ചക്ക വരട്ടൂ

ചക്ക വരട്ടിയെടുക്കാന്‍ വളരെ എളുപ്പമാണ് എന്നു പറയാം. വേറെ ആരെങ്കിലും ആണ് ഉണ്ടാക്കിത്തരുന്നതെങ്കില്‍. ഇനി സ്വയം ഉണ്ടാക്കണമെങ്കിലോ. നിങ്ങള്‍ക്കൊക്കെ സാധിക്കും. വേണമെങ്കില്‍ച്ചക്ക (അങ്ങന്യൊരു ചക്കേണ്ടോ? ;) വേരിലും കായ്ക്കും എന്നല്ലേ.
ആദ്യം തന്നെ വേണ്ടത് ക്ഷമയാണ്. അതില്ലെങ്കില്‍ ചക്ക വരട്ടാന്‍ നില്‍ക്കരുത്. അതിന്റെ കൂടെ വേണ്ടത് സമയമാണ്.
പിന്നെ വേണ്ടത് ദാ...ഇതുപോലൊരു ചക്കയാണ്.

ചക്ക കടയില്‍ നിന്ന് വാങ്ങുകയോ, വീട്ടില്‍ നിന്ന് പറിച്ചെടുക്കുകയോ, അയല്‍‌പക്കത്തുനിന്ന് തരുന്നത് സന്തോഷത്തോടെ വാങ്ങുകയോ ഒക്കെ ചെയ്യാം. ഒറ്റ കാര്യം ശരിയായിരിക്കണം. നന്നായി പഴുത്തിരിക്കണം. വളരെ നന്നായി പഴുത്തിരുന്നാല്‍ നല്ലത്.

അത് മുറിയ്ക്കുക. അല്ലെങ്കില്‍ ഇങ്ങനെ വിടര്‍ത്തുക.

ഓരോ ചുളയായി വൃത്തിയായി, അതിന്റെ ചകിണിയും, കുരുവും ഒക്കെക്കളഞ്ഞ് എടുക്കുക.
ഒക്കെ വൃത്തിയായി എടുത്തശേഷം, മിക്സിയില്‍ ഇട്ട് നന്നായി അരയ്ക്കുക. മിക്സിയില്‍ ഇടുമ്പോള്‍, കുരുവും, ചകിണിയും ഒന്നുമില്ലെന്ന് ഉറപ്പോടുറപ്പ് വരുത്തണം. കുറച്ച് കുറച്ചേ ഇടാനും പാടുള്ളൂ.
അരച്ചുകഴിഞ്ഞാല്‍, ഉരുളി അടുപ്പത്തോ സ്റ്റൌവിലോ ഒക്കെ വയ്ക്കുക. തീ കത്തിയ്ക്കുക. അല്ലെങ്കില്‍ നല്ല അടിഭാഗം കട്ടിയുള്ള പാത്രം വയ്ക്കുക. അതില്‍ നെയ്യൊഴിക്കുക. കുറച്ച്. ഒന്ന് രണ്ട് ടേബിള്‍സ്പൂണ്‍ ഒഴിക്കാം. കൂടുതല്‍ ഒഴിച്ചാലും ഒന്നുമില്ല. ആ നെയ്യിലേക്ക് അരച്ചെടുത്തത് ഒഴിക്കുക.

അത് വേവാനുള്ള വെള്ളവും ഒഴിക്കുക.
പിന്നെ ശര്‍ക്കര അഥവാ വെല്ലം ഇതിലേക്ക് ഇടുക. ഇത്രേം വലിയ ചക്കയ്ക്ക് ഒന്നര - രണ്ട് കിലോ ഇടാം. കൂടുതല്‍ ആയാലും കുഴപ്പമില്ല. പായസമോ അടയോ ഉണ്ടാക്കുമ്പോള്‍ എന്തായാലും അതിന്റെ കൂടെ വേറെ ശര്‍ക്കര ചേര്‍ക്കാമല്ലോ. ഇനി വെറും ചക്കപ്പേസ്റ്റ് തിന്നാന്‍ ആണെങ്കില്‍ നന്നായി ചേര്‍ക്കാം.

ഇനിയാണ് ജോലി. ഇളക്കിക്കൊണ്ടിരിക്കണം. താഴെപ്പോവാതെ. കുറേക്കഴിയുമ്പോള്‍ നിങ്ങള്‍ക്ക് മടുത്താല്‍ തീയൊക്കെ അണച്ച് പാത്രം ഇറക്കിവയ്ക്കാം. ഇളക്കാതിരുന്നാല്‍ കരിഞ്ഞുപോവും. ഇനിയിന്നു വയ്യ എന്നു തോന്നിയാല്‍ നാളേയ്ക്ക് വയ്ക്കാം. സൌകര്യം പോലെ അടുപ്പത്ത് വച്ച് ഇളക്കിക്കൊണ്ടിരിക്കുക.

തിള വന്ന് കൈയിലൊക്കെ തെറിക്കും. അതുകൊണ്ട് സൂക്ഷിക്കുക. തീ കുറയ്ക്കുക.
കട്ടിയാവും. പിന്നേം കട്ടിയാവും.

ഒടുവില്‍, ഇളക്കുന്ന ചട്ടുകത്തിലോ സ്പൂണിലോ എടുത്തു മുകളില്‍ പിടിച്ചാല്‍ താഴെ വീഴാത്തിടം വരെയാണ് ഇതിന്റെ പാചകം. അതാണ് പാകം. (തലയ്ക്കു മുകളില്‍ പിടിച്ച് പാകം നോക്കരുത്. ;))

അവസാനം ഇങ്ങനെയാവും.
നല്ലപോലെ തണുത്തിട്ട്, കുപ്പികളില്‍ അടച്ച് വയ്ക്കുക.

പിന്നീട് വേണ്ടപ്പോള്‍ വേണ്ടപ്പോള്‍ എടുത്ത് തിന്നുകയോ വിഭവങ്ങള്‍ ഉണ്ടാക്കുകയോ ചെയ്യുക. ആദ്യം, ചുള വേവിച്ച് തണുത്ത ശേഷം അരച്ചാലും മതി.

(നന്നായി പാകമായില്ലെങ്കില്‍ പൂപ്പല്‍ വരും എന്ന് ഓര്‍മ്മിക്കുക).