സൂചിറവപ്പായസം

ഒന്നും വയ്യെന്നു വിചാരിച്ചിരിക്കുകയായിരുന്നു. ഒരു മ്ലാനത. അപ്പോഴാണ് പാട്ട് കേട്ടത്. അല്ല പരസ്യം കേട്ടത്. മധുരം കഴിക്കണം ഇന്നൊന്നാംതീയ്യതിയായ് എന്ന പരസ്യം. ഇന്ന് കർക്കടകം ഒന്നല്ലേ. അപ്പോ മധുരം തന്നെ ആവാംന്ന് വിചാരിച്ചു. അല്ലെങ്കിലും അല്പം മധുരത്തിന്റെ ആവശ്യമുണ്ടായിരുന്നു. അങ്ങനെയാണ് ഈ പായസം ഉണ്ടാക്കാൻ തീരുമാനിച്ചത്.

പായസം എന്നൊക്കെപ്പറയാമെങ്കിലും ഇത് വല്യ ഒരു പായസമൊന്നുമല്ല. ഉണ്ടാക്കാനും കഴിക്കാനും എളുപ്പം. ആർക്കും ഉണ്ടാക്കിയെടുക്കാം.

സൂചി റവ വേണം - കാൽ ലിറ്റർ വെള്ളം കൊള്ളുന്ന ഗ്ലാസ്സിൽ അര ഗ്ലാസ്സ്.
ശർക്കര - 6 ആണി. (കൂട്ടുകയോ കുറയ്ക്കുകയോ നിങ്ങളുടെ ഇഷ്ടം പോലെ.
ചെറുപഴം - 2. അല്പം പുളിയുള്ളതായാലും കുഴപ്പമില്ല. ഇനി നേന്ത്രപ്പഴം ആയാലും പ്രശ്നമില്ല.
തേങ്ങ - അരമുറി ചിരവിയത്.

ആദ്യം തന്നെ കുറച്ചു വല്യ പാത്രത്തിൽ റവ അളന്നെടുത്ത ഗ്ലാസ്സിന് ഏഴെട്ട് ഗ്ലാസ്സ് വെള്ളം അടുപ്പത്ത് വയ്ക്കുക.




അതു തിളച്ചാൽ തീ കുറച്ച്, റവ കുറച്ചുകുറച്ചായിട്ട് വെള്ളത്തിലേക്കിട്ട് ഇളക്കിക്കൊണ്ടിരിക്കണം.



പിന്നെ റവ വെന്തോട്ടെ. ഇടയ്ക്ക് ഇളക്കണം. ഇല്ലെങ്കിൽ കരിഞ്ഞുപിടിക്കാൻ സാദ്ധ്യതയുണ്ട്.



വെന്താൽ, ശർക്കരയിടുക. ഇളക്കുക. അതു തിളച്ചു യോജിച്ചോട്ടെ. തീ കുറേ കൂട്ടിവയ്ക്കരുത്. ഒക്കെക്കൂടെ വെള്ളം വറ്റിപ്പോവുകയേ ഉള്ളൂ.

ശരക്കരയും ഇളകി വെന്ത് യോജിച്ചാൽ തേങ്ങയിട്ടിളക്കുക. പിന്നെ കുറച്ചുനേരം വെച്ചാൽ മതി. വാങ്ങിവെച്ച് പഴം മുറിച്ചിടുക. സൂചിറവപ്പായസം തയ്യാർ.



തണുത്താൽ കട്ടിയാവും. അങ്ങനെ ആവേണ്ടെങ്കിൽ, കുറച്ചു വെള്ളം തിളപ്പിച്ച്, ശർക്കരയിടുമ്പോൾ ചേർക്കുക. റവ് വെന്ത് കഴിയുമ്പോൾ വെള്ളം കുറവാണെന്നു തോന്നിയാലും വെള്ളമൊഴിക്കാം. പക്ഷേ തിളപ്പിച്ച വെള്ളമായാൽ നല്ലത്. പുളിയുള്ള പഴം ആയാൽ മധുരത്തിനിടയ്ക്ക് അല്പം പുളിയും വരും. ഇനി അണ്ടിപ്പരിപ്പ്, മുന്തിരി ഒക്കെ വറവിടണമെങ്കിൽ അങ്ങനെ ആവാം. തേങ്ങയ്ക്കു പകരം തേങ്ങാപ്പാൽ ഒഴിക്കണമെങ്കിൽ അതും ആവാം. റവ വറുത്തില്ല ഞാൻ. വറുത്താലും ഇല്ലെങ്കിലും കുഴപ്പമില്ല.

തുവരക്കൂട്ടാൻ

തുവര കൊണ്ട് കറി വെക്കാറുണ്ടോ? തുവരപ്പരിപ്പ് കൊണ്ട് പലവിഭവങ്ങളും ഉണ്ടാക്കാറില്ലേ? ആ പരിപ്പുണ്ടാക്കുന്നത് ഈ തുവരകൊണ്ടാണ്. ഇത് ഒരു പ്രാവശ്യം വെച്ചുനോക്കിയാൽ അറിയാം ഇഷ്ടമാണോ അല്ലയോ എന്ന്. എല്ലാവർക്കും ഇഷ്ടമാവും. സാധാരണയായി തുവരക്കൂട്ടാൻ അല്ലെങ്കിൽ തുവരക്കറി അല്ലെങ്കിൽ തോരക്കൂട്ടാൻ വെക്കുന്നതാണ് ഞാൻ ഇവിടെ പറയുന്നത്. നിങ്ങൾക്ക് ഇഷ്ടം‌പോലെ പിന്നീട് മസാലകൾ ചേർത്തും വേറെ രീതിയിൽ പരീക്ഷിച്ചും ഒക്കെ നോക്കാവുന്നതാണ്.

