Kariveppila കറിവേപ്പില

പച്ചക്കറി ബേക്ക്

2012-01-19T18:43:00.006+05:30

കാരറ്റ് - ഒന്ന്. ചെറുത്.
മധുരക്കിഴങ്ങ് - ഒരു വലുതിന്റെ പകുതി.
കാബേജ് അരിഞ്ഞെടുത്തത് - മൂന്നു ടേബിൾസ്പൂൺ.
കാപ്സിക്കം - ഒന്ന്.
കോളിഫ്ലവർ - ഒരു ചെറുതിന്റെ പകുതി.
ബീൻസ് - പത്ത് എണ്ണം.
ബട്ടർ - രണ്ട് ടേബിൾസ്പൂൺ.
പാൽ - കാൽ ലിറ്റർ.
മൈദ - അഞ്ച് ടീസ്പൂൺ.
ചീസ് - പച്ചക്കറിയുടെ മുകളിൽ തൂവാൻ വേണ്ടത്ര.
കുരുമുളകുപൊടി - അര ടീസ്പൂൺ.

മധുരക്കിഴങ്ങ് പുഴുങ്ങിയെടുക്കുക. ഞാൻ കുക്കറിലാണ് വേവിച്ചെടുത്തത്. തോലോടെ വേവിച്ചു, എന്നിട്ട് തൊലി കളഞ്ഞ് കഷണങ്ങളാക്കി. പച്ചക്കറികളൊക്കെ മുറിച്ച് പുഴുങ്ങുക. പച്ചക്കറികളൊക്കെ കഴുകിയെടുത്ത് വെള്ളം ഒഴിച്ച് വേവിച്ചു. കോളിഫ്ലവർ ആദ്യം തന്നെ ഇട്ടില്ല. അതു വേഗം വേവും. കാബേജും ആദ്യം ഇട്ടില്ലെങ്കിൽ കുഴപ്പമില്ല. വെന്തുകഴിഞ്ഞാൽ വെള്ളം ഊറ്റിക്കളഞ്ഞ് എടുക്കുക.
ബട്ടർ ചൂടാക്കുക. പച്ചക്കറികൾ ഒരുമിച്ച് ഇടാൻ പറ്റുന്നത്ര വലുപ്പത്തിലുള്ള പാത്രത്തിൽ ബട്ടർ ചൂടാക്കിയാൽ നന്ന്.
ബട്ടർ ചൂടാക്കി വാങ്ങിവെച്ച് അതിൽ മൈദ ഇട്ട് ഇളക്കുക. പാൽ അതിലേക്ക് ഒഴിച്ച് മൈദ കട്ടയാവാത്ത വിധത്തിൽ നന്നായി ഇളക്കി യോജിപ്പിക്കുക. ചൂടാക്കിയിട്ട് തണുത്ത പാലാണ് ഒഴിച്ചത്.
അടുപ്പത്തു വെച്ച് ഒന്നു കുറുക്കുക.
വാങ്ങിവെച്ച് കുരുമുളകുപൊടിയും, പച്ചക്കറികൾക്കു മുഴുവൻ ആവശ്യമായ ഉപ്പും ഇട്ട് യോജിപ്പിക്കുക. മധുരക്കിഴങ്ങും പച്ചക്കറികളും അതിലേക്ക് ഇട്ട് യോജിപ്പിക്കുക.

മൈക്രോവേവിൽ വയ്ക്കാൻ പറ്റുന്ന പാത്രത്തിലേക്കു മാറ്റുക. പാത്രത്തിൽ ആദ്യം കുറച്ചു ബട്ടർ പുരട്ടണം.

മുകളിൽ ചീസ് തൂവുക.
കൺവെക്ഷൻ രീതിയിൽ 200 ഡിഗ്രി C-ൽ പത്തുമിനുട്ട് ബേക്ക് ചെയ്യുക. പ്രീ-ഹീറ്റ് ചെയ്യേണ്ട.

പച്ചക്കറികൾ വേറെ ഏതെങ്കിലും വേണമെങ്കിൽ ഉപയോഗിക്കാം. കുരുമുളകുപൊടി കുറയ്ക്കണമെങ്കിൽ കുറയ്ക്കാം. മധുരക്കിഴങ്ങിനു പകരം ഉരുളക്കിഴങ്ങും ഉപയോഗിക്കാം. ഞാൻ കുറച്ചേ ചീസ് ഇട്ടിട്ടുള്ളൂ. നിങ്ങൾക്കുവേണമെങ്കിൽ ഇനീം കുറേ ഇടാം.

കുടവൻ ഇല ചമ്മന്തി

2012-01-03T21:00:00.004+05:30

കുടകൻ അഥവാ കുടവൻ ( Indian Pennywort) ഒരു ഔഷധസസ്യം ആണ്. മണ്ഡൂകപർണി, സരസ്വതി, ബ്രഹ്മി എന്നൊക്കെ പല ഭാഷകളിലുമായി പല പേരുകളിൽ അറിയപ്പെടുന്നു.

വീട്ടിൽ വളർത്താൻ എളുപ്പമുള്ളൊരു ചെടിയാണ് ഇത്. കുടവൻ ഇല കൊണ്ട് പലതരം വിഭവങ്ങൾ ഉണ്ടാക്കാം. ജ്യൂസ്, ചമ്മന്തികൾ ഒക്കെ. ഞാനുണ്ടാക്കിയത് ഒരു ചമ്മന്തിയാണ്. അഥവാ അരച്ചുകലക്കി.

കുടവനില പറിച്ച് കുറച്ചുനേരം വെള്ളത്തിലിട്ടുവെച്ചു. മണ്ണും പൊടിയുമൊക്കെ പോകണമല്ലോ.

കഴുകിയെടുത്ത്, തേങ്ങ, പച്ചമുളക്, ഉപ്പ്, മല്ലിയില, തൈര് എന്നിവ ചേർത്ത് അരച്ചെടുത്തു. കലക്കുചമ്മന്തിയിൽ വറവിടാറാണു പതിവ്.

ഇഞ്ചി, കറിവേപ്പില, പുളി എന്നിവയൊക്കെ ചേർത്തും അരയ്ക്കാം. തൈരു ചേർക്കുന്നില്ലെങ്കിൽ, ശർക്കരയും ഒരു കഷണം ഇടാം.

മധുരം നിറയും മുട്ടായി

2012-01-01T11:35:00.009+05:30

ചോക്ലേറ്റ് ഇഷ്ടമാണോ? നാരങ്ങമുട്ടായിയോ? രണ്ടും കൂടെ ആയാലോ? എന്തായാലും പുതുവർഷമൊക്കെയല്ലേ? “മധുരം കഴിക്കണം ഇന്നൊന്നാം തീയ്യതിയായ്” എന്നാണല്ലോ പറഞ്ഞുകേട്ടിട്ടുള്ളത്? അതുകൊണ്ട് കഴിച്ചേക്കാം അല്ലേ?

ചോക്ലേറ്റ് ബാർ മൂന്നു തരത്തിൽ (പ്രധാനമായും) കിട്ടും. ഡാർക്ക്, മിൽക്ക്, വൈറ്റ്. അതുരുക്കി പല വിഭവങ്ങളും ഉണ്ടാക്കാം. ഇവിടെയിപ്പോൾ, എളുപ്പത്തിൽ ഉണ്ടാക്കാൻ പറ്റുന്ന, എല്ലാർക്കും ഉണ്ടാക്കാൻ പറ്റുന്ന ഒരു വിഭവമാണുള്ളത്. നാരങ്ങമുട്ടായി ചോക്ലേറ്റ്.

ചോക്ലേറ്റ് ഉണ്ടാക്കാനുള്ള ഡിസൈൻ മോൾഡുകൾ കിട്ടും. ഇവിടെ ഐസ് ട്രേ കൊണ്ട് വല്യ പ്രയോജനമൊന്നുമില്ല. ഇരുമ്പല്ലാത്തതുകൊണ്ടായിരിക്കും, വെറുതേയിട്ടിട്ടും തുരുമ്പു പിടിക്കാത്തത്. അതുകൊണ്ട്, നാരങ്ങമുട്ടായി ചോക്ലേറ്റിനു വേറെ പാത്രമൊന്നും വേണ്ടെന്നു ഞാൻ തീരുമാനിച്ചു. വെറുതേ (ഇല്ലാത്ത) പൈസ കളയേണ്ടല്ലോ.

ചോക്ലേറ്റ് ബാർ വാങ്ങിക്കൊണ്ടുവരിക. നാരങ്ങമുട്ടായിയും വാങ്ങിക്കൊണ്ടുവരുക. ഇവിടെയുള്ളത് സെമി- സ്വീറ്റ് ചോക്ലേറ്റ് ബാർ ആണ്.

ഒരു കഷണം മുറിച്ചെടുത്ത്, ഉരുക്കുക. നോൺ - സ്റ്റിക്ക് പാത്രത്തിൽ ഉരുക്കുന്നതാണു നല്ലത്. ചോക്ക്ലേറ്റ് പാത്രത്തിൽ മുറിച്ചിട്ട് ചെറുതീയിൽ വയ്ക്കുക. ഒന്നും കൂടെച്ചേർക്കേണ്ട.

ഐസ് ട്രേ കഴുകിയുണക്കി അതിലേക്ക് (ഏകദേശം പകുതിക്കടുത്ത്) ചോക്ലേറ്റ് ഒഴിക്കുക.

നാരങ്ങമുട്ടായി വയ്ക്കുക.

എല്ലാത്തിലും വച്ചുകഴിഞ്ഞാൽ മുകളിൽ വീണ്ടും ഉരുകിയ ചോക്ലേറ്റ് ഒഴിക്കുക.

മെല്ലെ ഒന്നു കുലുക്കി ടക് ടക് ടക് എന്നു ഒച്ച വരുത്തിയാൽ ഒക്കെ ഒരു നിരപ്പിലാവും.

ഫ്രിഡ്ജിൽ വയ്ക്കുക. നന്നായി ഉറച്ചാൽ എടുക്കുക. ട്രേയിൽ നിന്ന് പ്ലേറ്റിലേക്കു തട്ടിമുട്ടിയിടുക.

ഇതാണ് നാരങ്ങമുട്ടായി ചോക്ലേറ്റ്.

ആർക്കെങ്കിലും കൊടുക്കുമ്പോൾ പറയുക. അകത്തു നാരങ്ങമുട്ടായിയുണ്ട്. സൂക്ഷിക്കുക!

എല്ലാ കൂട്ടുകാർക്കും പുതുവർഷത്തിൽ നന്മകൾ നേരുന്നു.

ചോളം കട്‌ലറ്റ്

2011-12-24T18:47:00.007+05:30

ചോളം(കോൺ) കഴിച്ചിട്ടുണ്ടോ? ഇഷ്ടമാണെങ്കിൽ ഈ കട്‌ലറ്റും ഇഷ്ടമാവും. ചോളം പായ്ക്കറ്റുകളിലും കിട്ടും. അപ്പാടെയുള്ളത് കിട്ടിയില്ലെങ്കിൽ അതുപയോഗിച്ചാൽ മതി. സാധാരണയായി കട്‌ലറ്റ് ഉണ്ടാക്കുന്നതുപോലെത്തന്നെയാണ്. വല്യ വിഷമം ഒന്നുമില്ല.

ചോളം - ഒന്ന്. (ചിത്രത്തിൽ ഉള്ളതുപോലെ). പായ്ക്കറ്റിലുള്ളതാണെങ്കിൽ ഏകദേശം അളവു കണക്കാക്കിയെടുക്കാം.
കാരറ്റ് - ഒന്ന്.
വലിയ ഉള്ളി - ഒന്ന്.
പച്ചമുളക് - രണ്ട്.
ഇഞ്ചി - ചെറിയ ഒരു കഷണം.
കാപ്സിക്കം - ഒന്ന്.
ഉരുളക്കിഴങ്ങ് - ഒന്ന്. വലുത്.
വെജിറ്റബിൾ മസാലപ്പൊടി - അര ടീസ്പൂൺ.
ഉപ്പ്
വെളിച്ചെണ്ണ.
കറിവേപ്പില.
റൊട്ടിപ്പൊടി - ബ്രഡിന്റെ അരികു കളഞ്ഞ് ബാക്കിയുള്ളത് പൊടിച്ചെടുക്കുക. മിക്സിയിൽ ഇട്ടാൽ മതി.

ചോളം വേവിക്കുക. ഉരുളക്കിഴങ്ങും വേവിക്കുക. ഉരുളക്കിഴങ്ങ് വേവിച്ച് ഉടച്ചുവയ്ക്കുക. തോലോടെ പുഴുങ്ങിയിട്ട്, പിന്നെ തോലു കളഞ്ഞാൽ മതി. ചോളവും ഉരുളക്കിഴങ്ങും നന്നായി വേവണം.

കാരറ്റ്, ഉള്ളി, പച്ചമുളക്, ഇഞ്ചി, കാപ്സിക്കം എന്നിവ വളരെച്ചെറുതാക്കി അരിയുക. ഞാൻ കാരറ്റ് ചീവിയെടുത്തു. കറിവേപ്പിലയും ചെറുതാക്കി മുറിച്ചുവയ്ക്കുക.

വെളിച്ചെണ്ണയോ, അല്ലെങ്കിൽ ഏതെങ്കിലും ഒരു പാചകയെണ്ണയോ ചൂടാക്കുക. അതിലേക്ക് പച്ചക്കറികളും (കാരറ്റ്, ഉള്ളി തുടങ്ങിയവ) കറിവേപ്പിലയും ഇട്ട് നന്നായി വഴറ്റി വേവിക്കുക.

വെന്താൽ ഉപ്പും മസാലപ്പൊടിയും ചേർക്കുക. ചോളവും ഉരുളക്കിഴങ്ങും ചേർക്കുക. നന്നായി വഴറ്റി യോജിപ്പിച്ച് വാങ്ങിവയ്ക്കുക.

ദോശക്കല്ല് ചൂടാക്കി, വഴറ്റിയ പച്ചക്കറികൾ കുറേശ്ശെയെടുത്ത് ഉരുട്ടിപ്പരത്തി, റൊട്ടിപ്പൊടിയിൽ ഇട്ട് പൊതിഞ്ഞ്, ദോശക്കല്ലിൽ ഇട്ട് വെളിച്ചെണ്ണയൊഴിച്ച് അപ്പുറവും ഇപ്പുറവും വേവിച്ചെടുക്കുക.

റൊട്ടിപൊടിയിൽ പൊതിഞ്ഞിട്ടും, പച്ചക്കറികൾ വേർപെട്ടു പോകുന്നുണ്ടെങ്കിൽ, അല്പം കോൺഫ്ലോറോ മൈദയോ കലക്കി അതിൽ മുക്കിയ ശേഷം റൊട്ടിപ്പൊതിയിൽ പൊതിഞ്ഞ് വേവിക്കാൻ വയ്ക്കുക.

പച്ചക്കറികൾ വഴറ്റി വേവിക്കുന്നില്ലെങ്കിൽ, ഒന്നു വഴറ്റിയശേഷം, ഉപ്പും, മസാലയും, ചോളവും, ഉരുളക്കിഴങ്ങും ചേർത്ത് യോജിപ്പിച്ചശേഷം മൈദയിലോ കോൺഫ്ലോറിലോ പൊതിഞ്ഞ്, റൊട്ടിപ്പൊടിയിലോ, റവയിലോ പൊതിഞ്ഞ് എണ്ണയിൽ വറുത്തെടുക്കുകയും ചെയ്യാം.

ഈ അളവിൽ അത്യാവശ്യം എരുവൊക്കെയുണ്ട്. കൂടുതൽ വേണ്ടവർക്ക് അല്പം മുളകുപൊടിയോ, പച്ചമുളകോ ഒക്കെ ചേർക്കാവുന്നതാണ്.

സോസ് കൂട്ടിക്കഴിക്കുന്നതാവും നല്ലത്.

ഓട്സ് ദോശ

2011-12-22T09:37:00.002+05:30

ഓട്സ് ആരോഗ്യത്തിനു നല്ലതാണ്. അതുകൊണ്ട് കഞ്ഞിയുണ്ടാക്കിക്കുടിക്കുകയാണ് പലരും ചെയ്യാറുള്ളത്. എന്നാൽ ഓട്സ് കൊണ്ട് ദോശയാവാം ഇനി.

ഓട്സ് - ഒരു ഗ്ലാസ്സ്. (കാൽ ലിറ്റർ വെള്ളം കൊള്ളുന്ന ഗ്ലാസ്സ്). ഒന്ന് - ഒന്നേകാൽ ആയാലും കുഴപ്പമില്ല.
പുഴുങ്ങലരി/പൊന്നിയരി - അര ഗ്ലാസ്സ്.
ഉഴുന്ന് - കാൽ ഗ്ലാസ്സ്.
ഉലുവ - ഒരു ടീസ്പൂൺ.
ഉപ്പ് - പാകം നോക്കി.

പുഴുങ്ങലരിയും ഉഴുന്നും ഉലുവയും കഴുകി, വെള്ളത്തിൽ കുതിർത്തുവയ്ക്കുക. ഓട്സും അപ്പോൾത്തന്നെ വെള്ളത്തിൽ കുതിർത്ത് ഇടുക. കുറേ വെള്ളം ഒഴിക്കരുത്. ഓട്സ് മുഴുവൻ നനയാൻ ഉള്ള വെള്ളം മതി.

നാലു മണിക്കൂറെങ്കിലും കഴിഞ്ഞ് അരയ്ക്കുക. അരിയും ഉഴുന്നും ഉലുവയും മിനുസമായി അരഞ്ഞാൽ അതിൽ ഓട്സ് ഇട്ട് ഒന്നുകൂടെ നല്ലോണം അരയ്ക്കുക. അരയ്ക്കുമ്പോൾ ആവശ്യത്തിനു ഉപ്പിടുകയോ, അരച്ചുകഴിഞ്ഞ്, ഉപ്പുചേർത്ത് നന്നായി ഇളക്കിയോജിപ്പിച്ചുവയ്ക്കുകയോ ചെയ്യുക.

അരയ്ക്കുമ്പോൾ, ഉഴുന്നും ഉലുവയും അരിയും ഉള്ളതിന്റെ പകുതിയ്ക്കു മാത്രം വെള്ളം ഒഴിക്കുക. കുറച്ച് അരഞ്ഞുകഴിഞ്ഞാൽ വെള്ളം വേണമോയെന്ന് നോക്കി മാത്രം കൂട്ടണം. ഇതിനുമാത്രമല്ല, എപ്പോഴും.

ഇവിടെ പിറ്റേ ദിവസമാണ് ദോശയുണ്ടാക്കിയത്. മാവു പുളിച്ചിട്ട്. പുളി വേണ്ടാത്തവർക്ക് അരച്ചുകഴിഞ്ഞാൽ ഉണ്ടാക്കാം.

ചൂടായ ദോശക്കല്ലിൽ ഒഴിക്കുക. വെളിച്ചെണ്ണയോ നെയ്യോ പുരട്ടുക. വെന്താൽ മറിച്ചിടുക. പിന്നേം വെന്താൽ എടുത്തുവയ്ക്കുക.

നിങ്ങൾക്കിഷ്ടമുള്ള എന്തെങ്കിലും കൂട്ടിക്കഴിക്കഴിക്കാം.

കാബേജു ബജ്ജി

2011-11-19T20:17:00.007+05:30

കാബേജ് എന്നു കേട്ടാൽ മുഖം ചുളിയില്ലെങ്കിൽ നിങ്ങൾക്കു ധൈര്യമായി ഈ ബജ്ജിയുണ്ടാക്കാം. എളുപ്പം കഴിയും, സ്വാദും നന്ന്.

കാബേജ് - ഒരു നൂറ് ഗ്രാം വേണം. വയലറ്റോ പച്ചയോ ഏതെങ്കിലും മതി.

കടലപ്പൊടി അഥവാ കടലമാവ് അഥവാ ബേസൻ - മുക്കാൽ കപ്പ്. ഒരു ഏഴ് ടേബിൾസ്പൂൺ എടുത്താലും മതി.

അരിപ്പൊടി - മൂന്ന് ടേബിൾസ്പൂൺ.

വലിയ ഉള്ളി - ഒന്ന് ചെറുത്.

പച്ചമുളക് - രണ്ട്.

മുളകുപൊടി - കാൽ ടീസ്പൂൺ.

കായം - കുറച്ച് പൊടി.

ഉപ്പ്

വെളിച്ചെണ്ണ/ വേറെ ഏതെങ്കിലും പാചകയെണ്ണ.

കാബേജ് കഴുകിയിട്ട് ചെറുതായി നുറുക്കുക/അരിയുക/മുറിക്കുക. ഉപ്പേരിക്ക് അരിയുന്നതുപോലെയൊന്നും ചെറുതാക്കേണ്ട. ചിത്രത്തിലുള്ളതുപോലെ മതി. പച്ചമുളകും ഉള്ളിയും ചെറുതാക്കിത്തന്നെ അരിയണം.

എന്നിട്ട് കടലമാവ്, അരിപ്പൊടി, ഉപ്പ്, കായം, മുളകുപൊടി, പച്ചമുളക്, ഉള്ളി എന്നിവയൊക്കെ ഒരു പാത്രത്തിലിട്ട് യോജിപ്പിക്കുക.

അതിൽ അല്പാല്പമായി വെള്ളമൊഴിച്ച് കലക്കുക. അധികം വെള്ളം വേണ്ട. അധികം കട്ടിയിലും വേണ്ട.

എണ്ണ ചൂടാക്കി, തയ്യാറാക്കിയ കാബേജുമാവിൽ നിന്ന് ഓരോ സ്പൂണായി കോരിയൊഴിച്ച് വറുത്തെടുക്കുക. അധികം വലുതും നന്നെ ചെറുതും ആയ സ്പൂൺ ആവണ്ട. മാവൊഴിച്ചു, ഒരു ഭാഗം വെന്താൽ ഒന്നു തിരിച്ചിട്ടും വേവിക്കുക. തീ വളരെക്കൂട്ടിവെച്ച് ഉണ്ടാക്കിയാൽ ഉള്ള് വേവില്ല.

വെറുതേ തിന്നുക. സോസും ചമ്മന്തിയുമൊക്കെ ഉണ്ടെങ്കിൽ കൂട്ടുക.

