞാൽ ഞങ്ങൾ പറയും പാവം ഇഡ്ഡലി വിഷമിച്ച് പാട്ടുപാടും എന്ന്. “അരികിൽ നീ ഉണ്ടായിരുന്നെങ്കിൽ” എന്ന പാട്ട്.

ഉഴുന്നുവടയുണ്ടാക്കാൻ എളുപ്പമാണ്. അല്പം ചേരുവകളേ വേണ്ടൂ. വേഗം കിട്ടുകയും ചെയ്യും.

ഉഴുന്ന്
പച്ചമുളക്
കറിവേപ്പില
ഇഞ്ചി
കുരുമുളക്
വെളിച്ചെണ്ണ
ഉപ്പ്
ബേക്കിംഗ് പൗഡർ (നിർബ്ബന്ധമില്ല).


ഒരു കപ്പ് ഉഴുന്ന് രണ്ടോ മൂന്നോ മണിക്കൂർ വെള്ളത്തിലിടുക.
സമയം ആയാൽ ഒട്ടും വെള്ളമില്ലാതെ അരയ്ക്കുക.
അരയ്ക്കുമ്പോൾ അതിൽ ഉപ്പും പത്ത് - പന്ത്രണ്ട് മണി കുരുമുളകും ഇടുക.
ഉഴുന്ന് ഒന്ന് അരഞ്ഞിട്ടേ കുരുമുളക് ഇടാവൂ. കുരുമുളക് മുഴുവൻ അരഞ്ഞുപോകരുത്. തരിതരിയായി കിടക്കണം. തിന്നുമ്പോൾ കടിക്കണം.
അഞ്ച് പച്ചമുളക് ചെറുതായി വട്ടത്തിൽ മുറിച്ചെടുക്കുക.
കുറച്ച് കറിവേപ്പിലയും ചെറുതായി അരിഞ്ഞെടുക്കുക.
ഒരു കഷണം ഇഞ്ചിയും ചെറുതായി മുറിച്ചെടുക്കണം.



ഒക്കെ ഉഴുന്നുകൂട്ടിലേക്ക് ഇടുക. അല്പം കായം (പൊടി) ചേർക്കുക. വളരെ സ്വല്പം ബേക്കിംഗ് പൗഡറും ചേർക്കുക. വീട്ടിൽ ചേർക്കാറില്ല.
ഉള്ളിയും തേങ്ങ ചെറുതായി അരിഞ്ഞതും ചേർക്കുന്നതു കണ്ടിട്ടുണ്ട്. ഞാൻ ചേർത്തിട്ടില്ല.



ഒക്കെ യോജിപ്പിച്ച്, കൈയിൽ അല്പം വെള്ളം പുരട്ടി കൂട്ട് എടുത്തുവെച്ച് തുളയുണ്ടാക്കി ചൂടുള്ള വെളിച്ചെണ്ണയിലേക്ക് ഇടുക. ശ്രദ്ധിച്ചില്ലെങ്കിൽ ഉഴുന്നുകൂട്ടിനുപകരം വിരലും കൈയും ഒക്കെ വെളിച്ചെണ്ണയിൽ മുങ്ങും. ഞാൻ പറഞ്ഞില്ലെന്ന് പിന്നെപ്പറയരുത്.




നന്നായി മൊരിച്ച് വറുത്തെടുക്കുക. വെറുതേ തിന്നുക. ചമ്മന്തിയും സാമ്പാറും ഉണ്ടാക്കിയിട്ടുണ്ടെങ്കിൽ അതു കൂട്ടിത്തിന്നുക.

പരിപ്പുവടയും

സാബൂദനവടയും

കടലപ്പരിപ്പ് വടയും ഇവിടെയുണ്ട്.