തുവര - നൂറ് ഗ്രാം.
തേങ്ങ - അഞ്ച് ടേബിൾസ്പൂൺ.
ചുവന്ന മുളക് - മൂന്നെണ്ണം (കുറയ്ക്കുകയോ കൂട്ടുകയോ ചെയ്യാം).
മഞ്ഞൾപ്പൊടി
ഉപ്പ്
തേങ്ങയും മുളകും അരയ്ക്കുക. മുളക് അരയ്ക്കുന്നതിനുപകരം മുളകുപൊടി ആവശ്യത്തിനു ചേർത്താലും മതി. അരയ്ക്കുമ്പോൾ, അല്പം ജീരകവും ഇഷ്ടമുണ്ടെങ്കിൽ ചേർക്കാം.
തുവരയിൽ കല്ലും പുല്ലും ഒക്കെയുണ്ടെങ്കിൽ അതൊക്കെ കളഞ്ഞുവൃത്തിയാക്കി, തലേന്ന് വെള്ളത്തിലിട്ടു വയ്ക്കുക. എന്നാൽ നന്നായി വേവും.
തുവര കഴുകിയെടുത്ത്, അതിൽ മഞ്ഞൾപ്പൊടിയിട്ട് വെള്ളവുമൊഴിച്ച് വേവിക്കുക. നന്നായി വെന്താലേ സ്വാദുണ്ടാവൂ.
വെന്താൽ, ആദ്യം തന്നെ അതിലെ വെള്ളം വേറൊരു പാത്രത്തിലേക്ക് ഊറ്റിവയ്ക്കുക.



എന്നിട്ട്, തുവര, നല്ലവണ്ണം ഒരു സ്പൂൺകൊണ്ട് ഉടയ്ക്കുക.
വെന്ത തുവര, കല്ലിലോ മിക്സിയിലോ ഇട്ട് ഒന്ന് ചതച്ചെടുക്കുന്നതാണ് പതിവ്. അങ്ങനെ പറ്റുമെങ്കിൽ ചെയ്യുക. പകുതി തുവര ചതച്ചാൽ മതി.
ഉപ്പിടുക. തേങ്ങയരച്ചതും ആവശ്യത്തിനു വെള്ളവും (ഊറ്റിവെച്ച വെള്ളം ആദ്യം ചേർക്കുക. അതു പോരെങ്കിൽ പച്ചവെള്ളം ചേർക്കുക.) ചേർത്ത് നന്നായി യോജിപ്പിച്ച് തിളപ്പിക്കണം.




തിളച്ചുയോജിച്ചാൽ വാങ്ങിവെച്ച് വറവിടുക.

ചൂ ചൂ ചുണ്ടങ്ങ

ചുണ്ടങ്ങ എന്നു കേട്ടിട്ടില്ലേ? ചുണ്ടങ്ങ കണ്ടിട്ടില്ലേ? ഇതാണു ചുണ്ടങ്ങ മരം/ ചെടി.



നിങ്ങളുടെയൊക്കെ വീട്ടിലോ പറമ്പിലോ ഉണ്ടോ? ആദ്യം ഞാൻ വിചാരിച്ചത് അതുകൊണ്ടൊരു ഗുണമില്ല, അതു വെറുതേ വേലിപ്പടർപ്പിനു നിൽക്കുന്നതെന്നായിരുന്നു. അനിയത്തിക്കുട്ടിയോട് ചോദിച്ചപ്പോൾ അവളു പറഞ്ഞു, ചുണ്ടങ്ങ കൊണ്ട് ഉപ്പേരി വെക്കാംന്ന്. എന്നാല്‍പ്പിന്നെ ഒരുകൈ അല്ല, രണ്ടുകൈയും നോക്കാംന്ന് ഞാനും കരുതി.



ഇത് ഒടിഞ്ഞ കൊമ്പ്





ഇത് പൂവ്. കാറ്റുള്ളതുകാരണം ഫോട്ടോ ശരിയായില്ല. (അല്ലെങ്കിൽ കുറേ ശരിയായി. ;))




ഇത് ചുണ്ടങ്ങ.




ചുണ്ടങ്ങ ചെടിയിൽ നിന്ന് പറിച്ചെടുക്കുക. നിറയെ മുള്ളുണ്ടാവും കുത്തും. വേദനിക്കും. സൂക്ഷിക്കുക. പിന്നെ ചുണ്ടങ്ങ എടുത്ത് അമ്മിക്കല്ലുകൊണ്ട് കുത്തിച്ചതയ്ക്കുക. അപ്പോ അതിനുള്ളിലെ അരി അഥവാ കുരു പോകും. പിന്നെ കഴുകുക. കുരു മുഴുവനായിട്ടും പോകും.




കുരുവിന് കയ്പുണ്ടാവുമെന്ന് വിശ്വാസം. കഴുകിക്കഴിഞ്ഞ് വാരിയെടുത്ത് വയ്ക്കുക.

പാത്രത്തിലോ ചീനച്ചട്ടിയിലോ ആദ്യം കുറച്ച് പാചകയെണ്ണ ഏതെങ്കിലും ഒഴിക്കുക. കുറച്ച് ഉഴുന്നുപരിപ്പിടുക. ചുവന്നുവരുമ്പോഴേക്കും, കടുകും, ചുവന്ന മുളക് പൊട്ടിച്ചെടുത്തതും ഇടുക. കടുക് പൊട്ടുമ്പോഴേക്കും കറിവേപ്പിലയും ഇടുക. തീ കുറച്ച്, ചുണ്ടങ്ങ ഇടുക. മഞ്ഞളും ഉപ്പും ഇടുക. വേവിക്കാൻ വേണ്ട വെള്ളം ഒഴിക്കുക. എരിവ് വേണ്ടവർ മുളകുപൊടിയും ഇടുക. വേവിക്കുക. വാങ്ങിവെച്ച് ചിരവിയ തേങ്ങ കുറച്ചിടുക. ഉപ്പേരി തയ്യാർ.




ഇനി സ്പെഷൽ വേണമെങ്കിൽ ഉള്ളിയും വെളുത്തുള്ളിയും ഒക്കെ വഴറ്റാം. എന്നിട്ട് ചുണ്ടങ്ങയിട്ട് ഉപ്പേരിയുണ്ടാക്കാം. തിന്നുമ്പോൾ അതിന്റെ തോലു മാത്രം വേറെ കടിക്കുന്നതുപോലെ തോന്നും. നന്നായി വേവിക്കുക.

