പപ്പായപ്പച്ചടി

ഞങ്ങളൊക്കെ കറുമൂസ എന്നു വിളിക്കുന്ന പപ്പായകൊണ്ട് ഒരു പച്ചടി. പപ്പായകൊണ്ട് പല വിഭവങ്ങളും ഉണ്ടാക്കിക്കഴിഞ്ഞു. ഇനിയും പല വിഭവങ്ങളും ഉണ്ടാക്കാനുണ്ട്. പപ്പായകൊണ്ട് തോരനോ ഓലനോ ഒക്കെയാണ് സ്ഥിരം പാചകം. പച്ചടിയുണ്ടാക്കുന്നത് അപൂർവ്വം. പച്ചടി എന്ന വിഭവം ഇഷ്ടമുള്ളവർക്ക് പപ്പായപ്പച്ചടിയും ഇഷ്ടമാവും എന്നു കരുതുന്നു.

അധികം പഴുക്കാത്ത അല്ലെങ്കിൽ മുഴുവൻ പച്ചയായ കറുമൂസ - ചിത്രത്തിൽ ഉള്ളപോലെ
പച്ചമുളക് - എരിവുള്ളത്. മൂന്നോ നാലോ. രണ്ടാക്കി പൊട്ടിച്ചോ, വെറുതേ ഒന്ന് ചീന്തിയോ ഇടാം
പുളിച്ച തൈര് - അര ഗ്ലാസ്സ്.
തേങ്ങ - നാല് ടേബിൾസ്പൂൺ.
കടുക് - കാൽ ടീസ്പൂൺ
തേങ്ങയും കടുകും മോരും വെള്ളം ചേർത്ത് മിനുസമായിട്ട് അരയ്ക്കണം.
മുളകുപൊടി - കാൽടീസ്പൂൺ. എരിവ് വേണ്ടെങ്കിൽ പച്ചമുളക് മാത്രം ഇട്ടാൽ മതി. മുളകുപൊടി വേറെ ഇടരുത്.
ഉപ്പ്
വറവിടാൻ ആവശ്യമുള്ളത് - കടുക്, കറിവേപ്പില, ചുവന്നമുളക്.

കറുമൂസ തോലൊക്കെക്കളഞ്ഞ്, കുരുവൊക്കെക്കളഞ്ഞ് ചെറുതാക്കി മുറിച്ച് കഴുകിയെടുക്കുക. കഷണങ്ങളും പച്ചമുളകും ഉപ്പും ഇട്ട് ആവശ്യത്തിനുമാത്രം വെള്ളമൊഴിച്ച് നന്നായി വേവിക്കണം. വെന്താൽ അതിൽ വെള്ളം വേണ്ട. അതിൽ ഒരുതണ്ട് കറിവേപ്പില രണ്ടാക്കി മുറിച്ച് ഇടുക.

വെന്തത് തണുത്താൽ കഷണങ്ങൾ ഒന്നുടച്ച് അതിൽ അരച്ചുവെച്ചത് ചേർക്കുക. ഇളക്കുക. തൈരും ഒഴിക്കുക.
വറവിടുക.

ബീറ്റ്‌റൂട്ട് ഉപ്പേരി

ബീറ്റ്‌റൂട്ട്കൊണ്ടൊരു ഉപ്പേരി അഥവാ തോരൻ. പതിനഞ്ചുമിനുട്ടിനുള്ളിൽ കഴിയും. പല തരത്തിലും ഉണ്ടാക്കിയെടുക്കാം. ഇവിടെ എങ്ങനെയാണ് ചെയ്യുന്നതെന്ന് പറയാം.

ബീറ്റ്‌റൂട്ട് തോലുകളഞ്ഞ് ചെറുതായി മുറിച്ചെടുക്കുകയാണ് പതിവ്. ഇത് ഞാൻ ചീകിയെടുത്തു. കുഴപ്പം എന്താണെന്നുവെച്ചാൽ കുറച്ച് വെള്ളം പോലെ ഇരിക്കും. അതുകൊണ്ട് പ്രശ്നമൊന്നുമില്ല.




ബീറ്റ്‌റൂട്ട് ചീകിയെടുത്തോ കഷണങ്ങളായി മുറിച്ചോ എടുക്കുക. ചിത്രത്തിൽ ഉള്ളത്രേം. ഒരു വല്യ ബീറ്റ്‌റൂട്ടിന്റെ പകുതിയുണ്ട്.
മഞ്ഞൾപ്പൊടിയും മുളകുപൊടിയും കുറച്ച്
കടുക് - കാൽ ടീസ്പൂൺ
ഉഴുന്നുപരിപ്പ് - രണ്ട് ടീസ്പൂൺ
വറ്റൽമുളക് - രണ്ട്
കറിവേപ്പില
തേങ്ങ ചിരവിയത് - കുറച്ച്
ഉപ്പ്
വെളിച്ചെണ്ണയോ വേറെ പാചകയെണ്ണയോ

എണ്ണ ചൂടായാൽ അതിൽ ഉഴുന്നുപരിപ്പിടുക. ചുവന്നു തുടങ്ങുമ്പോൾ കടുക് ഇടുക, ചുവന്ന മുളക് പൊട്ടിച്ചിടുക.കടുക് പൊട്ടുമ്പോഴേക്കും കറിവേപ്പിലകൾ ഇടുക. ബീറ്റ്റൂട്ട് ഇടുക. മഞ്ഞൾപ്പൊടി, ഉപ്പ്, മുളകുപൊടി എന്നിവയിട്ട് ഇളക്കുക. അല്പം വെള്ളമൊഴിക്കുക. അടച്ചുവയ്ക്കുക. തീ കുറച്ചുവച്ച് വേവിക്കുക. വറവിടാൻ എടുത്ത എണ്ണയിൽ, ബീറ്റ്‌റൂട്ട് കരിയാതെ വേവുമെന്ന് തോന്നുന്നെങ്കിൽ വെള്ളം ഒഴിക്കേണ്ട. വെന്താൽ വാങ്ങിവെച്ച് തേങ്ങയിട്ട് ഇളക്കുക.



എളുപ്പം കഴിയും. കഷണങ്ങളാക്കി മുറിച്ചാൽ വേവാൻ കുറച്ചും കൂടെ സമയം എടുക്കും. ചീകിയെടുക്കുമ്പോൾ വെള്ളം പോലെ ഇരിക്കും.

കാരറ്റ് പാലക്ക് ചോറ്

“സ്വാതന്ത്ര്യം തന്നെയമൃതം
സ്വാതന്ത്ര്യം തന്നെ ജീവിതം.
പാരതന്ത്ര്യം മാനികൾക്കോ
മൃതിയേക്കാൾ ഭയാനകം.”



വന്ദേമാതരം!
വന്ദേമാതരം!
വന്ദേമാതരം!

