കുക്കർ ചക്കയപ്പം

ഇലയട ആയിരുന്നു വീട്ടിൽ മിക്കപ്പോഴും ഉണ്ടാക്കിയിരുന്ന മധുരം. എല്ലാവരും കൂടെയാണ് പാചകം. ഇലയടയ്ക്കുള്ളിൽ വയ്ക്കുന്ന കൂട്ടിനെ ഞങ്ങൾ “പണ്ടം” എന്നാണ് വിളിക്കുന്നത്. പണ്ടം എന്നതിന് ആഭരണം എന്നുകൂടെയുണ്ട് ഞങ്ങളുടെ നാട്ടിൽ അർത്ഥം. എന്നിട്ട്, ഞങ്ങൾ അരിമാവ് പരത്തിയതിലേക്ക് പണ്ടം വയ്ക്കുമ്പോൾ, ഇതിനു കുറച്ച് പണ്ടം കൂടുതൽ കൊടുത്തേക്കാം എന്നും പറഞ്ഞ് ചിരിക്കുമായിരുന്നു. ഇലയട കഴിഞ്ഞാൽ ചക്കയപ്പവും ചക്കയടയും ഇടയ്ക്കൊക്കെ ഉണ്ടാക്കിയിരുന്നു.

ചക്കയട, അമ്മ മിക്കവാറും ഉണ്ടാക്കുന്നത്, കുക്കറിലാണ്. അതായത് ഇലയൊന്നുമില്ലാതെ. മാവുകലക്കി, കുക്കറിന്റെ തട്ടുകളിലേക്ക് ഒഴിച്ച് വേവിച്ചെടുക്കും. ആദ്യം വെന്തോന്ന് നോക്കിയിട്ട്, വെന്തില്ലെങ്കിൽ, കുറച്ചുസമയംകൂടെ വേവിക്കും. അടയുടെ സ്വാദുതന്നെ. അത്രത്തോളം വരില്ലെങ്കിലും. എളുപ്പത്തിൽ ജോലികഴിയും എന്നതാണ് ഗുണം.
മിനുസമായിപ്പൊടിച്ച അരിപ്പൊടി, (അരിപ്പൊടി വറുത്തെടുക്കും ഇവിടെ) ശർക്കര, ചക്കവരട്ടിയത്, ഏലയ്ക്ക പൊടിച്ചത്, തേങ്ങ ചെറുതായി നുറുക്കിയത് എന്നിവ വേണം. ചിത്രത്തിൽ ഉള്ളതുപോലെ മതി അളവ്. ശർക്കരയും ഏലയ്ക്കയും ചിത്രത്തിൽ ഇല്ല. ഏകദേശം കണക്കാക്കി എടുക്കുക. ആറേഴ് ആണി മതിയാവും. മധുരം വേണ്ടതനുസരിച്ച് കൂട്ടുകയും കുറയ്ക്കുകയും ചെയ്യാം.

ചക്കവരട്ടിയിൽ ശർക്കര കുറവായിരിക്കും. അതുകൊണ്ട് കുറച്ച് ശർക്കര എടുത്ത്, അരിപ്പൊടിക്കു മധുരം വരാനും കണക്കാക്കി, പാവുകാച്ചുക. (വെള്ളമൊഴിച്ച് അടുപ്പത്തുവെച്ച് ഉരുക്കുക). മിനുസമായി പൊടിച്ച അരിപ്പൊടിയെടുക്കുക. ആ ഉരുകിയത് അരിച്ചിട്ടാണെങ്കിൽ അരിച്ചിട്ട് അല്ലെങ്കിൽ അപ്പാടെ അരിപ്പൊടിയിലേക്ക് ഒഴിക്കുക. ഏലയ്ക്ക പൊടിച്ചിടുക. തേങ്ങാക്കഷണങ്ങൾ ഇടുക. ചക്കവരട്ടിയതും ഇട്ട് ഒന്നായി ഇളക്കി കുറച്ച് വെള്ളമായി എടുത്ത് കുക്കറിന്റെ തട്ടിലോ, കുക്കറിൽ വെക്കാവുന്ന പാത്രത്തിലോ കുറച്ച് നെയ് പുരട്ടിയിട്ട് ഒഴിയ്ക്കുക. (നെയ് പുരട്ടിയില്ലെങ്കിലും സാരമില്ല. പക്ഷെ വെന്താൽ അപ്പാടെ എടുക്കണമെങ്കിൽ ചിലപ്പോൾ കിട്ടിയെന്നുവരില്ല). കുക്കറിന്റെ കൂടെ കിട്ടുന്ന തട്ടിൽത്തന്നെയാണ് ഞാൻ വെച്ചിരിക്കുന്നത്. വലുതിൽ.