ചിത്രങ്ങളൊക്കെ ക്ലിക്ക് ചെയ്താൽ വലുതായിട്ട് കാണാം എന്നു പറഞ്ഞുതരേണ്ട കാര്യമില്ലല്ലോ അല്ലേ?

മുരിങ്ങക്കായ് മാങ്ങ മോരുകൂട്ടാൻ

മാങ്ങാക്കാലം. മാങ്ങയിഷ്ടമുള്ളവർക്ക്, മുരിങ്ങക്കോൽ/മുരിങ്ങാക്കായ് ഇഷ്ടമുള്ളവർക്ക് ഒരു കൂട്ടാൻ. അമ്മ പറഞ്ഞു, മാങ്ങയും മുരിങ്ങക്കോലും, മോരും ഇട്ട് ഒരു കൂട്ടാനൊന്നും വച്ചിട്ടില്ലെന്ന്. അവിയലിൽ, മാങ്ങയും മോരും മുരിങ്ങയും ഇടുമെങ്കിൽ അതുമാത്രമൊരു കൂട്ടാൻ എന്തുകൊണ്ടായിക്കൂടെന്ന് ഞാൻ. വെച്ചുനോക്കിയപ്പോൾ നന്നായിട്ടുണ്ട്.



മാങ്ങ, അധികം പച്ചയും, അധികം പഴുത്തതുമല്ലാത്തത്. രണ്ടെണ്ണം, കഴുകി തോലുകളഞ്ഞ് മുറിച്ചത്.
മുരിങ്ങാക്കോൽ - രണ്ടെണ്ണം കഴുകി മുറിച്ചത്
ചിരവിയ തേങ്ങ - നാലു ടേബിൾസ്പൂൺ.
ജീരകം - കാൽ ടീസ്പൂൺ.(ഇഷ്ടമല്ലെങ്കിൽ തീരെ കുറയ്ക്കുക).
മോര് - കാൽ ലിറ്റർ. മാങ്ങയ്ക്കു പുളിയുണ്ടെങ്കിൽ അധികം പുളിച്ചത് വേണ്ട. മാങ്ങയ്ക്ക് മധുരമാണെങ്കിൽ കുറച്ച് പുളി ആയ്ക്കോട്ടെ.
മഞ്ഞൾപ്പൊടിയും മുളകുപൊടിയും ഉപ്പും പാകം നോക്കി ഇടുക.
മുളകുപൊടി ഇടുന്നില്ലെങ്കിൽ, തേങ്ങയുടെ കൂടെ ചുവന്ന മുളക് അരയ്ക്കുക.
തേങ്ങയും ജീരകവും ആവശ്യത്തിനു വെള്ളം കൂട്ടി അരയ്ക്കുക.



മുരിങ്ങാക്കോൽ, മാങ്ങ എന്നിവ ഉപ്പും മുളകുപൊടിയും മഞ്ഞൾപ്പൊടിയുമിട്ട് വേവിക്കുക. വേവാനുള്ള വെള്ളം ഒഴിച്ചാൽ മതി. ഞാൻ കുക്കറിലാണ് വേവിച്ചത്. എന്നിട്ട് കൽച്ചട്ടിയിലിട്ടു. വെന്തുടഞ്ഞുപോകരുത്.





അതിലേക്ക് മോരൊഴിച്ച് തിളപ്പിക്കുക.
തേങ്ങയരച്ചത് ഇട്ട് തിളപ്പിക്കുക.
ആവശ്യത്തിനു വെള്ളവും ചേർക്കുക. തിളപ്പിക്കുക.
കുറച്ച് കറിവേപ്പില ഇടുക.
വറവിടുക.



മുരിങ്ങക്കായ് മാങ്ങാ മോരുകൂട്ടാൻ തയ്യാർ.

പടവലങ്ങയുപ്പേരി

തോരന്, ഞങ്ങളൊക്കെ ഉപ്പേരി എന്നാണ് പറയുന്നതെന്ന് ഞാൻ പറഞ്ഞിട്ടുണ്ട്. ചിലർ വറവ് എന്നും പറയും. പടവലങ്ങയുപ്പേരി ഉണ്ടാക്കിയതെങ്ങനെയെന്നു പറയാം. എളുപ്പമാണ്. സ്വാദുണ്ട്. രസമോ മറ്റോ വെച്ചാൽ അതിന്റെ കൂടെ ഈ ഉപ്പേരിയും വെച്ചാൽ ചോറ് നിറച്ചുണ്ണാം.





പടവലങ്ങ, ചിത്രത്തിൽ ഉള്ളത്രേം എടുക്കുക. അല്ലെങ്കിൽ ഒരു നീണ്ട പടവലങ്ങയെടുത്ത്, അതിന്റെ പകുതി എടുത്ത്, തോലു ചുരണ്ടിക്കളഞ്ഞ്, ചെറുതാക്കി മുറിച്ചെടുത്ത് കഴുകിയെടുക്കുക. വലിയ ഉള്ളി അഥവാ സവാള ഒന്നും ചെറുതാക്കി മുറിച്ചെടുക്കുക. ഒന്നോ രണ്ടോ പച്ചമുളകും വട്ടത്തിൽ മുറിച്ചെടുക്കുക.