സ്വാതന്ത്ര്യദിനാശംസകൾ!

-----------------------------




കാരറ്റും പാലക്കും ചേർത്തുണ്ടാക്കുന്ന നെയ്ച്ചോറ് ആണിത്.

വേണ്ടത്:-




കാരറ്റ് - ഒന്ന് വലുത് - ചീകിയെടുക്കുക.

പാലക് - ചെറിയ ഒരു കെട്ട്- ചെറുതായി മുറിച്ചെടുക്കുക.

ബസുമതിയരി - ഒരു വല്യ ഗ്ലാസ്സ് (100 ഗ്രാമെങ്കിലും വേണം).

ഇഞ്ചിവെളുത്തുള്ളിപ്പേസ്റ്റ് - ഒരു ടീസ്പൂൺ.

ഏലയ്ക്ക - മൂന്നെണ്ണം പൊടിച്ചത്.

ഉണക്കമുന്തിരി കുറച്ച്.

കുറച്ച് നെയ്യ്.

വലിയ ഉള്ളി അഥവാ സവാള - ഒന്ന് വലുത് - മുറിച്ചെടുത്തത്.

ഉപ്പ്.

അരി കഴുകിയെടുത്ത് ഉപ്പും ഇട്ട് വേവിക്കുക.

ഒരു പാത്രത്തിൽ നെയ്യ് ചൂടാക്കി ഉള്ളി ചുവന്നുവരുന്നതുവരെ ചൂടാക്കണം. അതു കഴിഞ്ഞ് കാരറ്റ് ഇട്ട് വഴറ്റുക, പാലക് ചീരയിട്ടു വഴറ്റുക, ഇഞ്ചി വെളുത്തുള്ളിപ്പേസ്റ്റ് ഇട്ട് വഴറ്റുക. ഒക്കെ വഴറ്റി വെന്താൽ ഏലയ്ക്കപ്പൊടിയിടുക. ഒരു നുള്ള് ഉപ്പ് ഈ കൂട്ടിലേക്ക് ചേർക്കുക. വളരെക്കുറച്ചുമതി. ചോറിൽ ഉപ്പിട്ടതല്ലേ. ചോറ് ഇട്ടിളക്കുക. ഗരം മസാലപ്പൊടി ചേർക്കാൻ ഇഷ്ടമുള്ളവർക്ക് കുറച്ച് അതും ചേർക്കാം.



ഉണക്കമുന്തിരി കുറച്ച് നെയ്യിൽ വറുത്തെടുത്ത് ചേർക്കുക. അണ്ടിപ്പരിപ്പും ഉണ്ടെങ്കിൽ വറുത്ത് ചേർക്കാം.

ചേന എരിശ്ശേരി

എരിശ്ശേരി എന്നുപറഞ്ഞാൽ പുളിയില്ലാത്തൊരു കൂട്ടാനാണ്. വെള്ളം ചേർത്ത് നീട്ടിയും, ചേർക്കാതെ, ഒന്ന് കുറുക്കിയും ഉണ്ടാക്കാം. വേറെ കറിയൊന്നും ഉണ്ടാക്കുന്നില്ലെങ്കിൽ കുറച്ച് വെള്ളമായിട്ട് വയ്ക്കുക. സദ്യയ്ക്കൊക്കെയാണെങ്കിൽ വെള്ളം അധികമില്ലാതെ വയ്ക്കുക.

എരിശ്ശേരി പല പച്ചക്കറികൾ കൊണ്ടു വയ്ക്കാം. ചേന കൊണ്ട് വയ്ക്കാമെന്നാണ് ഞാനിപ്പോ തീരുമാനിച്ചത്.

ആവശ്യമുള്ളത് ഒക്കെ ആദ്യം തന്നെ ഒരുക്കിവയ്ക്കുക.



ചേന ചിത്രത്തിൽ ഉള്ളതുപോലെ കുറച്ചു കഷണങ്ങൾ - ചെറുതാക്കി മുറിക്കണം. ഇത് വേഗം വെന്തുടയുന്നതായതുകൊണ്ട് ഞാൻ ഇങ്ങനെ മുറിച്ചതാണ്.

പരിപ്പ് - കടലപ്പരിപ്പ് 3 ടേബിൾസ്പൂൺ.

ഇവിടെ കടലപ്പരിപ്പ് ആണ് എടുത്തത്. സാധാരണയായി തുവരപ്പരിപ്പും ചെറുപരിപ്പുമാണ് എടുക്കാറുള്ളത്.

തേങ്ങ - നാല് ടേബിൾസ്പൂൺ, കാൽ ടീസ്പൂൺ ജീരകവും ചേർത്ത് അരച്ചത്.
ഉപ്പ്
മുളകുപൊടി - അര ടീസ്പൂൺ. പൊടിയിടുന്നില്ലെങ്കിൽ തേങ്ങ അരയ്ക്കുമ്പോൾ ചുവന്ന മുളക് ആവശ്യത്തിനു ചേർത്ത് അരയ്ക്കുക.
മഞ്ഞൾപ്പൊടി.
വറവിടാനുള്ള വസ്തുക്കൾ.
തേങ്ങ - ഒരു ടേബിൾസ്പൂൺ. കുറച്ച് വെളിച്ചെണ്ണയൊഴിച്ച് വറുത്തെടുക്കുക. (രണ്ട് ടേബിൾസ്പൂൺ ആയാലും കുഴപ്പമില്ല. സ്വാദു കൂട്ടാൻ ചേർക്കുന്നതാണ്. ചുവക്കെ വറുക്കണം).

ചേന മുറിച്ച് കഴുകുക. പരിപ്പ് കഴുകിയെടുക്കുക. മഞ്ഞൾപ്പൊടി, മുളകുപൊടി എന്നിവയിട്ട് നല്ലപോലെ വേവിക്കുക. വെന്താൽ ഉപ്പിടുക. തേങ്ങയരച്ചത് ചേർത്ത് തിളപ്പിക്കുക. വെള്ളം ആവശ്യത്തിനു ചേർക്കാം. തിളച്ച് വാങ്ങിയാൽ, തേങ്ങ വറുത്തത് ഇടുക. കടുകും കറിവേപ്പിലയും വറവിടുക.




ചേന എരിശ്ശേരി തയ്യാർ. എരിശ്ശേരിയൊക്കെയുണ്ടാക്കിയാൽ വേഗം തീർക്കുക. ആവശ്യത്തിനുമാത്രം ഉണ്ടാക്കുക. അധികം നേരമൊന്നും കേടാവാതെ ഇരിക്കില്ല.