മാവിൽ, മല്ലിയില, കറിവേപ്പില എന്നിവ ചെറുതായി അരിഞ്ഞിടാം. അല്പം പഞ്ചസാരയും ബേക്കിംഗ് പൌഡറും വേണമെങ്കിൽ ചേർക്കാം.

ബേബി കോൺ കറി

2011-10-18T12:32:00.005+05:30

ബേബികോൺ കൊണ്ടൊരു മസാലക്കറിയുണ്ടാക്കാൻ തീരുമാനിച്ചു. ഉണ്ടാക്കി. ഇനി നിങ്ങൾക്കും വേണമെങ്കിൽ പരീക്ഷിക്കാം.

ബേബി കോൺ - പത്തെണ്ണം വേണം.
ഉരുളക്കിഴങ്ങ് - രണ്ടെണ്ണം.
വലിയ ഉള്ളി അഥവാ സവാള - രണ്ട്. അധികം വലുത് വേണ്ട.
പച്ചമുളക് - ഒന്ന്.
ഇഞ്ചി ഒരു ചെറിയ കഷണം.
വെളുത്തുള്ളി - അഞ്ച് അല്ലി. (വലുത്).
ജീരകം - അര ടീസ്പൂൺ.
തക്കാളി വലുത് ഒന്ന്.
മല്ലിയില കുറച്ച്.
വറവിനു വേണ്ടി കടുക്, കറിവേപ്പില.
മഞ്ഞൾപ്പൊടി, ഉപ്പ്, പാചകയെണ്ണ. (ഈ കറിക്ക്, വെളിച്ചെണ്ണയേക്കാൾ നല്ലത് വേറെ ഏതെങ്കിലും പാചകയെണ്ണയാണ്.)

ബേബി കോണും ഉരുളക്കിഴങ്ങും മുറിക്കുക. (ബേബി കോൺ നീളത്തിൽ കഷണങ്ങളാക്കുകയും ചെയ്യാം. ഇവിടെ വട്ടത്തിലാണ് മുറിച്ചത്.)

മുറിച്ച ശേഷം കഴുകുക.

തക്കാളി മുറിച്ചുവയ്ക്കുക.

തോലു കളഞ്ഞ് കഷണങ്ങളാക്കിയ ഉള്ളിയ്ക്കൊപ്പം, ജീരകം, മല്ലിയില, വെളുത്തുള്ളി, ഇഞ്ചി, പച്ചമുളക് എന്നിവ അരയ്ക്കുക.

ഒരു പാത്രത്തിൽ എണ്ണയൊഴിച്ച് കടുക് ഇടുക. പൊട്ടിയാൽ കറിവേപ്പില ഇടുക. അരച്ചുവെച്ച മസാല ചേർക്കുക. രണ്ട് മൂന്നു മിനുട്ട് വഴറ്റണം. പിന്നെ തക്കാളി ചേർക്കുക. തക്കാളി വേവണം. ഇളക്കിക്കൊടുക്കണം. അതിനുശേഷം ബേബി കോണും ഉരുളക്കിഴങ്ങും അതിലിടുക. ഉപ്പും മഞ്ഞൾപ്പൊടിയും ഇടുക. വേവാനുള്ള വെള്ളമൊഴിക്കുക. വേവിക്കുക.

കഴിക്കുന്നതിനുമുമ്പ് ചെറുനാരങ്ങ നീര് ചേർക്കാം.

പച്ചമുളകും ഇഞ്ചിയും അരച്ചുചേർക്കുന്നതിനു പകരം അല്പം ഗരം മസാലയോ വെജിറ്റബിൾ മസാലയോ ചേർത്താലും മതി.

ഉരുളക്കിഴങ്ങും ബേബി കോണും ആദ്യം വേവിച്ച് മസാലയിലേക്കു ചേർക്കുകയും ചെയ്യാം. അല്ലെങ്കിൽ വേവാൻ കുറച്ച് സമയമെടുക്കും.

പുതിനയിലച്ചമ്മന്തി

2011-10-10T19:36:00.004+05:30

പുതിന(Mint)യില കൊണ്ടൊരു ചമ്മന്തി. പുതിനയില കിട്ടാനുണ്ടെങ്കിൽ എളുപ്പം കഴിയും പരിപാടി.

പുതിനയില, ഉപ്പ്, പുളി, ഉഴുന്നുപരിപ്പ്, തേങ്ങ, പച്ചമുളക്, അല്പം വെളിച്ചെണ്ണ എന്നിവ വേണം.

ഏകദേശം നാലു ടേബിൾസ്പൂൺ പുതിനയിലയെടുക്കുക. ചിരവിയ തേങ്ങ മൂന്നു ടേബിൾസ്പൂൺ എടുക്കുക. പുളി അല്പം എടുക്കുക. ഉഴുന്നുപരിപ്പ് ഒരു ടീസ്പൂൺ എടുക്കുക. രണ്ട് പച്ചമുളക്

എടുക്കുക.

പുതിനയില കഴുകിവൃത്തിയാക്കി എടുക്കുക.

ഒരു പാത്രത്തിൽ വെളിച്ചെണ്ണ (വേറെ പാചകയെണ്ണയായാലും മതി) ചൂടാക്കുക. ഉഴുന്നുപരിപ്പ് അതിലിട്ട് ചുവപ്പിക്കുക. അതിൽ പച്ചമുളക് ഇട്ട് വാട്ടുക. അതിലേക്ക് പുതിനയിലയിട്ട് വാട്ടുക.

ഒന്നു തണുത്താൽ, തേങ്ങ, പുളി, ഉപ്പ് എന്നിവ ചേർത്ത് അരയ്ക്കുക.

അരയ്ക്കുമ്പോൾ അല്പം വെള്ളം ചേർക്കുക.

പച്ചമുളക് നിങ്ങൾക്ക് എരിവ് വേണ്ടതനുസരിച്ച് എടുക്കാം. പുതിനയില നാലു ടേബിൾസ്പൂൺ എടുത്ത്, എണ്ണയിൽ വാട്ടിക്കഴിഞ്ഞാൽ, കുറച്ചേ കാണൂ.

ശർക്കര ഒരു കഷണം വേണമെങ്കിൽ ഇടാം.

സേമിയ ഊത്തപ്പം

2011-08-25T08:54:00.006+05:30

സേമിയ അഥവാ വെർമിസെല്ലി ഇഷ്ടമാണോ? ആണെങ്കിൽ‌പ്പിന്നെ വേറൊന്നും നോക്കാനില്ല. സേമിയ ഊത്തപ്പം ഉണ്ടാക്കുക തന്നെ. വളരെ എളുപ്പമുള്ളൊരു കാര്യം. ഇതിനുവേണ്ടതെല്ലാം വീട്ടിൽത്തന്നെ ഉണ്ടാവും.

സേമിയ - ഒരു വലിയ ഗ്ലാസ്സിൽ നിറച്ചും എടുക്കുക. അല്ലെങ്കിൽ നൂറു ഗ്രാം എടുക്കുക. വറുത്ത സേമിയ ആണെടുത്തത്. അവിടെ വറുത്ത സേമിയ ഇല്ലെങ്കിൽ സേമിയ എടുത്ത് അല്പം നെയ്യൊഴിച്ച് വറുക്കുക.

അരിപ്പൊടി - സേമിയ എടുത്ത ഗ്ലാസ്സിൽ ഒന്നേ കാൽ ഗ്ലാസ്. അല്ലെങ്കിൽ നൂറ്റമ്പത് ഗ്രാം. ഇവിടെ പുട്ടുപൊടിയാണെടുത്തത്. പുട്ടിനുവേണ്ടി വറുത്ത അരിപ്പൊടി. സാദാ അരിപ്പൊടി ആയാലും മതി.

വലിയ ഉള്ളി/സവാള - ഒന്ന്. ചെറുതായി അരിയുക.
പച്ചമുളക് - മൂന്ന്. വട്ടത്തിൽ, ചെറുതായി അരിയുക.
മല്ലിയില - കുറച്ച്, ചെറുതായി അരിയുക.
കറിവേപ്പില - കുറച്ച്, ചെറുതായി അരിയുക.
ഇഞ്ചി - ഒരു കഷണം, ചെറുതായി മുറിച്ചെടുക്കുക.
ജീരകം - കാൽ ടീസ്പൂൺ.
കായം (പൊടി) - കുറച്ച്.
തൈര് - ഒരു ഗ്ലാസ്.
തേങ്ങ - തേങ്ങാക്കഷണങ്ങൾ ചെറുതായി അരിഞ്ഞത് കുറച്ച്.
കുരുമുളകുപൊടി - അല്പം.
തക്കാളി - ഒന്ന്.
ഉപ്പ്.
നെയ്യ്/വെളിച്ചെണ്ണ.

എല്ലാം കൂടെ ഒരുമിച്ച് ചേർക്കുക. യോജിപ്പിക്കുക. അല്പം വെള്ളം ചേർത്താലേ ശരിയാവൂ. വെള്ളം ചേർത്ത് ഒഴുകിനടക്കാത്ത പാകത്തിൽ, കുറച്ചു കട്ടിയിൽ കലക്കിവയ്ക്കുക. വെളുത്തുള്ളിയുടെ സ്വാദ് ഇഷ്ടമുള്ളവർക്ക് അതും കൂട്ടാം.

കുറച്ചുനേരം വച്ചാലും കുഴപ്പമില്ല. അപ്പോത്തന്നെ ഉണ്ടാക്കിയാലും കുഴപ്പമില്ല.

ദോശക്കല്ല് ചൂടാക്കി മാവൊഴിക്കുക.
വെളിച്ചെണ്ണയോ നെയ്യോ മുകളിൽ പുരട്ടുക.

വെന്തുവന്നാൽ മറിച്ചിടുക.
തീ അധികം കൂട്ടിവയ്ക്കേണ്ട. ഉള്ളിൽ നല്ലപോലെ വേവണം.

വെന്താൽ എടുത്തുവയ്ക്കുക.

തിന്നുക. ചമ്മന്തി, ചമ്മന്തിപ്പൊടി, സ്റ്റ്യൂ, എന്നിങ്ങനെ എന്തുവേണമെങ്കിലും കൂട്ടിക്കഴിക്കാം. പുളീഞ്ചി വരെ കൂട്ടിക്കഴിക്കാം. അല്ല പിന്നെ!

ചേമ്പ് മാങ്ങാക്കൂട്ടാൻ

2011-08-18T09:26:00.006+05:30

ചേമ്പും മാങ്ങയും മോരും. കേൾക്കുമ്പോൾ നിങ്ങൾക്ക് ഇഷ്ടമാവുന്നുണ്ടോ? എന്നാൽ‌പ്പിന്നെ കൂട്ടാൻ വയ്ക്കാൻ തയ്യാറായിക്കോളീൻ. നല്ല സ്വാദുള്ളൊരു കൂട്ടാനാണിത്. ഉണ്ടാക്കാനും വല്യ പ്രയാസം ഒന്നുമില്ല.

ചേമ്പ് - ചിത്രത്തിൽ ഉള്ളതുപോലെ, അല്ലെങ്കിൽ അധികം വലുപ്പമില്ലാത്തതും വളരെ ചെറുതല്ലാത്തതും ആയ ചേമ്പ് മൂന്നെണ്ണം.

മാങ്ങ - ചെറുത് രണ്ടെണ്ണം. പഴുത്തതാണിവിടെ എടുത്തത്. പച്ച ആയാലും കുഴപ്പമില്ല. അധികം പുളി വേണമെന്നില്ല.

മോര് - കാൽ ലിറ്റർ. മോര് ചേർക്കാൻ ഇഷ്ടമുണ്ടെങ്കിൽ ചേർത്താൽ മതി.

തേങ്ങയും ജീരകവും - നാല് ടേബിൾസ്പൂൺ തേങ്ങയും ഒരു ടീസ്പൂൺ ജീരകവും. തേങ്ങയുടെ അളവിത്തിരി കൂടിയാലും കുഴപ്പമൊന്നും ഇല്ല.

പച്ചമുളക് - രണ്ടോ മൂന്നോ.

മഞ്ഞൾപ്പൊടിയും മുളകുപൊടിയും ഉപ്പും നിങ്ങളുടെ സൌകര്യത്തിനിടുന്നതാവും നല്ലത്. ഏകദേശം കണക്കാക്കിയിട്ടാൽ മതി.

വറവിടാൻ, വെളിച്ചെണ്ണ, കടുക്, കറിവേപ്പില, ചുവന്ന മുളക്.

തേങ്ങയും ജീരകവും മിനുസമായി അരയ്ക്കുക. അധികം വെള്ളം ചേർക്കരുത്.

ചേമ്പും മാങ്ങയും തോലുകളഞ്ഞ് എടുക്കുക. കഷണങ്ങളാക്കുക.

ചേമ്പ്, ഉപ്പ്, മഞ്ഞൾപ്പൊടി, മുളകുപൊടി, പച്ചമുളക് ചീന്തിയിട്ടത് എന്നിവ ചേർത്ത് വേവാനുള്ള വെള്ളം മാത്രം ഒഴിച്ച് ആദ്യം വേവിക്കുക. ഇവിടെ കുക്കറിലാണ് വേവിച്ചത്.

വെന്തുകഴിഞ്ഞാൽ മാങ്ങാക്കഷണങ്ങൾ ചേർത്ത്, വെള്ളം വേണമെങ്കിൽ ഒഴിച്ച് ഒന്നു വേവിക്കുക. മാങ്ങയ്ക്ക് വേവാൻ വളരെക്കുറച്ചേ സമയം വേണ്ടൂ. അപ്പോൾത്തന്നെ ഉപ്പും മുളകുമൊക്കെ മാങ്ങയിലും പിടിച്ചോളും. പിന്നെ മോരൊഴിച്ച് തിളപ്പിക്കാം. വേണ്ടെങ്കിൽ ഒഴിക്കേണ്ട.

പിന്നെ തേങ്ങയരച്ചത് ചേർത്ത് തിളപ്പിച്ച് വാങ്ങിവെച്ച് വറവിടുക. തേങ്ങ കൂട്ടിക്കഴിഞ്ഞാൽ ഉപ്പ് പാകം നോക്കി വേണമെങ്കിൽ ചേർക്കുക.

മുളകുപൊടിയ്ക്കു പകരം തേങ്ങയരയ്ക്കുമ്പോൾ ചുവന്ന മുളകോ പച്ചമുളകോ പാകത്തിനു ചേർത്ത് അരയ്ക്കാം.

ബിസ്ക്കറ്റ് പഴം ഗാത്തോ

2011-08-17T09:32:00.006+05:30

ഗാത്തോ (Gateau) എന്നു കേട്ടാൽ നിങ്ങൾ പേടിക്കരുത്. സംഗതി വളരെ ലളിതമായ ഒരു കാര്യമാണ്. പക്ഷെ അതിന്റെ പേര് അങ്ങനെ ആയിപ്പോയി. അതിനെക്കുറിച്ച് വലുതായൊന്നും അറിയുകയുമില്ല. എന്നാലും ഇത് വളരെ എളുപ്പത്തിൽ ഉണ്ടാക്കാൻ പറ്റുന്ന ഒരു വിഭവമാണ് എന്നു മനസ്സിലായി. പഴങ്ങളും മധുരവും ഇഷ്ടമുണ്ടെങ്കിൽ വേഗം ഉണ്ടാക്കിക്കോളീൻ.

പലതരം പഴങ്ങൾ.
അല്പം പഞ്ചാരപ്പൊടി.
ക്രീം.
ഓറഞ്ച്നീര്.
പഞ്ചാരബിസ്കറ്റ്.

ഇത്രേം സാധനങ്ങൾ വേണം.

കദളിപ്പഴം, ആപ്പിൾ, മുന്തിരി, പൈനാപ്പിൾ, പേരയ്ക്ക, സപ്പോട്ട എന്നിങ്ങനെയൊക്കെയുള്ള പലതരം പഴങ്ങൾ, നിങ്ങൾക്കിഷ്ടമുള്ളത്, കൊണ്ടുവന്ന് വളരെച്ചെറുതാക്കി അരിഞ്ഞുവയ്ക്കുക.

തോലും കുരുവും കളയേണ്ടതൊക്കെ കളയണം.

ക്രീം അല്പം പഞ്ചാരപ്പൊടിയും ചേർത്ത് അടിച്ചുപതപ്പിച്ച് വയ്ക്കുക.

ഒരു പരന്ന പാത്രം എടുത്തുവച്ച്, ബിസ്ക്കറ്റ് ഓരോന്നായി ഓറഞ്ചുനീരിൽ മുക്കി, അടുക്കിവയ്ക്കുക.

അതിനുമുകളിൽ ക്രീം ഒഴിച്ചുതേച്ചു വയ്ക്കുക.

അതിനുമുകളിൽ പഴങ്ങൾ അരിഞ്ഞത് നിരത്തുക.

പിന്നേം ബിസ്ക്കറ്റ് ഓറഞ്ചുനീരിൽ മുക്കി വയ്ക്കുക. പിന്നേം ക്രീം, പിന്നേം പഴങ്ങൾ. അങ്ങനെ വെച്ചുവെച്ച് അവസാനം പഴം വരുന്ന വിധത്തിൽ അടുക്കിക്കൊണ്ടിരിക്കുക. കഴിഞ്ഞാൽ കുറച്ചുനേരം ഫ്രിഡ്ജിൽ വയ്ക്കുക.
പിന്നെ എടുത്തുതിന്നുക. ഓരോ ബിസ്ക്കറ്റിന്റേം അടുത്തുനിന്ന് സ്പൂൺ കൊണ്ട് അടിയിൽ നിന്നു മുകളിൽ വരെ ഒരുമിച്ചു കോരിയെടുക്കുക.

ഇത്രേയുള്ളൂ പണി. ക്രീമിനു പകരം ചോക്ലേറ്റ് വേണമെങ്കിൽ അതും അലിയിച്ച് നിരത്താം. പലവിധത്തിൽ ഗാത്തോ ഉണ്ടാക്കാം. അതൊക്കെ പരീക്ഷിച്ചിട്ടു പറയാം.

മുത്താറിക്കുറുക്ക്

2011-06-14T13:31:00.006+05:30

മുത്താറി അഥവാ പഞ്ഞപ്പുല്ല് അഥവാ റാഗി കൊച്ചുകുട്ടികൾക്കുമാത്രമല്ല വല്യവർക്കും കഴിക്കാം. പ്രമേഹരോഗികൾക്ക് ഇടയ്ക്ക് ഇത് കഴിക്കാം. മധുരം ഇടരുതെന്നു മാത്രം. കുട്ടികൾക്കാവുമ്പോ മധുരം വേണം.
മുത്താറിപ്പൊടിയാണ് വാങ്ങുന്നതെങ്കിൽ കുറുക്ക് ഉണ്ടാക്കൽ വേഗം കഴിയും.

ഇനി മുത്താറി അപ്പാടെയാണെങ്കിലോ? അത് വീട്ടിൽത്തന്നെ അരച്ചെടുക്കുന്നതല്ലേ ആരോഗ്യത്തിനു ശരിക്കും നല്ലത്?

ആദ്യം തന്നെ മുത്താറി കുറച്ചെടുത്ത് വെള്ളത്തിൽ ഇട്ടുവയ്ക്കുക. വെള്ളത്തിൽ മുങ്ങിക്കിടക്കണം. ഒന്നോ രണ്ടോ മണിക്കൂർ. അത്രയില്ലെങ്കിലും സാരമില്ല.

അത് കഴുകിയെടുത്ത് അരയ്ക്കുക. വെള്ളം കുറച്ച് ഒഴിയ്ക്കണം. അരഞ്ഞാൽ അരിപ്പയിൽ അരിച്ചെടുക്കുക. കിട്ടുന്ന കരട് ഒന്നുകൂടെ വെള്ളം ചേർത്ത് അരയ്ക്കുക. പിന്നേം അരിയ്ക്കുക.

അരിപ്പയിൽ അരിച്ച കരട് ആണിത്. അരച്ച്, അരിച്ച് എടുത്തത്. കളയാനുള്ളത്.

അരച്ചെടുത്തതിൽ കുറച്ചുകൂടെ വെള്ളം ചേർത്ത് അടുപ്പത്തുവച്ച് കുറുക്കുക. കുറച്ച് പാൽ ചേർക്കാം. കുറുക്ക് പാകമാവുന്നതുവരെ ഇളക്കിക്കൊണ്ടിരിക്കുക.

കുറുക്ക് തയ്യാർ. ഇത് മധുരമില്ലാത്ത കുറുക്ക്.

കുട്ടികൾക്കാണെങ്കിൽ കൽക്കണ്ടം പൊടിച്ചിട്ടതും, പാലും ചേർത്ത് കുറുക്കുക. അല്ലെങ്കിൽ ശർക്കര മാത്രം ചേർത്ത് കുറുക്കുക. വല്യവർക്ക് വേണമെങ്കിൽ പഞ്ചസാരയും പാലുംചേർത്ത് കുറുക്കുക.

അമ്മയാണ് മുത്താറി കാച്ചിയത്. അച്ഛൻ കഴിച്ചോളും എന്നു ഞങ്ങൾ വിചാരിച്ചു. ഇത്രയൊന്നും എനിക്കുവേണ്ടെന്ന് അച്ഛൻ. കുറച്ച് അച്ഛൻ കഴിച്ചു. ബാക്കിയുള്ളതിൽ മധുരം ചാർത്തി ഞങ്ങളും.