ആദ്യം, വെളിച്ചെണ്ണയോ, നിങ്ങൾ പാചകത്തിനുപയോഗിക്കുന്ന എണ്ണയോ ചൂടാക്കുക. ഒരു ടീസ്പൂൺ ഉഴുന്നുപരിപ്പ് ഇടുക. ചുവന്നുവരുമ്പോഴേക്ക് കടുകും, പിന്നെ കുറച്ച് കറിവേപ്പിലയും ഇടുക. കടുവറ കടുവറ കടുവറ (കട:- ഉർവ്വശി/വനജ - അച്ചുവിന്റെ അമ്മ). അതുകഴിഞ്ഞാൽ ഉള്ളിയും പച്ചമുളകുമിട്ട് വഴറ്റിമൂപ്പിച്ച്, അതിലേക്ക് പടവലങ്ങാക്കഷണങ്ങൾ ഇടുക. മഞ്ഞൾപ്പൊടി കുറച്ചിടുക. കാൽ ടീസ്പൂൺ മുളകുപൊടിയിടുക. നിങ്ങൾക്ക് എരിവ് വേണ്ടെങ്കിൽ ഇടേണ്ട. പച്ചമുളകുണ്ടല്ലോ. പിന്നെ ഉപ്പുമിട്ട്, വേവാൻ വെള്ളവുമൊഴിച്ച് അടച്ചുവെച്ച്, തീ കുറച്ച് വേവിക്കുക. വെള്ളമൊഴിക്കാതെ എണ്ണയിൽ വേവിക്കുന്നത് അത്ര നല്ലതൊന്നുമല്ല. എന്നാലും സ്വാദു കൂടുമായിരിക്കും. വെന്താൽ തേങ്ങ ചിരവിയിടുക. ഇളക്കുക. ഉപ്പേരി തയ്യാറായി. (ഉണ്ടാക്കിയതു മുഴുവൻ ചിത്രത്തിലില്ല.)




ചൂടുകാലത്ത്, തേങ്ങ ചിരവിയിട്ടുവെച്ചാൽ രാവിലത്തെ ഉപ്പേരി, മിക്കവാറും വൈകുന്നേരത്തേക്ക് കേടാവും. അതുകൊണ്ട് കുറേയുണ്ടാക്കി, തേങ്ങയും ഇട്ട് യോജിപ്പിച്ചുവയ്ക്കരുത്. ഉച്ചയൂണിനു വേണ്ടതിൽ മാത്രം തേങ്ങ ചേർക്കുക. ബാക്കി, പിന്നെ എടുക്കുമ്പോൾ തേങ്ങ ചേർക്കുക.

അവിൽ‌പ്രഥമൻ

അവിൽ/അവൽ ‌പ്രഥമൻ കഴിച്ചിട്ടുണ്ടോ? ഇല്ലെങ്കിൽ മധുരപ്രിയരാണെങ്കിൽ നിങ്ങൾക്ക് ഉണ്ടാക്കിക്കുടിച്ചുനോക്കാം. അത്രയ്ക്കു ജോലിയൊന്നുമില്ല. തേങ്ങാപ്പാൽ വേണം. വീട്ടിലുണ്ടാക്കുന്നതിലും എളുപ്പം കടയിൽ നിന്നു കിട്ടുന്നതാണെങ്കിൽ അതുമാവാം.




നാടൻ അവിൽ - 100 ഗ്രാം
ശർക്കര നല്ല മധുരമുള്ളത് - 6 ആണി.
വറുത്തിടാൻ, കൊട്ടത്തേങ്ങ, അണ്ടിപ്പരിപ്പ്, മുന്തിരി - കുറച്ച്
നെയ്യ് - വറവിനാവശ്യമായത്.
തേങ്ങാപ്പാൽ (അധികം കട്ടിയില്ലാത്തത്) - മുന്നൂറ് എം എൽ.

കട്ടിയുള്ള തേങ്ങാപ്പാൽ - 50 എം എൽ.

അവിലിൽ നെല്ലും ഉമിയും കല്ലുമൊക്കെയുണ്ടെങ്കിൽ അതൊക്കെ ആദ്യം കളയുക. പോകാത്തത്, കഴുകുമ്പോൾ പോയ്ക്കോളും. നിങ്ങൾക്ക് അവിലിന് നല്ല വേവ് ആവശ്യമുണ്ടെങ്കിൽ ആദ്യം അവിൽ കഴുകി അല്പം വെള്ളത്തിൽ വേവിക്കുക. വെന്താൽ ശർക്കയിടുക.


അല്ലെങ്കിൽ ശർക്കര ആദ്യം വെള്ളമൊഴിച്ച് അടുപ്പത്തുവയ്ക്കുക.



ഉരുകിയാൽ, കഴുകിവെച്ചിരിക്കുന്ന അവിൽ അതിലിട്ടു വേവിക്കുക. അപ്പോൾ കുറച്ചും കൂടെ വെള്ളമൊഴിക്കണം.



ശർക്കരയും അവിലും യോജിച്ചാൽ, വെന്താൽ, കട്ടിയില്ലാത്ത തേങ്ങാപ്പാൽ ഒഴിച്ച് തിളപ്പിക്കുക. തിളച്ച് യോജിച്ചാൽ, കട്ടിയുള്ള തേങ്ങാപ്പാലും ഒഴിച്ച് ഒന്നു തിള വന്നാൽ വാങ്ങിവെച്ച്, വറവിടുക.



കൊട്ടത്തേങ്ങ വേറെ വറക്കുക. അണ്ടിപ്പരിപ്പു വറുത്ത്, മുന്തിരിയും അതിലേക്കിട്ട് വറക്കുക.

ചുക്കുപൊടിയും കുറച്ച് ഇടാം.

ആദ്യം ആവശ്യത്തിനു വെള്ളം ഒഴിച്ചില്ലെങ്കിൽ, തണുക്കുമ്പോൾ കട്ടിയാവും പായസം. മധുരം അധികം വേണ്ടെങ്കിൽ ശർക്കയിടുമ്പോൾ കുറയ്ക്കുക. പിന്നെ വെന്തു കഴിഞ്ഞാൽ മധുരം നോക്കിയിട്ട് പോരെങ്കിൽ വീണ്ടും ഇട്ടാൽ മതി.

ബോണ്ട

ബോണ്ടയുണ്ടാക്കാൻ അത്രയെളുപ്പം കഴിയുമോന്നു ചോദിച്ചാൽ കഴിയില്ല്ല. എന്നാലും അധികം വിഷമമില്ലാതെയുണ്ടാക്കിയെടുക്കാം. ഇതിനുവേണ്ട വസ്തുക്കളൊക്കെ വീട്ടിൽ ഉണ്ടായിരിക്കും എന്നു കരുതാം.