കുമ്പളങ്ങ പച്ചടി

കുമ്പളങ്ങ ഇഷ്ടമാണോ? കൃഷിസ്ഥലത്തുനിന്ന് നേരിട്ട് പറിച്ചെടുത്ത് കറികൾ ഉണ്ടാക്കിയാൽ എന്തൊരു സ്വാദായിരിക്കും അല്ലേ? തൽക്കാലം അതിനു നിവൃത്തിയില്ല. അതുകൊണ്ട് കടയിൽനിന്ന് വാങ്ങി കറികൾ ഉണ്ടാക്കുകയേ നിവൃത്തിയുള്ളൂ. മൊളേഷ്യവും എരിശ്ശേരിയും ഓലനും മോരുകറിയും ഒക്കെ വെക്കാം കുമ്പളങ്ങ കൊണ്ട്.

പച്ചടി വെക്കാൻ കുമ്പളങ്ങയും, തേങ്ങയും, ഉപ്പും മുളകുപൊടിയും പച്ചമുളകും കടുകും വേണം. പിന്നെ വറവിടാനുള്ളതും.





ചിത്രത്തിലുള്ളതുപോലെ ഒരു കഷണം കുമ്പളങ്ങ എടുക്കുക. തോലുകളഞ്ഞ് മുറിക്കുക. കഴുകുക.




വെന്താൽ ഉടച്ചെടുക്കാം എന്ന് വിചാരിച്ച് ഞാൻ കുറച്ച് വലുപ്പത്തിലാണ് മുറിച്ചത്. ചെറുതാക്കി മുറിക്കുന്നതാണ് നല്ലത്.

കഴുകിയെടുത്ത് മൂന്നോ നാലോ പച്ചമുളക് ചീന്തിയിട്ടോ മുറിച്ചിട്ടോ എടുക്കുക.

ഉപ്പും, അല്പം മുളകുപൊടിയും ഇടുക. മുളകുപൊടി ഇല്ലെങ്കിലും പ്രശ്നമൊന്നുമില്ല. എരിവ് ഇഷ്ടമെങ്കിൽ മുളകുപൊടി ചേർക്കാം.

വേവിക്കുക. നല്ലോണം വേവണം. കുക്കറിൽ ആണെങ്കിൽ വെള്ളം ഒഴിച്ചു എന്നു വരുത്തിയാൽ മതി. വെന്ത കഷണങ്ങളിൽ വെള്ളം ഉണ്ടാവരുത്. ഉണ്ടെങ്കിൽ വറ്റിച്ചെടുക്കാം.



മൂന്ന് ടേബിൾസ്പൂൺ തേങ്ങയെടുത്ത് കാൽ ടീസ്പൂൺ കടുകും കൂട്ടി മിനുസമായിട്ട് അരച്ചെടുക്കുക. അരയ്ക്കുമ്പോൾ വെള്ളത്തിനുപകരം മോരും വെള്ളം ഉപയോഗിക്കുക.

വെന്തത് തണുത്തിട്ട് മാത്രമേ തേങ്ങയരച്ചത് അതിലേക്ക് ഇടാവൂ. അതുകൊണ്ട് പച്ചടിയുണ്ടാക്കുമ്പോൾ, എത്രയും നേരത്തെ കഷണങ്ങൾ അവിടെ വേവിച്ചുവയ്ക്കുക.

തണുത്താൽ കഷണങ്ങളൊക്കെ ഒന്നുടച്ചിട്ട് തേങ്ങയരച്ചത് ചേർക്കുക. അര ഗ്ലാസ്സ് തൈരും ചേർക്കുക. തേങ്ങയും തൈരുമൊക്കെ കുറച്ച് കൂടിപ്പോയാൽ പ്രശ്നമൊന്നുമില്ല. പക്ഷേ അധികം വെള്ളം പോലെ ആവാതെയിരിക്കുന്നതാണ് നല്ലത്.




കഷണം വെന്താൽ അതിൽ കറിവേപ്പില, തണ്ടോടെ ഇടണം. ഒരു തണ്ട് ഇല രണ്ടാക്കി മുറിച്ച് ഇട്ടാൽ മതി. കടുകും മുളകും കറിവേപ്പിലയും വറവിടുക.

എല്ലാവർക്കും കുമ്പളങ്ങപ്പച്ചടി ഇഷ്ടമാവും എന്നു കരുതുന്നു.

പൊട്ടുകടലപ്പൊടി

പൊട്ടുകടല കൊണ്ട് വെള്ളവും ചേർത്ത് ചമ്മന്തിയുണ്ടാക്കുകയാണ് പലയിടത്തും പതിവ്. പൊട്ടുകടല കൊണ്ട് ചമ്മന്തിപ്പൊടിയുണ്ടാക്കി വെച്ചാലോ? ചോറിനും ദോശയ്ക്കും ചപ്പാത്തിയ്ക്കും ഒക്കെ കൂട്ടിക്കഴിക്കാം. യാത്രയിൽ കൊണ്ടുപോകാം. കുറച്ച് തൈരും ഒഴിച്ചാൽ നല്ല ചമ്മന്തിയായി.




പൊട്ടുകടല - ചിത്രത്തിൽ ഉള്ളതുപോലെ.
മുളകുപൊടി -മുക്കാൽ ടീസ്പൂൺ (വേണമെങ്കിൽ കുറയ്ക്കുകയും കൂട്ടുകയും ചെയ്യാം).
വെളുത്തുള്ളി - എട്ട് ചെറിയ അല്ലി.
ഉപ്പ്.

പൊട്ടുകടല ആദ്യം തന്നെ നന്നായി വറുക്കണം. എണ്ണയൊന്നും ഒഴിക്കരുത്. വറുത്തെടുത്താൽ തണുക്കാൻ വയ്ക്കുക. നന്നായി മൊരിയണം. ഇല്ലെങ്കിൽ പച്ചസ്വാദ് വരും. കരിയാനും പാടില്ല. ഒക്കെച്ചേർത്ത് പൊടിക്കുക. ആദ്യം കടലയും മുളകുപൊടിയും ഉപ്പും ഇട്ട് ഒന്ന് പൊടിച്ചതിനുശേഷം വെളുത്തുള്ളി ഇട്ട് പൊടിച്ചാലും മതി.





വെളുത്തുള്ളിയുടെ സ്വാദും പൊട്ടുകടലയുടെ സ്വാദും ഒക്കെ ഇഷ്ടപ്പെടുന്നവർക്കു മാത്രമേ ഇത് ഇഷ്ടപ്പെടാൻ സാദ്ധ്യതയുള്ളൂ എന്നു തോന്നുന്നു.

ഗോതമ്പ് അപ്പം

അപ്പം അഥവാ പാലപ്പം പോലെ ഒരു വിഭവമാണ് ഗോതമ്പ് അപ്പം. അരിപ്പൊടികൊണ്ട് പാലപ്പം ഉണ്ടാക്കുന്നതുപോലെത്തന്നെ ഗോതമ്പുപൊടി കൊണ്ട് ഉണ്ടാക്കുന്ന അപ്പം.