ഉഴുന്നുവട, ഹോട്ടലിൽ കിട്ടുന്നതുപോലെ ആകൃതിയിൽ കിട്ടിയില്ലെങ്കിൽ വിഷമിക്കേണ്ട കാര്യമൊന്നുമില്ല. ചിലപ്പോളതിൽ, തലേന്നത്തെ ചോറോ അല്ലെങ്കിൽ അരിപ്പൊടിയോ, റവയോ ഒക്കെ കൂട്ടിയിട്ടുണ്ടാകും. നമ്മളുണ്ടാക്കുമ്പോൾ ഉഴുന്ന് മാത്രം ഉപയോഗിച്ചാൽ മതി. ഉണ്ടാക്കിയുണ്ടാക്കി ശരിയാവും.

പണ്ടൊരു ചടങ്ങിന് വീട്ടിലുണ്ടാക്കിയത്.

പഴുത്തപപ്പായസാമ്പാർ

കർമൂസ എന്ന് ഞങ്ങളുടെ നാട്ടിൽ വിളിക്കുന്ന പപ്പായകൊണ്ട് കുറേയേറെ വിഭവങ്ങളുണ്ടാക്കാം. കുറച്ച് സ്ഥലമുണ്ടെങ്കിൽ വീടുകളിൽത്തന്നെ അധികം അധ്വാനമില്ലാതെയുണ്ടാക്കാൻ പറ്റിയൊരു മരമാണ് പപ്പായ മരം. പപ്പായ പച്ച തിന്നാം, പഴുത്താലും തിന്നാം.

പഴുത്ത പപ്പായകൊണ്ടൊരു സാമ്പാർ. നിങ്ങളാരെങ്കിലും കഴിച്ചിട്ടുണ്ടോ? ഇവിടെ ഉണ്ടാക്കാറുണ്ട്.



പഴുത്ത പപ്പായ
തേങ്ങ ചിരവിയത്
മല്ലി
മുളക്
തുവരപ്പരിപ്പ്
പച്ചമുളക്
കായം പൊടി
പുളി
മഞ്ഞൾപ്പൊടി
ഉപ്പ്
പിന്നെ വറവിടാൻ ആവശ്യമായതും വേണം.




പപ്പായ ചിത്രത്തിൽ ഉള്ളതിൽ ചെറിയ കഷണം എടുക്കുക. തോലു കളയുക, മുറിക്കുക. കഴുകുക.

പുളി വലിയ നെല്ലിക്കാവലുപ്പത്തിൽ വെള്ളമൊഴിച്ച് വെച്ച് കുതിർന്നാൽ അതിന്റെ വെള്ളം മാത്രം എടുക്കുക.

തേങ്ങ രണ്ട് രണ്ടര ടേബിൾസ്പൂൺ വറുത്തെടുക്കുക.

മല്ലി രണ്ട് ടീസ്പൂണും, മുളക് മൂന്നെണ്ണവും വറുത്തെടുക്കുക. അതിൽ നാലോ അഞ്ചോ എണ്ണം ഉലുവമണികൾ ഇട്ട് വറുക്കുക.



തേങ്ങയും മല്ലിക്കൂട്ടും തണുത്തുകഴിഞ്ഞാൽ അരയ്ക്കുക.

തുവരപ്പരിപ്പ് മൂന്ന് ടേബിൾസ്പൂൺ ആദ്യം വേവിക്കുക. കുക്കറിൽ ആയാൽ നല്ലത്.




ഒരു പാത്രത്തിൽ പുളിവെള്ളവും പപ്പായ/കർമൂസക്കഷണങ്ങളും ഇട്ട്, മൂന്ന് പച്ചമുളകും ചീന്തിയിട്ട്, ഉപ്പും, മഞ്ഞൾപ്പൊടിയും ഇട്ട് വേവാൻ വയ്ക്കുക. ഞാൻ കൽച്ചട്ടിയിൽ വേവിക്കാമെന്നുവച്ചു.

വെന്താൽ, അതിലേക്ക് പരിപ്പ് വേവിച്ചത് ഇടുക.