ഒരു പ്ലേറ്റുകൊണ്ട് അടയ്ക്കുക. കുക്കർ അടയ്ക്കുക. വേവിക്കുക.


കുക്കർ ചക്കയപ്പം തയ്യാർ. ഇതൊരു എളുപ്പപ്പണിയാണ്. വെന്തോന്ന് നോക്കാൻ ഒരു ഈർക്കിലോ പപ്പടം കുത്തിയോ എടുത്ത് അപ്പത്തിൽ ഒന്ന് കുത്തിയെടുത്ത് നോക്കുക. പറ്റിപ്പിടിച്ചാൽ വെന്തില്ല.

ഒന്നു തണുത്താൽ പ്ലേറ്റിലേക്ക് മാറ്റാം.


മുറിച്ചെടുക്കാം. ഇഷ്ടമുള്ളതുപോലെ.



കുക്കറിൽ വെക്കുമ്പോൾ ശ്രദ്ധിക്കേണ്ടത്, കുറച്ചുനേരം എടുക്കും ഇത് വേവാൻ എന്നുള്ളതുകൊണ്ട് കുക്കറിൽ നല്ലപോലെ വെള്ളം ഒഴിക്കണം. കൂട്ടൊഴിച്ച പാത്രത്തിനടിയിൽ വേറൊരു പാത്രം (അതിൽ വെള്ളം ഒഴിക്കാം. നീങ്ങിപ്പോകാതിരിക്കാൻ കനത്തിന്) വെക്കാം. എന്നാൽ കുക്കറിലൊഴിച്ച വെള്ളം തിളച്ചുപൊന്തി കൂട്ടിലേക്ക് കയറില്ല.
ചക്കവരട്ടിയത്, ശർക്കര വെള്ളത്തിലേക്കിട്ടിളക്കി ഒന്ന് യോജിപ്പിച്ചാലും നന്നായിരിക്കും. ചൂടോടെ.

ചക്കവരട്ടിയത് കടയിൽ ഇഷ്ടം പോലെ കിട്ടാനുണ്ടല്ലോ. അതുകൊണ്ട് എളുപ്പമായി ഇത് ചെയ്യാം. അരിപ്പൊടിയും കിട്ടും.

ഇവിടെ ചക്കവരട്ടിയത് വീട്ടിൽത്തന്നെയുണ്ട്. അരിപ്പൊടിയും മിക്കവാറും വീട്ടിൽ ഉണ്ടാക്കിയെടുക്കുകയാണ് ചെയ്യാറ്. ഇടയ്ക്ക് കടയിൽ നിന്നു വാങ്ങും.

ഉലുവയിലച്ചപ്പാത്തി

ഇലക്കറികളൊക്കെ എനിക്കിഷ്ടമാണ്. ഉണ്ടാക്കാനും കഴിക്കാനും. ഉലുവയുടെ ഇലയ്ക്ക് കയ്പുണ്ടെന്ന് ഞാൻ മനസ്സിലാക്കിയിരുന്നു. അതുകൊണ്ട് അതിനോട് വലുതായ താല്പര്യം തോന്നിയില്ല. ഇലക്കറികൾ കഴിക്കുന്നത് നല്ലതായതുകൊണ്ട് ഉലുവയിലകൊണ്ട് എന്തെങ്കിലും ഉണ്ടാക്കിയേക്കാം എന്നുവെച്ചു. കൂട്ടുകാരികളൊക്കെ ഉലുവച്ചീരകൊണ്ട് ചപ്പാത്തിയുണ്ടാക്കുന്നത് പറഞ്ഞുകേട്ടിട്ടുണ്ട്. എനിക്കതിൽ താല്പര്യം ഇല്ലാഞ്ഞതുകൊണ്ട്, ഉലുവയില കയ്ക്കും എന്നൊരു വാശിയിൽ ഞാനിരുന്നു. അതിനുശേഷമാണ് കട്‌ലറ്റ് ഉണ്ടാക്കുന്നത്. അതിന്റെ വിജയത്തിന്റെ ചുവടുപിടിച്ച് എന്റേതായ രീതിയിൽ ഒരു പരീക്ഷണവും കൂടി നടത്തിക്കളയാം എന്നു കരുതി.