പാഞ്ചാലിച്ചീര

2011-06-09T19:28:00.008+05:30

പാണ്ഡവന്മാരുടെ വനവാസകാലത്ത് പാഞ്ചാലിയ്ക്ക് സൂര്യനിൽ നിന്ന് അക്ഷയപാത്രം കിട്ടുന്നു. അക്ഷയപാത്രത്തിൽ ഇഷ്ടം പോലെ ഭക്ഷണം കിട്ടും. പക്ഷെ, പാഞ്ചാലി കഴിച്ചുകഴിഞ്ഞാൽ അതിൽ ആ ദിവസം പിന്നെ ആഹാരം ഒന്നും ആ പാത്രത്തിൽ ഉണ്ടാവില്ല. അങ്ങനെയിരിക്കെ ഒരിക്കൽ, ദുർവ്വാസാവ് മഹർഷി, കൌരവരുടെ കൊട്ടാരത്തിൽ വന്നു താമസിക്കുകയും, ദുര്യോധനൻ, മുനിയ്ക്കും കൂടെയുള്ള ശിഷ്യന്മാർക്കും വേണ്ടതൊക്കെ ഒരുക്കിക്കൊടുത്ത് സന്തോഷിപ്പിക്കുകയും ചെയ്യുന്നു. അപ്പോ മുനി, ദുര്യോധനനോട് വരം ചോദിക്കാൻ പറയുന്നു. അപ്പോ പാണ്ഡവരെ ഒന്നു പറ്റിയ്ക്കാമെന്നു കരുതി, ദുര്യോധനൻ പറയും, പാണ്ഡവന്മാരെക്കാണാൻ അങ്ങ് ശിഷ്യന്മാരോടു കൂടെ പോകണം എന്ന്. അതും അവരുടെ ഭക്ഷണശേഷം. അവർ അങ്ങനെ, പാണ്ഡവരുടെ അടുക്കൽ ചെന്ന സമയത്ത്, എല്ലാവരുടേം, പാഞ്ചാലിയുടേയും, ഭക്ഷണം കഴിഞ്ഞിരുന്നു. മുനിയും ശിഷ്യന്മാരും കുളിക്കാനും ജപിക്കാനും പോയി. അവർ എത്തുമ്പോഴേക്കും ഭക്ഷണം വേണം. അല്ലെങ്കിൽ മുനിക്ക് കോപം വന്നു ശപിച്ചേക്കും എന്ന് പാണ്ഡവന്മാർ കരുതി. പാഞ്ചാലി വിഷമിച്ച്, ശ്രീകൃഷ്ണനെ വിളിച്ച് പ്രാർത്ഥിയ്ക്കും. ശ്രീകൃഷ്ണൻ അവിടെയെത്തും. എന്തെങ്കിലും ഭക്ഷണം കൊടുക്കണമെന്ന് പറഞ്ഞപ്പോൾ, ഭക്ഷണം കഴിഞ്ഞുവെന്നും ഇനി ഒന്നുമില്ലെന്നും പാഞ്ചാലി പറയുന്നു. അപ്പോ, അക്ഷയപാത്രം കൊണ്ടുവരാൻ ശ്രീകൃഷ്ണൻ പറയുന്നു. പാഞ്ചാലി, പാത്രം കൊണ്ടുവന്നുകൊടുത്തപ്പോൾ അതിന്റെ വക്കിൽ ഒരു ചീരയില കാണുകയും ശ്രീകൃഷ്ണൻ അതു കഴിക്കുകയും ചെയ്യുന്നു. പിന്നെ, മുനിയേയും ശിഷ്യന്മാരേയും ഭക്ഷണം തയ്യാറായി എന്നും പറഞ്ഞ് വിളിച്ചുകൊണ്ടുവരാൻ പറയുന്നു. പക്ഷേ, ദുർവ്വാസാവിനും ശിഷ്യന്മാർക്കും ഭക്ഷണം വേണ്ടായിരുന്നു. പാണ്ഡവരുടെ അടുക്കലേക്ക് ചെന്ന് ഭക്ഷണം വേണ്ടെന്ന് പറയാനും മടിയായി. ശ്രീകൃഷ്ണനോടും പാണ്ഡവരോടും ശത്രുത കാണിക്കുന്നത് പന്തിയാവില്ലെന്നു കണ്ട് അവർ വേഗം സ്ഥലം വിട്ടു. അങ്ങനെ ഒരു ചീരയില കൊണ്ട് പാഞ്ചാലി വല്യൊരു ശാപത്തിൽ നിന്ന് രക്ഷപ്പെട്ടു.

കഥ കഴിഞ്ഞു. ഇനി കാര്യം.

പാഞ്ചാലിച്ചീര എന്ന് അറിയപ്പെടുന്ന ചീര കൊണ്ട് ഉപ്പേരി അഥവാ തോരൻ വയ്ക്കാൻ ഞാൻ തീരുമാനിച്ചു. അമ്മാമന്റേം അമ്മായിയുടേം വീട്ടിൽ പറമ്പിലാണ് ഈ ചീരകൾ നിൽക്കുന്നത്. നട്ടുവളർത്തേണ്ട ആവശ്യമൊന്നുമില്ല. ഇഷ്ടം പോലെ ഉണ്ടാവും. അമ്മായി പണ്ടേ പറഞ്ഞിരുന്നു, ഇതുകൊണ്ട് എന്തെങ്കിലും ഉണ്ടാക്കിക്കോന്ന്. പക്ഷേ അപ്പോ എനിക്കു സൌകര്യമില്ലായിരുന്നു. ഇപ്പോ അവിടെപ്പോയപ്പോൾ സൌകര്യം കിട്ടി. എന്റെ ബ്ലോഗിനുവേണ്ടിയുള്ള ഉപ്പേരിവയ്ക്കലായതുകൊണ്ടും, അവിടെത്തന്നെയുള്ള കായ മെഴുക്കുപുരട്ടി ഉണ്ടാക്കിയതുകൊണ്ടും ആരും എന്നെ സഹായിച്ചില്ല. വെറുതെ, പ്രോത്സാഹിപ്പിച്ചു.

ചീര ഇതാ പറമ്പിൽ.

അതിന്റെ പൂവ്. മൊട്ടും.

അത് സാധാരണ എല്ലാ ചീരകളും പൊട്ടിച്ചെടുക്കുന്നതുപോലെ വേരിനു കുറച്ചു മുകളിൽ വെച്ച് പൊട്ടിച്ചെടുത്തത്. കൈ കൊണ്ട് പൊട്ടിക്കുകയേ വേണ്ടൂ.

കഴുകി, അരിഞ്ഞത്. നല്ല ഇലകളായിരുന്നു മിക്കതും. അതുകൊണ്ട് അധികം തരം തിരിയ്ക്കൽ വേണ്ടിവന്നില്ല. പൂവും മൊട്ടും കളയാം.

അടുപ്പത്ത് ചീനച്ചട്ടി വെച്ച്, വെളിച്ചെണ്ണ ഒഴിയ്ക്കുക. ഉഴുന്നുപരിപ്പ് അല്പം ഇടുക്കുക. ചുവക്കുമ്പോഴേക്കും കടുകും ചുവന്ന മുളകും ഇടുക. കറിവേപ്പിലയും ഇട്ടാൽ പ്രശ്നമൊന്നുമില്ല. മുറിച്ചുവെച്ച ചീര ഇടുക. ആവശ്യത്തിനു മഞ്ഞൾപ്പൊടിയും ഉപ്പും ഇടുക. വെള്ളം ഒഴിക്കാനേ പാടില്ല. ചൂടാവുന്നതിനനുസരിച്ച് ചീരയിൽ വെള്ളം കയറും. നല്ല തീയുണ്ടെങ്കിൽ വറ്റും. വാങ്ങിവെച്ച് ചിരവിയ തേങ്ങ ഇടുക.

ഉപ്പേരി തയ്യാർ.

സാമ്പാറും, ചക്കക്കുരു ഇട്ട്, ഓലനും ഒക്കെ വയ്ക്കാം എന്നു പറഞ്ഞു. ഉപ്പേരിയ്ക്ക് നല്ല സ്വാദുണ്ട്.

ഈ ചീരയ്ക്ക് പാഞ്ചാലിച്ചീര എന്ന പേരു വന്നത് മുകളിൽ‌പ്പറഞ്ഞ കഥ കൊണ്ടാണെന്നും പറഞ്ഞു. കഥയും പറഞ്ഞു. പുസ്തകത്തിൽ എവിടെയെങ്കിലും നോക്കുന്നത് നല്ലതാണെന്നും പറഞ്ഞു. നോക്കിയതുകൊണ്ട്, കഥയ്ക്ക് കടപ്പാട് :- പുരാണിക് എൻസൈക്ലോപീഡിയ- വെട്ടം മാണി.

മാങ്ങാത്തെര

2011-05-24T10:07:00.008+05:30

മാങ്ങാത്തെര അഥവാ മാങ്ങാക്കച്ച് എന്ന് അറിയപ്പെടുന്ന വിഭവം, മാങ്ങാക്കാലത്ത്, നല്ല വെയിലുള്ള കാലത്ത് ഉണ്ടാക്കി സൂക്ഷിക്കാൻ പറ്റിയ ഒന്നാണ്. എന്റെ കസിൻ സഹോദരന്റെ ഭാര്യ എല്ലാ വേനലവധിക്കും സ്വന്തം വീട്ടിൽ പോയിട്ട് ഇതുകൊണ്ടുവരും. അവിടെ അമ്മയുണ്ടാക്കിയത്. ഇവിടെയും എല്ലാവർക്കും അറിയാമെങ്കിലും ഉള്ള മാങ്ങയൊക്കെ തിന്നുതീർക്കുന്നതുകൊണ്ട് ആരും ഉണ്ടാക്കാൻ ശ്രമിക്കാറില്ലായിരുന്നു. ഇത്തവണ ഞാൻ ആ അമ്മയെ ഫോൺ ചെയ്ത് ഇതിന്റെ എല്ലാ ഗുട്ടൻസുകളും ചോദിച്ചറിഞ്ഞു. ഉണ്ടാക്കാനും തുടങ്ങി. അത് ഇങ്ങനെയൊക്കെ ആയിക്കിട്ടി. ഇനി നിങ്ങൾക്കും ഇതൊക്കെ ഒന്നു പരീക്ഷിച്ചൂടേ?

ഇത് ചെയ്യാൻ നന്നായി പഴുത്ത മാങ്ങകൾ വേണം. മൂവാണ്ടൻ മാങ്ങയുണ്ടെങ്കിൽ നല്ലത്. ഇവിടെ വാങ്ങിക്കൊണ്ടുവന്ന മാങ്ങയാണ് ഉപയോഗിച്ചിരിക്കുന്നത്.

ചെയ്യേണ്ട വിധം :-

പഴുത്ത മാങ്ങ തോലു കളയുക.

അതിന്റെ ചാറ് നന്നായി പിഴിഞ്ഞെടുക്കുക. കഷണങ്ങളും ഉണ്ടെന്നു തോന്നുന്നെങ്കിൽ മിക്സിയിൽ അടിച്ചെടുക്കുക.

ഒരു പായയിലോ, പ്ലാസ്റ്റിക്ക് കടലാസ്സിലോ ഇത് നേർമ്മയിൽ തേച്ചുപിടിപ്പിക്കുക.

ഉണക്കാൻ വയ്ക്കുക. നല്ല വെയിൽ ഉണ്ടെങ്കിൽ വേഗം ഉണങ്ങും.

പിറ്റേ ദിവസം ആ ഉണങ്ങിയതിനു മുകളിൽ മാങ്ങാച്ചാറ് വീണ്ടും തേയ്ക്കുക. വേണമെങ്കിൽ ശർക്കര കൂട്ടാം. അഥവാ മാങ്ങയ്ക്ക് പുളിയുണ്ടെങ്കിൽ അതു പോയിക്കിട്ടും.

കട്ടിയിൽ തേയ്ക്കരുത്. എന്നാൽ ഓരോ ദിവസം തേയ്ക്കുന്നതും അന്നന്നു തന്നെ ഉണങ്ങിക്കിട്ടും.

അങ്ങനെ നിങ്ങൾക്കാവശ്യമുള്ള കട്ടിയിൽ തേച്ചുപിടിപ്പിച്ച് ഉണക്കി തെര ഉണ്ടാക്കിയെടുക്കുക.

ഇത്രേം കട്ടിയിൽ ഒന്നും വേണമെന്നില്ല കേട്ടോ. ശരിക്കും ഉണങ്ങിയാൽ കറുപ്പുനിറമാവും.

സൂക്ഷിച്ചുവച്ച് പഴുത്ത മാങ്ങ ഇല്ലാത്ത കാലത്ത് ചോറിനൊപ്പം കഴിക്കുക. കറികളിൽ ഇടുകയും ചെയ്യാം. വെറുതെ തിന്നാനും നല്ലതുതന്നെ.

കയ്പ്പക്കയും മാങ്ങയും കൂട്ടാൻ

2011-05-11T09:15:00.004+05:30

കയ്പ്പക്ക അഥവാ പാവയ്ക്ക ഇഷ്ടമുള്ളവർ മാത്രം ഇതുണ്ടാക്കിയാൽ മതി എന്നാണ് എന്റെ അഭിപ്രായം. കുറച്ച് കയ്പ്പൊക്കെ ഉണ്ടാവും കൂട്ടാന്. ഇത് വളരെ എളുപ്പമുള്ള ഒരു കൂട്ടാനാണ്.

കയ്പ്പക്ക - ഒന്ന്.
മാങ്ങ - ഒന്ന്. അധികം പുളിയില്ലാത്തതാവും നല്ലത്.
ജീരകം - കാൽ ടീസ്പൂൺ.
തേങ്ങ - മൂന്ന്/ നാലു ടേബിൾസ്പൂൺ.
മുളകുപൊടി - അര ടീസ്പൂൺ.
മഞ്ഞൾപ്പൊടി - കാൽ ടീസ്പൂൺ.
ഉപ്പ്.
വറവിടാൻ, വെളിച്ചെണ്ണയും, കടുകും, മുളകും, കറിവേപ്പിലയും.

കയ്പ്പക്കയും മാങ്ങയും കഷണങ്ങളാക്കി മഞ്ഞൾപ്പൊടി, ഉപ്പ്, മുളകുപൊടി എന്നിവയിട്ട് വേവിക്കുക. ആദ്യം കയ്പ്പക്ക വേവിച്ച് പിന്നെ മാങ്ങയിട്ടാൽ നല്ലത്. കയ്പ്പയ്ക്ക് കുറച്ച് വേവുണ്ട്. മാങ്ങയ്ക്ക് അത്രയില്ലല്ലോ. ഒരുമിച്ച് വെച്ചാലും കുഴപ്പമില്ല. തേങ്ങ, ജീരകം ഇട്ട് അരയ്ക്കുക. കയ്പ്പക്കയും മാങ്ങയും വെന്താൽ അതിലേക്ക് തേങ്ങ കൂട്ടുക. തിളപ്പിക്കുക. വാങ്ങിവയ്ക്കുക. വറവിടുക.

മാങ്ങയ്ക്ക് പുളി തീരെയില്ലെങ്കിൽ, കൂട്ടാനു പുളിയുള്ളതാണ് നിങ്ങൾക്കിഷ്ടമെങ്കിൽ കുറച്ച് മോരു ചേർക്കുക. എരിവ് നിങ്ങളുടെ പാകത്തിനു ചേർക്കുക.

ചെറുപയർ ദോശ

2011-05-02T09:47:00.005+05:30

ചെറുപയർ കൊണ്ട് പലതരം കൂട്ടാനുകളും വയ്ക്കാറില്ലേ? ഇനി ചെറുപയർ കൊണ്ട് ദോശയായാലോ? അത്ര എളുപ്പത്തിലൊന്നും ആവില്ല. എന്നാലും സമയമുള്ളപ്പോൾ പരീക്ഷിക്കാം.

പച്ചരി - ഒരു ഗ്ലാസ്.
പുഴുങ്ങലരി - അര ഗ്ലാസ്.
ഉലുവ - ഒരു ടീസ്പൂൺ.
ചെറുപയർ - അര ഗ്ലാസ്.
ഉപ്പ്.

ഉപ്പ് ഒഴിവാക്കി ബാക്കിയെല്ലാം നാലോ അഞ്ചോ മണിക്കൂർ വെള്ളത്തിലിട്ടു വയ്ക്കുക. കഴുകിയിട്ട് വെള്ളത്തിലിട്ടാൽ മതി. മിനുസമായിട്ട് അരച്ചെടുക്കുക. അരയ്ക്കുമ്പോൾ, മിക്സിയിൽ, വളരെക്കുറച്ച് വെള്ളം ഒഴിക്കുക. ഇതൊക്കെ ഉള്ളതിന്റെ പകുതിയിൽ നിൽക്കുന്നത്രേം വെള്ളം. വേണമെങ്കിൽ മാത്രം വീണ്ടും ചേർത്താൽ മതി. മിനുസമായിട്ട് അരയണം. ഉപ്പ്, അരയ്ക്കുമ്പോൾ ഇട്ടാൽ ഒരുപോലെ ചേരും.

ദോശമാവ് പുളിയ്ക്കാൻ വയ്ക്കുക. ഇവിടെ വൈകുന്നേരം അരച്ചിട്ട് പിറ്റേന്ന് രാവിലെയാണുണ്ടാക്കിയത്.

ദോശക്കല്ലിൽ മാവൊഴിക്കുക. പരത്തുക. എണ്ണയോ നെയ്യോ പുരട്ടുക.

വെന്താൽ മറിച്ചിടുക. മറ്റേഭാഗവും വെന്താൽ എടുത്തുവയ്ക്കുക.

കൂടെക്കൂട്ടാൻ വെറും ചമ്മന്തി ആയാലും കുഴപ്പമില്ല. അല്ലെങ്കിൽ കറിയെന്തെങ്കിലും ഇഷ്ടമുള്ളതുപോലെ ഉണ്ടാക്കുക.

ഈന്തപ്പഴം മാങ്ങാച്ചമ്മന്തി

2011-04-07T13:45:00.004+05:30

ഈന്തപ്പഴം ചമ്മന്തിയുണ്ടാക്കിക്കഴിഞ്ഞാൽ അടുത്തത് ഇതാണ്. ഈന്തപ്പഴത്തിനൊപ്പം മാങ്ങയും കൂട്ടിയൊരു ചമ്മന്തി. മാങ്ങാക്കാലത്ത് മാങ്ങ കൊണ്ടൊരു വിഭവം വേണ്ടേ?

വേണ്ടത് :-

മാങ്ങ - ഒന്ന് ചെറുത്.
ഈന്തപ്പഴം - പത്തു പന്ത്രണ്ട്. കുരുവില്ലാത്തതോ, കുരു കളഞ്ഞതോ.
ഉഴുന്നുപരിപ്പ് - രണ്ട് ടീസ്പൂൺ.
കായം പൊടി - കുറച്ച്.
ഉപ്പ് - വേണ്ടതനുസരിച്ച്.
വെളിച്ചെണ്ണ - ഒരു ടേബിൾസ്പൂൺ.
കറിവേപ്പില - പത്തില.
ചുവന്ന മുളക് - നാല്.

മാങ്ങ തോലു കളഞ്ഞ് കഷണങ്ങളാക്കുക. ഈന്തപ്പഴം നന്നായി ചെറുതാക്കുകയോ ചതയ്ക്കുകയോ ചെയ്യുക. അപ്പാടെ ഇട്ടാൽ മിക്സിയ്ക്ക് കേടാണ്.

വെളിച്ചെണ്ണ ചൂടാക്കി ഉഴുന്നുപരിപ്പ് ചുവക്കെ വറുക്കുക. കരിയരുത്. അതിനുമുമ്പേ മുളകും ഇട്ട് മൊരിക്കുക. അതിൽ കറിവേപ്പിലയും ഇട്ട് മൊരിച്ചെടുക്കുക.

ഉഴുന്നും മുളകും കായവും ഉപ്പും മാങ്ങയും കറിവേപ്പിലയും കൂടെ അരയ്ക്കുക. അധികം മിനുസം ആവണമെന്നില്ല. ഈന്തപ്പഴം ചേർക്കുക. ഒന്ന് അരഞ്ഞാൽ ഉപ്പ് നോക്കുക. വേണമെങ്കിൽ ചേർക്കുക. അധികം ആയിട്ടുണ്ടെങ്കിൽ, കാര്യമില്ലെങ്കിലും, അയ്യോ എന്നു പറയുക. എല്ലാം കൂടെ നന്നായരച്ച് എടുക്കുക. ഇത്രേ ഉള്ളൂ പണി.

ആദ്യം ഈന്തപ്പഴം അരച്ചാലും കുഴപ്പമില്ല. ഉഴുന്നുപരിപ്പ് ശരിക്കും അരയുന്നതാണ് നല്ലത്. ഈന്തപ്പഴം ഇട്ടാൽ എല്ലാം കൂടെ പറ്റിപ്പിടിക്കും.

മുളക് ഇത്രേം വേണ്ടെങ്കിൽ ചേർക്കേണ്ട.

ഈന്തപ്പഴം ചമ്മന്തി

2011-04-06T18:42:00.004+05:30

ഈന്തപ്പഴം ഇഷ്ടമാണോ? ആണെങ്കിലും അല്ലെങ്കിലും ഈ ചമ്മന്തി ഒന്നു പരീക്ഷിയ്ക്കൂ. ഇഷ്ടമാവും.

വേണ്ടത്:-

ഈന്തപ്പഴം - കുരുവില്ലാത്തത്/കുരു കളഞ്ഞത് - പത്ത് എണ്ണം.
കുഞ്ഞുള്ളി അഥവാ ചെറിയ ഉള്ളി - പതിനഞ്ച്.
ചുന്നമുളക്/വറ്റൽ മുളക്/ ഉണക്കമുളക് - വലുത് മൂന്ന്.
കറിവേപ്പില - പന്ത്രണ്ട് ഇല.
കായം - രണ്ട് നുള്ള്.
പുളി - അല്പം. (രണ്ടു പുളിങ്കുരുവിന്റെ അത്രേം പുളി).
ഉപ്പ് - തോന്നിയപോലെ.
വെളിച്ചെണ്ണ - ഒന്നോ രണ്ടോ ടേബിൾസ്പൂൺ.

ഉള്ളി തോലുകളഞ്ഞ് കഴുകിയെടുക്കുക. കഷണങ്ങളാക്കുകയൊന്നും വേണ്ട. ഈന്തപ്പഴം മിക്സി ജാറിൽ ഇടാൻ പാകത്തിനു കുറച്ച് ചെറുതാക്കുക. അരയ്ക്കുന്ന കല്ല് ഉണ്ടെങ്കിൽ ചതച്ചുവയ്ക്കുക.

ചീനച്ചട്ടിയിൽ വെളിച്ചെണ്ണ ചൂടാക്കുക. ചെറിയ ഉള്ളി ഇടുക. ഒന്നു വഴറ്റിയിട്ട് മുളക് ഇടുക. രണ്ടും കൂടെ അല്പനേരം വഴറ്റുക. ഉള്ളി ചുവക്കുകയൊന്നും വേണ്ട. അതിലേക്ക് കറിവേപ്പിലയും ഇട്ട് അതും മൊരിഞ്ഞാൽ വാങ്ങിവയ്ക്കുക. തണുത്തോട്ടെ.