അല്പനേരം തിളച്ച് ഒക്കെ ഒന്ന് യോജിച്ചാൽ, തേങ്ങ കൂട്ടുക. കായം പൊടിയും ഇടുക.

കറിവേപ്പില ഇടുക.



മുളകു പൊട്ടിച്ചതും, കടുകും, കറിവേപ്പിലയും വറുത്തിടുക.



പഴുത്ത പപ്പായസാമ്പാർ തയ്യാർ. രാവിലെ ഇഡ്ഡലിയ്ക്കൊപ്പം കഴിക്കുക. ഉച്ചയ്ക്ക് ചോറിനൊപ്പം കഴിക്കുക. എരിവ് ഇനിയും വേണമെന്നുണ്ടെങ്കിൽ, അടുത്ത തവണ കൂട്ടുക.


മോരുകൂട്ടാനും,

പച്ചപ്പപ്പായസ്സാമ്പാറും ഇവിടെ.

മുതിര കായത്തോൽ ഉപ്പേരി

കായ വറുക്കാനെടുത്തുകഴിഞ്ഞാൽ അതിന്റെ തോലു ബാക്കിയുണ്ടാവും. അത്എറിഞ്ഞുകളയുകയാണോ നിങ്ങൾ ചെയ്യാറ്? എന്നാൽ ഇനി മുതൽ അങ്ങനെ ചെയ്യരുത്. ഞങ്ങളൊക്കെച്ചെയ്യുന്നത്, ഒന്നുകിൽ അത് മുറിച്ച് തോരൻ വയ്ക്കും, അല്ലെങ്കിൽ കുറച്ച് നീളത്തിലരിഞ്ഞ് ഉണക്കി കൊണ്ടാട്ടം ഉണ്ടാക്കും.

കായത്തോൽ അല്ലെങ്കിൽ കായത്തൊലി, കായത്തോട് എന്നൊക്കെപ്പറയുന്നുണ്ടാവും. എന്തായാലും കായയുടെ തൊലി തന്നെ.

അതുകൊണ്ട് ഇപ്പോഴൊരു കായത്തോൽ/ കായത്തൊലി - മുതിരത്തോരൻ/ഉപ്പേരി വയ്ക്കാം. മുതിരയിഷ്ടമുള്ളവർക്ക് നന്നായി ഇഷ്ടപ്പെടും. അല്ലാത്തവർക്കും ഇഷ്ടപ്പെടും.




മുതിര
കായത്തോൽ
ഉപ്പ്
ചുവന്ന മുളക്
മഞ്ഞൾപ്പൊടി, മുളകുപൊടി
വറവിടാൻ ആവശ്യമായത് .
ഇവയൊക്കെ വേണം.

മുതിര തലേന്ന് വെള്ളത്തിലിട്ട് വയ്ക്കണം.

പിറ്റേദിവസം, കായത്തോൽ കുഞ്ഞുകുഞ്ഞായി നുറുക്കിയെടുക്കണം. കഴുകി കറയൊക്കെപ്പോക്കണം. മുതിര കഴുകിയെടുക്കണം. ചിലപ്പോൾ നല്ലോണം കല്ലുണ്ടാവും അതിൽ. അതൊക്കെക്കളഞ്ഞെടുക്കണം. കായത്തോൽ നല്ല പച്ചയായിരിക്കുമ്പോളെടുക്കണം. വാടിപ്പോകാൻ നിൽക്കരുത്. ഇവിടെ കുറച്ച് പച്ച കുറഞ്ഞു.



മുതിര ആദ്യം ഒരുപാത്രത്തിൽ ഇട്ട്, അത് മുങ്ങിക്കിടക്കുന്ന വെള്ളം ഒഴിക്കുക. തോരന് ആവശ്യമുള്ള മഞ്ഞൾപ്പൊടി ഇടുക. മുളകുപൊടിയും ഇടുക (ഞാൻ ഇടാറില്ല). എന്നിട്ട് കഴുകിയ കായത്തോൽ അതിനു മുകളിൽ ഇടുക. കുക്കറിൽ നന്നായി വേവിക്കുക. മുതിരയിൽ ഒഴിച്ച വെള്ളംകൊണ്ട് കായത്തോലും വെന്തോളും. അതിന് അധികം വേവൊന്നും ഇല്ലല്ലോ. വെന്താൽ അതിൽ ഉപ്പ് ഇടുക. നന്നായി ഇളക്കിയോജിപ്പിക്കുക. വെള്ളം ഉണ്ടെങ്കിൽ നിന്നോട്ടെ.