ഉലുവയില നന്നായി കഴുകിയെടുത്ത് ചെറുതായി മുറിക്കണം/അരിയണം. ചിത്രത്തിൽ കാണുന്നതുകൊണ്ട് ഏകദേശം മൂന്ന് ചപ്പാത്തിക്കേ ഉള്ളൂ. അതു കണക്കാക്കി, ഗോതമ്പുപൊടിയും, അരിഞ്ഞ ഇലയും, ഉപ്പും, കുഞ്ഞുകുഞ്ഞായി അരിഞ്ഞ രണ്ട് പച്ചമുളകും എടുത്ത് വെള്ളവും കൂട്ടി ചപ്പാത്തിമാവ് ഉണ്ടാക്കുക.
പരത്തിയെടുക്കുക. ചൂടായ ചപ്പാത്തിക്കല്ലിലിട്ട് ഉണ്ടാക്കിയെടുക്കുക. എളുപ്പം.
കലോറിയിൽ ശ്രദ്ധിക്കുന്ന ആളാണെങ്കിൽ ഒട്ടും എണ്ണയില്ലാതെ ചുട്ടെടുക്കാം.
കുറച്ച് ശ്രദ്ധയുള്ള ആളാണെങ്കിൽ അല്പം എണ്ണയൊഴിച്ച് ചുട്ടെടുക്കാം.
കലോറിയോ? കൂടിക്കോട്ടേന്നേ എന്ന മട്ടാണെങ്കിൽ നെയ്യൊഴിച്ച് ചുട്ടെടുക്കുക.
ഇതിൽ വേണമെങ്കിൽ കുറച്ച് ജീരകം പൊടിച്ചിടാം. മുളകുപൊടിയിടാം. പച്ചമുളകിനുപകരം. പിന്നെ കടലപ്പൊടി/ബേസൻ കൂട്ടാം കുറച്ച്.

എന്തെങ്കിലും ചമ്മന്തി മതി കൂട്ടിക്കഴിക്കാൻ. അല്ലെങ്കിൽ അച്ചാർ. കറിയൊന്നും ഇല്ലെങ്കിലും സാരമില്ല.
ഈ പോസ്റ്റിലെ ഉലുവയിലച്ചപ്പാത്തിയ്ക്ക് ഒരു പ്രത്യേകതയെന്താണെന്നുവെച്ചാൽ, ഞാൻ വീട്ടിൽ ഉണ്ടാക്കിയെടുത്ത ഉലുവയിലയാണ് ഉപയോഗിച്ചിരിക്കുന്നത്.

പൊട്ടുകടലച്ചമ്മന്തി

തേങ്ങ അധികം ഇല്ലാത്തവർക്കും, അധികം തേങ്ങ ഉപയോഗിക്കാത്തവർക്കും പറ്റിയൊരു ചമ്മന്തിയാണ് പൊട്ടുകടലച്ചമ്മന്തി. വീട്ടിൽ അപൂർവ്വമായിട്ട് ഇതുണ്ടാക്കുന്നത് കണ്ടിട്ടുണ്ട്. നല്ല കട്ടിയിൽ ഇരിക്കും ഇത്. അങ്ങനെയുമുണ്ടൊരു ഗുണം. എന്റെ കൂട്ടുകാരി എപ്പോഴും ഇതിട്ടാണ് ചമ്മന്തിയുണ്ടാക്കുക. ഞാൻ അങ്ങനെ വാങ്ങാറില്ല. കുട്ടിക്കാലത്ത് കടയിൽ നിന്നു വാങ്ങിത്തിന്നുമായിരുന്നു. വെറുതെ തിന്നാൻ വല്യ ഇഷ്ടം ആണ്. വെളുത്തുള്ളി, എന്റെ വീട്ടിലൊന്നും ഉപയോഗിക്കാറില്ല. കൂട്ടുകാരിയുടെ കൂടെ കൂടിയാണ് വെളുത്തുള്ളി ഉപയോഗിക്കാൻ തുടങ്ങിയത്. ഈ ചമ്മന്തിയ്ക്ക് തേങ്ങയും പൊട്ടുകടലയും പച്ചമുളകും കറിവേപ്പിലയും വെളുത്തുള്ളിയും മല്ലിയിലയും ഉപ്പും വേണം. ഇതിൽ മല്ലിയില ഇട്ടില്ല. ഹോട്ടലിൽ കിട്ടുന്ന ചമ്മന്തികളിൽ പൊട്ടുകടല മിക്കവാറും ഉണ്ടാവും.



ചിരവിയെടുത്ത തേങ്ങയുടെ പകുതി പൊട്ടുകടല വേണം.
അതിനനുസരിച്ച് പച്ചമുളകും ഉപ്പും വെളുത്തുള്ളിയും കറിവേപ്പിലയും ഇടുക. മല്ലിയില ഇഷ്ടമാണെങ്കിൽ അതും ഇടാം.
ഉരുളച്ചമ്മന്തി വേണമെങ്കിൽ അധികം വെള്ളമൊഴിക്കാതെ അരച്ചെടുക്കുക.