ഈന്തപ്പഴം, ആവശ്യത്തിനു ഉപ്പിട്ട്, പുളിയും, കുറച്ച് കായവും ഇട്ട് മിക്സിയിൽ അരയ്ക്കുക. അതു പറ്റിപ്പിടിക്കും. അതുകൊണ്ട് സ്പൂൺ കൊണ്ട് ഇളക്കിക്കൊടുക്കണം ഇടയ്ക്ക് (മിക്സി ഓഫ് ചെയ്തിട്ട്).

അത് അരഞ്ഞാൽ, അതിലേക്ക് വറുത്തുവെച്ചിരിക്കുന്ന ഉള്ളി മുതലായ വസ്തുക്കൾ ഇട്ട് അരയ്ക്കുക. വറുത്ത വെളിച്ചെണ്ണ (ഉണ്ടെങ്കിൽ) ബാക്കിവയ്ക്കേണ്ട. അതും ഇതിലേക്ക് ഒഴിക്കുക. അരച്ചുകഴിഞ്ഞാൽ എടുക്കുക.

ഒട്ടും വെള്ളം ചേർക്കരുത്. അതുകൊണ്ടുതന്നെ ഈന്തപ്പഴം നന്നായി ചതച്ചിട്ടോ, അരിഞ്ഞിട്ടോ മാത്രം മിക്സിയിൽ അരയ്ക്കുക. എരിവിനു മുളക് നിങ്ങളുടെ പാകം പോലെ ചേർക്കാം. അരയ്ക്കുമ്പോൾത്തന്നെ ഉപ്പുനോക്കി പാകത്തിനു ചേർക്കുക. കുറഞ്ഞുപോയിട്ട് പിന്നെച്ചേർത്താൽ അത് അത്രയ്ക്കു യോജിക്കില്ല. ഈന്തപ്പഴത്തിനു മധുരമായതുകൊണ്ട് പുളി കുറച്ചുകൂടെ ചേർത്താലും കുഴപ്പമൊന്നുമില്ല.

റവക്കൊഴുക്കട്ട

2011-04-05T19:09:00.006+05:30

കൊഴുക്കട്ടയുണ്ടാക്കാറില്ലേ? അരികൊണ്ടാണ് സാധാരണയായി ഉണ്ടാക്കാറുള്ളത്. അതിനു കുറച്ച് ജോലിയുണ്ട്. എന്നാൽ വളരെ എളുപ്പത്തിൽ ഒരു കൊഴുക്കട്ടയായാലോ? അതാണ് റവക്കൊഴുക്കട്ട. അധികം വസ്തുക്കളൊന്നും ആവശ്യമില്ല. ഉണ്ടാക്കാനും അധികം ജോലിയൊന്നുമില്ല. അല്പം സമയം വേണം.

വേണ്ടത് :-

സൂജി റവ/ ചെറിയ റവ - ഒരു ഗ്ലാസ്സ്
തേങ്ങ ചിരവിയത് - മുക്കാൽ ഗ്ലാസ്സ്.
തിളച്ച വെള്ളം - ഒന്നേകാൽ ഗ്ലാസ്സ്.
ഉപ്പ് - പാകം നോക്കിയിടുക.

റവയെടുക്കുന്ന അതേ ഗ്ലാസ്സിൽത്തന്നെ വെള്ളവും, തേങ്ങയും അളവ് എടുക്കുക.

റവയിൽ ആവശ്യത്തിനു ഉപ്പിടുക. റവ വറുക്കണമെന്നില്ല.

വെള്ളം തിളപ്പിക്കുക. തിളച്ച ഉടനെത്തന്നെ റവയിൽ ഒഴിക്കുക. വലിയ സ്പൂൺ കൊണ്ട് നന്നായി കുഴയ്ക്കുക.

അടച്ച് അരമണിക്കൂർ വയ്ക്കുക. റവ മൃദു ആവാനാണത്.

അതുകഴിഞ്ഞാൽ തേങ്ങ ചേർക്കുക. പിന്നേം നന്നായി കുഴയ്ക്കുക. തണുത്തിട്ടുണ്ടാവും എന്നുള്ളതുകൊണ്ട് കൈകൊണ്ടു തന്നെ കുഴയ്ക്കുക.

ഉരുട്ടുക. ഒരു പാത്രത്തിൽ വയ്ക്കുക. ഇവിടെ കുക്കറിന്റെ തട്ടിൽത്തന്നെയാണ് വെച്ചത്. കുക്കർ തട്ട് ഇല്ലെങ്കിൽ തീരെച്ചെറുതല്ലാത്ത ഒരു പാത്രത്തിൽ വയ്ക്കുക. കുക്കറിലെ വെള്ളം കൊഴുക്കട്ടയിലേക്ക് കയറാതിരിക്കും. ഉരുട്ടിക്കഴിഞ്ഞ് നല്ല പാകമുള്ള ഒരു പ്ലേറ്റുകൊണ്ട് അടയ്ക്കുക. കുക്കറിൽ നല്ലപോലെ വെള്ളം ഒഴിച്ച്, പാത്രം കുക്കറിൽ വയ്ക്കുക. മൂന്നു വിസിൽ വന്നാൽ തീ താഴ്ത്തിവെച്ച് വേവിക്കുക. എല്ലാം കൂടെ ഒരു ഇരുപത് ഇരുപത്തഞ്ച് മിനുട്ട് ആവും. കുക്കർ വാങ്ങിവയ്ക്കുക.

തണുത്താൽ തുറന്ന് എടുക്കുക.

റവക്കൊഴുക്കട്ടയും മാങ്ങാച്ചമ്മന്തിയും. (കറിയൊന്നുമില്ലെങ്കിൽ‌പ്പിന്നെ അതുമതീന്നു വയ്ക്കുക!)

ചെറുപയർ കറി, ഉരുളക്കിഴങ്ങ് കറി (സ്റ്റ്യൂ) എന്നിവയൊക്കെ കൂടെ കൂട്ടാം.

കുമ്പളങ്ങ മുരിങ്ങാക്കായ പുളിങ്കറി

2011-03-25T10:06:00.003+05:30

ആ കുമ്പളങ്ങ ഇനീം തീർന്നില്ലേന്ന് നിങ്ങളു ചോദിക്കും. ഇല്ല, തീർന്നിട്ടില്ല. അതുകൊണ്ട് ഒരു കൂട്ടാൻ ഇനീം വെയ്ക്കാംന്ന് വിചാരിച്ചു. ആ കൂട്ടാനാണ് കുമ്പളങ്ങ മുരിങ്ങാക്കായ പുളിങ്കറി.

വേണ്ടത്:-
കുമ്പളങ്ങ - ഒരു കഷണം - നൂറ്റമ്പത് ഗ്രാം.
മുരിങ്ങാക്കോല്/മുരിങ്ങാക്കായ - രണ്ട്. വലുത്.
പുളി - ചെറിയ നെല്ലിക്ക വലുപ്പമുള്ളത്.
തേങ്ങ - നാലു ടേബിൾസ്പൂൺ. (കുറച്ച് അങ്ങോട്ടുമിങ്ങോട്ടുമൊക്കെ ആയാലും കുഴപ്പമൊന്നുമില്ല).
ജീരകം - കാൽ ടീസ്പൂൺ. (നിങ്ങൾക്ക് ജീരകത്തിന്റെ സ്വാദ് ഇഷ്ടമല്ലെങ്കിൽ വേണ്ടെന്നും വയ്ക്കാം).
മുളകുപൊടി - കാൽ ടീസ്പൂൺ.
മഞ്ഞൾപ്പൊടി - കുറച്ച്.
ഉപ്പ്.
വറവിടാൻ, വെളിച്ചെണ്ണ, കറിവേപ്പില, ചുവന്നമുളക്, കടുക്.

കുമ്പളങ്ങയും മുരിങ്ങാക്കോലും കഷണങ്ങളാക്കുക. പുളി അല്പം വെള്ളത്തിൽ ഇട്ടുവയ്ക്കുക. തേങ്ങയും ജീരകവും അരയ്ക്കുക. മുളകുപൊടി ഇഷ്ടമല്ലെങ്കിൽ രണ്ട് ചുവന്ന മുളക്, തേങ്ങയോടൊപ്പം അരയ്ക്കുക. മുരിങ്ങാക്കായയും, കുമ്പളങ്ങയും മഞ്ഞൾപ്പൊടി, മുളകുപൊടി, ഉപ്പ് എന്നിവയിട്ട് വേവിയ്ക്കുക. വെന്താൽ പുളി വെള്ളം ഒഴിച്ച് തിളപ്പിക്കുക. വേവണം. വെന്താൽ തേങ്ങ ചേർക്കുക. വെള്ളവും ആവശ്യത്തിനു ചേർക്കുക. തിളപ്പിക്കുക. തിളച്ചാൽ വാങ്ങിവെച്ച് വറവിടുക.

മത്തങ്ങ ചെറുപയർ കൂട്ടാൻ

2011-03-23T18:21:00.005+05:30

മത്തങ്ങ/മത്തൻ കൊണ്ടൊരു കൂട്ടാനാണിത്. ചെറുപയറും അതിന്റെ കൂടെക്കൂടി. സാദാ കൂട്ടാനാണിത്. സ്വാദുള്ളതും.

വേണ്ടത്:-

മത്തങ്ങ - ഇരുനൂറ് ഗ്രാം. (ചിത്രത്തിൽ ഉള്ളത്രേം.)
ചെറുപയർ - അമ്പത് ഗ്രാം.
തേങ്ങ - മൂന്ന് ടേബിൾസ്പൂൺ. കുറച്ച് അങ്ങോട്ടുമിങ്ങോട്ടുമൊക്കെ ആവാം.
മഞ്ഞൾപ്പൊടി - കാൽ ടീസ്പൂണിലും അല്പം കുറവ്.
മുളകുപൊടി - കാൽ ടീസ്പൂൺ.
ഉപ്പ്.
വെളിച്ചെണ്ണ.
കറിവേപ്പില - ഒരു തണ്ട്.

മത്തങ്ങ വേഗം വേവും. ചെറുപയർ കുറച്ചു താമസിക്കും. ചെറുപയർ കുറച്ചുനേരം വെള്ളത്തിൽ കുതിർത്തിട്ട ശേഷം കഴുകിയെടുക്കുക. മത്തങ്ങ തോലു കളഞ്ഞ് കഷണങ്ങളാക്കി കഴുകിയെടുക്കുക. തേങ്ങ അരയ്ക്കുക. അരയ്ക്കുമ്പോൾ കുറേ വെള്ളം ഒഴിക്കേണ്ട. പേസ്റ്റുപോലെ മതി.

ചെറുപയർ കുക്കറിൽ വേവിക്കുക. അല്ലെങ്കിൽ ആദ്യം വേറെ വേവിക്കുക. മത്തങ്ങ ഒരു പാത്രത്തിലിട്ട് കുറച്ച് വെള്ളം ഒഴിച്ച്, ഉപ്പും, മഞ്ഞൾപ്പൊടി, മുളകുപൊടി എന്നിവയും ഇട്ട് വേവിക്കുക.

വെന്താൽ, ആദ്യം വേവിച്ച ചെറുപയർ അതിലിടുക. കുറച്ചുനേരം തീ കുറച്ചു വയ്ക്കുക. അഞ്ചുമിനുട്ട്. അതുകഴിഞ്ഞാൽ തേങ്ങയരച്ചത് ചേർക്കുക. തിളപ്പിക്കുക. കറിവേപ്പില തണ്ടോടെ ഇടുക. വാങ്ങിവയ്ക്കുക. മുകളിൽ അല്പം വെളിച്ചെണ്ണ ഒഴിക്കുക. നിങ്ങൾക്ക് നിർബ്ബന്ധമാണെങ്കിൽ വറവിടുക.

എല്ലാത്തിലും കൂടെ വെള്ളം അധികമാവാതിരിക്കാൻ ശ്രദ്ധിക്കണം. ചെറുപയറിനുള്ള ഉപ്പും കൂടെ മത്തങ്ങ വേവിക്കുമ്പോൾ ഇടണം.

ഇനി പഴഞ്ചൊല്ല്. ‘മത്ത കുത്തിയാൽ കുമ്പളം മുളയ്ക്കുമോ’ എന്നതല്ല. ‘മത്തങ്ങ പോകുന്നതറിയില്ല; കടുകു പോകുന്നത് കണ്ടിരിയ്ക്കും’ എന്നത്. എന്നുവെച്ചാൽ, നിസ്സാരനഷ്ടം ശ്രദ്ധിയ്ക്കും; വലിയ നഷ്ടം കാണാതെ പോകും എന്ന്.

ഇനി ചോറെടുക്കൂ; കറിയൊഴിക്കൂ.

കുമ്പളങ്ങ തക്കാളി പുളിങ്കറി

2011-03-22T09:29:00.006+05:30

കുമ്പളങ്ങയും തക്കാളിയും കൊണ്ട് ഒരു സാദാ കൂട്ടാനാണിത്. കുമ്പളങ്ങതക്കാളി പുളിങ്കറി എന്നും ഇതിനെ വിളിക്കാം. എളുപ്പം കഴിയും പരിപാടി. അതുകൊണ്ട് ഇടയ്ക്ക് ഇതൊക്കെയൊന്ന് പരീക്ഷിക്കാം. കുമ്പളങ്ങ ഇത്തവണ ആരും തന്നില്ല. വാങ്ങേണ്ടിവന്നു. പാവം ഞാൻ!

വേണ്ടത് :‌-

കുമ്പളങ്ങ - ഒരു കഷണം. നൂറ് നൂറ്റമ്പത് ഗ്രാം.
തക്കാളി - രണ്ട്. അധികം വലുത് വേണ്ട. ചിത്രത്തിൽ കാണുന്നില്ലേ?
പച്ചമുളക് - രണ്ടോ മൂന്നോ.
തേങ്ങ - നാല് ടേബിൾസ്പൂൺ. കുറച്ച് കൂടിയാലും കുറഞ്ഞാലും കുഴപ്പമൊന്നുമില്ല.
ജീരകം - കാൽ ടീസ്പൂൺ.
മഞ്ഞൾപ്പൊടി - കാൽ ടീസ്പൂൺ.
ഉപ്പ്.
മുളകുപൊടി - കാൽ ടീസ്പൂൺ. അല്ലെങ്കിൽ നിങ്ങളുടെ പാകത്തിന്.
വറവിടാൻ, കടുക്, ചുവന്നമുളക്/വറ്റൽമുളക്/ഉണക്കമുളക്, കറിവേപ്പില, വെളിച്ചെണ്ണ.
പുളി - ഒരു ചെറിയ നെല്ലിക്ക വലുപ്പത്തിൽ. അല്പം വെള്ളത്തിൽ ഇട്ടുവയ്ക്കുക.

കുമ്പളങ്ങ തോലു കളഞ്ഞ്, കുരുവൊക്കെക്കളഞ്ഞ് കഷണങ്ങളാക്കുക. കഴുകുക. കഴുകിയ തക്കാളിയും മുറിച്ചെടുക്കുക. കഴുകിയ പച്ചമുളക് നീളത്തിൽ ചീന്തിയാൽ മതി. മൂന്നും കൂടെ ഒരുമിച്ചെടുത്ത്, ഉപ്പും, മുളകുപൊടി, മഞ്ഞൾപ്പൊടി എന്നിവയും ഇട്ട് അല്പം വെള്ളവും ഒഴിച്ച് വേവാൻ വയ്ക്കുക. രണ്ടും വേഗം വേവും. തേങ്ങയും ജീരകവും അരയ്ക്കുക. പുളി പിഴിഞ്ഞ് വെള്ളം എടുക്കുക. കഷണങ്ങൾ വെന്താൽ അതിൽ പുളിവെള്ളം ചേർക്കുക. തിളപ്പിക്കുക. അല്പനേരം വയ്ക്കണം. പുളി വെന്താൽ, തേങ്ങയരച്ചതും ചേർത്ത് യോജിപ്പിച്ച് തിളപ്പിക്കുക. വെള്ളം ഇനിയും ആവശ്യമുണ്ടെങ്കിൽ മാത്രം ചേർക്കുക. നന്നായി തിളച്ചുയോജിച്ചാൽ വാങ്ങിവച്ച് വറവിടുക.

വറവിടുക എന്നുപറഞ്ഞാൽ അല്പം വെളിച്ചെണ്ണ ചൂടാക്കി അതിൽ ചുവന്ന മുളക് ഒന്നോ രണ്ടോ പൊട്ടിച്ചതും കുറച്ച് കടുകും ഇട്ട് പൊട്ടിക്കഴിഞ്ഞാൽ കറിവേപ്പില ഇലകളും ഇട്ട് അത് കൂട്ടാനിലേക്ക് ഒഴിക്കുക. വറവ് ഇട്ടയുടനെ കൂട്ടാൻ ഇളക്കരുത്. അടച്ചുവയ്ക്കുക. കഷണങ്ങൾ വേവിക്കുമ്പോൾ മുളകുപൊടിയിടുന്നതിനു പകരം, ചുവന്നമുളക് പാകത്തിന്, തേങ്ങയുടെ കൂടെ അരച്ചാലും മതി.

ഗുജറാത്തി കൂട്ടാൻ

2011-03-03T19:19:00.003+05:30

ഇതു ഗുജറാത്തികളുടെ ഒരു കൂട്ടാനാണ്. കഡി എന്നാണ് ഇതിന്റെ പേര്. അവരുടെ ഭക്ഷണത്തിൽ ഇത് ഒഴിച്ചുകൂടാത്ത ഒന്നാണ്. എന്റെ അനിയത്തിക്കുട്ടിയുടെ കൂട്ടുകാരിയുണ്ടാക്കുന്നത് നോക്കിയിരുന്നു ഒരിക്കൽ. ചിലയിടത്തുനിന്നൊക്കെ കഴിച്ചിട്ടുമുണ്ട്. നമ്മുടെ മോരു കാച്ചിയതുപോലെ ഒരു കൂട്ടാനായതുകൊണ്ട് ഇതുണ്ടാക്കിയേക്കാമെന്നുവെച്ചു. എളുപ്പത്തിൽ തയ്യാറാക്കാം.

വേണ്ടത് :-

തൈര് - കാൽ ലിറ്റർ.
പഞ്ചസാര - ഒരു ടീസ്പൂൺ.
വെളുത്തുള്ളി - നാലഞ്ച് അല്ലി.
പച്ചമുളക് - ഒന്ന്.
ഇഞ്ചി - ഒരു കഷണം.
കടലമാവ്/ കടലപ്പൊടി - രണ്ട് ടീസ്പൂൺ.
ജീരകം - കാൽ ടീസ്പൂൺ.
ഗ്രാമ്പൂ - മൂന്നാലെണ്ണം.
കുരുമുളക് - എട്ട്.
മല്ലിയില, കറിവേപ്പില, ഒരു നുള്ള് മഞ്ഞൾപ്പൊടി - മൂന്നും നിർബ്ബന്ധമില്ല. ഇലകൾ ഇട്ടില്ലെങ്കിൽ കുടിക്കാൻ എളുപ്പമാകും.
ഉപ്പ്.
കുറച്ച് നെയ്യ്.

പച്ചമുളകും ഇഞ്ചിയും വെളുത്തുള്ളിയും പേസ്റ്റാക്കിയെടുക്കണം. തൈരിൽ കടലമാവും ഉപ്പും പഞ്ചസാരയും ഇട്ട് കലക്കണം. കുറച്ച് വെള്ളവും ചേർക്കാം. അത് അടുപ്പത്തുവെച്ച്, അതിൽ പേസ്റ്റാക്കിവെച്ചിരിക്കുന്നത് ഇട്ട് ഇളക്കുക. കറി ഇളക്കിക്കൊണ്ടിരിക്കണം. ചെറുതീയിലേ വയ്ക്കാവൂ. മഞ്ഞൾ ഒരു നുള്ള് വേണമെങ്കിൽ ഇടാം. മല്ലിയില ചെറുതായി അരിഞ്ഞതും കറിവേപ്പിലയും ഇടാം. പച്ചമുളക് രണ്ടെണ്ണം അരച്ചാലും കുഴപ്പമില്ല.

ഒക്കെയിട്ട് നന്നായി തിളച്ച് എല്ലാം നന്നായി വെന്താൽ വാങ്ങിവെച്ച്, ജീരകം, ഗ്രാമ്പൂ, കുരുമുളക് എന്നിവ നെയ്യിൽ വറവിടുക. അച്ചുവിന്റെ അമ്മയിലെ വനജ കറി റെഡി, ഗോ എന്നു പറഞ്ഞില്ലേ?

ഓട്സ് അപ്പം

2011-02-23T11:09:00.005+05:30

ഇത് ഓട്സ് കൊണ്ടുണ്ടാക്കുന്ന അപ്പമാണ്. ഓട്സ് കൊണ്ടു പല വിഭവങ്ങളും ഉണ്ടാക്കാം. അതുകൊണ്ട് ഓട്സ് കഞ്ഞി മാത്രം കുടിക്കാതെ വേറെയും വിഭവങ്ങളുണ്ടാക്കാൻ തീരുമാനിച്ചു. പുട്ടുണ്ടാക്കി, ഇപ്പോ അപ്പവും ഉണ്ടാക്കി. എളുപ്പം കഴിയും ഉണ്ടാക്കാൻ.

ഓട്സ് - നൂറ് ഗ്രാം.
അരിപ്പൊടി - നൂറ് ഗ്രാം.
തൈര് - കാൽ ഗ്ലാസ്സ്. (പുളിയുള്ളതാണ് നല്ലത്).
വലിയ ഉള്ളി - ഒന്ന് ചെറുതായി അരിഞ്ഞത്.
പച്ചമുളക് - രണ്ടെണ്ണം. വട്ടത്തിൽ ചെറുതായി മുറിച്ചത്.
ഇഞ്ചി - ഒരു ചെറിയ കഷണം. ചെറുതാക്കി മുറിയ്ക്കുക.
കറിവേപ്പിലയും മല്ലിയിലയും കുറച്ച് ചെറുതായി അരിയുക.
കുരുമുളക് - കാൽ ടീസ്പൂൺ.
തക്കാളി - ഒന്ന് ചെറുതാക്കി മുറിച്ചെടുക്കുക.
ഉപ്പ്.
വെളിച്ചെണ്ണ.