ഉരുളക്കിഴങ്ങ് വലുത് നാലെണ്ണം - പുഴുങ്ങുക. പൊടിക്കുക. അധികം പൊടിഞ്ഞുകുഴയരുത്.
വലിയ ഉള്ളി അഥവാ സവാള - രണ്ടെണ്ണം ചെറുതായി അരിഞ്ഞുമുറിച്ചെടുക്കണം.
പച്ചമുളക് നാലെണ്ണം - വട്ടത്തിൽ, ചെറുതായി മുറിച്ചെടുക്കണം
കറിവേപ്പില - കുറച്ച് അരിഞ്ഞെടുക്കണം.

കടലപ്പൊടി/ബേസൻ/ കടലമാവ് - അരക്കപ്പ്
അരിപ്പൊടി - രണ്ട് ടേബിൾസ്പൂൺ.
കായവും, മുളകുപൊടിയും കുറച്ച്
ഉപ്പ് ആവശ്യത്തിന്.


വലിയ ഉള്ളി, അല്പം വെളിച്ചെണ്ണ ചൂടാക്കി നന്നായി വഴറ്റുക. പച്ചമുളകും അതിന്റെ കൂടെയിടാം. പിന്നെ കറിവേപ്പിലയും ഇട്ട് വഴറ്റുക. അതുകഴിഞ്ഞ് ഉപ്പുചേർത്ത്, ഉരുളക്കിഴങ്ങ് ഉടച്ചതും ചേർത്തൊന്ന് വഴറ്റി വാങ്ങിവയ്ക്കുക. തണുക്കട്ടെ.



കടലപ്പൊടിയും, അരിപ്പൊടിയും വളരെക്കുറച്ച് ഉപ്പും, കായം, മുളക് എന്നീ പൊടികളും ഇട്ട് കുറച്ചുമാത്രം വെള്ളം ചേർത്ത് കുഴയ്ക്കുക. ഇഡ്ഡലിമാവിന്റെ കൂട്ടുപോലെ ആയാൽ മതി. ഒഴിച്ചാൽ ഓടിപ്പോകരുത്.



ഉരുളക്കിഴങ്ങ് കൂട്ട് തണുത്തുകഴിഞ്ഞാൽ, കുറച്ചെടുത്ത്, ചെറിയ ഉരുളകളാക്കി, കടലമാവുകൂട്ടിൽ മുക്കിപ്പൊക്കി, ചൂടായ വെളിച്ചെണ്ണയിൽ ഇട്ട് വറുത്തെടുക്കുക. വെന്തു തുടങ്ങിയാൽ തിരിച്ചും മറിച്ചുമൊക്കെ ഇടണം. ഉള്ളിലുള്ളത് വെന്തതല്ലേ. എന്നാലും അകവും പുറവുമൊക്കെ വെന്തുവെന്നു തോന്നിയാൽ കോരിയെടുക്കുക.



കടലമാവു കൂട്ട് പോരെങ്കിൽ വീണ്ടും ഉണ്ടാക്കിയെടുക്കാം. കുറേ ഉണ്ടാക്കിവെച്ചിട്ട് കാര്യമില്ല.

ഉരുളക്കിഴങ്ങ് കൂട്ട് തയ്യാറാക്കുമ്പോൾ കടുകൊക്കെ വേണമെങ്കിൽ വറുത്തിടാം, ആദ്യം. പിന്നെ ഗ്രീൻപീസും ഇടാം, വേവിച്ചിട്ട്. കാരറ്റ് ഇടാം. അങ്ങനെ പലതരത്തിൽ പരീക്ഷിക്കാം. മൈദപ്പൊടിയിലും പരീക്ഷിച്ചുനോക്കാം വേണമെങ്കിൽ. ഞാൻ പരീക്ഷിച്ചിട്ടില്ല.

ഉപ്പിടുമ്പോൾ ശ്രദ്ധിക്കുക. ഉരുളക്കിഴങ്ങിനുള്ളത്, അത് വഴറ്റുമ്പോൾ ഇടും. പിന്നെ കടലമാവു കൂട്ടിൽ, അതിലെ ചേരുവകൾക്ക് ഉള്ള ഉപ്പ് ഇട്ടാൽ മതി.

ചൂടോടെ തിന്നുക.

പഴുത്തമാങ്ങ വെള്ളരിക്കൂട്ടാൻ

പഴുത്ത മാങ്ങകളുടെ കാലം. വെറുതേ തിന്നിട്ടും തിന്നിട്ടും തീരുന്നില്ല. അപ്പോപ്പിന്നെ കൂട്ടാൻ വയ്ക്കുക തന്നെ നല്ലത്. ഒരുപാട് വിഭവങ്ങൾ ഉണ്ടാക്കാം പഴുത്ത മാങ്ങ കൊണ്ട്. പച്ചടി, മധുരപ്പച്ചടി, പുളിശ്ശേരി ഒക്കെ. വെള്ളരിക്കയുടെ കൂടെ പച്ചയായാലും പഴുത്തതായാലും, മാങ്ങയിട്ട് കൂട്ടാൻ വെച്ചാൽ നല്ല സ്വാദായിരിക്കും. അതുകൊണ്ട് പഴുത്ത മാങ്ങാക്കാലത്തിൽ ഒരു പഴുത്തമാങ്ങ വെള്ളരിക്കൂട്ടാൻ.




പഴുത്ത മാങ്ങ, കുറച്ചൊരു പുളിയുള്ളത് വലുത് മൂന്നെണ്ണം

വെള്ളരിക്ക - ഇടത്തരം വെള്ളരിക്കയുടെ പകുതി

അരവിന് - നാലു ചുവന്ന മുളക് , അര ടീസ്പൂൺ ജീരകം, 5 ടേബിൾസ്പൂൺ തേങ്ങ

ഉപ്പും മഞ്ഞൾപ്പൊടിയും ആവശ്യത്തിന്.

വറവിടാൻ, കറിവേപ്പില, മുളക്, കടുക്. ഇത്രയും വസ്തുക്കൾ വേണം.