വെള്ളമൊഴിച്ച് കലക്കി വറവിടുകയാണ് എല്ലാവരും ചെയ്യുന്നത്. എനിക്കിങ്ങനെ വേണമെന്നതുകൊണ്ട് ഉരുട്ടുചമ്മന്തിയായി.


ദോശയോടൊപ്പം, ചപ്പാത്തിയോടൊപ്പം, ചോറിനൊപ്പം, ഒക്കെ കഴിക്കാം.
ചോറിനൊപ്പം ആണെങ്കിൽ, കുറച്ച് മോരൊഴിച്ച് എടുത്താലും നന്നാവും. ഉണ്ടാക്കാൻ എളുപ്പം. നല്ല സ്വാദും ഉണ്ടാവും. കടല ഒന്ന് ചൂടാക്കി, ഇതിൽ ചേർക്കുകയും ചെയ്യാം.

പയറുപ്പേരി

പയറുപ്പേരി, പയറുതോരൻ, പയർ വറവ് എന്നൊക്കെ ഇതിനു പറയും. പയർ കഴുകി, തലയും വാലും കളഞ്ഞ് ചെറുതായി മുറിച്ചെടുക്കണം.

ചീനച്ചട്ടി/ ഫ്രയിംഗ് പാൻ/ പാത്രം ചൂടാക്കി അതിൽ വെളിച്ചെണ്ണ അല്പം ഒഴിക്കുക. അതിൽ ഉഴുന്നുപരിപ്പ് ഇടുക. അതു ചുവന്നുവരുമ്പോഴേക്കും കുറച്ച് കടുകും, ചുവന്ന മുളകും ഇടുക. കടുക് പൊട്ടിത്തെറിക്കുമ്പോഴേക്കും കറിവേപ്പിലയും ഇടുക. അതിലേക്ക് പയർ ഇടുക. ഉപ്പും മഞ്ഞളും ഇടുക. നിങ്ങൾക്കു വേണമെങ്കിൽ മുളകുപൊടിയും. ഞാനിടാറില്ല. അത്യാവശ്യത്തിനു വെള്ളമൊഴിക്കുക. അടച്ചുവച്ച് വേവിക്കുക. നിങ്ങൾ വെളിച്ചെണ്ണയിൽ വഴറ്റി വഴറ്റി വേവിക്കുമെങ്കിൽ അങ്ങനെയും ആവാം. വെള്ളമൊഴിക്കാതെ. വെന്തുകഴിഞ്ഞാൽ വാങ്ങി തേങ്ങ ചിരവിയിടുക.

വേണമെങ്കിൽ മുളകുപൊടിയിടാം. അല്ലെങ്കിൽ തേങ്ങയുടെ കൂടെ ജീരകവും പച്ചമുളകും ചതച്ച് ഇടാം. കുറേ മുളകുപൊടിയും മുളകുമൊക്കെ ഇട്ട് പച്ചക്കറികളുടെ ഗുണങ്ങൾ കളയരുത്. പിന്നെ കൊച്ചുകുട്ടികൾക്കും നാം കഴിക്കുന്നതുപോലെ കൊടുക്കണമെങ്കിൽ അധികം എരിവ് ഇല്ലാതിരിക്കുന്നതുതന്നെ നല്ലത്. എരിവിന് കൂട്ടാൻ അച്ചാറില്ലേ?