വറവിടുമ്പോൾ ഒക്കെ പോയിക്കോളും. ഉപ്പ് പിടിക്കുകയും വേണമല്ലോ.

വറവിടാൻ ഒരുക്കുക. വെളിച്ചെണ്ണ ചൂടാവുമ്പോൾ ആദ്യം ഉഴുന്നുപരിപ്പ് ഇടുക. അത് ചുവന്നാൽ കടുകും ചുവന്ന മുളക് പൊട്ടിച്ചതും ഇടുക. അത് പൊട്ടിത്തെറിക്കുമ്പോൾ കറിവേപ്പിലയും ഇടുക. അതിലേക്ക് മുതിര കായത്തോൽ കൂട്ട് ഇടുക. അടച്ച് വെള്ളം വറ്റുന്നതുവരെ വേവിക്കുക. വെള്ളമില്ലെങ്കിൽ വറവിലേക്കിട്ട് വഴറ്റിയെടുത്ത്, അടുപ്പിൽ നിന്നു വാങ്ങി, തേങ്ങ ചിരവിയത് ഇടുക.



വറവിടുമ്പോളും വെള്ളം വറ്റിക്കുമ്പോഴും തീ കുറച്ച് വയ്ക്കുക.

നല്ല സ്വാദുണ്ടാവും ഈ ഉപ്പേരിക്ക് അഥവാ തോരന്.

മൂന്നാം കൂട്ടുകറി

കൂട്ടുകറി സദ്യകളിലൊക്കെ സ്ഥിരമായുണ്ടാവും. പുളിയില്ലാത്ത, നല്ല സ്വാദുള്ള ഒരു കറി. സാധാരണയായി, കായ, കടല, ചേന എന്നിവയാണ് കൂട്ടുകറിയ്ക്ക് ഉപയോഗിക്കുന്നത്. ആ കൂട്ടുകറി ഇവിടെയുണ്ട്. എന്നാൽ അതുകൊണ്ടേ കൂട്ടുകറി ഉണ്ടാക്കാൻ പാടുള്ളൂ എന്നൊന്നും ഇല്ലല്ലോ. ചേനയും കായയും പറ്റാത്തവർക്കായൊരു കൂട്ടുകറിയാണ് ഇത്.




ഇതിൽ വെള്ളരിക്ക, കുമ്പളങ്ങ, കടല, കാരറ്റ് എന്നിവയാണ്. കാരറ്റ് ചേർത്തിരിക്കുന്നത് കുറച്ച് കട്ടിയായിക്കോട്ടെ എന്നു കരുതിയാണ്. വെള്ളരിക്കയും കുമ്പളങ്ങയും “വെള്ളക്കഷണങ്ങൾ” അല്ലേ.

കടല - കുറച്ച് തലേന്ന് വെള്ളത്തിലിട്ട് കുതിർത്ത് വയ്ക്കണം

വെള്ളരിക്ക

കുമ്പളങ്ങ

തേങ്ങ - കുറച്ച് ചിരവിവയ്ക്കുക. അരയ്ക്കാനും വറവിടാനും വേണം.

ജീരകം

ഉപ്പ്

മഞ്ഞൾപ്പൊടി

മുളകുപൊടി

കടല കുതിർന്നത് നാല് ടേബിൾ സ്പൂൺ എടുക്കുക. വെള്ളരിക്കയുടേയും കുമ്പളങ്ങയുടേയും ഓരോ ചെറിയ കഷണങ്ങൾ എടുത്ത് ചെറുതായി കൂട്ടുകറിയ്ക്കുള്ള പാകത്തിൽ കഷണങ്ങളാക്കുക. കാരറ്റ് ഒന്ന് മതി. അതും കഷണങ്ങളാക്കുക.