മാങ്ങ കഴുകി, തോലുകളഞ്ഞ് അതിന്റെ പുറത്ത് കത്തികൊണ്ട് വരയുക. വേവാനും, അത് കൂട്ടാനിലേക്ക് നന്നായി യോജിക്കാനും വേണ്ടിയാണ് വരയുന്നത്. വെള്ളരിക്ക, മുറിച്ച് കഴുകിയെടുക്കുക. രണ്ടും കൂടെ, ഉപ്പും മഞ്ഞൾപ്പൊടിയും ഇട്ട് കുറച്ച് വെള്ളവും ഒഴിച്ച് വേവിക്കുക.

തേങ്ങ, മുളക്, ജീരകം എന്നിവ നന്നായി അരയ്ക്കുക.





വെന്ത, മാങ്ങാവെള്ളരിയിലേക്ക് തേങ്ങയരച്ചത് ഇട്ട്, ആവശ്യമെങ്കിൽ വെള്ളവും ചേർത്ത് തിളപ്പിക്കുക.

വാങ്ങിവെച്ച് വറവിടുക.




ചുവന്ന മുളക് അരയ്ക്കുന്നതിനുപകരം, ആവശ്യമനുസരിച്ച് മുളകുപൊടിയിടാം. മാങ്ങയ്ക്ക് പുളിയില്ലെങ്കിൽ, കൂട്ടാനു പുളി വേണമെങ്കിൽ, അല്പം പുളിച്ച മോരൊഴിച്ചാൽ മതി.

കപ്പക്കിഴങ്ങ് കൊണ്ടാട്ടം

പൂള, കിഴങ്ങ്, കപ്പ, കൊള്ളിക്കിഴങ്ങ്, കപ്പക്കിഴങ്ങ്, എന്നൊക്കെ പല പേരും ഇട്ട് വിളിക്കുന്ന കപ്പ കൊണ്ട് ഉണ്ടാക്കുന്ന കൊണ്ടാട്ടം. വേനൽക്കാലത്ത് ഉണ്ടാക്കിവെച്ചാൽ, മഴക്കാലത്ത് വറുത്തുതിന്നാം. നല്ല സ്വാദായിരിക്കും. ഉണ്ടാക്കിവെക്കാൻ എളുപ്പം. അധികം വസ്തുക്കളൊന്നും വേണ്ട. അധികം അദ്ധ്വാനവും വേണ്ട.





കപ്പയും, ഉപ്പും, നല്ല വെയിലും പ്രധാനമായിട്ടും വേണം.




കപ്പ തോലൊക്കെക്കളഞ്ഞ്, ഒന്നു കഴുകി, കഷണങ്ങളാക്കി, വീണ്ടും ചെറിയ ചെറിയ കഷണങ്ങളാക്കുക. കഴുകുക.



മുങ്ങിക്കിടക്കാനുള്ള വെള്ളത്തിലിട്ട്, പാകത്തിന് ഉപ്പുമിട്ട്, ഒന്ന് ചൂടാക്കുക. ഒന്ന് വേവണം. പക്ഷെ, അധികം സമയം അടുപ്പത്ത് വയ്ക്കരുത്.




വെള്ളം ഊറ്റിക്കളഞ്ഞെടുക്കുക. അപ്പോത്തന്നെ ഉണക്കാൻ തുടങ്ങുക. ഒരു പ്ലാസ്റ്റിക് ഷീറ്റിലോ, പായയിലോ, കടലാസ്സിലോ ഒക്കെ നിരത്തിയിട്ട് നല്ല വെയിലത്ത്, നന്നായി മൊരിഞ്ഞുണങ്ങുന്നതുവരെ ഉണക്കുക.



വേണമെന്നു തോന്നുമ്പോൾ വറുത്തുതിന്നുക.

വേണമെങ്കിൽ മുളകുപൊടിയും ഇടാം. ഉപ്പ് അധികമാവാതെ സൂക്ഷിക്കുക. ഒരേ ആകൃതിയിലൊക്കെ നുറുക്കിയെടുത്താൽ നന്നായിരിക്കും. ഞാൻ അങ്ങനെ ചെയ്തില്ല.

പുളിച്ചോറ്

നിങ്ങൾ തിരക്കിലാകുന്ന സമയം. ഒരുപാട് വിഭവങ്ങളൊന്നും ഉണ്ടാക്കാൻ സമയമില്ല. അല്ലെങ്കിൽ ഒരു കൂട്ടാൻ വയ്ക്കാൻ പോലും സമയമില്ല. അപ്പോ ഈ പുളിച്ചോറ് ഉണ്ടാക്കാം. അല്ലെങ്കിൽ, ചോറ് വെച്ചതുണ്ട്. അതിഥികൾ ആരെങ്കിലും പെട്ടെന്ന് വന്നു. വെറും ചോറ് കൊടുക്കുന്നത് മോശമല്ലേ? അപ്പോ സൂത്രത്തിൽ ഈ ചോറുണ്ടാക്കി വിളമ്പാം.

പുളിച്ചോറിന്റെ പൊടി വാങ്ങാറുണ്ട്. ടമറിൻഡ് റൈസ് പൗഡർ എന്നും പറഞ്ഞ് കിട്ടും. പക്ഷേ, അതില്ലാത്ത ഒരുദിവസം അതില്ലാതെ സ്വന്തമായിട്ട് ഒന്നു തട്ടിക്കൂട്ടാംന്നു കരുതി. ഒന്നുമില്ല. തക്കാളിച്ചോറ്, തൈർസാദം ഒക്കെ ഉണ്ടാക്കുന്നതുപോലെ എളുപ്പത്തിൽ ഒന്നാണ് ഈ പുളിസാദവും.