കുമ്പളങ്ങ മോരുകറി

ഇതിനെ കുമ്പളങ്ങക്കാളൻ, കുമ്പളങ്ങപ്പുളിശ്ശേരി എന്നൊക്കെ വേണമെങ്കിൽ പറയാം. ചേനയും കായയും പഴവും പിന്നെ പുതിയ പച്ചമുളകുകാളനും കഴിഞ്ഞാൽ ഈയൊരു മോരുകറിയുണ്ടാക്കാം. കുമ്പളങ്ങ എല്ലാ സമയത്തും മിക്കവാറും കിട്ടും. പക്ഷെ അധികം പേർക്ക് വേണ്ടെങ്കിൽ ഒരു കഷണം വാങ്ങുന്നതു തന്നെ നല്ലത്. അല്ലെങ്കിൽ വേഗം കേടാവും. കുമ്പളങ്ങ ഒരു കഷണം, തോലും കുരുവുമൊക്കെക്കളഞ്ഞ് ചിത്രത്തിലെപ്പോലെ മുറിക്കുക. ഇനിയും ചെറുതാക്കാൻ കഴിയുമെങ്കിൽ നല്ലത്. ചെറുതായിരിക്കുന്നതാണ് നല്ലത്. കുറച്ച് മഞ്ഞൾപ്പൊടിയും ഉപ്പും ഇട്ട് വേവിക്കുക. വെള്ളം അത്യാവശ്യത്തിനുമാത്രം ഒഴിച്ച് വേവിക്കുക. മൂന്ന് അല്ലെങ്കിൽ നാലു ടേബിൾസ്പൂൺ ചിരവിയ തേങ്ങയും കാൽ ടീസ്പൂൺ ജീരകവും കൂട്ടി വെള്ളം ചേർത്ത് മിനുസമായി അരച്ചെടുക്കുക. വെന്ത കഷണത്തിലേക്ക് നന്നായി കലക്കിയെടുത്ത പുളിച്ച മോര് കാൽ ലിറ്റർ ചേർക്കുക. അതു തിളച്ചാൽ, അതിലേക്ക് തേങ്ങയും ആവശ്യമെങ്കിൽ വെള്ളവും ചേർത്ത് തിളച്ചാൽ വാങ്ങിവയ്ക്കുക. അതിലേക്ക് ഒരു തണ്ട് കറിവേപ്പില ഇടുക. തേങ്ങ തിളയ്ക്കുമ്പോൾ ഇടാം. വാങ്ങിവച്ച് കടുകും കറിവേപ്പിലയും ചുവന്നമുളകും വറുത്തിടുക. മോര് ശരിക്കും പുളിച്ചില്ലെങ്കിൽ, തേങ്ങ ചേർത്ത് തിളച്ചതിനുശേഷം മോരൊഴിച്ച് ഒന്ന് പത വന്നാൽ വാങ്ങുക. മോരിനു പുളിയില്ലെങ്കിൽ കാളനു വല്യ സ്വാദുണ്ടാവില്ല. പാൽ ഉറയൊഴിച്ച് പിറ്റേന്ന് നന്നായി കലക്കിയെടുത്ത് ഫ്രിഡ്ജിൽ വയ്ക്കാതെ രണ്ട് ദിവസം കൂടെ ആയാൽ നല്ലപോലെ പുളിക്കും.

മത്തങ്ങപ്പച്ചടി

ഒരു ചെറിയ കഷണം മത്തങ്ങയെടുത്ത് തോലൊക്കെക്കളഞ്ഞ് കഴുകി, ചിത്രത്തിലെപ്പോലെ, അല്ലെങ്കിൽ അതിലും കുഞ്ഞായി മുറിക്കുക.

ഉപ്പും ഇട്ട്, മൂന്ന് പച്ചമുളക് ചീന്തിയോ, അല്ലെങ്കിൽ രണ്ടോ മൂന്നോ ആക്കി മുറിച്ചോ ഇട്ട് വേവിക്കുക. മുളകുപൊടി വേണമെങ്കിൽ ഇടാം. വെന്താൽ വെള്ളം ഇല്ലാതിരിക്കുന്നത് നല്ലത്. തേങ്ങ ചിരവിയത് മൂന്ന് ടേബിൾസ്പൂൺ എടുത്ത് കാൽ ടീസ്പൂൺ കടുകും ഇട്ട് അരയ്ക്കുക. മിനുസമായിട്ട് അരയ്ക്കണം. അരയ്ക്കുമ്പോൾ പച്ചവെള്ളത്തിനുപകരം മോരും വെള്ളം ചേർക്കുക. വെന്തത് തണുത്താൽ കുറച്ച് തൈരും, തേങ്ങയരച്ചതും ചേർത്ത് ഇളക്കിയോജിപ്പിച്ച്, ഉപ്പു നോക്കി, വേണമെങ്കിൽ ചേർത്തിളക്കി വറവിടുക. പുളിച്ച മോരായാലും മതി, തൈരിനു പകരം. പക്ഷെ കൂടുതൽ വെള്ളം പോലെ ആകരുത്. തൈരായാലും മോരായാലും.

ഓലൻ

ഓലൻ ചെറിയ കുട്ടികൾക്കുപോലും കൊടുക്കാവുന്ന ഒരു വിഭവം ആണ്. അതിൽ അധികം എരിവൊന്നും ഉണ്ടാകില്ല. പച്ചക്കറികൾ ഉണ്ടാവുകയും ചെയ്യും. ഓലൻ ഒരുപാട് തരത്തിൽ ഉള്ളത് ഉണ്ട്. ഞാൻ ഈ ഓലനുണ്ടാക്കിയിരിക്കുന്നത് ഒരു കഷണം പച്ചപ്പപ്പായ, ഒരു കഷണം മത്തൻ, ഒരു വഴുതനങ്ങ എന്നിവകൊണ്ടാണ്. വയലറ്റ് വഴുതിന ഇല്ലെങ്കിൽ പച്ചവഴുതിന ഇടുക. മൂന്ന് പച്ചമുളകും. പപ്പായ തീരെ പഴുത്തില്ലെങ്കിൽ അത്രയും നല്ലത്. ഇവിടെ കുറച്ച് പഴുക്കാൻ തുടങ്ങിയിരുന്നു.