വേണ്ടതെന്തൊക്കെയാണെന്നു വെച്ചാൽ :‌-

തേങ്ങാവെള്ളം - കുറച്ചു വല്യ ഒരു ഗ്ലാസ്സ് നിറയെ.
പഞ്ചസാര - രണ്ട് ടീസ്പൂൺ.
ഗോതമ്പുപൊടി - രണ്ട് ഗ്ലാസ്സ്.
തേങ്ങ ചിരവിയത് - അര മുറിത്തേങ്ങ. മിനുസമായിട്ട് അരയ്ക്കുക.
യീസ്റ്റ് - ആറ് മണി.
ഉപ്പ്
റവ/ അരിപ്പൊടി - ഒരു ടേബിൾസ്പൂൺ.

തേങ്ങാവെള്ളത്തിൽ പഞ്ചസാരയിട്ട് ഒരു പത്ത് മണിക്കൂറെങ്കിലും വയ്ക്കണം.
അപ്പം ഉണ്ടാക്കുന്നതിന്റെ തലേദിവസം തന്നെ, ഗോതമ്പുപൊടിയിൽ, പുളിപ്പിച്ച തേങ്ങാവെള്ളം, ഉപ്പ്, തേങ്ങ അരച്ചത്, എന്നിവയൊഴിച്ച് ആവശ്യത്തിനു വെള്ളവും ചേർത്ത് അപ്പത്തിന്റെ മാവിന്റെ രീതിയിൽ കുഴച്ചുവയ്ക്കുക.
ഉണ്ടാക്കുന്നതിനു മുമ്പ് അതിൽ റവയോ അരിപ്പൊടിയോ, അടുപ്പത്ത് തിളയ്ക്കുന്ന വെള്ളത്തിലിട്ട് കുറുക്കി ഇതിൽ ചേർക്കുക.



അപ്പച്ചട്ടി ചൂടായാൽ കുറച്ച് കോരിയൊഴിച്ച് അപ്പമുണ്ടാക്കിയെടുക്കുക. കറിയും കൂട്ടി കഴിക്കുക. ചമ്മന്തി കൂട്ടിയാലും മതി.




കൂട്ടിൽ തേങ്ങാപ്പാലും വേണമെങ്കിൽ ചേർക്കാം.

സൂചിറവപ്പായസം

ഒന്നും വയ്യെന്നു വിചാരിച്ചിരിക്കുകയായിരുന്നു. ഒരു മ്ലാനത. അപ്പോഴാണ് പാട്ട് കേട്ടത്. അല്ല പരസ്യം കേട്ടത്. മധുരം കഴിക്കണം ഇന്നൊന്നാംതീയ്യതിയായ് എന്ന പരസ്യം. ഇന്ന് കർക്കടകം ഒന്നല്ലേ. അപ്പോ മധുരം തന്നെ ആവാംന്ന് വിചാരിച്ചു. അല്ലെങ്കിലും അല്പം മധുരത്തിന്റെ ആവശ്യമുണ്ടായിരുന്നു. അങ്ങനെയാണ് ഈ പായസം ഉണ്ടാക്കാൻ തീരുമാനിച്ചത്.

പായസം എന്നൊക്കെപ്പറയാമെങ്കിലും ഇത് വല്യ ഒരു പായസമൊന്നുമല്ല. ഉണ്ടാക്കാനും കഴിക്കാനും എളുപ്പം. ആർക്കും ഉണ്ടാക്കിയെടുക്കാം.

സൂചി റവ വേണം - കാൽ ലിറ്റർ വെള്ളം കൊള്ളുന്ന ഗ്ലാസ്സിൽ അര ഗ്ലാസ്സ്.
ശർക്കര - 6 ആണി. (കൂട്ടുകയോ കുറയ്ക്കുകയോ നിങ്ങളുടെ ഇഷ്ടം പോലെ.
ചെറുപഴം - 2. അല്പം പുളിയുള്ളതായാലും കുഴപ്പമില്ല. ഇനി നേന്ത്രപ്പഴം ആയാലും പ്രശ്നമില്ല.
തേങ്ങ - അരമുറി ചിരവിയത്.

ആദ്യം തന്നെ കുറച്ചു വല്യ പാത്രത്തിൽ റവ അളന്നെടുത്ത ഗ്ലാസ്സിന് ഏഴെട്ട് ഗ്ലാസ്സ് വെള്ളം അടുപ്പത്ത് വയ്ക്കുക.




അതു തിളച്ചാൽ തീ കുറച്ച്, റവ കുറച്ചുകുറച്ചായിട്ട് വെള്ളത്തിലേക്കിട്ട് ഇളക്കിക്കൊണ്ടിരിക്കണം.



പിന്നെ റവ വെന്തോട്ടെ. ഇടയ്ക്ക് ഇളക്കണം. ഇല്ലെങ്കിൽ കരിഞ്ഞുപിടിക്കാൻ സാദ്ധ്യതയുണ്ട്.



വെന്താൽ, ശർക്കരയിടുക. ഇളക്കുക. അതു തിളച്ചു യോജിച്ചോട്ടെ. തീ കുറേ കൂട്ടിവയ്ക്കരുത്. ഒക്കെക്കൂടെ വെള്ളം വറ്റിപ്പോവുകയേ ഉള്ളൂ.

ശരക്കരയും ഇളകി വെന്ത് യോജിച്ചാൽ തേങ്ങയിട്ടിളക്കുക. പിന്നെ കുറച്ചുനേരം വെച്ചാൽ മതി. വാങ്ങിവെച്ച് പഴം മുറിച്ചിടുക. സൂചിറവപ്പായസം തയ്യാർ.



തണുത്താൽ കട്ടിയാവും. അങ്ങനെ ആവേണ്ടെങ്കിൽ, കുറച്ചു വെള്ളം തിളപ്പിച്ച്, ശർക്കരയിടുമ്പോൾ ചേർക്കുക. റവ് വെന്ത് കഴിയുമ്പോൾ വെള്ളം കുറവാണെന്നു തോന്നിയാലും വെള്ളമൊഴിക്കാം. പക്ഷേ തിളപ്പിച്ച വെള്ളമായാൽ നല്ലത്. പുളിയുള്ള പഴം ആയാൽ മധുരത്തിനിടയ്ക്ക് അല്പം പുളിയും വരും. ഇനി അണ്ടിപ്പരിപ്പ്, മുന്തിരി ഒക്കെ വറവിടണമെങ്കിൽ അങ്ങനെ ആവാം. തേങ്ങയ്ക്കു പകരം തേങ്ങാപ്പാൽ ഒഴിക്കണമെങ്കിൽ അതും ആവാം. റവ വറുത്തില്ല ഞാൻ. വറുത്താലും ഇല്ലെങ്കിലും കുഴപ്പമില്ല.