ഒരു കപ്പ് പച്ചരി. ഇനി പുഴുങ്ങലരിയേ ഉള്ളൂ/ഇഷ്ടമുള്ളൂന്ന് വെച്ചാൽ അതും ആവാം. കഴുകിവയ്ക്കുക.
നിലക്കടല - അര ടേബിൾസ്പൂൺ
കടലപ്പരിപ്പ് - ഒരു ടീസ്പൂൺ
ഉഴുന്ന് - ഒരു ടീസ്പൂൺ
ചുവന്ന മുളക് - രണ്ട് (കഷണങ്ങളായി മുറിക്കുക)
കടുക് - അര ടീസ്പൂൺ
ജീരകം - കാൽ ടീസ്പൂൺ
മല്ലിപ്പൊടി - കാൽ ടീസ്പൂൺ
മുളകുപൊടി - കാൽ ടീസ്പൂണിലും കുറവ്
മഞ്ഞൾപ്പൊടി - കാൽ ടീസ്പൂണിലും കുറവ്.
പുളി - നെല്ലിക്കാവലുപ്പം. വെള്ളത്തിലിട്ട് കുതിരുമ്പോൾ പുളി പിഴിഞ്ഞ് വെള്ളം മാത്രം എടുക്കണം
ഉപ്പ് - ആവശ്യത്തിന്.
കായം - പൊടി - ലേശം.
എണ്ണ - സൂര്യകാന്തിയെണ്ണയാണ് ഞാനുപയോഗിച്ചത്.
കറിവെപ്പില - കുറച്ച്.
പരിപ്പുകളും, നിലക്കടലയുമൊന്നും ചോറ് തിന്നുമ്പോൾ വല്യ ഇഷ്ടമല്ലെങ്കിൽ കുറയ്ക്കാം. ഇല്ലാതിരിക്കരുത്. അത്രേ ഉള്ളൂ.




എണ്ണ ചൂടാക്കി, ആദ്യം ഉഴുന്നുപരിപ്പ്, അതു ചൂടാവുമ്പോൾ, കടുകും മുളകും, അതും പൊട്ടിക്കഴിയുമ്പോൾ ജീരകം, അതു ചൂടാവുമ്പോഴേക്കും നിലക്കടല, കറിവേപ്പില, അതും ചൂടായാൽ, മല്ലി, മുളക്, കായം, മഞ്ഞൾപ്പൊടികൾ, അതൊന്ന് ചൂടായാൽ, പുളിവെള്ളം. ഒക്കെയൊന്ന് യോജിച്ചാൽ, അരി വേവാൻ മാത്രം വേണ്ട വെള്ളവും ഉപ്പും. വെള്ളം തിളച്ചാൽ, കഴുകിവെച്ച അരിയെടുത്തിട്ട് ഇളക്കുക.




വെന്താൽ ആയി. ഒക്കെ തീ കുറച്ച് വെച്ച് ചെയ്യുക.



പപ്പടവും, കൊണ്ടാട്ടമുളകും, കൊണ്ടാട്ടങ്ങളും കൂട്ടിക്കഴിക്കാം. പുളി ആയതുകൊണ്ട്, പുളിയില്ലാത്ത മോരുണ്ടെങ്കിൽ കൂട്ടിക്കഴിക്കാം.

ഇനി നിങ്ങൾക്ക് ഇങ്ങനെ ചോറു വേവേണ്ടെങ്കിൽ, വേറെ വേറെ നിൽക്കണമെങ്കിൽ, അരി ഉപ്പുമിട്ട് വേവിച്ചുവയ്ക്കുക. ഒക്കെ വറത്തിട്ട് കഴിയുമ്പോൾ അതിലേക്ക് ചോറിട്ടിളക്കുക.

ഒക്കെയൊന്ന് പരീക്ഷിച്ചിട്ട്, പിന്നീട് കൂട്ടലും കിഴിക്കലും നടത്തുക. കാരണം, മുളകും മല്ലിയും ഉപ്പുമൊന്നും എല്ലാവർക്കും ഒരേപോലെയാവില്ല അളവ്. അതൊക്കെ ഇടണം എന്നു പറയാൻ മാത്രമേ ആവൂ.

പടവലങ്ങ എരിശ്ശേരി

പടവലങ്ങ ഇഷ്ടമാണോ? എനിക്കിഷ്ടമാണ്. പടവലങ്ങത്തോട്ടം കാണാനും ഇഷ്ടമുണ്ട്. പടവലങ്ങ കൊണ്ട് ഒരുപാട് വിഭവങ്ങൾ ഉണ്ടാക്കാം എന്ന് നിങ്ങൾക്കറിയാവുന്നതുപോലെ എനിക്കും അറിയാം. അതുകൊണ്ട് ചെറിയ തോതിൽ ഒരു സാദാ എരിശ്ശേരി വെച്ചുകളയാംന്ന് വിചാരിച്ചു.




പടവലങ്ങ ചിത്രത്തിൽ ഉള്ളതുപോലെ രണ്ട് കഷണം എടുത്ത്, അല്ലെങ്കിൽ ചെറിയൊരു പടവലങ്ങയോ, വല്യതിന്റെ പകുതിക്കഷണമോ എടുക്കുക.




തോലുരച്ച് കളഞ്ഞ് മുറിക്കുക. കഴുകുക.

പരിപ്പ്, മൂന്ന് ടേബിൾസ്പൂൺ എടുക്കുക. (കുറച്ച് അങ്ങോട്ടും ഇങ്ങോട്ടുമൊക്കെയായാൽ വല്യ കുഴപ്പമില്ല.) കഴുകുക.

ഒരു പാത്രത്തിൽ, ആദ്യം പരിപ്പിട്ട്, അത് മുങ്ങാനുള്ള വെള്ളം ഒഴിച്ച്, പടവലങ്ങക്കഷണങ്ങൾ ഇട്ട്, കുറേശ്ശെക്കുറേശ്ശെ, മുളകുപൊടിയും (കാൽ ടീസ്പൂൺ ഇടാം), മഞ്ഞൾപ്പൊടിയും ഇടുക. കുറച്ചും കൂടെ വെള്ളം അതിനു മുകളിൽ ഒഴിക്കുക. പടവലങ്ങ മുങ്ങുകയൊന്നും വേണ്ട. വെന്തുകഴിഞ്ഞ് ഒരുപാട് വെള്ളമുണ്ടെങ്കിൽ ശരിയാവില്ല. വേവിക്കുക. കുക്കറിൽ അല്ലെങ്കിൽ ആദ്യം പരിപ്പ് വേവിച്ചിട്ടേ പടവലങ്ങയും പൊടികളും ഇടേണ്ടൂ. വേറെ വേറെ ആണെങ്കിൽ ഉപ്പും ഇടാം. കുക്കറിൽ ആണെങ്കിൽ, വെന്ത് വാങ്ങിയിട്ട് ഉപ്പ് ചേർത്താൽ മതി.

