Wednesday, April 06, 2011

ഈന്തപ്പഴം ചമ്മന്തി

ഈന്തപ്പഴം ഇഷ്ടമാണോ? ആണെങ്കിലും അല്ലെങ്കിലും ഈ ചമ്മന്തി ഒന്നു പരീക്ഷിയ്ക്കൂ. ഇഷ്ടമാവും.

വേണ്ടത്:-

ഈന്തപ്പഴം - കുരുവില്ലാത്തത്/കുരു കളഞ്ഞത് - പത്ത് എണ്ണം.
കുഞ്ഞുള്ളി അഥവാ ചെറിയ ഉള്ളി - പതിനഞ്ച്.
ചുന്നമുളക്/വറ്റൽ മുളക്/ ഉണക്കമുളക് - വലുത് മൂന്ന്.
കറിവേപ്പില - പന്ത്രണ്ട് ഇല.
കായം - രണ്ട് നുള്ള്.
പുളി - അല്പം. (രണ്ടു പുളിങ്കുരുവിന്റെ അത്രേം പുളി).
ഉപ്പ് - തോന്നിയപോലെ.
വെളിച്ചെണ്ണ - ഒന്നോ രണ്ടോ ടേബിൾസ്പൂൺ.





ഉള്ളി തോലുകളഞ്ഞ് കഴുകിയെടുക്കുക. കഷണങ്ങളാക്കുകയൊന്നും വേണ്ട. ഈന്തപ്പഴം മിക്സി ജാറിൽ ഇടാൻ പാകത്തിനു കുറച്ച് ചെറുതാക്കുക. അരയ്ക്കുന്ന കല്ല് ഉണ്ടെങ്കിൽ ചതച്ചുവയ്ക്കുക.

ചീനച്ചട്ടിയിൽ വെളിച്ചെണ്ണ ചൂടാക്കുക. ചെറിയ ഉള്ളി ഇടുക. ഒന്നു വഴറ്റിയിട്ട് മുളക് ഇടുക. രണ്ടും കൂടെ അല്പനേരം വഴറ്റുക. ഉള്ളി ചുവക്കുകയൊന്നും വേണ്ട. അതിലേക്ക് കറിവേപ്പിലയും ഇട്ട് അതും മൊരിഞ്ഞാൽ വാങ്ങിവയ്ക്കുക. തണുത്തോട്ടെ.

ഈന്തപ്പഴം, ആവശ്യത്തിനു ഉപ്പിട്ട്, പുളിയും, കുറച്ച് കായവും ഇട്ട് മിക്സിയിൽ അരയ്ക്കുക. അതു പറ്റിപ്പിടിക്കും. അതുകൊണ്ട് സ്പൂൺ കൊണ്ട് ഇളക്കിക്കൊടുക്കണം ഇടയ്ക്ക് (മിക്സി ഓഫ് ചെയ്തിട്ട്).

അത് അരഞ്ഞാൽ, അതിലേക്ക് വറുത്തുവെച്ചിരിക്കുന്ന ഉള്ളി മുതലായ വസ്തുക്കൾ ഇട്ട് അരയ്ക്കുക. വറുത്ത വെളിച്ചെണ്ണ (ഉണ്ടെങ്കിൽ) ബാക്കിവയ്ക്കേണ്ട. അതും ഇതിലേക്ക് ഒഴിക്കുക. അരച്ചുകഴിഞ്ഞാൽ എടുക്കുക.




ഒട്ടും വെള്ളം ചേർക്കരുത്. അതുകൊണ്ടുതന്നെ ഈന്തപ്പഴം നന്നായി ചതച്ചിട്ടോ, അരിഞ്ഞിട്ടോ മാത്രം മിക്സിയിൽ അരയ്ക്കുക. എരിവിനു മുളക് നിങ്ങളുടെ പാകം പോലെ ചേർക്കാം. അരയ്ക്കുമ്പോൾത്തന്നെ ഉപ്പുനോക്കി പാകത്തിനു ചേർക്കുക. കുറഞ്ഞുപോയിട്ട് പിന്നെച്ചേർത്താൽ അത് അത്രയ്ക്കു യോജിക്കില്ല. ഈന്തപ്പഴത്തിനു മധുരമായതുകൊണ്ട് പുളി കുറച്ചുകൂടെ ചേർത്താലും കുഴപ്പമൊന്നുമില്ല.

2 comments:

Manju said...

Hi...

I have come to the world of blogs recently. I found this link yesterday only and I liked it very much. I felt like I am talking to my mom while reading this. BTW I have become a home maker recently :) and I loved cooking on the very first day i started it seriously(which is 3 months ago).Ente mummy ye fone vilichu aanu nhan oro items nte recipe vangi kondirunnathu. Onnum ithu vare flop aayilla ennanu viswasam.. :) want to try more... So I am goin to use this as a guide from today onwards.I mentioned about ur posts to my mom yesterday. and gave her the link too.. :)...today as first thing in the mornign i checked ur page and found this. So felt like I should post a comment. Thanks a lot for Kariveppila...

Manju

സു | Su said...

മഞ്ജു :) ബ്ലോഗ് നോക്കാൻ വന്നതിൽ സന്തോഷം. സമയം കിട്ടുമ്പോൾ നോക്കുമെന്നും, കുറിപ്പുകൾ പരീക്ഷിക്കുമെന്നും കരുതുന്നു.

 
Creative Commons License
This work is licensed under a Creative Commons Attribution-NonCommercial-NoDerivs 2.5 License.

Copyright 2006-2015 [സു | Su]