തുവരക്കൂട്ടാൻ

തുവര കൊണ്ട് കറി വെക്കാറുണ്ടോ? തുവരപ്പരിപ്പ് കൊണ്ട് പലവിഭവങ്ങളും ഉണ്ടാക്കാറില്ലേ? ആ പരിപ്പുണ്ടാക്കുന്നത് ഈ തുവരകൊണ്ടാണ്. ഇത് ഒരു പ്രാവശ്യം വെച്ചുനോക്കിയാൽ അറിയാം ഇഷ്ടമാണോ അല്ലയോ എന്ന്. എല്ലാവർക്കും ഇഷ്ടമാവും. സാധാരണയായി തുവരക്കൂട്ടാൻ അല്ലെങ്കിൽ തുവരക്കറി അല്ലെങ്കിൽ തോരക്കൂട്ടാൻ വെക്കുന്നതാണ് ഞാൻ ഇവിടെ പറയുന്നത്. നിങ്ങൾക്ക് ഇഷ്ടം‌പോലെ പിന്നീട് മസാലകൾ ചേർത്തും വേറെ രീതിയിൽ പരീക്ഷിച്ചും ഒക്കെ നോക്കാവുന്നതാണ്.

തുവര - നൂറ് ഗ്രാം.
തേങ്ങ - അഞ്ച് ടേബിൾസ്പൂൺ.
ചുവന്ന മുളക് - മൂന്നെണ്ണം (കുറയ്ക്കുകയോ കൂട്ടുകയോ ചെയ്യാം).
മഞ്ഞൾപ്പൊടി
ഉപ്പ്
തേങ്ങയും മുളകും അരയ്ക്കുക. മുളക് അരയ്ക്കുന്നതിനുപകരം മുളകുപൊടി ആവശ്യത്തിനു ചേർത്താലും മതി. അരയ്ക്കുമ്പോൾ, അല്പം ജീരകവും ഇഷ്ടമുണ്ടെങ്കിൽ ചേർക്കാം.
തുവരയിൽ കല്ലും പുല്ലും ഒക്കെയുണ്ടെങ്കിൽ അതൊക്കെ കളഞ്ഞുവൃത്തിയാക്കി, തലേന്ന് വെള്ളത്തിലിട്ടു വയ്ക്കുക. എന്നാൽ നന്നായി വേവും.
തുവര കഴുകിയെടുത്ത്, അതിൽ മഞ്ഞൾപ്പൊടിയിട്ട് വെള്ളവുമൊഴിച്ച് വേവിക്കുക. നന്നായി വെന്താലേ സ്വാദുണ്ടാവൂ.
വെന്താൽ, ആദ്യം തന്നെ അതിലെ വെള്ളം വേറൊരു പാത്രത്തിലേക്ക് ഊറ്റിവയ്ക്കുക.



എന്നിട്ട്, തുവര, നല്ലവണ്ണം ഒരു സ്പൂൺകൊണ്ട് ഉടയ്ക്കുക.
വെന്ത തുവര, കല്ലിലോ മിക്സിയിലോ ഇട്ട് ഒന്ന് ചതച്ചെടുക്കുന്നതാണ് പതിവ്. അങ്ങനെ പറ്റുമെങ്കിൽ ചെയ്യുക. പകുതി തുവര ചതച്ചാൽ മതി.
ഉപ്പിടുക. തേങ്ങയരച്ചതും ആവശ്യത്തിനു വെള്ളവും (ഊറ്റിവെച്ച വെള്ളം ആദ്യം ചേർക്കുക. അതു പോരെങ്കിൽ പച്ചവെള്ളം ചേർക്കുക.) ചേർത്ത് നന്നായി യോജിപ്പിച്ച് തിളപ്പിക്കണം.




തിളച്ചുയോജിച്ചാൽ വാങ്ങിവെച്ച് വറവിടുക.

ചൂ ചൂ ചുണ്ടങ്ങ

ചുണ്ടങ്ങ എന്നു കേട്ടിട്ടില്ലേ? ചുണ്ടങ്ങ കണ്ടിട്ടില്ലേ? ഇതാണു ചുണ്ടങ്ങ മരം/ ചെടി.



നിങ്ങളുടെയൊക്കെ വീട്ടിലോ പറമ്പിലോ ഉണ്ടോ? ആദ്യം ഞാൻ വിചാരിച്ചത് അതുകൊണ്ടൊരു ഗുണമില്ല, അതു വെറുതേ വേലിപ്പടർപ്പിനു നിൽക്കുന്നതെന്നായിരുന്നു. അനിയത്തിക്കുട്ടിയോട് ചോദിച്ചപ്പോൾ അവളു പറഞ്ഞു, ചുണ്ടങ്ങ കൊണ്ട് ഉപ്പേരി വെക്കാംന്ന്. എന്നാല്‍പ്പിന്നെ ഒരുകൈ അല്ല, രണ്ടുകൈയും നോക്കാംന്ന് ഞാനും കരുതി.



ഇത് ഒടിഞ്ഞ കൊമ്പ്





ഇത് പൂവ്. കാറ്റുള്ളതുകാരണം ഫോട്ടോ ശരിയായില്ല. (അല്ലെങ്കിൽ കുറേ ശരിയായി. ;))




ഇത് ചുണ്ടങ്ങ.




ചുണ്ടങ്ങ ചെടിയിൽ നിന്ന് പറിച്ചെടുക്കുക. നിറയെ മുള്ളുണ്ടാവും കുത്തും. വേദനിക്കും. സൂക്ഷിക്കുക. പിന്നെ ചുണ്ടങ്ങ എടുത്ത് അമ്മിക്കല്ലുകൊണ്ട് കുത്തിച്ചതയ്ക്കുക. അപ്പോ അതിനുള്ളിലെ അരി അഥവാ കുരു പോകും. പിന്നെ കഴുകുക. കുരു മുഴുവനായിട്ടും പോകും.




കുരുവിന് കയ്പുണ്ടാവുമെന്ന് വിശ്വാസം. കഴുകിക്കഴിഞ്ഞ് വാരിയെടുത്ത് വയ്ക്കുക.

പാത്രത്തിലോ ചീനച്ചട്ടിയിലോ ആദ്യം കുറച്ച് പാചകയെണ്ണ ഏതെങ്കിലും ഒഴിക്കുക. കുറച്ച് ഉഴുന്നുപരിപ്പിടുക. ചുവന്നുവരുമ്പോഴേക്കും, കടുകും, ചുവന്ന മുളക് പൊട്ടിച്ചെടുത്തതും ഇടുക. കടുക് പൊട്ടുമ്പോഴേക്കും കറിവേപ്പിലയും ഇടുക. തീ കുറച്ച്, ചുണ്ടങ്ങ ഇടുക. മഞ്ഞളും ഉപ്പും ഇടുക. വേവിക്കാൻ വേണ്ട വെള്ളം ഒഴിക്കുക. എരിവ് വേണ്ടവർ മുളകുപൊടിയും ഇടുക. വേവിക്കുക. വാങ്ങിവെച്ച് ചിരവിയ തേങ്ങ കുറച്ചിടുക. ഉപ്പേരി തയ്യാർ.