ഒക്കെ കഴുകിയെടുക്കുക.

കാരറ്റും കടലയും കുക്കറിൽ വേവിക്കുക. അതിനു നല്ല വേവ് വേണം. അതിൽ കറിക്കാവശ്യമുള്ള അളവിൽ മഞ്ഞൾപ്പൊടിയും മുളകുപൊടിയും ഇടണം.

പിന്നെ കുമ്പളങ്ങയും വെള്ളരിക്കയും വേവിക്കുക. കുക്കറിൽ വേണമെന്നില്ല. വേവിക്കുമ്പോൾ ഉപ്പിടണം.

വെള്ളരിക്ക കുമ്പളങ്ങ കഷണങ്ങൾ ഒരുവിധം വേവ് ആയാൽ, കടലയും കാരറ്റും വേവിച്ചത് ചേർക്കുക. അതിലെ മഞ്ഞൾപ്പൊടിയും മുളകുപൊടിയും ഇതിനും ചേരണമല്ലോ.

ഒക്കെ വെന്തു യോജിച്ചാൽ, നാലോ അഞ്ചോ ടേബിൾസ്പൂൺ തേങ്ങ(കുറച്ച് കൂടിയാലും കുഴപ്പമില്ല), അര ടീസ്പൂൺ ജീരകം ചേർത്തരച്ച്, ഇതിലേക്ക് ചേർക്കുക. കൂട്ടുകറിയിൽ അധികം വെള്ളം പാടില്ല. അതുകൊണ്ട് വെന്തു കഴിഞ്ഞാൽ കഷണങ്ങളിലും, അരച്ചെടുക്കുന്ന തേങ്ങയിലും അധികം വെള്ളം ഇല്ലാത്തതാണ് നല്ലത്. വിളമ്പിയാൽ വിളമ്പുന്നിടത്തിരിക്കണം.

തേങ്ങ ചേർത്ത് നന്നായി തിളച്ച് ഒക്കെ നല്ലപോലെ യോജിച്ചാൽ അതിലേക്ക് കടുകും മുളകും കറിവേപ്പിലയും വറവിടുക.

രണ്ട് ടേബിൾസ്പൂൺ തേങ്ങയും നന്നായി വറുത്ത് ഇടുക.




ഇത് മധുരക്കിഴങ്ങ് കൂട്ടുകറി

(താഴെയുള്ള കൂട്ടുകറി ലേബലിൽ ക്ലിക്ക് ചെയ്താൽ മൂന്നും കാണാം)

സേമിയ ഇഡ്ഡലി

സേമിയപ്പായസം ഇഷ്ടമല്ലേ? സേമിയ ഉപ്പുമാവ് ഇഷ്ടമാണോ? ഈ ബ്ലോഗിൽ ഉണ്ടാക്കിയിട്ടിട്ടുണ്ട്.
ഇനി സേമിയ ഇഡ്ഡലി ആയിക്കോട്ടെ. എളുപ്പമാണ്. സ്വാദും ഉണ്ട്. നല്ലൊരു ചമ്മന്തിയും ഉണ്ടെങ്കിൽ ഉഷാർ.






ഉണ്ടാക്കിയത് എങ്ങനെയെന്ന് പറയാം.

ഉഴുന്നരച്ചത് വേണം. ഉഴുന്ന് മൂന്നോ നാലോ മണിക്കൂർ വെള്ളത്തിലിട്ട ശേഷം മിനുസമായി അരച്ചെടുത്തത്. വെള്ളം അധികം പാടില്ല. അത്യാവശ്യത്തിനു മതി.