മത്തനും, പപ്പായയും തോലുകളഞ്ഞ് ഓലനു മുറിക്കുന്നതുപോലെ മുറിച്ച് കഴുകിയെടുക്കുക. പച്ചമുളക്, കഴുകി ചീന്തിയിടുക. വഴുതനങ്ങ വട്ടത്തിൽ മുറിച്ച് കഴുകി ഇടുക. ഒക്കെക്കൂടെ ഉപ്പും ഇട്ട് വേവിക്കുക.

വെള്ളം അധികം ഒഴിക്കരുത്. വെന്താൽ ഒന്നുകിൽ കുറച്ച് വെളിച്ചെണ്ണ ഒഴിക്കുക. ഞാൻ അതാണ് ചെയ്യാറ്. അല്ലെങ്കിൽ കുറച്ച് തേങ്ങാപ്പാൽ ഒഴിക്കുക. ഓലൻ തയ്യാറായി. എരിവും പുളിയുമുള്ള കറികളുടെ കൂടെ ഒരു പാവം കറി.

ഗണേശചതുർത്ഥി

ഇന്ന് വിനായകചതുർത്ഥി അഥവാ ഗണേശചതുർത്ഥി. അത്തംചതുർത്ഥി എന്നാണ് വീട്ടിൽ പറയുന്നത്. ഇന്ന് പല നാട്ടുകാരും ഗണപതിപ്രതിമകൾ വീട്ടിൽകൊണ്ടുവന്ന് പൂജിച്ച് അഞ്ചോ ഏഴോ പതിനൊന്നോ ദിവസം പൂജിച്ച്, അതിനെ എവിടെയെങ്കിലും കൊണ്ടുപോയി ഒഴുക്കിക്കളയും. മുംബൈയിലൊക്കെ വലിയ ആഘോഷമാണ്. ഓരോ റോഡിലും ഉണ്ടാവും പൂജ വെച്ചിട്ട്. പിന്നെ പാട്ടും മേളവും ഒക്കെ.

ചതുർഥിയോടനുബന്ധിച്ച് ഒരു കഥ കേട്ടിട്ടുണ്ട്, പണ്ട്. വീട്ടിൽ വിളിച്ചുചോദിക്കേണ്ടിവന്നു മുഴുവൻ ഓർമ്മിക്കാൻ. ഒരു ചതുർത്ഥി ദിവസം, ഗണപതി, ഭക്തരുടെ പൂജയൊക്കെക്കഴിഞ്ഞ്, വയറുനിറച്ച് ശാപ്പാടും അടിച്ച്, കുറേ പഴവും, തേങ്ങയും ശർക്കരയുമൊക്കെ കൈയിലെടുത്തങ്ങനെ നടന്നുവരികയായിരുന്നു. ഇരുട്ടിയിട്ടുണ്ട്. നടന്നുനടന്ന് താഴെയൊരു വേരിൽത്തട്ടി ഗണപതി 'ധീം തരികിട തോം’ എന്ന് വീണു. ഹോ...ആരും കണ്ടില്ലല്ലോ വിജനമാണല്ലോ വഴിയെന്നൊക്കെ വിചാരിച്ച് തപ്പിത്തടഞ്ഞ് എഴുന്നേൽക്കുമ്പോൾ ചിരി കേട്ടു.“ബുഹഹഹ, ബുഹഹഹ, ബുഹഹഹാ”. നോക്കുമ്പോൾ ആരാ? മാനത്തുനിന്ന് ചന്ദ്രൻ. വീണാൽച്ചിരിക്കണമെന്നേ മൂപ്പർക്കറിയൂ. പക്ഷെ ഗണപതിക്ക് ദേഷ്യം വരുമെന്നാരു കണ്ടു.
ഗണപതിക്ക് നല്ല ദേഷ്യം വന്നു. എന്നിട്ട് ശപിച്ചു. “ചതുർത്ഥി ദിവസം നിന്നെക്കാണുന്നവർക്കൊക്കെ മാനഹാനി ഭവിക്കട്ടെ’ എന്ന്. അങ്ങനെ പാവം ചന്ദ്രനെ ചതുർത്ഥിദിവസം ആരും കാണാനേ പോയില്ല. എല്ലാവരും വീട്ടിനുള്ളിലടച്ചിരുന്നു ഗണപതിയെ പൂജിച്ചു.