വെളിച്ചെണ്ണ മാറ്റിവെച്ച് ബാക്കി എല്ലാം കൂടെ യോജിപ്പിക്കുക. എന്നിട്ട് ആവശ്യത്തിനുള്ള വെള്ളവും കൂട്ടിച്ചേർത്ത്, അധികം അയവില്ലാതെ കലക്കിയെടുക്കുക. രണ്ട് മണിക്കൂർ വയ്ക്കുക. വെച്ചില്ലെങ്കിലും കുഴപ്പമില്ല. ദോശക്കല്ല് ചൂടാക്കി അതിൽ കുറച്ച് ഒഴിച്ച് പരത്തുക. വെളിച്ചെണ്ണ മുകളിൽ പുരട്ടുക. അടച്ചുവയ്ക്കുക. വെന്താൽ മറിച്ചിടുക. പിന്നേം വെന്താൽ എടുക്കുക.

ചൂടോടെ കഴിയ്ക്കുക.

ചമ്മന്തിയോ കറിയോ ഒക്കെ കൂടെക്കൂട്ടാൻ ഉണ്ടാക്കാം. ഇഞ്ചിച്ചമ്മന്തിയാണ് ഇവിടെ ഉണ്ടാക്കിയത്.
മാവ് കുറച്ചുനേരം വെച്ചാലേ പുളിയ്ക്കൂ. അല്ലെങ്കിൽ നല്ല പുളിയുള്ള തൈർ കൂട്ടണം. പുളി വേണ്ടാത്തവർ അതനുസരിച്ച് തക്കാളിയും തൈരും ചേർക്കുക.

പനീർ മഞ്ചൂരിയൻ

2011-02-17T11:24:00.005+05:30

മഞ്ചൂരിയൻ കഴിച്ചിട്ടുണ്ടോ? മഞ്ചൂരിയൻ, കറി ആയിട്ടുള്ളതും അല്ലാതെ, ഡ്രൈ ആയിട്ടുള്ളതും കിട്ടും. ഇവിടെ പനീർ കൊണ്ട് ഡ്രൈ ആയിട്ടുള്ളതാണ് ഉണ്ടാക്കിയിരിക്കുന്നത്. അത്ര വിഷമമൊന്നുമില്ല ഉണ്ടാക്കാൻ.

ആവശ്യമുള്ളത് :‌-

പനീർ - 200 ഗ്രാം.

വലിയ ഉള്ളി/സവാള - രണ്ടെണ്ണം.

പച്ചമുളക് - രണ്ടെണ്ണം.
ഇഞ്ചി - ഒരു ചെറിയ കഷണം.
വെളുത്തുള്ളി - ചെറുത്. പതിനഞ്ച് അല്ലി.

മല്ലിപ്പൊടി - കാൽ ടീസ്പൂൺ.
മുളകുപൊടി - അല്പം. നിർബ്ബന്ധമില്ല.
മൈദപ്പൊടിയും കോൺഫ്ലോറും - കാൽ കപ്പ് വീതം.
പാചകയെണ്ണ - കുറച്ച്.
ഉപ്പ് - കുറച്ച്.
മല്ലിയില - കുറച്ച്.

സോയ സോസ്, ചില്ലി സോസ്, തക്കാളി സോസ് എന്നിവ നാലു ടേബിൾസ്പൂൺ വീതം.

ഉള്ളി, പച്ചമുളക്, ഇഞ്ചി, വെളുത്തുള്ളി എന്നിവ ചെറുതാക്കി മുറിച്ചുവയ്ക്കുക.

മൈദയും കോൺഫ്ലോറും വെള്ളത്തിൽ അയവിൽ കലക്കിവയ്ക്കുക. ഒരു തുള്ളി സോയസോസും ഒഴിക്കുക. അല്പം ഉപ്പും. പനീർ കഷണങ്ങൾ മുഴുവൻ മുക്കിവറുക്കാൻ മാവ് തികഞ്ഞില്ലെങ്കിൽ അല്പം കൂടി കലക്കിയെടുക്കുന്നതാവും, ആദ്യം തന്നെ കുറേ ഉണ്ടാക്കിവെക്കുന്നതിനേക്കാൾ നല്ലത്.

പനീർ ചെറിയ ചെറിയ കഷണങ്ങളാക്കുക. പനീർ കഷണങ്ങളാണ് വാങ്ങിയത്. അതിനു ഇത്രേം വലുപ്പം ഉള്ളതുകൊണ്ട് ഒന്നുകൂടെ ചെറുതാക്കിയിരുന്നു.

അത് മൈദ കോൺഫ്ലോർ മാവിൽ മുക്കിയെടുത്ത്, ചൂടാക്കിയ എണ്ണയിൽ വറുക്കുക.

അല്പം പാചകയെണ്ണയൊഴിച്ച്, ഉള്ളി, പച്ചമുളക്, ഇഞ്ചി, വെളുത്തുള്ളി എന്നിവയൊക്കെ നന്നായി വഴറ്റുക. അതിൽ മല്ലിപ്പൊടി, മുളകുപൊടി എന്നിവയിടുക. അത്യാവശ്യം ഉപ്പ് ഇടുക. അതിൽ സോസുകൾ മൂന്നും ചേർക്കുക. വറുത്തുവെച്ചിരിക്കുന്ന പനീർ അതിലേക്ക് ഇട്ട് യോജിപ്പിക്കുക.

നന്നായി ഇളകിയോജിച്ചാൽ വാങ്ങിവെച്ച് മല്ലിയിലയിടുക. തക്കാളി സോസും ചേർത്ത് ചൂടോടെ കഴിക്കുക. എരിവ് അധികം വേണ്ടെങ്കിൽ ചില്ലിസോസും മുളകുപൊടിയും കുറയ്ക്കുക.

പനീർ വറുത്താൽ മിക്കവാറും കട്ടിയിൽ നിൽക്കും. അതുകൊണ്ട് മൃദു ആവണമെങ്കിൽ മാവിൽ മുക്കി വറുത്തശേഷം അല്പം വെള്ളത്തിൽ ഇട്ടുവെച്ച് പിഴിഞ്ഞെടുക്കുക. പക്ഷേ, കറുമുറു ആവില്ല പിന്നെ. പനീർ ഫ്രീസറിലാണു വെച്ചിരിക്കുന്നതെങ്കിൽ പാചകത്തിനു കുറച്ചുമുൻപേ എടുത്ത് പുറത്തുവയ്ക്കുകയും വേണം.

വെളിച്ചെണ്ണയേക്കാളും നല്ലത് വേറെ ഏതെങ്കിലും പാചകയെണ്ണയാണ്. കാബേജും ഉള്ളിത്തണ്ടും ഒക്കെയുണ്ടെങ്കിൽ അവസാനം മുറിച്ചിടാവുന്നതാണ്.

കുമ്പളങ്ങയും മാങ്ങയും മോരും

2011-02-04T14:44:00.006+05:30

കുമ്പളങ്ങ ഇഷ്ടമാണോ? ഇഷ്ടമാണെങ്കിൽ ചിത്രത്തിൽ കാണുന്നതുപോലെയുള്ള കുമ്പളങ്ങ വാങ്ങിക്കൊണ്ടുവരിക.

മാങ്ങയും വാങ്ങിക്കൊണ്ടുവരുക. വീട്ടിൽത്തന്നെയുണ്ടെങ്കിൽ നിങ്ങൾ ഭാഗ്യവതീഭാഗ്യവാന്മാർ. കുമ്പളങ്ങ, ഞങ്ങളുടെ ഒരു സുഹൃത്ത് തന്നതാണ്. അവരുടെ വീട്ടിലുണ്ടാക്കിയത്. അതു ലാഭം. മാങ്ങ അച്ഛൻ വാങ്ങിക്കൊണ്ടുത്തന്നു. അതും ലാഭം. തേങ്ങയുടെ കാര്യംപറയേണ്ടല്ലോ. അതു പറമ്പിലേതുതന്നെ. മോരും വീട്ടിലേതു തന്നെ. ഹോ...ഒന്നും പറയേണ്ട. ബാക്കിയൊക്കെ വാങ്ങേണ്ടിവന്നു. ഉപ്പു മുതൽ ജീരകം വരെ. മുളകുമുതൽ കടുകുവരെ.

കുമ്പളങ്ങ മാങ്ങ മോരു കൂട്ടാൻ ഉണ്ടാക്കാൻ ആവശ്യമായ വസ്തുക്കൾ:-

കുമ്പളങ്ങ - ഒരു കഷണം.
മാങ്ങ - ഒന്ന്.
ജീരകം - ഒരു ടീസ്പൂൺ.
ചുവന്ന മുളക് - മൂന്നോ നാലോ.
മഞ്ഞൾപ്പൊടി - കാൽ ടീസ്പൂൺ.
മോര് - കാൽ ലിറ്റർ. (പുളിയുണ്ടെങ്കിൽ കാൽ ലിറ്റർ വേണമെന്നില്ല). അല്ലെങ്കിൽ കുറച്ച് തൈര്.
ഉപ്പ്.
തേങ്ങ - നാലു ടേബിൾസ്പൂൺ. കുറച്ചും കൂടെ ആയാലും കുഴപ്പമൊന്നുമില്ല.
പിന്നെ വറവിടാൻ, കടുക്, കറിവേപ്പില, മുളക്.

കഷണം കുമ്പളങ്ങയെടുത്ത് തോലും കുരുവും കളഞ്ഞ് ചെറുതാക്കി മുറിയ്ക്കുക. മാങ്ങയും തോലു കളഞ്ഞ് മുറിച്ചെടുക്കുക.

രണ്ടും കൂടെ മഞ്ഞൾപ്പൊടിയും ഉപ്പും ഇട്ട് വേവിക്കുക.

തേങ്ങയും ജീരകവും ചുവന്ന മുളകും കൂടെ നന്നായിട്ട് അരയ്ക്കുക. കഷണങ്ങൾ വെന്താൽ മോരൊഴിക്കുക. ഇളക്കി യോജിപ്പിച്ച് തിളപ്പിക്കുക. തിളച്ചാൽ തേങ്ങ ചേർക്കുക. തിളപ്പിക്കുക. ഉപ്പു പോരെങ്കിൽ പാകത്തിനിടുക. ഒരു തണ്ട് കറിവേപ്പിലയിടുക.

തിളച്ചു വാങ്ങിവെച്ച് വറവിടുക.

ചുവന്ന മുളക് അരയ്ക്കുന്നതിനുപകരം മുളകുപൊടി ഇടാം.

ചക്കയുപ്പേരി

2011-01-07T20:32:00.004+05:30

ചക്കയുപ്പേരിയുണ്ടാക്കാൻ എളുപ്പമാണ്. ഇടിച്ചക്കയുപ്പേരിയുണ്ടാക്കാൻ എടുക്കുന്ന ചക്കയേക്കാൾ അല്പം കൂടെ മൂത്ത ചക്ക വേണം.

ഇടിച്ചക്കയുപ്പേരിയുണ്ടാക്കുമ്പോൾ, അതിൽ കുരു മൂത്തിട്ടുണ്ടാവില്ല. ഇതിൽ അല്പം കുരു ഉണ്ടാവും.

ചക്ക - നടുവേ മുറിച്ച്, നാലാക്കി മുറിച്ച്, തോലുകളഞ്ഞ്, ഉള്ളിലുള്ള കൂഞ്ഞ് കളഞ്ഞ്, ചെറുതാക്കി അരിഞ്ഞെടുക്കുക. എത്രയും ചെറുതാവുന്നോ അത്രയും നല്ലത്.
ഉഴുന്നുപരിപ്പ് - കുറച്ച്.
കടുക് - കുറച്ച്.
കറിവേപ്പില.
ഉപ്പ്.
മഞ്ഞൾപ്പൊടി.
തേങ്ങ.
വെളിച്ചെണ്ണ.
ഇത്രയും വസ്തുക്കളേ ആവശ്യമുള്ളൂ. പിന്നെ കുറച്ചു വെള്ളവും.

മുറിച്ചെടുത്ത ചക്കയ്ക്ക് ആവശ്യമായ വറവിടുക. വെളിച്ചെണ്ണ ചൂടാവുമ്പോൾ ആദ്യം ഉഴുന്ന് ഇടുക, ചുവന്നു വരുമ്പോൾ കടുകും, ചുവന്ന മുളകും, ഇടുക. കടുക് പൊട്ടിക്കഴിഞ്ഞാൽ കറിവേപ്പിലയും ഇടുക. അതിലേക്ക് മുറിച്ചുവെച്ചിരിക്കുന്ന ചക്കയിടണം. ഇളക്കി, ഉപ്പും മഞ്ഞളും ഇട്ട് വീണ്ടും ഇളക്കി അല്പം വെള്ളം ഒഴിച്ച്, അടച്ചുവെച്ച് വേവിക്കുക.

വെള്ളം, ചക്ക വേവാനുള്ളത് മാത്രമേ ഒഴിക്കാവൂ. വെന്ത്, വാങ്ങിയാൽ തേങ്ങയിട്ടിളക്കുക.

ചക്ക കുക്കറിൽ വെച്ചും വേവിക്കാം. ചക്കയിൽ വെള്ളമൊഴിക്കേണ്ട. ഉപ്പും മഞ്ഞളുമിട്ട് വേവിക്കണം. അതു കഴിഞ്ഞ് വറവിലേക്ക് ഇട്ടാൽ മതി.

ഈ ബ്ലോഗ് നോക്കുകയും, പാചകക്കുറിപ്പുകൾ പരീക്ഷിക്കുകയും ചെയ്യുന്ന എല്ലാവർക്കും നന്ദി.

പുതുവത്സരാശംസകൾ!

കോളി മസാല

2010-12-18T12:05:00.007+05:30

കോളിഫ്ലവർ കൊണ്ടൊരു സാദാ മസാലക്കറിയാണിത്. ആർക്കും പരീക്ഷിക്കാം. വളരെക്കുറച്ച് വസ്തുക്കൾ, മിക്കവാറും എല്ലാവരുടേം വീട്ടിലുണ്ടാവുന്നതുതന്നെ, മാത്രമേ ഈ കറിയുണ്ടാക്കാൻ വേണ്ടൂ.

ആവശ്യമുള്ളത് :-

കോളിഫ്ലവർ - ചിത്രത്തിലുള്ളതുപോലെ ഒന്ന്.
വലിയ ഉള്ളി/ സവാള - രണ്ടെണ്ണം.
തക്കാളി - രണ്ടെണ്ണം - ചെറുത്.
വെളുത്തുള്ളി- ഇഞ്ചി അരച്ചത് - അര ടീസ്പൂൺ. റെഡിമെയ്ഡ് പേസ്റ്റ് ആയാലും മതി.
പച്ചമുളക് - രണ്ടെണ്ണം.
ജീരകം - കാൽ ടീസ്പൂൺ.
മഞ്ഞൾപ്പൊടി - അരടീസ്പൂൺ.
മുളകുപൊടി - കാൽ ടീസ്പൂൺ.
വെജിറ്റബിൾ മസാല - ഒരു ടീസ്പൂൺ.
മല്ലിയില - കുറച്ച്.
പാചകയെണ്ണ.
ഉപ്പ്.

കോളിഫ്ലവർ ഇതളുകൾ വേർതിരിച്ചെടുക്കുക. കുറച്ച് ചൂടുവെള്ളത്തിൽ അല്പം ഉപ്പിട്ട്, അതിൽ കോളിഫ്ലവർ ഇതളുകൾ മുക്കിയിടുക. “പുയു” ഉണ്ടെങ്കിൽ അതിനെ നശിപ്പിക്കാനാണിത്.

ഉള്ളി, തക്കാളി, പച്ചമുളക് എന്നിവ ചെറുതാക്കി മുറിച്ചുവയ്ക്കുക. ഒരു പാത്രത്തിൽ പാചകയെണ്ണ ചൂടാക്കി, അതിൽ ജീരകം ഇടുക. അതു മൊരിഞ്ഞാൽ, ഉള്ളിയും, പച്ചമുളകും ഇട്ട് നന്നായി വഴറ്റി വേവിക്കുക. ഇഞ്ചി വെളുത്തുള്ളിപ്പേസ്റ്റ് ചേർക്കുക. അതിൽ തക്കാളി ഇടുക. അതും വഴറ്റി വെന്താൽ, മുളകുപൊടി, മഞ്ഞൾപ്പൊടി, മസാലപ്പൊടി എന്നിവ ഇടുക. നന്നായി ഇളക്കി യോജിപ്പിക്കുക. തീ കുറച്ച് വെച്ചുവേണം എല്ലാം ചെയ്യാൻ. അതിലേക്ക്, നന്നായി കഴുകിയെടുത്ത കോളിഫ്ലവർ ഇതളുകൾ ഇട്ട് ഇളക്കുക. ഉപ്പിടുക. അത്യാവശ്യം വെള്ളമൊഴിച്ച് അടച്ചുവെച്ച് വേവിക്കുക. അധികം വെള്ളമൊഴിച്ചാൽ കോളിഫ്ലവർ അധികം വെന്തുപോകും. വെള്ളം ആദ്യം ചേർത്ത്, അതൊന്ന് തിളച്ചശേഷം കോളിഫ്ലവർ ഇട്ടാലും മതി.

വെന്ത് വാങ്ങിവെച്ചാൽ അതിൽ മല്ലിയില അരിഞ്ഞത് ഇടണം.

വെജിറ്റബിൾ മസാല ഇല്ലെങ്കിൽ ഗരം മസാല ഇട്ടാലും മതി. എരിവിന്റെ പാകത്തിനേ ചേർക്കാവൂ. ഇവിടെ ഉണ്ടാക്കിയതിനു അധികം എരിവില്ല. വെജിറ്റബിൾ മസാലയേക്കാൾ എരിവ് ചിലപ്പോൾ ഗരം മസാലയ്ക്ക് ഉണ്ടാവും. എരിവ് നിങ്ങളുടെ പാകത്തിനു ചേർക്കുന്നതാവും നല്ലത്. മസാലക്കറിയുണ്ടാക്കുമ്പോൾ, വെളിച്ചെണ്ണയേക്കാൾ നല്ലത് വേറെ ഏതെങ്കിലും പാചകയെണ്ണയായിരിക്കും.

ചപ്പാത്തിയുടെ അല്ലെങ്കിൽ പൂരിയുടെ കൂടെ, അല്ലെങ്കിൽ ചോറിന്റെ കൂടെ കഴിക്കുക. ചോറിന്റെ കൂടെയാവുമ്പോൾ കുറച്ച് വെള്ളം ഉണ്ടായാലും കുഴപ്പമില്ല.

മധുരക്കിഴങ്ങ് പുഴുക്ക്

2010-12-07T09:14:00.004+05:30

മധുരക്കിഴങ്ങ് ഇഷ്ടമാ‍ണോ? എന്നാൽ‌പ്പിന്നെ മധുരക്കിഴങ്ങുകൊണ്ടൊരു പുഴുക്ക് ആയിക്കോട്ടെ. സാധാരണ പുഴുക്കുകളിൽ കുറച്ചു വെള്ളമുണ്ടാകും. ഇതിൽ വെള്ളം ചേർത്തിട്ടില്ല. ചേർക്കാത്തതാണ് നല്ലത്. ദോശയ്ക്കൊപ്പം കഴിക്കാൻ നല്ലൊരു വിഭവമാണിത്.

ഇതിനു വേണ്ടത്, മധുരക്കിഴങ്ങ്, തേങ്ങ ചിരവിയത്, ഉപ്പ്, മഞ്ഞൾപ്പൊടി, പച്ചമുളക്, ഉഴുന്നുപരിപ്പ്, കറിവേപ്പില, കടുക്, ചുവന്ന മുളക്, വെളിച്ചെണ്ണ, ചെറിയ ഉള്ളി എന്നിവയാണ്.

അഞ്ചോ ആറോ മധുരക്കിഴങ്ങ് കഴുകി വേവിക്കുക. വെന്ത് അലിഞ്ഞുപോകരുത്. തണുത്താൽ തോലുകളയുക. കഷണങ്ങളാക്കുക.

നാലു ടേബിൾസ്പൂൺ തേങ്ങ മൂന്നു പച്ചമുളകും ചേർത്ത് ഒന്ന് ചതച്ചെടുക്കുക. വെള്ളം ചേർക്കരുത്.

കുറച്ച് ചെറിയ ഉള്ളി, തോലുകളഞ്ഞ് ചെറുതായി അരിയുക.

പാത്രത്തിൽ വെളിച്ചെണ്ണ ചൂടാക്കാൻ വയ്ക്കുക. ഉഴുന്നുപരിപ്പ് ഇടുക. ചുവക്കുമ്പോഴേക്കും കടുകും, രണ്ട് ചുവന്ന മുളക് പൊട്ടിച്ചതും ഇടുക. കടുക് പൊട്ടിത്തെറിച്ചാൽ, കറിവേപ്പില ഇടുക. കുഞ്ഞുള്ളി അരിഞ്ഞത് ഇടണം. അതു ചുവന്നാൽ, കാൽ ടീസ്പൂൺ മഞ്ഞൾപ്പൊടിഇടുക. അതിലേക്ക് വേവിച്ച മധുരക്കിഴങ്ങും, ആവശ്യത്തിനുപ്പും ഇടുക. ഇളക്കിയോജിപ്പിച്ച്, അതിലേക്ക് ചതച്ച തേങ്ങ ചേർക്കുക. നന്നായി യോജിപ്പിക്കുക. അഞ്ചുമിനുട്ട് അടച്ചുവെച്ച് വാങ്ങിവയ്ക്കുക.

എരിവ് വേണ്ടെങ്കിൽ പച്ചമുളക് ചേർക്കണ്ട. തേങ്ങ ചതയ്ക്കുമ്പോൾ കുറച്ച് ജീരകം ചേർക്കാം. ഇഷ്ടമാണെങ്കിൽ.

ദോശയ്ക്കൊപ്പം കഴിക്കാം.