ഇനി സ്പെഷൽ വേണമെങ്കിൽ ഉള്ളിയും വെളുത്തുള്ളിയും ഒക്കെ വഴറ്റാം. എന്നിട്ട് ചുണ്ടങ്ങയിട്ട് ഉപ്പേരിയുണ്ടാക്കാം. തിന്നുമ്പോൾ അതിന്റെ തോലു മാത്രം വേറെ കടിക്കുന്നതുപോലെ തോന്നും. നന്നായി വേവിക്കുക.

ചിത്രങ്ങളൊക്കെ ക്ലിക്ക് ചെയ്താൽ വലുതായിട്ട് കാണാം എന്നു പറഞ്ഞുതരേണ്ട കാര്യമില്ലല്ലോ അല്ലേ?

മുരിങ്ങക്കായ് മാങ്ങ മോരുകൂട്ടാൻ

മാങ്ങാക്കാലം. മാങ്ങയിഷ്ടമുള്ളവർക്ക്, മുരിങ്ങക്കോൽ/മുരിങ്ങാക്കായ് ഇഷ്ടമുള്ളവർക്ക് ഒരു കൂട്ടാൻ. അമ്മ പറഞ്ഞു, മാങ്ങയും മുരിങ്ങക്കോലും, മോരും ഇട്ട് ഒരു കൂട്ടാനൊന്നും വച്ചിട്ടില്ലെന്ന്. അവിയലിൽ, മാങ്ങയും മോരും മുരിങ്ങയും ഇടുമെങ്കിൽ അതുമാത്രമൊരു കൂട്ടാൻ എന്തുകൊണ്ടായിക്കൂടെന്ന് ഞാൻ. വെച്ചുനോക്കിയപ്പോൾ നന്നായിട്ടുണ്ട്.



മാങ്ങ, അധികം പച്ചയും, അധികം പഴുത്തതുമല്ലാത്തത്. രണ്ടെണ്ണം, കഴുകി തോലുകളഞ്ഞ് മുറിച്ചത്.
മുരിങ്ങാക്കോൽ - രണ്ടെണ്ണം കഴുകി മുറിച്ചത്
ചിരവിയ തേങ്ങ - നാലു ടേബിൾസ്പൂൺ.
ജീരകം - കാൽ ടീസ്പൂൺ.(ഇഷ്ടമല്ലെങ്കിൽ തീരെ കുറയ്ക്കുക).
മോര് - കാൽ ലിറ്റർ. മാങ്ങയ്ക്കു പുളിയുണ്ടെങ്കിൽ അധികം പുളിച്ചത് വേണ്ട. മാങ്ങയ്ക്ക് മധുരമാണെങ്കിൽ കുറച്ച് പുളി ആയ്ക്കോട്ടെ.
മഞ്ഞൾപ്പൊടിയും മുളകുപൊടിയും ഉപ്പും പാകം നോക്കി ഇടുക.
മുളകുപൊടി ഇടുന്നില്ലെങ്കിൽ, തേങ്ങയുടെ കൂടെ ചുവന്ന മുളക് അരയ്ക്കുക.
തേങ്ങയും ജീരകവും ആവശ്യത്തിനു വെള്ളം കൂട്ടി അരയ്ക്കുക.



മുരിങ്ങാക്കോൽ, മാങ്ങ എന്നിവ ഉപ്പും മുളകുപൊടിയും മഞ്ഞൾപ്പൊടിയുമിട്ട് വേവിക്കുക. വേവാനുള്ള വെള്ളം ഒഴിച്ചാൽ മതി. ഞാൻ കുക്കറിലാണ് വേവിച്ചത്. എന്നിട്ട് കൽച്ചട്ടിയിലിട്ടു. വെന്തുടഞ്ഞുപോകരുത്.





അതിലേക്ക് മോരൊഴിച്ച് തിളപ്പിക്കുക.
തേങ്ങയരച്ചത് ഇട്ട് തിളപ്പിക്കുക.
ആവശ്യത്തിനു വെള്ളവും ചേർക്കുക. തിളപ്പിക്കുക.
കുറച്ച് കറിവേപ്പില ഇടുക.
വറവിടുക.



മുരിങ്ങക്കായ് മാങ്ങാ മോരുകൂട്ടാൻ തയ്യാർ.

പടവലങ്ങയുപ്പേരി

തോരന്, ഞങ്ങളൊക്കെ ഉപ്പേരി എന്നാണ് പറയുന്നതെന്ന് ഞാൻ പറഞ്ഞിട്ടുണ്ട്. ചിലർ വറവ് എന്നും പറയും. പടവലങ്ങയുപ്പേരി ഉണ്ടാക്കിയതെങ്ങനെയെന്നു പറയാം. എളുപ്പമാണ്. സ്വാദുണ്ട്. രസമോ മറ്റോ വെച്ചാൽ അതിന്റെ കൂടെ ഈ ഉപ്പേരിയും വെച്ചാൽ ചോറ് നിറച്ചുണ്ണാം.





പടവലങ്ങ, ചിത്രത്തിൽ ഉള്ളത്രേം എടുക്കുക. അല്ലെങ്കിൽ ഒരു നീണ്ട പടവലങ്ങയെടുത്ത്, അതിന്റെ പകുതി എടുത്ത്, തോലു ചുരണ്ടിക്കളഞ്ഞ്, ചെറുതാക്കി മുറിച്ചെടുത്ത് കഴുകിയെടുക്കുക. വലിയ ഉള്ളി അഥവാ സവാള ഒന്നും ചെറുതാക്കി മുറിച്ചെടുക്കുക. ഒന്നോ രണ്ടോ പച്ചമുളകും വട്ടത്തിൽ മുറിച്ചെടുക്കുക.


