ഇലുമ്പിപ്പുളി

എല്ലാവരും പറയുന്നത് ഇലുമ്പിപ്പുളിയെന്നാണോ? എന്റെ അമ്മാമന്റെ വീട്ടിനടുത്ത് ഒരു ഡോക്ടറുടെ നഴ്സിംഗ് ഹോമിൽ നിറയെ ഇലുമ്പിപ്പുളിയുണ്ടായിരുന്നു. കുട്ടിക്കാലത്ത് ഞാനും കസിനുകളും അവിടെ പോകുമ്പോൾ രോഗിയെ കാണുന്നതിലും ഉഷാർ ഇലുമ്പിപ്പുളി പെറുക്കിക്കൊണ്ടുവന്ന് തിന്നുന്നതിലായിരുന്നു. കൊണ്ടുവന്ന് തിന്നും. പിന്നെ വീണ്ടും പോകും.



ഇപ്പോ അമ്മാമന്റെ വീട്ടിലുണ്ട് മരം. പക്ഷെ, അതിൽനിന്ന് പറിച്ചുതിന്നാൻ ആർക്കും വല്യ ഉഷാറില്ല. ഒന്നും ഉണ്ടാക്കാറുമില്ല.
എന്നാല്‍പ്പിന്നെ ചമ്മന്തിയുണ്ടാക്കിയേക്കാം, അച്ചാറുണ്ടാക്കിയേക്കാം എന്നൊക്കെ ഞാൻ കരുതി.


ചമ്മന്തിയ്ക്ക് ഇലുമ്പിപ്പുളിയുടെ കൂടെ കുറച്ച് തേങ്ങ, ഉപ്പ്, ചുവന്ന മുളക് എന്നിവ വേണം. കറിവേപ്പിലയും ഇടാം. ഇലുമ്പിപ്പുളിയുടെ അധികപുളി ഒഴിവാക്കാൻ ഞാൻ അതിൽ കുറച്ച് കുഞ്ഞുള്ളിയും ഇട്ടു.



ഇലുമ്പിപ്പുളി മിക്സിയിൽ ഇടുന്നതിനുമുമ്പ് ഒന്നു ചെറുതാക്കാം. തീരെ വെള്ളമില്ലാതെ
അരയ്ക്കണം. പുളിയിൽത്തന്നെ വെള്ളമുണ്ട്. ചമ്മന്തി റെഡി.



പുളിയുള്ളതുകൊണ്ട് ചോറിനും കഞ്ഞിക്കുമൊപ്പമാണ് നല്ലത്.



ഇനി അച്ചാറുണ്ടാക്കാനോ?

ഇലുമ്പിപ്പുളി
നല്ലെണ്ണ
കായം (പൊടി)
ഉലുവപ്പൊടി
മുളകുപൊടി
ഉപ്പ്
ഇത്രയും വേണം.



ഇലുമ്പിപ്പുളി ചിത്രത്തിലെപ്പോലെ മുറിക്കുക. നല്ലെണ്ണ കുറച്ചെടുത്ത് ചൂടാക്കാൻ വയ്ക്കുക. ഇലുമ്പിപ്പുളിയ്ക്കനുസരിച്ച് അതു വഴറ്റിയെടുക്കാൻ വേണ്ട അളവിൽ എണ്ണയെടുക്കണം. ചൂടായാൽ ഇലുമ്പിപ്പുളി അതിലേക്കിട്ട് ഇളക്കുക. തീ വളരെക്കുറച്ചു വയ്ക്കുക. പുളി എളുപ്പത്തിൽ മൃദുവാകും. നിറവും മാറും. അങ്ങനെ മൃദു ആയാൽ അതിലേക്ക് ഉലുവപ്പൊടി വളരെക്കുറച്ച് ഇടുക. കായം പൊടി ഇടുക. ഇളക്കി യോജിപ്പിച്ചതിനുശേഷം ഉപ്പും ആവശ്യത്തിനു മുളകുപൊടിയും ഇടുക. മൂന്നാലു മിനുട്ട് ഇളക്കിക്കൊണ്ട് യോജിപ്പിച്ചാൽ വാങ്ങിവയ്ക്കാം.



നല്ലെണ്ണ ഇഷ്ടമല്ലെങ്കിൽ നിങ്ങളുപയോഗിക്കുന്ന പാചകയെണ്ണ ഉപയോഗിച്ചാലും മതി.