കപ്പപ്പുട്ട്

2010-12-01T19:12:00.006+05:30

കപ്പയെന്നു കേൾക്കുമ്പോൾത്തന്നെ സന്തോഷം തോന്നുന്നവരുണ്ട്. കപ്പ കൊണ്ടുണ്ടാക്കാവുന്ന വിഭവങ്ങളേറെ. വെറുതെ വേവിച്ച് തിന്നാനും കഴിയും. കപ്പ, പൂള, കിഴങ്ങ്, ഇങ്ങനെ കുറേ പേരുകളുമുണ്ട് കപ്പയ്ക്ക്. കപ്പ കൊണ്ട് പുട്ടുണ്ടാക്കിയാലോ? കപ്പപ്പൊടി, കടയിൽ കിട്ടും. പണ്ടൊക്കെ കപ്പ ഉണക്കിപ്പൊടിച്ചൊക്കെയാണ് പുട്ടുണ്ടാക്കിയിരുന്നതത്രേ. ഇപ്പോ, പൊടി വാങ്ങുന്നവർക്ക് എളുപ്പം കഴിയും.

ഈ പുട്ടുണ്ടാക്കാൻ, കപ്പപ്പൊടി, അരിപ്പൊടി, ഉപ്പ്, വെള്ളം, ചിരവിയ തേങ്ങ, പുട്ടുകുറ്റി എന്നിവ മതി.

കപ്പപ്പൊടിയും പുട്ടിനുണ്ടാക്കിയ, വെള്ളത്തിലിട്ട്, ഉണക്കി, പൊടിച്ച് വറുത്ത അരിപ്പൊടിയും സമാസമം എടുക്കുക.
അതിനാവശ്യമായ ഉപ്പ്, കുറച്ചു വെള്ളത്തിൽ അലിയിച്ച്, ആ വെള്ളം കൂട്ടി പൊടികൾ ഒരുമിച്ച് കുഴയ്ക്കുക. കട്ടയൊന്നും ഇല്ലാതെ കുഴയ്ക്കുക. കുഴച്ചശേഷം ഒന്ന് മിക്സിപ്പാത്രത്തിലിട്ട് മിക്സിയിൽ ഒന്നു തിരിച്ചാൽ കട്ടയൊക്കെ ഉണ്ടെങ്കിൽ പോകും.

കുറച്ച് തേങ്ങയും അതിലിട്ട് കുഴയ്ക്കുക. തേങ്ങ ആദ്യം ഇട്ടതുകൊണ്ട് ഞാൻ മിക്സിയിൽ തിരിച്ചില്ല.

പുട്ടുകുറ്റിയെടുത്ത്, അതിൽ ചില്ലിട്ട്, തേങ്ങയിട്ട്, പൊടിയിട്ട്, പിന്നേം തേങ്ങയിട്ട്, അടച്ച് ആവിയിൽ വേവിക്കുക.

വെന്ത് വാങ്ങിയിട്ട് അല്പം വെച്ചിട്ട്, പുട്ട് പാത്രത്തിലേക്കിടുക. എന്നാൽ കഷണങ്ങളായിപ്പോവില്ല.

കപ്പപ്പുട്ട് എളുപ്പത്തിൽ തയ്യാറായില്ലേ?

പുട്ടിനു കടലക്കറി എന്നാണു പറയുകയെങ്കിലും, വേറെ കറിയുണ്ടാക്കിയും കഴിക്കാം. പഴവും പഞ്ചസാരയും കൂട്ടിയും കഴിക്കാം.

കാപ്സിക്കം പരിപ്പുകറി

2010-11-25T21:38:00.004+05:30

പരിപ്പുകറി ഉണ്ടാക്കാറില്ലേ? അതുപോലെയുള്ള, എളുപ്പത്തിലുണ്ടാക്കാവുന്ന ഒരു കറിയാണ് കാപ്സിക്കം പരിപ്പുകറി. കാപ്സിക്കം ഉണ്ടെങ്കിൽ, അതിന്റെ കൂടെ അല്പം ചില വസ്തുക്കളും കൂട്ടിച്ചേർത്ത് ഈ കറിയുണ്ടാക്കാം.

ആവശ്യമുള്ള വസ്തുക്കൾ:-

തുവരപ്പരിപ്പ് - നൂറ് ഗ്രാം.

കാപ്സിക്കം - ചിത്രത്തിലെപ്പോലെ രണ്ടെണ്ണം.
തക്കാളി - രണ്ട് ചെറുത് അല്ലെങ്കിൽ ഒന്ന് വലുത്, നല്ല പോലെ പഴുത്തത്.
വലിയ ഉള്ളി/ സവാള - രണ്ടെണ്ണം.
വെളുത്തുള്ളി - ചെറുത് നാലഞ്ച് അല്ലി.
പച്ചമുളക് - രണ്ടെണ്ണം.
മഞ്ഞൾപ്പൊടി - അര ടീസ്പൂൺ.
മുളകുപൊടി - കാൽ ടീസ്പൂൺ.
ഗരം മസാലപ്പൊടി - അര ടീസ്പൂൺ.
ഉപ്പ്, പാചകയെണ്ണ.
കടുക്, ജീരകം - കുറച്ച്.
കറിവേപ്പില, മല്ലിയില.

തുവരപ്പരിപ്പ് കഴുകിയെടുക്കുക. കാപ്സിക്കം, തക്കാളി, ഉള്ളി, പച്ചമുളക് എന്നിവ ചെറിയ കഷണങ്ങളാക്കുക. വെളുത്തുള്ളി ഒന്ന് ചതച്ചെടുക്കുക. പരിപ്പിൽ, കാപ്സിക്കവും തക്കാളിയും പച്ചമുളകും മുളകുപൊടിയും മഞ്ഞൾപ്പൊടിയും ഇട്ട് വേവിക്കുക. കുക്കറിൽ വയ്ക്കുകയാണെങ്കിൽ, പാത്രത്തിൽ, പരിപ്പ് അടിയിൽ ഇട്ട് അതിനുമാത്രം വെള്ളം ഒഴിച്ചാൽ മതി. ബാക്കിയൊക്കെ മുങ്ങിക്കിടക്കാൻ വെള്ളം ഒഴിച്ചാൽ അധികം വേവ് ആയിപ്പോകും. വെന്താൽ അതിൽ ഉപ്പിട്ട് ഇളക്കിവയ്ക്കുക.

ഏതെങ്കിലും ഒരു പാചകയെണ്ണ ഒരു പാത്രത്തിൽ അടുപ്പിൽ വച്ച് അതു ചൂടായാൽ കടുക് ഇടുക. കടുകുപൊട്ടിയാൽ, ജീരകം ഇട്ട് കറിവേപ്പിലയും ഇട്ട് അതിൽ, മുറിച്ചുവെച്ചിരിക്കുന്ന ഉള്ളി ഇട്ട് നന്നായി വഴറ്റി വേവിക്കുക. അതിൽ വെളുത്തുള്ളി ചതച്ചതും ഇടുക. ഉള്ളി വെന്താൽ ഗരം മസാലപ്പൊടി ഇടുക. അതും ഒന്നിളക്കി യോജിപ്പിച്ച് അതിൽ പരിപ്പും മറ്റുള്ളവയും വേവിച്ചത് ഇടുക. ഇളക്കിയോജിപ്പിക്കുക. കുറച്ചുനേരം അടച്ചുവെച്ച് വേവിക്കുക. വാങ്ങിയാൽ മല്ലിയില ഇടുക.

ചപ്പാത്തിയോടൊപ്പം കഴിക്കാനാണെങ്കിൽ പരിപ്പ് വേവിക്കുമ്പോൾ ഒഴിക്കുന്നതല്ലാതെ വേറെ വെള്ളം ഒഴിക്കേണ്ട. ചോറിനാണെങ്കിൽ, ഗരം മസാലപ്പൊടി ചേർത്തതിനുശേഷം കുറച്ച്( ആവശ്യം പോലെ) വെള്ളം ഒഴിച്ച് അതു തിളച്ചിട്ട് പരിപ്പും മറ്റുള്ളവയും ഇടാം.

എരിവുണ്ടാകും. നല്ല എരിവ് വേണ്ടെങ്കിൽ പച്ചമുളക് കുറയ്ക്കാം. പരിപ്പും ഇത്ര വേണ്ടെങ്കിൽ കുറയ്ക്കാം. വെളിച്ചെണ്ണ ഉപയോഗിക്കുന്നതിലും നല്ലത് സൺ‌ഫ്ലവർ എണ്ണ ഉപയോഗിക്കുന്നതായിരിക്കും. തക്കാളി, പരിപ്പിൽ ഇടുന്നില്ലെങ്കിൽ, ഉള്ളി വഴറ്റിക്കഴിഞ്ഞ് അതിലിട്ടാലും മതി.

ശർക്കര കേസരി

2010-11-14T12:13:00.004+05:30

കേസരി കഴിച്ചിട്ടില്ലേ? മിക്കവാറും സദ്യകൾക്ക് രാവിലത്തെ ഒരു വിഭവമാണ് കേസരി. ചായപ്പലഹാരത്തിന്റെ കൂടെ മധുരത്തിനു കേസരിയും. ഈ കേസരിസാധാരണ ഉണ്ടാക്കുന്ന ചുവപ്പ്, മഞ്ഞ കേസരിയിൽ നിന്നും അല്പം വ്യത്യാസമുണ്ട്. അതിലൊക്കെ മധുരത്തിനു പഞ്ചസാരയാണ് ഉപയോഗിച്ചിരിക്കുന്നതെങ്കിൽ, ഇതിൽ ശർക്കരയാണ് ഇട്ടിരിക്കുന്നത്.

ഇവിടെ ഉണ്ടാക്കിയത് എങ്ങനെയെന്ന് പറയാം.

റവ - സൂജിറവ/ബോംബെ റവ - 200 ഗ്രാം എടുത്തു.

ശർക്കര - വല്യ ആണി - 8 എണ്ണം.

അണ്ടിപ്പരിപ്പും ഉണങ്ങിയ മുന്തിരിയും - കുറച്ച്. അണ്ടിപ്പരിപ്പ് കഷണങ്ങളാക്കുക.
പാൽ - അര ഗ്ലാസ്സ്.
വെള്ളം - റവയും ശർക്കരയും വേവാൻ പാകത്തിനു ഒഴിക്കുക.
സേമിയ - മൂന്നു ടീസ്പൂൺ.
ഏലക്കായ് പൊടിച്ചത് കുറച്ച്.
നെയ്യ് - കുറച്ച്. (അഞ്ചാറ് ടീസ്പൂൺ).

ആദ്യം തന്നെ റവയും സേമിയയും മൂന്ന് ടീസ്പൂൺ നെയ്യൊഴിച്ച് വറുക്കുക. തീ വളരെക്കുറച്ചുവെച്ച് ഇളക്കിയിളക്കി വേണം വറുക്കാൻ. അതിനുശേഷം അതിലേക്ക് പാലൊഴിക്കുക. കാച്ചിവെച്ച പാലാണ് ഇവിടെ ഒഴിച്ചത്. അപ്പോ തന്നെ വെള്ളവും ഒഴിക്കുക. ശർക്കര ഇടുക. ഇളക്കിക്കൊണ്ടിരിക്കുന്നതാണ് നല്ലത്. തീ കൂട്ടി വയ്ക്കുകയും വേണ്ട. അണ്ടിപ്പരിപ്പും മുന്തിരിയും നെയ്യൊഴിച്ച് വറുത്തെടുത്ത് ഇതിലേക്കിടുക. വേവുന്നതിനുമുമ്പ് ഇട്ടാലും കുഴപ്പമൊന്നുമില്ല. വെന്ത് വെള്ളം നല്ലോണം വറ്റിയാൽ അതിൽ രണ്ട് ടീസ്പൂൺ നെയ്യൊഴിച്ച് ഇളക്കാം. ഏലയ്ക്കപ്പൊടി ഇടുക. ഒന്നുകൂടെ നന്നായി ഇളക്കിച്ചേർത്ത് വാങ്ങിവയ്ക്കുക.

ആദ്യം തന്നെ കുറച്ചുനെയ്യ് ഒഴിച്ച് പാത്രം വെച്ചാൽ അടിയിൽ കരിഞ്ഞുപിടിക്കാതെ ഇരിക്കും.

ഇതിൽ നെയ്യ് കുറച്ചേ ചേർത്തിട്ടുള്ളൂ. മധുരവും. മധുരവും നെയ്യും കുറച്ചും കൂടെ കഴിച്ചാൽ പ്രശ്നമില്ലാത്തവർക്ക് കുറച്ചും കൂടെ ചേർക്കാം. വെള്ളം അധികമായാൽ അധികം വേവ് ആവും. കേസരിയ്ക്ക് അത്ര വേവ് വേണ്ട. നെയ്യും പാലും മാത്രം ചേർത്ത് വെള്ളം തീരെ ചേർക്കാതെയും ഉണ്ടാക്കാം.

പുതിയ ക്യാമറ മേടിച്ചു. :) ഫോട്ടോയെടുക്കുന്നത് ഞാനായതുകൊണ്ട് അതിൽ വല്യ വ്യത്യാസമൊന്നും പ്രതീക്ഷിക്കരുത്. ;)

നേന്ത്രപ്പഴം പച്ചടികൾ

2010-10-22T21:33:00.006+05:30

നേന്ത്രപ്പഴം/ ഏത്തപ്പഴം കൊണ്ട് പലതരം വിഭവങ്ങൾ ഉണ്ടാക്കാറില്ലേ? ഞങ്ങൾ സാമ്പാർ, കാളൻ ഒക്കെ വയ്ക്കാറുണ്ട്. പച്ചടിയും ഇഷ്ടമാണെങ്കിൽ പരീക്ഷിക്കാം.
ഇവിടെ രണ്ടുതരത്തിൽ പച്ചടി വയ്ക്കുന്നത് പറയാം.

ആദ്യം തൈർ/മോർ ചേർത്ത് വയ്ക്കുന്ന പച്ചടി. അല്പം പുളിയുള്ള പച്ചടിയുണ്ടാക്കാം.

നേന്ത്രപ്പഴം ഒന്ന് തോലുകളഞ്ഞ് ചെറുതായി അരിയുക. നല്ലപോലെ പഴുത്തതാണ് കൂടുതൽ നല്ലത്. ചിത്രത്തിൽ ഉള്ളത് അത്രയ്ക്ക് പഴുത്തിട്ടില്ല.
പച്ചമുളക് രണ്ടെണ്ണം നടുവിൽ മുറിച്ച് നീളത്തിൽ അരിയുക.
മുളകുപൊടി - കാൽ ടീസ്പൂൺ. എരിവ് വേണ്ടാത്തവർക്ക് ഇടേണ്ടെന്നും വയ്ക്കാം.
തേങ്ങ - മൂന്ന്/നാലു ടേബിൾസ്പൂൺ.
കടുക് - കാൽ ടീസ്പൂൺ.
തേങ്ങയും കടുകും വെള്ളമില്ലാതെ മിനുസമായിട്ട് അരയ്ക്കുക. വെള്ളത്തിനു പകരം അല്പം മോരുവെള്ളം ചേർത്താൽ മതി.
തൈർ - കുറച്ച്. ഏകദേശം അര ഗ്ലാസ്സ്.
വറവിടാൻ കടുക്, കറിവേപ്പില, മുളക്.
വെളിച്ചെണ്ണ
ഉപ്പ്.

പഴം ഉപ്പും മുളകുപൊടിയും പച്ചമുളകും ഇട്ട് അല്പം വെള്ളം ചേർത്ത് നന്നായി വേവിക്കുക. വെന്തുകഴിഞ്ഞാൽ അതിൽ വെള്ളം ഇല്ലാത്തതാണ് നല്ലത്. വേവിയ്ക്കുമ്പോൾ അതിനനുസരിച്ചു മാത്രം വെള്ളം ഒഴിയ്ക്കുക. വെന്താൽ തണുക്കാൻ വയ്ക്കുക. തണുത്താൽ അതിൽ തൈർ ഒഴിക്കുക, തേങ്ങ ചേർക്കുക.

നന്നായി യോജിപ്പിച്ച ശേഷം വറവിടുക.

ഇനി നേന്ത്രപ്പഴം മധുരപ്പച്ചടി.

മുകളിൽ പറഞ്ഞതിൽ തൈർ ഒഴിച്ച് ബാക്കിയെല്ലാം വേണം.
ഒരു ആണി ശർക്കരയും വേണം.
മധുരപ്പച്ചടിയ്ക്ക് തേങ്ങ അരയ്ക്കുമ്പോൾ മോരുവെള്ളം ചേർക്കാനും പാടില്ല.

പഴം, മുളകുപൊടി, ഉപ്പ്, പച്ചമുളക് എന്നിവയൊക്കെ ഇട്ട് വേവിച്ച് ഉടയ്ക്കുക. അതിൽ ശർക്കരയിടുക. ശർക്കര കുറച്ചുനേരം വേവണം. വെന്ത് വെള്ളം വറ്റിയാൽ വാങ്ങിവെച്ച് തേങ്ങ ചേർക്കുക. വറവിടുക.

രണ്ടു പച്ചടികളും വെന്താൽ വാങ്ങുന്നതിനുമുമ്പ് കറിവേപ്പില ഒരുതണ്ട് അതിൽ ഇടണം. ഇവിടെ ഇട്ടിട്ടില്ല. അതുകൊണ്ട് നിങ്ങൾ ഉപേക്ഷ വിചാരിയ്ക്കരുത്.

അരി ഉപ്പുമാവ്

2010-10-06T19:43:00.003+05:30

അരി ഉപ്പുമാവ് കഴിക്കാറുണ്ടോ? ഉപ്പുമാവ് ഇഷ്ടമുള്ളവർക്ക് ഈ അരി ഉപ്പുമാവ് ഉണ്ടാക്കിക്കഴിക്കാം. പണ്ട് ഇടയ്ക്കൊക്കെ കഴിക്കാറുണ്ടായിരുന്നു. ഇപ്പോ അരിഭക്ഷണം പലരും കുറച്ചപ്പോൾ അരി ഉപ്പുമാവുണ്ടാക്കുന്നതും കുറഞ്ഞു.

അരി ഉപ്പുമാവ് എങ്ങനെയാണുണ്ടാക്കുന്നതെന്ന് പറയാം. അരി പലതരത്തിൽ ആയതുകൊണ്ടും വേവിന്റെ കാര്യങ്ങൾ പലർക്കും പലതരത്തിൽ ആയതുകൊണ്ടും അളവ് പറയുന്നില്ല.

ആവശ്യമുള്ളത്:-

അരി - നുറുക്കരിയാണ് ഉപയോഗിക്കേണ്ടത്. അല്ലെങ്കിൽ ഉണക്കലരി. ഇതൊന്നുമില്ലെങ്കിൽ ചെറിയ അരി ഏതെങ്കിലും ഉപയോഗിക്കാം.
പച്ചമുളക്.
ഉപ്പ്.
കറിവേപ്പില.
ഇഞ്ചി.
ചുവന്നമുളക്/വറ്റൽമുളക്.
കടുക്.
ഉഴുന്നുപരിപ്പ്.
തേങ്ങ ചിരവിയത്.
വെളിച്ചെണ്ണ.

ഇത്രയും വസ്തുക്കൾ എടുത്തുവെച്ചാൽ ഉപ്പുമാവുണ്ടാക്കാൻ തുടങ്ങാം. പച്ചമുളകും ഇഞ്ചിയും അരിയുക. അരി വൃത്തിയാക്കിയതിനുശേഷം കഴുകി വെള്ളം മുഴുവൻ ഊറ്റിക്കളഞ്ഞു വയ്ക്കുക.

ഒരു പാത്രത്തിലോ ചീനച്ചട്ടിയിലോ വെളിച്ചെണ്ണയൊഴിച്ച് ചൂടാക്കുക. ആദ്യം ഉഴുന്നുപരിപ്പ് ഇടുക. അതു ചുവക്കുമ്പോഴേക്കും ചുവന്ന മുളക് പൊട്ടിച്ച് ഇടുക. കടുക് ഇടുക. കടുക് പൊട്ടിയാൽ കറിവേപ്പിലയിടുക. ഇഞ്ചിയും പച്ചമുളകും ഇടുക. ഒന്നു വഴറ്റിയിട്ട്, കഴുകി, വെള്ളം കളഞ്ഞുവെച്ചിരിക്കുന്ന അരി അതിലിട്ട് ഒന്നു വറുക്കുക. അല്പനേരം ഇളക്കിയാൽ മതിയാവും. അതിലേക്ക് അരി വേവാനുള്ള പാകത്തിൽ വെള്ളവും ആവശ്യത്തിന് ഉപ്പും ചേർക്കുക. വെള്ളം തിളച്ചാൽ തീ കുറച്ചുവെച്ച് വേവിക്കുക. വെന്ത് വെള്ളം വറ്റി വാങ്ങിവെച്ചാൽ തേങ്ങയിട്ടിളക്കുക.

ഇടയ്ക്ക് വെന്തോന്ന് നോക്കുമ്പോൾ, വെള്ളം അധികമായെന്നുതോന്നിയാൽ തീ കൂട്ടിവെച്ചാൽ വെള്ളം വറ്റും. പക്ഷേ, അടിയിൽ കരിയാതെ നോക്കണം.

പഴവും കൂട്ടി കഴിയ്ക്കാം. അല്ലെങ്കിൽ ചമ്മന്തിപ്പൊടിയോ ഒക്കെ കൂട്ടാം. ശർക്കരയും കൂട്ടിക്കഴിക്കാം. പച്ചമുളക്, ഇഞ്ചി, ചുവന്ന മുളക് എന്നിവയുടെയൊക്കെ എരിവ് അരിയ്ക്ക് പിടിക്കും. അതുകൊണ്ട് എരിവ് ഇഷ്ടമില്ലാത്തവർ/ കുറച്ചുവേണ്ടവർ മുളകുകൾ കുറച്ച് ഇട്ടാൽ മതി.

ചെറുപയർ വട

2010-10-05T09:50:00.005+05:30

ചെറുപയർ ഇഷ്ടമാണോ? ചെറുപയർ ആരോഗ്യത്തിനു നല്ലതാണ്. എന്നും ചെറുപയർ വേവിച്ച് കഴിക്കാം. ചെറുപയർ കൊണ്ടുണ്ടാക്കുന്ന വട ദിവസവും കഴിക്കാൻ പറ്റില്ല. എന്നാലും ഇടയ്ക്കൊരുദിവസം ഉണ്ടാക്കിക്കൂടേ? എളുപ്പം കഴിയും വടയുണ്ടാക്കുന്ന ജോലി.