ആദ്യം, വെളിച്ചെണ്ണയോ, നിങ്ങൾ പാചകത്തിനുപയോഗിക്കുന്ന എണ്ണയോ ചൂടാക്കുക. ഒരു ടീസ്പൂൺ ഉഴുന്നുപരിപ്പ് ഇടുക. ചുവന്നുവരുമ്പോഴേക്ക് കടുകും, പിന്നെ കുറച്ച് കറിവേപ്പിലയും ഇടുക. കടുവറ കടുവറ കടുവറ (കട:- ഉർവ്വശി/വനജ - അച്ചുവിന്റെ അമ്മ). അതുകഴിഞ്ഞാൽ ഉള്ളിയും പച്ചമുളകുമിട്ട് വഴറ്റിമൂപ്പിച്ച്, അതിലേക്ക് പടവലങ്ങാക്കഷണങ്ങൾ ഇടുക. മഞ്ഞൾപ്പൊടി കുറച്ചിടുക. കാൽ ടീസ്പൂൺ മുളകുപൊടിയിടുക. നിങ്ങൾക്ക് എരിവ് വേണ്ടെങ്കിൽ ഇടേണ്ട. പച്ചമുളകുണ്ടല്ലോ. പിന്നെ ഉപ്പുമിട്ട്, വേവാൻ വെള്ളവുമൊഴിച്ച് അടച്ചുവെച്ച്, തീ കുറച്ച് വേവിക്കുക. വെള്ളമൊഴിക്കാതെ എണ്ണയിൽ വേവിക്കുന്നത് അത്ര നല്ലതൊന്നുമല്ല. എന്നാലും സ്വാദു കൂടുമായിരിക്കും. വെന്താൽ തേങ്ങ ചിരവിയിടുക. ഇളക്കുക. ഉപ്പേരി തയ്യാറായി. (ഉണ്ടാക്കിയതു മുഴുവൻ ചിത്രത്തിലില്ല.)




ചൂടുകാലത്ത്, തേങ്ങ ചിരവിയിട്ടുവെച്ചാൽ രാവിലത്തെ ഉപ്പേരി, മിക്കവാറും വൈകുന്നേരത്തേക്ക് കേടാവും. അതുകൊണ്ട് കുറേയുണ്ടാക്കി, തേങ്ങയും ഇട്ട് യോജിപ്പിച്ചുവയ്ക്കരുത്. ഉച്ചയൂണിനു വേണ്ടതിൽ മാത്രം തേങ്ങ ചേർക്കുക. ബാക്കി, പിന്നെ എടുക്കുമ്പോൾ തേങ്ങ ചേർക്കുക.

അവിൽ‌പ്രഥമൻ

അവിൽ/അവൽ ‌പ്രഥമൻ കഴിച്ചിട്ടുണ്ടോ? ഇല്ലെങ്കിൽ മധുരപ്രിയരാണെങ്കിൽ നിങ്ങൾക്ക് ഉണ്ടാക്കിക്കുടിച്ചുനോക്കാം. അത്രയ്ക്കു ജോലിയൊന്നുമില്ല. തേങ്ങാപ്പാൽ വേണം. വീട്ടിലുണ്ടാക്കുന്നതിലും എളുപ്പം കടയിൽ നിന്നു കിട്ടുന്നതാണെങ്കിൽ അതുമാവാം.




നാടൻ അവിൽ - 100 ഗ്രാം
ശർക്കര നല്ല മധുരമുള്ളത് - 6 ആണി.
വറുത്തിടാൻ, കൊട്ടത്തേങ്ങ, അണ്ടിപ്പരിപ്പ്, മുന്തിരി - കുറച്ച്
നെയ്യ് - വറവിനാവശ്യമായത്.
തേങ്ങാപ്പാൽ (അധികം കട്ടിയില്ലാത്തത്) - മുന്നൂറ് എം എൽ.

കട്ടിയുള്ള തേങ്ങാപ്പാൽ - 50 എം എൽ.

അവിലിൽ നെല്ലും ഉമിയും കല്ലുമൊക്കെയുണ്ടെങ്കിൽ അതൊക്കെ ആദ്യം കളയുക. പോകാത്തത്, കഴുകുമ്പോൾ പോയ്ക്കോളും. നിങ്ങൾക്ക് അവിലിന് നല്ല വേവ് ആവശ്യമുണ്ടെങ്കിൽ ആദ്യം അവിൽ കഴുകി അല്പം വെള്ളത്തിൽ വേവിക്കുക. വെന്താൽ ശർക്കയിടുക.


അല്ലെങ്കിൽ ശർക്കര ആദ്യം വെള്ളമൊഴിച്ച് അടുപ്പത്തുവയ്ക്കുക.



ഉരുകിയാൽ, കഴുകിവെച്ചിരിക്കുന്ന അവിൽ അതിലിട്ടു വേവിക്കുക. അപ്പോൾ കുറച്ചും കൂടെ വെള്ളമൊഴിക്കണം.



ശർക്കരയും അവിലും യോജിച്ചാൽ, വെന്താൽ, കട്ടിയില്ലാത്ത തേങ്ങാപ്പാൽ ഒഴിച്ച് തിളപ്പിക്കുക. തിളച്ച് യോജിച്ചാൽ, കട്ടിയുള്ള തേങ്ങാപ്പാലും ഒഴിച്ച് ഒന്നു തിള വന്നാൽ വാങ്ങിവെച്ച്, വറവിടുക.



കൊട്ടത്തേങ്ങ വേറെ വറക്കുക. അണ്ടിപ്പരിപ്പു വറുത്ത്, മുന്തിരിയും അതിലേക്കിട്ട് വറക്കുക.

ചുക്കുപൊടിയും കുറച്ച് ഇടാം.

ആദ്യം ആവശ്യത്തിനു വെള്ളം ഒഴിച്ചില്ലെങ്കിൽ, തണുക്കുമ്പോൾ കട്ടിയാവും പായസം. മധുരം അധികം വേണ്ടെങ്കിൽ ശർക്കയിടുമ്പോൾ കുറയ്ക്കുക. പിന്നെ വെന്തു കഴിഞ്ഞാൽ മധുരം നോക്കിയിട്ട് പോരെങ്കിൽ വീണ്ടും ഇട്ടാൽ മതി.

ബോണ്ട

ബോണ്ടയുണ്ടാക്കാൻ അത്രയെളുപ്പം കഴിയുമോന്നു ചോദിച്ചാൽ കഴിയില്ല്ല. എന്നാലും അധികം വിഷമമില്ലാതെയുണ്ടാക്കിയെടുക്കാം. ഇതിനുവേണ്ട വസ്തുക്കളൊക്കെ വീട്ടിൽ ഉണ്ടായിരിക്കും എന്നു കരുതാം.

ഉരുളക്കിഴങ്ങ് വലുത് നാലെണ്ണം - പുഴുങ്ങുക. പൊടിക്കുക. അധികം പൊടിഞ്ഞുകുഴയരുത്.
വലിയ ഉള്ളി അഥവാ സവാള - രണ്ടെണ്ണം ചെറുതായി അരിഞ്ഞുമുറിച്ചെടുക്കണം.
പച്ചമുളക് നാലെണ്ണം - വട്ടത്തിൽ, ചെറുതായി മുറിച്ചെടുക്കണം
കറിവേപ്പില - കുറച്ച് അരിഞ്ഞെടുക്കണം.