സേമിയ എത്രയാണെന്നുള്ളത് നോക്കിയാണ് ഉഴുന്ന് എടുക്കേണ്ടത്. സേമിയയുടെ നേർപകുതി ഉഴുന്നരച്ചത് ചേർക്കണം. സേമിയ ഒരു ഗ്ലാസ്സ് ഉണ്ടെങ്കിൽ ഉഴുന്ന് അരച്ചത് അര ഗ്ലാസ് ചേർക്കണം. അര ഗ്ലാസ്സ് മുഴുവൻ ഇല്ലെങ്കിലും സാരമില്ല. അധികം കുറയ്ക്കരുത്.

സേമിയ കഴുകുക. ഒന്ന് വെറുതേ വെള്ളത്തിലിട്ട് കഴുകിയാൽ മതി.

അതു കഴിഞ്ഞ് അല്പം വെള്ളത്തിൽ ഇടുക. സേമിയ നനയാൻ മാത്രം വെള്ളം മതി. കുറേ വെള്ളമൊഴിച്ച് മുക്കിയിടുകയൊന്നും വേണ്ട. പത്തുമിനുട്ട് ഇട്ടാൽ, ഉഴുന്നരച്ചതും ഉപ്പും ചേർത്ത് കുഴച്ചുവയ്ക്കുക. ഇന്നു കുഴച്ചുവെച്ചാൽ നാളെ ഇഡ്ഡലിയുണ്ടാക്കിയെടുക്കാം. വെള്ളം ഉഴുന്നിലും സേമിയയിലും ഉള്ളത് പോരാതെ വരില്ല. അതുകൊണ്ട് വേറെ ചേർക്കേണ്ട. ഇഡ്ഡലിപ്പാകത്തിനേ മാവിൽ വെള്ളം ഉണ്ടാകാവൂ.




കുഴച്ചുവെച്ചാൽ സേമിയയൊക്കെ അലിഞ്ഞു ചേർന്നിട്ടുണ്ടാവും. ഇഡ്ഡലിയുണ്ടാക്കുക. ചമ്മന്തി കൂട്ടിക്കഴിക്കുക. ഈ അളവിൽ മൃദു ആയിട്ടാണ്. കട്ടി വേണമെങ്കിൽ ഉഴുന്നിന്റെ അളവ് കുറയ്ക്കുക.

ചീട

ചീട അഥവാ ശീട എന്നൊക്കെ അറിയപ്പെടുന്ന പലഹാരം പല വിധത്തിൽ തയ്യാറാക്കാം.

1

അരിപ്പൊടിയിൽ, ഉഴുന്നരച്ചതും മുളകുപൊടിയും ഉപ്പും ജീരകവും ഇട്ട് കൂട്ടിക്കുഴച്ച്.

2

അരിപ്പൊടിയിൽ, ഉഴുന്നുപൊടി ചേർത്ത്, മറ്റു ചേരുവകളും ചേർത്ത്.

3
അരിപ്പൊടിയിൽ, തേങ്ങയും മറ്റുള്ളവയുമൊക്കെച്ചേർത്ത്.

അരിപ്പൊടിയുടെ കൂടെ, തേങ്ങയും എള്ളും ചേർത്ത് ഉണ്ടാക്കുന്നതാണ് കൂടുതൽ സ്വാദ്. എരിവില്ലാതെ.
തേങ്ങ ചിരവിയിട്ട് ഒന്ന് ചൂടാക്കി അതിലെ വെള്ളം കളഞ്ഞെടുത്താൽ നന്നായിരിക്കും.

മുളകുപൊടിക്കു പകരം കുരുമുളകും കൂട്ടാം. എരുവ് വേണ്ടെങ്കിൽ എല്ലാ വിധത്തിൽ നിന്നും ഒഴിവാക്കാം.

കായം എല്ലാ തരത്തിലും ചേർക്കാം. എള്ളും ചേർക്കാം.