ചെറുപയർ ഏകദേശം 100 ഗ്രാം എടുക്കണം. വെള്ളത്തിലിട്ട് മൂന്നോ നാലോ മണിക്കൂർ കുതിർക്കാൻ വയ്ക്കണം.

വലിയ ഉള്ളി - രണ്ട് ചെറുത്/ ഒന്ന് വലുത്. തോലുകളഞ്ഞ് ചെറുതാക്കി അരിയുക.
പച്ചമുളക് - രണ്ടെണ്ണം. വട്ടത്തിൽ ചെറുതായി മുറിയ്ക്കുക.
ഇഞ്ചി - ഒരു കഷണം. തോലുകളഞ്ഞ് ചെറുതാക്കി അരിഞ്ഞുവയ്ക്കുക.
ചുവന്ന മുളക് - രണ്ടെണ്ണം.
കായം പൊടി- കുറച്ച്.
കറിവേപ്പില - ഒരു വല്യ തണ്ടിലെ ഇല. ചെറുതാക്കി മുറിയ്ക്കുക.
ഉപ്പ്.
അരിപ്പൊടി - ഒരു ടേബിൾസ്പൂൺ.
വെളിച്ചെണ്ണ - വട വറുക്കാൻ.

ചെറുപയർ കഴുകിയെടുത്ത് ചുവന്ന മുളക് ഇട്ട് അരയ്ക്കുക. തീരെ വെള്ളം ഉണ്ടാവരുത്. അധികം പേസ്റ്റുപോലെ ആവരുത്. അരച്ചുകഴിഞ്ഞാൽ അതിലേക്ക് പച്ചമുളക്, കറിവേപ്പില, ഉള്ളി, ഇഞ്ചി, കായം പൊടി, അരിപ്പൊടി, ആവശ്യത്തിന് ഉപ്പ് എന്നിവയൊക്കെച്ചേർത്ത് കുഴയ്ക്കുക. വെള്ളമൊന്നും ചേർക്കല്ലേ. അഞ്ചുമിനുട്ട് വയ്ക്കാം. വെളിച്ചെണ്ണ ചൂടാക്കുക. കൂട്ട് എടുത്ത് ഉരുട്ടുക. അത് കൈയിൽ വച്ച് ഒന്നു പരത്തി വെളിച്ചെണ്ണയിൽ ഇട്ട് വറുത്തെടുക്കുക.

എണ്ണ ചൂടാക്കുന്നതിനുമുമ്പ് ഉരുട്ടി വയ്ക്കാം. അധികം വലുപ്പം വേണ്ട. ഒരു ചെറിയ ചെറുനാരങ്ങ വലുപ്പത്തിൽ ആയാൽ കുഴപ്പമില്ല. കൈയിൽ പരത്തുമ്പോൾ നടുവിലുള്ള ഭാഗം നന്നായി അമർത്തി പരത്തുന്നതാവും നല്ലത്. എണ്ണ കുറേ ചൂടാക്കി വയ്ക്കരുത്. അധികം ചൂടായാൽ പുറം കരിയുകയും അകത്ത് ശരിക്കും വേവാതെയും ഇരിക്കും. പയറ് അരച്ചാൽ അല്പം പശപോലെ ഇരിക്കും. അതുകൊണ്ടാണ് അരിപ്പൊടി ചേർത്തത്. ചേർത്തില്ലെങ്കിലും കുഴപ്പമില്ല. മല്ലിയില ഇഷ്ടമുണ്ടെങ്കിൽ അതും ചേർക്കാം.

(ഞങ്ങളുടെ ക്യാമറ തൽക്കാലം ഇവിടെയില്ല. അതുകൊണ്ട് ഇപ്പോ ഉള്ള പോസ്റ്റുകളിലെ ചിത്രങ്ങളൊക്കെ ചേട്ടന്റെ നോക്കിയ 5800 എക്സ്പ്രസ്സ് മ്യൂസിക്കിലാണ്).

പുലാവ്

2010-10-03T22:07:00.004+05:30

ഇതൊരു സാദാപുലാവ് ആണ്. വീട്ടിൽ മിക്കവാറും ഉണ്ടാവുന്ന വസ്തുക്കളേ ഇതുണ്ടാക്കാൻ ആവശ്യമുള്ളൂ. അല്ലെങ്കിൽ എളുപ്പം കിട്ടുന്ന വസ്തുക്കളേ വേണ്ടൂ.

ആവശ്യമുള്ളത് :-

അരി - പച്ചരിയോ ബസ്മതിയരിയോ ആണ് നല്ലത്. പുഴുങ്ങലരി ആയാലും കുഴപ്പമൊന്നുമില്ല. 250 ഗ്രാം എടുക്കാം.
തേങ്ങ - ചിരവിയത് നാലു ടേബിൾസ്പൂൺ.
കറുവാപ്പട്ട - ഒരു ചെറിയ കഷണം.
ഗ്രാമ്പൂ - മൂന്നാലെണ്ണം.
ഏലയ്ക്ക - രണ്ടെണ്ണം.
കറിവേപ്പില - ഒരു വല്യ തണ്ടിലെ ഇല.
വെളുത്തുള്ളി - ചെറിയ നാലല്ലി.
മല്ലിയില കുറച്ച്.
നെയ്യ് കുറച്ച്.
ജീരകം - കാൽ ടീസ്പൂൺ.
ഉപ്പ്.

കാപ്സിക്കം - ഒന്ന് (നിർബ്ബന്ധമില്ല. ഇവിടെ ഉള്ളതുകൊണ്ട് ഇട്ടു).
ഉരുളക്കിഴങ്ങ് - രണ്ടെണ്ണം. അധികം വലുത് വേണ്ട.
കാരറ്റ് - ഒന്നു വലുത്.
ഗ്രീൻപീസ്/പച്ചപ്പട്ടാണി - അമ്പതു ഗ്രാം. (ഉണങ്ങിയ ഗ്രീൻപീസ് ആണെങ്കിൽ തലേന്ന് വെള്ളത്തിൽ കുതിരാൻ ഇടണം).
ബീൻസ് - നാലെണ്ണം/അഞ്ചെണ്ണം.
വലിയ ഉള്ളി/സവാള - രണ്ടുമൂന്നെണ്ണം.
മഞ്ഞൾപ്പൊടി ഒരു നുള്ള്.

തേങ്ങ, കറിവേപ്പില, കറുവാപ്പട്ട, വെളുത്തുള്ളി, മല്ലിയില, ഗ്രാമ്പൂ, ഏലയ്ക്ക, പച്ചമുളക്, ജീരകം എന്നിവ അരച്ചെടുക്കണം അല്പം വെള്ളം ചേർത്ത് അരയ്ക്കാം.

പച്ചക്കറികളൊക്കെ മുറിച്ചുവയ്ക്കണം. ഉള്ളി തോലുകളഞ്ഞ് നീളത്തിൽ അരിയണം.

ആദ്യം ഒരു പാത്രത്തിൽ കുറച്ച് നെയ്യൊഴിച്ച് വലിയ ഉള്ളി ചുവപ്പുനിറം വരുന്നതുവരെ വഴറ്റുക. അതിലേക്ക് തേങ്ങയരച്ചത് ഇടണം. അതൊന്നിളക്കിയോജിപ്പിച്ചാൽ പച്ചക്കറികൾ മുറിച്ചുവച്ചത് ഇടണം. അതും ഒന്ന് വഴറ്റുക. അതുകഴിഞ്ഞാൽ കഴുകിയെടുത്ത അരി ഇടുക. മഞ്ഞൾപ്പൊടിയിടുക. അരിയ്ക്കും പച്ചക്കറികൾക്കും ആവശ്യമായിട്ടുള്ളത്ര ഉപ്പിടുക. എല്ലാം വേവാൻ മാത്രമുള്ള വെള്ളം കണക്കാക്കി ഒഴിക്കുക. കുറച്ചും കൂടെ നെയ്യ് ചേർക്കുന്നതിൽ കുഴപ്പമില്ല. വേവിക്കുക. തീ കുറച്ച് വയ്ക്കണം വഴറ്റുമ്പോഴൊക്കെ.

സാലഡും അച്ചാറും കൂട്ടി കഴിക്കാം.

അരയ്ക്കുന്നതിൽ പച്ചമുളക് ഇട്ടില്ലെങ്കിലും കുഴപ്പമില്ല. പച്ചമുളക് അരിഞ്ഞ് പച്ചക്കറികളുടെ കൂടെ ഇട്ടാലും മതി. തേങ്ങയരയ്ക്കുമ്പോൾ അല്പം കുരുമുളക് ചേർത്താലും നന്നായിരിക്കും.

കുക്കറിൽ നേരിട്ട് പാകം ചെയ്യാം. ഉള്ളി അതിൽത്തന്നെ വഴറ്റിയാൽ മതി.

റവ ഊത്തപ്പം

2010-10-02T11:28:00.005+05:30

റവദോശയുണ്ടാക്കാറില്ലേ? റവ കൊണ്ട് ഉപ്പുമാവായിരിക്കും എല്ലാവരും അധികം ഉണ്ടാക്കുന്നത് അല്ലേ? അങ്ങനെയാണെങ്കിൽ ഈ റവ ഊത്തപ്പം പരീക്ഷിക്കാം. അരിമാവുകൊണ്ട് ഊത്തപ്പം ഉണ്ടാക്കുന്നതുപോലെത്തന്നെയാണ് ഇതും. എളുപ്പം കഴിയും മാവ് തയ്യാറാക്കാൻ.

ഇതിന്:-

റവ വേണം. സൂജിറവ/ ബോംബേ റവ എന്നൊക്കെ പേരുള്ള വെളുത്ത റവ - ഇവിടെ ഒന്നര കപ്പ് എടുത്തു.
പിന്നെ പച്ചമുളക് രണ്ടെണ്ണം വട്ടത്തിൽ ചെറുതായി മുറിച്ചത്.
ഇഞ്ചി ഒരു ചെറിയ കഷണം തോലുകളഞ്ഞ് ചെറുതാക്കി കഷണങ്ങളാക്കിയത്.
കറിവേപ്പിലയും മല്ലിയിലയും കുറച്ച് എടുത്ത് മുറിച്ച് ചെറുതാക്കിയെടുക്കുക.
തക്കാളി ചെറുത് രണ്ടെണ്ണം കുഞ്ഞുകഷണങ്ങളാക്കിയെടുക്കുക.
വലിയ ഉള്ളി ഒന്ന് വലുത് ചെറിയ കഷണങ്ങളാക്കി എടുക്കുക. തോലു കളയാൻ മറക്കരുത്.
തൈര്- അര ഗ്ലാസ്സ്.
തേങ്ങ ചിരവിയത് കുറച്ച്.
ഉപ്പ്.
വെളിച്ചെണ്ണ - ഊത്തപ്പം ഉണ്ടാക്കുമ്പോൾ അതിനു മുകളിൽ ഒഴിക്കാൻ.

ആദ്യം ചെയ്യേണ്ടത് റവ അതിനു മാത്രം ആവശ്യമായ ഉപ്പിട്ട്, കുറച്ചു വെള്ളമൊഴിച്ച് ഒരു മണിക്കൂർ കുതിരാൻ വയ്ക്കണം. അതു നനയാൻ കഷ്ടിച്ച് ഉള്ള വെള്ളമേ ഒഴിക്കേണ്ടൂ.

ഒരു മണിക്കൂർ കഴിഞ്ഞാൽ തൈർ ആദ്യം ചേർക്കുക. ഇളക്കിയോജിപ്പിച്ചിട്ട്, ബാക്കിയൊക്കെ ചേർക്കുക. ആ ചേർത്ത വസ്തുക്കൾക്കൊക്കെ ആവശ്യമായ ഉപ്പും കൂടെ ചേർക്കുക. അധികമാവരുത്. വെളിച്ചെണ്ണ ആ കൂട്ടിൽ ചേർക്കാനുള്ളതല്ല.

അഞ്ചുപത്തുമിനുട്ട് ഒക്കെ ഒന്നു ഒത്തുയോജിക്കാൻ വയ്ക്കണം.

അതിനുശേഷം ദോശക്കല്ല് ചൂടാക്കി മാവൊഴിക്കണം. അധികം ചൂടായാൽ മാവൊക്കെ ഏതെങ്കിലും വഴിക്ക് പോകും. അതുകൊണ്ട് കല്ല് ഒന്നു ചൂടാവുമ്പോൾ മാവൊഴിച്ച് പരത്തുക. നോൺ സ്റ്റിക്ക് അല്ലെങ്കിൽ ഒഴിക്കുന്നതിനുമുമ്പ് വെളിച്ചെണ്ണ ദോശക്കല്ലിൽ പുരട്ടുക. നോൺ സ്റ്റിക്ക് ആണെങ്കിൽ ഒഴിച്ച മാവിനു മുകളിൽ വെളിച്ചെണ്ണ പുരട്ടുക.

അടിഭാഗം വെന്ത്, മുകളിലും വെന്ത് വന്നാൽ മറിച്ചിടുക. മാവൊഴിച്ചതിനുശേഷം ഒരു പ്ലേറ്റെടുത്ത് അടച്ചുവെച്ചാലും നല്ലത്. രണ്ടുഭാഗവും വെന്താൽ കല്ലിൽനിന്നെടുക്കുക.

ചമ്മന്തിയും കൂട്ടി കഴിക്കുക.

മത്തങ്ങ കൂട്ടുകറി

2010-07-31T10:41:00.006+05:30

സുന്ദരിമത്തൻ എന്നാണ് ഞങ്ങൾ ഈ മത്തനു പറയുന്നത്. കുഞ്ഞുമത്തൻ. മത്തങ്ങ കൊണ്ട് ഒരുപാട് വിഭവങ്ങളുണ്ടാക്കാം. അല്പം മധുരമുള്ളൊരു വസ്തുവാണ് മത്തങ്ങ. മത്തങ്ങ കൊണ്ട് ഒരു കൂട്ടുകറിയുണ്ടാക്കിയേക്കാമെന്ന് വെച്ചു. വെള്ളക്കടല/ചനയും ഇട്ട്. ഓണമൊക്കെ വരുന്നതല്ലേ? എല്ലാവർക്കും മത്തങ്ങ വെള്ളക്കടല കൂട്ടുകറിയുണ്ടാക്കാമല്ലോ.

ജോലി തുടങ്ങാം?

മത്തങ്ങ - മുഴുവൻ മത്തങ്ങയുടെ ചിത്രത്തിൽ ഉള്ളതിന്റെ പകുതിയെടുത്ത് തോലും കുരുവുമൊക്കെ കളഞ്ഞ് മുറിച്ച് കഴുകിയെടുക്കുക. സാധാരണയായി ചേനയും കായയും ഒക്കെ നല്ല കുഞ്ഞുകുഞ്ഞു ചതുരക്കഷണങ്ങളാ‍ക്കുകയാണ് പതിവ്. മത്തങ്ങ വേഗം വെന്തുടയുന്ന ഒന്നായതുകൊണ്ട് അല്പം വലുതായാലും കുഴപ്പമില്ല.

വെള്ളക്കടല/ചന - 100 ഗ്രാം. തലേന്ന് അല്ലെങ്കിൽ അഞ്ചെട്ട് മണിക്കൂറെങ്കിലും വെള്ളത്തിൽ കുതിർത്തുവയ്ക്കണം.

മഞ്ഞൾപ്പൊടി - കാൽ ടീസ്പൂൺ.

മുളകുപൊടി - അര ടീസ്പൂൺ. (കുറയ്ക്കാം).

തേങ്ങ ചിരവിയത് - 5 ടേബിൾസ്പൂൺ. (4 ആയാലും കുഴപ്പമില്ല). അരയ്ക്കാനുള്ളതാണ്.

ജീരകം - അര ടീസ്പൂൺ.

തേങ്ങയും ജീരകവും അധികം വെള്ളം ചേർക്കാതെ അരയ്ക്കുക.

തേങ്ങ ചിരവിയത് - 3 ടേബിൾസ്പൂൺ. (2 ആയാലും കുഴപ്പമില്ല). വറവിടാനുള്ളതാണ്.

പിന്നെ ഉപ്പ്, കടുക്, കറിവേപ്പില, വെളിച്ചെണ്ണ ഒക്കെ കുറച്ച്.

ആദ്യം തന്നെ ചന കഴുകി വെള്ളമൊഴിച്ച് കുക്കറിൽ വേവിക്കുക. നല്ലപോലെ വേവണം. തിന്നുമ്പോൾ കട്ടിയിൽ ഉണ്ടാവരുത്. വേവാൻ കഷ്ടിച്ച് വേണ്ടിവരുന്ന വെള്ളമേ ഒഴിക്കാവൂ.

മത്തങ്ങ, ഒരു പാത്രത്തിലെടുത്ത്, മഞ്ഞൾപ്പൊടി, ഉപ്പ്, മുളകുപൊടി എന്നിവയിട്ട് കുറച്ച് വെള്ളവുമൊഴിച്ച് അടുപ്പത്തുവയ്ക്കുക. മത്തങ്ങയുടെ അല്പം മുകൾഭാഗം വരെ മതി വെള്ളം. തിളച്ചാൽ തീ കുറച്ച് അടച്ചുവേവിക്കുക.

പകുതിവേവായാൽ വെന്ത ചന അതിലേക്കിടുക. ചനയ്ക്കും ഉപ്പും മുളകുമൊക്കെ പിടിക്കണമല്ലോ. ചന ഒന്നുടച്ചിട്ട് ഇടുകയും ചെയ്യാം.

വെന്താൽ, എല്ലാം കൂടെ യോജിച്ചാൽ അതിൽ തേങ്ങ ചേർക്കുക. തീ കുറച്ചിട്ടായിരിക്കണം ഒക്കെ ചെയ്യുന്നത്. വെള്ളം ചേർക്കണമെന്നില്ല. പാത്രത്തിൽ ഒട്ടും ഇല്ലെങ്കിൽ അല്പം ചേർക്കാം. കരിഞ്ഞുപോകാതിരിക്കാൻ വേണ്ടി മാത്രം.

തേങ്ങ തിളയ്ക്കും. അതുകഴിഞ്ഞാൽ വാങ്ങിവയ്ക്കുക. വറുക്കാൻ വെച്ച തേങ്ങ അല്പം വെളിച്ചെണ്ണ ചേർത്ത് ചുവപ്പുനിറത്തിൽ വറുത്ത് ഇടുക. കറിവേപ്പിലയും അതിനോടൊപ്പം വറത്തിടാം. തേങ്ങ മൊരിഞ്ഞാൽ അതിൽത്തന്നെ കടുകും ഇടുന്നതുകൊണ്ടു കുഴപ്പമില്ല. പക്ഷെ, അത് വേറെ തന്നെ വറവിട്ടാൽ മതി.

വെള്ളം തീരെയില്ലെന്ന് ഈ ചിത്രം കണ്ടാൽ മനസ്സിലാവുന്നില്ലേ? അല്പം ഉണ്ടെങ്കിലും കുഴപ്പമൊന്നുമില്ല.

നല്ല സ്വാദുണ്ട്. എല്ലാവരും ഉണ്ടാക്കിക്കഴിക്കുക.

ബീറ്റ്‌റൂട്ട് ദോശ

2010-07-30T10:20:00.006+05:30

ബീറ്റ്‌റൂട്ട് ഇഷ്ടമാണോ? ദോശ ഇഷ്ടമാണോ? എങ്കിൽ ബീറ്റ്‌റൂട്ട് ദോശയുണ്ടാക്കാൻ ഒരുങ്ങിക്കോളൂ. എങ്ങനെയാണ് ഉണ്ടാക്കിയതെന്ന് പറയാം.

ആദ്യം ദോശമാവ് തയ്യാറാക്കണം. നിങ്ങൾ സാധാരണയായി ദോശയ്ക്ക് തയ്യാറാക്കുന്നപോലെ തയ്യാറാക്കിയാൽ മതി. അല്ലെങ്കിൽ താഴെപ്പറയുന്നതുപോലെ തയ്യാറാക്കുക.

പച്ചരി - ഒരു ഗ്ലാസ്സ്.
പുഴുങ്ങലരി - അര ഗ്ലാസ്സ്.
ഉലുവ - അര ടീസ്പൂൺ.
ഉഴുന്ന് - കാൽ ഗ്ലാസ്സ്.

എല്ലാം ഒരുമിച്ച് വെള്ളത്തിൽ ഇട്ടുവയ്ക്കുക. നാലഞ്ച് മണിക്കൂർ കഴിഞ്ഞാൽ, കഴുകി, മിനുസമായി അരച്ചെടുക്കുക. അധികം വെള്ളത്തോടെ അരയ്ക്കരുത്. ഉപ്പു ചേർത്തു വയ്ക്കുക. എട്ട് പത്ത് മണിക്കൂർ വച്ചാൽ മാവ് പുളിക്കും.

ഇനി ബീറ്റ്‌റൂട്ട് കൂട്ട്.

ബീറ്റ്‌റൂട്ട് - ഒന്ന് ഇടത്തരം (ചിത്രത്തിൽ ഉള്ളതുപോലെയുള്ളത്).

ബീറ്റ്‌റൂട്ട് തോലുകളഞ്ഞ് കഷണങ്ങളാക്കി വേവിക്കുക. ഇവിടെ കുക്കറിലാണ് വേവിച്ചത്. അതുകൊണ്ട് വല്യ കഷണങ്ങളാണ് ആക്കിയത്.

വെന്തിട്ട് ഒന്നു തണുത്താൽ അരയ്ക്കുക. വേവിക്കുമ്പോൾ ഒഴിച്ച വെള്ളം വേണ്ട. വെള്ളം ചേർക്കാതെ അരയ്ക്കുക. മിനുസവും ആവണം.