തേങ്ങ മൂന്ന് ടേബിൾസ്പൂണെടുത്ത്, കാൽ ടീസ്പൂൺ ജീരകവും ഇട്ട് അരച്ചെടുക്കുക.

വെന്ത പടവലങ്ങ-പരിപ്പിലേക്ക്, തേങ്ങയരച്ചത് ചേർത്തിളക്കുക. ഉപ്പ് ഇട്ടുകഴിഞ്ഞില്ലെങ്കിൽ ഇടുക. വെള്ളം വേണ്ടതുപോലെ ഒഴിക്കുക. തിളപ്പിക്കുക. തീ കുറച്ചുവെച്ച് തിളപ്പിക്കുക.





വാങ്ങിവെച്ച് കടുകും കറിവേപ്പിലയും വറുത്തിടുക. വേണമെങ്കിൽ ചുവന്ന മുളകും.

പഴം പ്രഥമൻ

പഴം പ്രഥമൻ അത്ര എളുപ്പത്തിൽ ആവുന്ന ഒന്നല്ല. പക്ഷെ, സമയമുണ്ടെങ്കിൽ കുഴപ്പമൊന്നുമില്ല. പഴം പ്രഥമൻ ഉണ്ടാക്കാൻ പ്രധാനമായിട്ട് വേണ്ട ഒന്നാണ് നേന്ത്രപ്പഴം/ ഏത്തപ്പഴം വരട്ടിയത്. വരട്ടാൻ കുറച്ചുസമയം വേണം, അത്രേ ഉള്ളൂ. അല്ലാതെ അധികം നൂലാമാലകളൊന്നുമില്ല. ആദ്യം പഴം വരട്ടിയിട്ട് പ്രഥമനിലേക്ക് കടക്കാം.

പഴം വരട്ടാൻ

നേന്ത്രപ്പഴം നന്നായി പഴുത്തത് - ആറ് എണ്ണം.
ശർക്കര - അരക്കിലോ
നെയ്യ് - കുറച്ച്- രണ്ട് മൂന്ന് ടേബിൾസ്പൂൺ.

പഴം, ആദ്യം തോലുകളഞ്ഞ് വേവിക്കുക. കുക്കറിൽ ഒരു പാത്രത്തിൽ ഒട്ടും വെള്ളം ചേർക്കാതെ വേവിക്കാൻ വെച്ചാൽ നന്നായിരിക്കും. വെന്ത പഴം കീറി,കുരുവും നാരും കളയണം. അതു കഴിഞ്ഞാൽ മുറിച്ച്, മിക്സിപ്പാത്രത്തിലിട്ട് നന്നായി അടിച്ചെടുക്കുക.ശർക്കര, ചൂടാക്കാൻ വെച്ച്, പഴവും ഇട്ട് നന്നായി വരട്ടുക. ശർക്കരയിൽ കുറച്ച് വെള്ളമൊഴിക്കാം. പക്ഷേ, നന്നായി വരട്ടിയെടുക്കണം. ചക്ക വരട്ടുന്നതുപോലെത്തന്നെ. നെയ്യും ചേർക്കാം.

ഇനി പ്രഥമൻ





പഴം വരട്ടിയത് - ഏഴ് ടേബിൾസ്പൂൺ
ശർക്കര - ഏഴ്/ എട്ട് ആണി. (നല്ല മധുരമുണ്ടാവും. വേണ്ടെങ്കിൽ കുറയ്ക്കുക).
തേങ്ങാപ്പാൽ - കട്ടിയുള്ളത് ഒരു ഗ്ലാസ്സ് (കാൽ ലിറ്റർ വേണ്ട).
തേങ്ങാപ്പാൽ വെള്ളം ചേർത്ത് നേർപ്പിച്ചത് - ഒരു ലിറ്റർ
ചുക്കുപൊടി - കുറച്ച്
കൊട്ടത്തേങ്ങാക്കഷണങ്ങൾ - വറുത്തു ചേർക്കാൻ - കുറച്ച്.
നെയ്യ് - തേങ്ങ വറുക്കാൻ.

(മുകളിലെ ചിത്രത്തിലെ അളവും അളവ് എഴുതിയതും വ്യത്യാസമുണ്ട്).







പഴം വരട്ടിയതും, അര ലിറ്റർ തേങ്ങാപ്പാലും, കാൽ ലിറ്റർ വെള്ളവും അടുപ്പത്ത് വെച്ച് വേവിക്കുക.





കുറുകിയാൽ, ശർക്കര ഇടുക.








അതും വെന്താൽ ബാക്കി അര ലിറ്റർ തേങ്ങാപ്പാൽ ഒഴിക്കുക.





അതും ഒക്കെക്കൂടെ വെന്ത് കുറുകിയാൽ, ബാക്കിയുള്ള, കട്ടിത്തേങ്ങാപ്പാൽ ഒഴിച്ച് തിളപ്പിച്ച് വാങ്ങിവെക്കുക.

നെയ്യിൽ കൊട്ടത്തേങ്ങ വറവിടുക. ചുക്കുപൊടി മുകളിൽ വിതറുക. അണ്ടിപ്പരിപ്പും മുന്തിരിയും ഇടാം വേണമെങ്കിൽ. വാങ്ങുന്ന തേങ്ങാപ്പാൽ ആണെങ്കിൽ എളുപ്പം കഴിയും ജോലി. തേങ്ങാപ്പാൽ, നിങ്ങൾക്ക് ഇത്രയും വേണ്ടെന്ന് തോന്നുന്നെങ്കിൽ അടുത്ത പ്രാവശ്യം കുറയ്ക്കാം. ശർക്കര ഈ അളവിൽ ഇട്ടാൽ നല്ല മധുരമുണ്ടാവും. മധുരപ്രിയർക്ക് പറ്റും.