ഗണപതിയ്ക്ക് മോദകം അല്ലേ ഇഷ്ടം. മധുരക്കൊഴുക്കട്ട. ഉണ്ടാക്കിയേക്കാം അല്ലേ?
പച്ചരി, നാലഞ്ച് മണിക്കൂർ വെള്ളത്തിലിട്ട് വെച്ച് മിനുസമായി പൊടിക്കുക. കാൽലിറ്റർ കൊള്ളുന്ന ഒരു പാത്രത്തിൽ അരിപ്പൊടി നിറച്ചും അളന്നെടുക്കുക



ആവശ്യത്തിനു ചൂടുവെള്ളവും രണ്ട് നുള്ള് ഉപ്പും ചേർത്ത് ഉരുളയാക്കാൻ പാകത്തിൽ കുഴയ്ക്കുക. ചിത്രത്തിൽ ഇല്ലേ അതുപോലെ. മൂന്നാണി ശർക്കരയും നാലു ടേബിൾസ്പൂൺ ചിരവിയ തേങ്ങയും, കുറച്ച് ഏലയ്ക്കപ്പൊടിയും കൂടെ പാക്ക് ആക്കിയെടുക്കുക. (ശർക്കര അല്പം വെള്ളമൊഴിച്ച് അടുപ്പത്തുവയ്ക്കുക. അലിഞ്ഞ് കുറുകിവരുമ്പോൾ തേങ്ങയും ഏലക്കാപ്പൊടിയും ഇട്ട് കുറുക്കിക്കുറുക്കിയെടുക്കുക.
കരിയരുത്).



അരി കുഴച്ചത് ഉരുളയാക്കി, കൈയിൽ പരത്തി, അതിൽ ശർക്കരപ്പാവ് നിറയ്ക്കണം.

പിന്നെ അടച്ച് ഉരുട്ടിവയ്ക്കണം. ഒരു പാത്രത്തിൽ. കുക്കറിലോ വേറെ പാത്രത്തിലോ വേവിച്ചെടുക്കുക. വെള്ളം കയറരുത്.



കുറച്ചുംകൂടെ നിറച്ചാൽ കൂടുതൽ മധുരമുണ്ടാവും. അരിപ്പൊടി കുറയുമല്ലോ. പക്ഷെ അപ്പോൾ വേവുമ്പോൾ ചിലപ്പോൾ വെള്ളം പോലെയാവും. ശർക്കരവെള്ളം വന്നിട്ട്.

മോദകത്തിന് വേറെ ഒരു രീതി കണ്ടിട്ടുണ്ട്. ഗോതമ്പുപൊടി കുഴച്ച് ഒക്കെ നിറച്ച് വറുത്തെടുക്കുന്നത്. മൈദയിലും ഉണ്ടാക്കാം. അരിപ്പൊടിക്ക് പകരം.

കാളൻ

രാവിലെ എണീറ്റപ്പോൾത്തോന്നി, അത്തമൊക്കെയല്ലേ ഇന്നൊരു കാളൻ ആയിക്കളയാംന്ന്. മനസ്സെന്നോട് ചോദിച്ചു എന്തു കാളൻ? കുറേ കാളൻ അവിടേം, ഇവിടേം, പിന്നിവിടേം ഉണ്ട്. പിന്നെന്തുകാളൻ. അപ്പോഴാണ് ആശയം വന്നത്. കാളനിലൊക്കെ പച്ചമുളക് ചേർക്കും. സകലതിലും വേണം. പക്ഷെ അതിനൊരു പ്രാധാന്യവും ഇല്ല. എനിക്കു പാവം തോന്നി. എന്നാലതിനെയൊന്നു സന്തോഷിപ്പിച്ചിട്ടു തന്നെ കാര്യം. പച്ചമുളക് കുറുക്കുകാളൻ പിറന്നുവീഴുന്നത് അങ്ങനെയാണ്. എന്റെ സ്വന്തം പാചകമാണിത്. ആരും വെച്ചത് കണ്ടില്ല, ആരും പറഞ്ഞുതന്നിട്ടുമില്ല.

പച്ചമുളക് തീരെ എരുവില്ലാത്തത് (ചള്ള് എന്ന് വീട്ടിലൊക്കെ പറയാറുണ്ട്) - ഒരു 20 എണ്ണം. ഓരോന്നും അതിന്റെ വാലു കളഞ്ഞ് മൂന്ന് ആയി മുറിക്കാം. തിന്നുമ്പോൾ എന്തെങ്കിലും ഇല തിന്നുന്നതുപോലെ ഉണ്ടാവും എരുവില്ലാത്തത്.