ഞാനിവിടെ തയ്യാറാക്കിയത് വളരെ എളുപ്പത്തിലാണ്. അതിനാവശ്യമുള്ളത് :-
അരിപ്പൊടി - ആറ് ടേബിൾസ്പൂൺ
ഉഴുന്ന് വറുത്ത് പൊടിച്ചത് - ഒരു ടേബിൾസ്പൂൺ. (ആറിനൊന്ന് എന്ന കണക്കാണ്)
കുറച്ച് ജീരകം, കുറച്ച് മുളകുപൊടി, ഉപ്പ്, കായം.



ഒക്കെക്കൂടെ തേച്ചു കുഴച്ച് ഒരു പത്തുമിനുട്ട് വെച്ച് ഉരുട്ടി വെളിച്ചെണ്ണയിലിട്ട് വറുത്തെടുത്തു. ഇത് റൊട്ടിയുടെ പോലെയുള്ള കൂട്ടാണ്. തേങ്ങ കൂട്ടാതെയുണ്ടാക്കുന്നത് അധികനേരം കഴിഞ്ഞാൽ തിന്നാൻ പാടാണ്. കട്ടിയിൽ ഇരിക്കും.



നിങ്ങൾക്ക് മുകളിൽ പറഞ്ഞിരിക്കുന്ന വിധത്തിൽ എല്ലാം ശ്രമിച്ചുനോക്കാം.

ചീടയ്ക്ക് ഉറപ്പ് അധികം ഇഷ്ടമല്ലെങ്കിൽ, ഉഴുന്ന് കുറച്ചും കൂടെ കൂട്ടിയാൽ മതി. മുറുക്കുപോലെ കറുമുറാന്ന് ഇരിക്കുന്നതാണ് ചീട. കടിച്ചാൽ വേഗം പൊട്ടരുത്.

വറുത്തെടുക്കുമ്പോൾ ഉള്ളിൽ നല്ലപോലെ വേവാൻ ശ്രദ്ധിക്കണം. തീ കൂട്ടിവെച്ച് വറുത്താൽ ഉള്ളിൽ പെട്ടെന്ന് വേവില്ല.

മാങ്ങാക്കൂട്ടാൻ

മാങ്ങാക്കാലം വന്നു. ഇനി കറികളെല്ലാം മാങ്ങമയം. അതുകൊണ്ട് മാങ്ങാക്കൂട്ടാൻ വയ്ക്കാം എന്നു കരുതി.

മാങ്ങ രണ്ടെണ്ണം പുളിയില്ലാത്തത്. കുറച്ച് പുളിയുണ്ടെങ്കിൽ കുഴപ്പമൊന്നുമില്ല. അധികം പുളി ആയാൽ ശരിയാവില്ല. കഴുകി, തോലു കളഞ്ഞ് മുറിച്ചെടുക്കുക.




നാലോ അഞ്ചോ ടേബിൾസ്പൂൺ തേങ്ങ കാൽ ടീസ്പൂൺ ജീരകവും ചേർത്ത് അരച്ചെടുക്കുക. മിനുസമായിട്ട്.
ഒരു പാത്രത്തിൽ ഏകദേശം അരലിറ്റർ വെള്ളത്തിലേക്ക് മാങ്ങയും കുറച്ച് മഞ്ഞൾപ്പൊടി, മുളകുപൊടി എന്നിവയും ഉപ്പും ഇടുക.
വേവാൻ വയ്ക്കുക.
അഞ്ച് പത്ത് മിനുട്ടിനുള്ളിൽ വേവും.
തേങ്ങ അതിലേക്ക് ചേർക്കുക.
വറവിടുക. കടുകും മുളകും കറിവേപ്പിലയും.




മാങ്ങാക്കൂട്ടാൻ തയ്യാ‍റായി. മാങ്ങയും മാങ്ങയുടെ അല്പം പുളിയും ഇഷ്ടം ഉള്ളവർ ഉണ്ടാക്കിയാൽ മതി. നല്ലൊരു തോരനും വയ്ക്കുക. ചോറും.