കടലപ്പൊടി/ബേസൻ/ കടലമാവ് - അരക്കപ്പ്
അരിപ്പൊടി - രണ്ട് ടേബിൾസ്പൂൺ.
കായവും, മുളകുപൊടിയും കുറച്ച്
ഉപ്പ് ആവശ്യത്തിന്.


വലിയ ഉള്ളി, അല്പം വെളിച്ചെണ്ണ ചൂടാക്കി നന്നായി വഴറ്റുക. പച്ചമുളകും അതിന്റെ കൂടെയിടാം. പിന്നെ കറിവേപ്പിലയും ഇട്ട് വഴറ്റുക. അതുകഴിഞ്ഞ് ഉപ്പുചേർത്ത്, ഉരുളക്കിഴങ്ങ് ഉടച്ചതും ചേർത്തൊന്ന് വഴറ്റി വാങ്ങിവയ്ക്കുക. തണുക്കട്ടെ.



കടലപ്പൊടിയും, അരിപ്പൊടിയും വളരെക്കുറച്ച് ഉപ്പും, കായം, മുളക് എന്നീ പൊടികളും ഇട്ട് കുറച്ചുമാത്രം വെള്ളം ചേർത്ത് കുഴയ്ക്കുക. ഇഡ്ഡലിമാവിന്റെ കൂട്ടുപോലെ ആയാൽ മതി. ഒഴിച്ചാൽ ഓടിപ്പോകരുത്.



ഉരുളക്കിഴങ്ങ് കൂട്ട് തണുത്തുകഴിഞ്ഞാൽ, കുറച്ചെടുത്ത്, ചെറിയ ഉരുളകളാക്കി, കടലമാവുകൂട്ടിൽ മുക്കിപ്പൊക്കി, ചൂടായ വെളിച്ചെണ്ണയിൽ ഇട്ട് വറുത്തെടുക്കുക. വെന്തു തുടങ്ങിയാൽ തിരിച്ചും മറിച്ചുമൊക്കെ ഇടണം. ഉള്ളിലുള്ളത് വെന്തതല്ലേ. എന്നാലും അകവും പുറവുമൊക്കെ വെന്തുവെന്നു തോന്നിയാൽ കോരിയെടുക്കുക.



കടലമാവു കൂട്ട് പോരെങ്കിൽ വീണ്ടും ഉണ്ടാക്കിയെടുക്കാം. കുറേ ഉണ്ടാക്കിവെച്ചിട്ട് കാര്യമില്ല.

ഉരുളക്കിഴങ്ങ് കൂട്ട് തയ്യാറാക്കുമ്പോൾ കടുകൊക്കെ വേണമെങ്കിൽ വറുത്തിടാം, ആദ്യം. പിന്നെ ഗ്രീൻപീസും ഇടാം, വേവിച്ചിട്ട്. കാരറ്റ് ഇടാം. അങ്ങനെ പലതരത്തിൽ പരീക്ഷിക്കാം. മൈദപ്പൊടിയിലും പരീക്ഷിച്ചുനോക്കാം വേണമെങ്കിൽ. ഞാൻ പരീക്ഷിച്ചിട്ടില്ല.

ഉപ്പിടുമ്പോൾ ശ്രദ്ധിക്കുക. ഉരുളക്കിഴങ്ങിനുള്ളത്, അത് വഴറ്റുമ്പോൾ ഇടും. പിന്നെ കടലമാവു കൂട്ടിൽ, അതിലെ ചേരുവകൾക്ക് ഉള്ള ഉപ്പ് ഇട്ടാൽ മതി.

ചൂടോടെ തിന്നുക.

പഴുത്തമാങ്ങ വെള്ളരിക്കൂട്ടാൻ

പഴുത്ത മാങ്ങകളുടെ കാലം. വെറുതേ തിന്നിട്ടും തിന്നിട്ടും തീരുന്നില്ല. അപ്പോപ്പിന്നെ കൂട്ടാൻ വയ്ക്കുക തന്നെ നല്ലത്. ഒരുപാട് വിഭവങ്ങൾ ഉണ്ടാക്കാം പഴുത്ത മാങ്ങ കൊണ്ട്. പച്ചടി, മധുരപ്പച്ചടി, പുളിശ്ശേരി ഒക്കെ. വെള്ളരിക്കയുടെ കൂടെ പച്ചയായാലും പഴുത്തതായാലും, മാങ്ങയിട്ട് കൂട്ടാൻ വെച്ചാൽ നല്ല സ്വാദായിരിക്കും. അതുകൊണ്ട് പഴുത്ത മാങ്ങാക്കാലത്തിൽ ഒരു പഴുത്തമാങ്ങ വെള്ളരിക്കൂട്ടാൻ.




പഴുത്ത മാങ്ങ, കുറച്ചൊരു പുളിയുള്ളത് വലുത് മൂന്നെണ്ണം

വെള്ളരിക്ക - ഇടത്തരം വെള്ളരിക്കയുടെ പകുതി

അരവിന് - നാലു ചുവന്ന മുളക് , അര ടീസ്പൂൺ ജീരകം, 5 ടേബിൾസ്പൂൺ തേങ്ങ

ഉപ്പും മഞ്ഞൾപ്പൊടിയും ആവശ്യത്തിന്.

വറവിടാൻ, കറിവേപ്പില, മുളക്, കടുക്. ഇത്രയും വസ്തുക്കൾ വേണം.





മാങ്ങ കഴുകി, തോലുകളഞ്ഞ് അതിന്റെ പുറത്ത് കത്തികൊണ്ട് വരയുക. വേവാനും, അത് കൂട്ടാനിലേക്ക് നന്നായി യോജിക്കാനും വേണ്ടിയാണ് വരയുന്നത്. വെള്ളരിക്ക, മുറിച്ച് കഴുകിയെടുക്കുക. രണ്ടും കൂടെ, ഉപ്പും മഞ്ഞൾപ്പൊടിയും ഇട്ട് കുറച്ച് വെള്ളവും ഒഴിച്ച് വേവിക്കുക.

തേങ്ങ, മുളക്, ജീരകം എന്നിവ നന്നായി അരയ്ക്കുക.





വെന്ത, മാങ്ങാവെള്ളരിയിലേക്ക് തേങ്ങയരച്ചത് ഇട്ട്, ആവശ്യമെങ്കിൽ വെള്ളവും ചേർത്ത് തിളപ്പിക്കുക.

വാങ്ങിവെച്ച് വറവിടുക.




ചുവന്ന മുളക് അരയ്ക്കുന്നതിനുപകരം, ആവശ്യമനുസരിച്ച് മുളകുപൊടിയിടാം. മാങ്ങയ്ക്ക് പുളിയില്ലെങ്കിൽ, കൂട്ടാനു പുളി വേണമെങ്കിൽ, അല്പം പുളിച്ച മോരൊഴിച്ചാൽ മതി.