ഉപ്പ് - പാകത്തിന്.
മഞ്ഞൾപ്പൊടി - കാൽ ടീസ്പൂൺ.
ജീരകം - അര ടീസ്പൂൺ. (നിങ്ങൾക്കതിന്റെ സ്വാദ് ഇഷ്ടമല്ലെങ്കിൽ കുറയ്ക്കുക).
തേങ്ങ ചിരവിയെടുക്കണം - കൃത്യം 5 ടേബിൾസ്പൂൺ നിറച്ചും. അല്പം കൂടെ ആയാലും ദോഷമില്ല. കുരുമുളക് - 5 എണ്ണം.
ഉലുവ 10 മണി ചൂടാക്കി പൊടിക്കണം. ഒരു പാത്രത്തിലിട്ട് വെറുതെ ചൂടാക്കുക. ഒരു കടലാസ്സിൽ ഇട്ട് എന്തെങ്കിലും കൊണ്ട് പൊടിച്ച് എടുക്കുക. മിക്സിയൊന്നും വേണ്ട.
കടുകും കറിവേപ്പിലയും ചുവന്ന മുളകും വറവിടാൻ വേണം.
ആദ്യം തന്നെ മഞ്ഞളും ഉപ്പും (ഉപ്പു കൂടിയാൽ സാരമില്ല. മോരിനും തേങ്ങയ്ക്കുമുള്ള ഉപ്പും കൂടെ ഇടാം) ഇട്ട് പച്ചമുളക് വേവിക്കുക. കുക്കറിലാണെങ്കിൽ, പച്ചമുളകിൽ വെള്ളം തീരെ ഒഴിക്കേണ്ട. ഒരു പാത്രത്തിലിട്ട് ഒന്ന് മഞ്ഞളൊക്കെ ഒന്ന് ഇളക്കിയിട്ട് വെച്ചാൽ മതി. വെന്തുകഴിഞ്ഞപ്പോൾ കണ്ടോ? ഒട്ടും വെള്ളമില്ല.



തേങ്ങയും ജീരകവും കുരുമുളകും കൂടെ അല്പം വെള്ളവും കൂട്ടി അരയ്ക്കുക. കുറേ വെള്ളം വേണ്ട. അരച്ചുകഴിഞ്ഞാൽ അത് വെണ്ണ തോൽക്കുന്ന വിധത്തിൽ മിനുസം ആയിരിക്കണം. വെന്ത പച്ച മുളകിൽ, അര ലിറ്റർ വളരെ പുളിയുള്ള മോരും, കാൽ ലിറ്റർ വെള്ളവും ഒഴിച്ച് അടുപ്പത്ത് വെച്ച് വറ്റിക്കുക. അര മണിക്കൂർ വേണ്ടിവരും. മോരും, വെള്ളവും കുറുകിക്കുറുകി ആവും. അപ്പോൾ ഉപ്പ് ഒന്നു നോക്കാം.



ആ കുറുകിയതിലേക്ക് തേങ്ങ കൂട്ടുക. വെള്ളം വേണ്ട. തേങ്ങ നല്ലപോലെ ഇളക്കിയിളക്കിച്ചേർക്കണം. തേങ്ങ ചൂടായി തിളച്ച് ഡിസ്കോ കളിക്കാൻ തുടങ്ങും. അപ്പോൾ വാങ്ങിവെച്ച് ഉലുവപ്പൊടി ഇടുക. വറവിടുക.

ശ്രദ്ധിക്കേണ്ട കാര്യങ്ങൾ :- മോരു വളരെ പുളിയുള്ളത് വേണം. കടകോലുകൊണ്ടോ മിക്സിയിലോ കലക്കിയെടുത്തതാവണം. വെറുതെ ഒരു സ്പൂണെടുത്ത് കലക്കിയൊഴിച്ചാൽ അതുപോലെയിരിക്കും.
പാകം ചെയ്യുമ്പോൾ തീ എപ്പോഴും വളരെക്കുറവിൽ ആയിരിക്കണം. കൽച്ചട്ടി ആയാലും വേറെ പാത്രമായാലും.
പച്ചമുളക് തീരെ എരുവില്ലാത്തത് വേണം. അല്ലെങ്കിൽ കാളൻ എരിയും. ഒരു പച്ചമുളക് തിന്നുനോക്കീട്ട് മതി. ;)

കുറുക്കുകാളൻ വിളമ്പിയാൽ അവിടെയിരിക്കണം. കാശിക്ക് പോകരുത്. ഈ കാളൻ ഓരോ സ്പൂൺ എന്നും കൂട്ടിക്കഴിക്കുക. അധികം വേണ്ട. പച്ചമുളകല്ലേ.

ഈ കുറിപ്പിന് എനിക്ക് ദക്ഷിണ വേണ്ടേ വേണ്ട. വെറ്റിലയിൽ പച്ചമുളക് ചുരുട്ടിത്തരാൻ അല്ലേ?