അരച്ചെടുത്തത് എത്ര അളവുണ്ട് എന്നു നോക്കുക. അതിന്റെ ഇരട്ടി ദോശമാവിൽ ബീറ്റ്‌റൂട്ട് അരച്ചത് ചേർക്കുക. കുറച്ച് കുരുമുളകുപൊടി ഇടുക. കായം പൊടിയും ഇടുക. അല്പം ഉപ്പ് ഇടുക. ബീറ്റ്‌റൂട്ടിനു മാത്രം വേണ്ടി. എല്ലാം കൂടെ യോജിപ്പിക്കുക.

ദോശക്കല്ല്/തട്ട് വെച്ച് ചൂടായാൽ മാവൊഴിക്കുക. ഒന്നു വെന്താൽ ദോശയ്ക്കു മുകളിൽ നെയ്യോ വെളിച്ചെണ്ണയോ പുരട്ടുക.

നല്ലപോലെ വെന്താൽ മറിച്ചിടുക. ആ ഭാഗവും വെന്താൽ എടുത്തുവയ്ക്കുക.

വെറും തേങ്ങാച്ചമ്മന്തി മതി കൂട്ടിക്കഴിക്കാൻ എന്ന് എന്റെ അഭിപ്രായം. മാവ് അധികം ചേർത്താലും കുഴപ്പമില്ല. ഈ അളവിൽ അരിമാവ് ബാക്കിയുണ്ടാവും. ഈ ബീറ്റ്‌റൂട്ട് കൂട്ടിൽ അഞ്ച് വല്യ ദോശയുണ്ടാക്കാം.

പപ്പടബജ്ജി

2010-07-13T13:17:00.003+05:30

പപ്പടബജ്ജിയുണ്ടാക്കുന്നത് മറ്റു ബജ്ജികൾ ഉണ്ടാക്കുന്നതുപോലെത്തന്നെയാണ്. കടലമാവിന്റെ കൂട്ടിൽ മുക്കിപ്പൊരിച്ച്. എന്നാൽ കുറച്ച് വ്യത്യാസം വരുത്തിയിട്ട് ഉണ്ടാക്കാമെന്ന് ഞാൻ കരുതി.

പപ്പടബജ്ജിയ്ക്ക് വേണ്ട വസ്തുക്കൾ:-

പപ്പടം - അധികം വലുതല്ലാത്തത് 5. (ചിത്രത്തിലേതുപോലെയുള്ളത്).
കടലപ്പൊടി/ കടലമാവ് - 3 ടേബിൾസ്പൂൺ.
അരിപ്പൊടി - 1 1/2 ടേബിൾസ്പൂൺ.
മഞ്ഞൾപ്പൊടി - ഒരുനുള്ള്.
കായം (പൊടി) - അല്പം.
കുരുമുളകുപൊടി - കാൽ ടീസ്പൂണിലും അല്പം കുറവ്. (കുരുമുളക് പൊടി ഇഷ്ടമല്ലാത്തവർ മുളകുപൊടി ചേർക്കുക).
എള്ള് - കാൽ ടീസ്പൂൺ. (നിർബ്ബന്ധമില്ല. ഇട്ടാൽ സ്വാദുണ്ടാവും).
ഉപ്പ് - കുറച്ചുമാത്രം (പപ്പടത്തിന് ഉപ്പുണ്ടാവുമല്ലോ).
പഞ്ചസാര - അര ടീസ്പൂൺ. (മൊരിയുന്നതിനും, അധികം ഉപ്പുണ്ടെങ്കിൽ പാകമാക്കുന്നതിനും സഹായിക്കും. നിർബ്ബന്ധമില്ല).

എല്ലാം ഒരുമിച്ച് അല്പം വെള്ളം ചേർത്ത് കുഴയ്ക്കുക. മാവ് തയ്യാറായാൽ എവിടെയെങ്കിലും ഒഴിച്ചാൽ പരക്കുന്ന രീതിയിൽ ആവരുത്. കട്ടിയിൽ വേണം. അതുകൊണ്ട് വെള്ളം ചേർക്കുമ്പോൾ ശ്രദ്ധിക്കുക.

വെളിച്ചെണ്ണ ചൂടാക്കുക. ഒരു പപ്പടം എടുക്കുക. മാവിൽ മുക്കുക. ചുരുട്ടുകയും മടക്കുകയും ചെയ്യരുത്. മാവ് പപ്പടത്തിന്റെ രണ്ടുവശത്തും ആയാൽ വെളിച്ചെണ്ണയിലേക്ക് ഇടുക. വറുത്തെടുക്കുക. ഓരോന്നായി അങ്ങനെ മുക്കി വറുത്തെടുക്കുക. എണ്ണയിലിട്ടു ഒന്നു വെന്താൽ ചട്ടുകം കൊണ്ടോ സ്പൂൺ കൊണ്ടോ ഒന്ന് തൊട്ടാൽ നന്ന്.

വെളിച്ചെണ്ണയിലേക്ക് ഇടുമ്പോൾ ശ്രദ്ധിക്കുക. അധികം ചൂടായിട്ട് പുക വരുന്നുണ്ടെങ്കിൽ തീ കുറയ്ക്കുക. മാവിൽ മുക്കിയാൽ പെട്ടെന്ന് വെളിച്ചെണ്ണയിൽ ഇടണം.

വല്യ പപ്പടം ആണെങ്കിൽ നാലാക്കി മുറിച്ചും ബജ്ജിയുണ്ടാക്കാം. വീട്ടിൽ മിക്കവാറും ഉണ്ടാവുന്ന വസ്തുക്കളേ ഇതിന് ആവശ്യമുള്ളൂ. അതുകൊണ്ട് എല്ലാവർക്കും ബജ്ജിയുണ്ടാക്കിയെടുക്കാൻ എളുപ്പമായിരിക്കും. എരിവ് ആവശ്യം പോലെ ചേർക്കാം. വെളിച്ചെണ്ണയിലാണ് സ്വാദ്. അതില്ലെങ്കിൽ വേറെ പാചകയെണ്ണ ആയാലും മതി.

പപ്പായ പുളിങ്കറി

2010-07-12T10:13:00.002+05:30

പപ്പായ എല്ലായിടത്തും എളുപ്പത്തിൽ കിട്ടുന്ന ഒന്നാണ്. പപ്പായ/കർമൂസ വീട്ടിൽ ഉണ്ടെങ്കിൽ പലതരം വിഭവങ്ങൾ ഓരോ ദിവസവും ഉണ്ടാക്കാം. പപ്പായ പുളിങ്കറി ഒരു സാദാ കൂട്ടാനാണ്. സാമ്പാറും കാളനുമൊക്കെ വേണ്ടെന്നുവെച്ച് ഒരുദിവസം പപ്പായപ്പുളിങ്കറിയുണ്ടാക്കാം. ഉണ്ടാക്കാൻ വല്യ വിഷമവുമില്ല.

പപ്പായ - ഒരു പപ്പായയുടെ പകുതി, തോലുകളഞ്ഞ് കഷണങ്ങളാക്കി, കഴുകിയെടുത്തത് (ചിത്രത്തിലെപ്പോലെ). അല്പമൊന്ന് പഴുത്തിട്ടുണ്ടെങ്കിലും കുഴപ്പമില്ല.
തേങ്ങ - മൂന്ന് ടേബിൾസ്പൂൺ
ജീരകം - അര ടീസ്പൂൺ.
മുളകുപൊടി - അര ടീസ്പൂൺ (കൂട്ടാം/കുറയ്ക്കാം).
മഞ്ഞൾപ്പൊടിയും ഉപ്പും ആവശ്യത്തിന്.
പുളി - ചെറിയ നെല്ലിക്കാവലുപ്പത്തിൽ പുളിയെടുത്ത് അരഗ്ലാസ്സ് വെള്ളത്തിൽ ഇട്ടുവയ്ക്കുക. കുറച്ചുകഴിയുമ്പോൾ, പുളി പിഴിഞ്ഞ് കരടൊന്നുമില്ലാതെ ആ വെള്ളം എടുക്കുക.
കടുക്, ചുവന്ന മുളക്, കറിവേപ്പില, വെളിച്ചെണ്ണ എന്നിവ വറവിടാനും എടുത്തുവയ്ക്കുക.

തേങ്ങയും ജീരകവും അരയ്ക്കുക. മുളകുപൊടി ഇടുന്നില്ലെങ്കിൽ അരയ്ക്കുമ്പോൾ അതിൽ രണ്ടോ മൂന്നോ ചുവന്ന മുളക് ചേർത്തരയ്ക്കുക.

പപ്പായ, ഉപ്പും മഞ്ഞൾപ്പൊടിയും മുളകുപൊടിയും ഇട്ട് കുറച്ച് വെള്ളവുമൊഴിച്ച് വേവിക്കുക. വെന്താൽ പുളിവെള്ളം ഒഴിച്ച് നന്നായി തിളപ്പിക്കുക. കുറച്ചുനേരം തിളയ്ക്കണം. പുളി വേവണം. വെന്താൽ തേങ്ങയരച്ചതു കൂട്ടി തിളപ്പിച്ച് വാങ്ങിവയ്ക്കുക. വറവിടുക.

പരിപ്പ് കുറച്ച് ഇട്ടാലും കുഴപ്പമില്ല.

വേവാൻ ആവശ്യമുള്ള വെള്ളമേ ആദ്യം ചേർക്കാവൂ. വെള്ളം വേണമെങ്കിൽ തേങ്ങ ചേർക്കുമ്പോൾ ചേർത്താൽ മതി. കുറേ വെള്ളം ആദ്യം തന്നെ ഒഴിച്ചാൽ, പുളിവെള്ളവും കൂടെയൊഴിക്കുമ്പോൾ ചിലപ്പോൾ അധികമാവും.

ഉള്ളിത്തണ്ട് ചമ്മന്തി

2010-06-14T11:03:00.003+05:30

ഉള്ളിത്തണ്ടുകൊണ്ട് ചമ്മന്തിയുണ്ടാക്കി നോക്കിയിട്ടുണ്ടോ? ഇല്ലെങ്കിൽ ഉണ്ടാക്കിക്കഴിക്കുക. എളുപ്പത്തിലാവും, സ്വാദും ഉണ്ട്. പലവിധത്തിലും ഉണ്ടാക്കാം. ഇപ്പോൾ ഉള്ളിത്തണ്ടും മാങ്ങയും കൂടെ ചമ്മന്തിയുണ്ടാക്കിയത് എങ്ങനെയെന്ന് പറയാം.

ഉള്ളിത്തണ്ട് എടുത്ത് കഴുകുക - ആറേഴെണ്ണം ആവാം.
വേരു മാത്രം കളയുക. ബാക്കി ചെറിയ കഷണങ്ങളാക്കി മുറിച്ചെടുക്കുക.

മാങ്ങയും കഴുകി തോലുകളഞ്ഞ് മുറിച്ചെടുക്കുക. മാങ്ങയുടെ ഒരു ഭാഗം കഷണങ്ങളാക്കിയത് മതി.
ചുവന്ന മുളക്/വറ്റൽ മുളക് - ഒന്ന്.
ഉപ്പ് - ആവശ്യത്തിന്.
തേങ്ങ ചിരവിയത് - കുറച്ച് - ഏകദേശം 4 ടീസ്പൂൺ.

ആദ്യം, മാങ്ങ, തേങ്ങ, മുളക്, ഉപ്പ് അരയ്ക്കുക. അതിലേക്ക് ഉള്ളിത്തണ്ട് ഇട്ട് അരയ്ക്കുക. അധികം മിനുസമൊന്നും അരയേണ്ട കാര്യമില്ല. വെള്ളം ഒട്ടും ചേർക്കരുത്. അരഞ്ഞുകഴിഞ്ഞാൽ വെള്ളം ഉണ്ടാവും.

പച്ചമുളകും ഇഞ്ചിയും ചേർത്തും അരയ്ക്കാം. ചുവന്ന മുളകും നിങ്ങളുടെ ഇഷ്ടം‌പോലെ ചേർക്കാം. പക്ഷെ എരിവ് അധികം ചേർക്കാത്തതാണ് നല്ലത്.

പ്ലം ഷേക്ക്

2010-05-21T13:45:00.003+05:30

പ്ലം ഇഷ്ടമാണോ? എന്നാല്‍, പ്ലം ഷേക്ക് ഇന്നുതന്നെ ഉണ്ടാക്കി കുടിയ്ക്കുക. എളുപ്പം ഉണ്ടാക്കാം. ഇഷ്ടമല്ലെങ്കിലും ഒന്ന് പരീക്ഷിക്കുന്നതിൽ തെറ്റില്ല.

ആവശ്യമുള്ളത്:-

പ്ലം - കുറച്ച് - പത്തെണ്ണം ചെറുത്. (ഇവിടെ വലുതാണ് കിട്ടിയത്).
പാൽ - അരലിറ്റർ - ഫ്രീസറിൽ വെച്ച് കട്ടിയാക്കിയത്.
ഏലയ്ക്ക - മൂന്നെണ്ണം തോലുകളഞ്ഞ് പൊടിച്ചത്.
പഞ്ചസാര - നാലു ടീസ്പൂൺ.

പ്ലം കുരു കളഞ്ഞ് മിക്സിയിൽ അടിയ്ക്കുക. അതിൽ പാലൊഴിച്ച്, പഞ്ചസാരയും ഏലയ്ക്കപ്പൊടിയും ഇട്ട് നന്നായി അടിയ്ക്കുക. നല്ലപോലെ യോജിച്ചാൽ അരിച്ചെടുക്കുക. തണുപ്പോടെ കുടിയ്ക്കുക. കുറച്ചു വെള്ളം പോലെ ആവണമെങ്കിൽ തണുത്ത വെള്ളം ഒഴിയ്ക്കുക.

പഞ്ചസാര കൂടുതലോ കുറവോ ഉപയോഗിക്കാം.
അല്പം പുളി ഇതിനുണ്ടാവും. അതുകൊണ്ട്, പഞ്ചസാര, അളവു നോക്കി, മധുരം വരുന്നതുവരെ ഇടുന്നതാണ് നല്ലത്.
ഏതെങ്കിലും ഐസ്ക്രീം ഇതിലിട്ടും കഴിയ്ക്കാം. നന്നായിരിക്കും.

റവ ദോശ

2010-05-13T10:26:00.004+05:30

ഇവിടെ സാധാരണയായി റവദോശ ഉണ്ടാക്കാറുള്ളത്, ഉഴുന്നും ഉലുവയും അരച്ച് റവ അതിലിട്ടാണ്. സാദാദോശയുണ്ടാക്കുന്നതുപോലെത്തന്നെ. പക്ഷെ ഇപ്പോ ഉണ്ടാക്കിയിരിക്കുന്ന റവദോശ വളരെ എളുപ്പമാണ്. ആർക്കും ശ്രമിക്കാവുന്നതേയുള്ളൂ.

റവ - 200 ഗ്രാം.
തേങ്ങ - അരമുറി ചിരവിയത്. (തേങ്ങ കൂടിയാൽ സ്വാദും കൂടും).
ഉപ്പ്.

ബോംബെറവ/ സൂചി റവ എന്നൊക്കെ അറിയപ്പെടുന്ന വെളുത്ത റവ എടുത്ത് വെള്ളമൊഴിയ്ക്കുക. ഉപ്പും ഇട്ട് ഇളക്കുക. വെള്ളം എന്നു പറയുന്നത് റവ മുഴുവനും വെള്ളത്തിൽ മുങ്ങണം. റവയുടെ മുകൾഭാഗത്തും അല്പം മാത്രം വെള്ളം വരുന്ന രീതിയിൽ വെള്ളമൊഴിയ്ക്കുക. അതിൽ അധികം വേണ്ട.

രണ്ടുമണിക്കൂറെങ്കിലും വെള്ളത്തിൽക്കിടക്കണം (കുറച്ച് അധികമായാലും കുഴപ്പമില്ല. കുറയാത്തതാവും നല്ലത്). അതുകഴിഞ്ഞ് അതിൽ തേങ്ങയിട്ടിളക്കുക. വെള്ളം അതിൽ ഉണ്ടാവുമായിരിക്കും. അല്ലെങ്കിൽ മാത്രം അല്പം വെള്ളം ചേർക്കുക.

ദോശക്കല്ല് ചൂടാക്കാൻ വയ്ക്കുക. ഒന്നു ചൂടുപിടിച്ചാൽ, അല്ലെങ്കിൽ അധികം ചൂടാവുന്നതിനുമുമ്പു തന്നെ ദോശമാവ് ഒഴിയ്ക്കുക. പരത്തുക. മുകളിൽ വെളിച്ചെണ്ണ പുരട്ടുക. ഒരു പ്ലേറ്റുകൊണ്ട് മുഴുവൻ മൂടുന്ന വിധത്തിൽ അടച്ചുവയ്ക്കുക. കുറച്ചു കഴിഞ്ഞാൽ തീ കുറച്ച ശേഷം അടപ്പ് മാറ്റിവെച്ച് ദോശ മറിച്ചിടുക. ആ ഭാഗവും വെന്താൽ എടുത്തുവയ്ക്കുക.

നല്ല ചൂടുള്ള ദോശക്കല്ലിലേക്ക് മാവൊഴിച്ചാൽ പരത്താൻ കിട്ടിയെന്ന് വരില്ല.

നോൺ സ്റ്റിക്ക് ദോശക്കല്ല് അല്ലെങ്കിൽ ആദ്യം മാവൊഴിക്കുന്നതിനുമുമ്പും കുറച്ച് വെളിച്ചെണ്ണ/ പാചകയെണ്ണ പുരട്ടണം.

മറിച്ചിടുമ്പോൾ തീ കുറയ്ക്കാം. അല്ലെങ്കിൽ അടുത്ത ദോശയ്ക്ക് ഒഴിയ്ക്കുമ്പോൾ അത് പരത്താൻ കിട്ടില്ല.

ഇതൊക്കെ ശ്രദ്ധിച്ചാൽ, നല്ല സ്വാദുള്ള, ഇതുപോലെയുള്ള റവദോശ നിങ്ങൾക്ക് കിട്ടും.

നിങ്ങൾക്കിഷ്ടമാണെങ്കിൽ ഇതേ മാവുകൂട്ടിലേക്ക് കടുകും, ചുവന്ന മുളകും, കറിവേപ്പിലയും വറത്തിട്ട് ദോശ ഉണ്ടാക്കിനോക്കൂ. നന്നായിരിക്കും. പുളിയുള്ളത് ഇഷ്ടമാണെങ്കിൽ തൈരും ഒഴിച്ച് ഉണ്ടാക്കാം. ഈ ദോശയ്ക്ക് അധികം പുളിയില്ലാത്തതുകൊണ്ട്, ഞാനൊരു പുളിച്ചമ്മന്തിയാണ് ഉണ്ടാക്കിയത്.

ഗ്രീൻപീസ് ചപ്പാ‍ത്തി

2010-05-11T10:10:00.003+05:30

ഗ്രീൻപീസ് കറിവെച്ച് ചപ്പാത്തിയ്ക്കൊപ്പം കഴിക്കാറില്ലേ? എന്നാല്‍പ്പിന്നെ ചപ്പാത്തിയിൽത്തന്നെ ഗ്രീൻപീസ് ആയാലോ. നല്ല കാര്യമല്ലേ? അതുകൊണ്ടാണ് ഗ്രീൻപീസ് ചപ്പാത്തിയുണ്ടാക്കാൻ തീരുമാനിച്ചത്. എളുപ്പം എന്നൊന്നും പറഞ്ഞൂടാ. എന്നാലും വല്യ ഗുലുമാലില്ല.

ഗോതമ്പുപൊടി - ഒന്നരക്കപ്പ്.
ഗ്രീൻപീസ് - അമ്പത് ഗ്രാം. രണ്ടോ മൂന്നോ മണിക്കൂർ വെള്ളത്തിൽ കുതിർക്കുക.
ജീരകം - കാൽ ടീസ്പൂൺ.
മഞ്ഞൾപ്പൊടി - കുറച്ച്.
മുളകുപൊടി - കാൽ ടീസ്പൂണിലും അല്പം കുറവ്.
മല്ലിയില - കുറച്ച് പൊടിയായി അരിഞ്ഞെടുക്കണം. ഇല്ലെങ്കിലും കുഴപ്പമില്ല.
ഉപ്പ്.
നെയ്യ്
അല്പം പാചകയെണ്ണ, വെളിച്ചെണ്ണയോ സൂര്യകാന്തിയെണ്ണയോ ഒക്കെ ആവാം. നിങ്ങൾ പാചകത്തിനുപയോഗിക്കുന്നത്.

ഗോതമ്പുപൊടി വെള്ളവും ഉപ്പും കൂട്ടി ചപ്പാത്തിയുണ്ടാക്കാൻ കുഴച്ചുവയ്ക്കുക. അധികം വെള്ളമായാൽ ശരിയാവില്ല. ചിത്രത്തിൽ ഉള്ളതുപോലെ ആവണം.
ഗ്രീൻപീസ്, മഞ്ഞൾപ്പൊടി ഇട്ട് വേവിക്കുക. വേവിക്കുമ്പോൾ അത്യാവശ്യം വെള്ളമേ ഒഴിക്കാവൂ. വെന്താൽ ഒട്ടും വെള്ളമില്ലാതെയാണ് വേണ്ടത്.
ഒരു പാത്രത്തിൽ പാചകയെണ്ണ കുറച്ചൊഴിച്ച് ചൂടാക്കി, ജീരകം ഇട്ട് പൊട്ടിച്ച്, ഗ്രീൻപീസ് ഇട്ട്, മുളകുപൊടിയും ഉപ്പും ഇട്ടിളക്കി, മല്ലിയിലയും ഇട്ടിളക്കുക. വെള്ളം അധികം ഉണ്ടെങ്കിൽ വറ്റിക്കോട്ടെ.

ഒരുരുള ചപ്പാത്തിമാവ് എടുക്കുക. കുറച്ച് വല്യ ഉരുള. അതൊന്ന് കൈകൊണ്ട് കൈയിൽത്തന്നെ പരത്തി, ഗ്രീൻപീസ് കുറച്ചെടുത്ത് അതിൽ വെച്ച് ഉരുട്ടുക. പിന്നെ ഉരുള, ചപ്പാത്തിപ്പലകയിൽ വെച്ച് കുറച്ച് ഗോതമ്പുപൊടിയിട്ട് പരത്തിയെടുക്കുക. ശരിക്ക് പരത്താൻ പറ്റുന്നില്ലെങ്കിൽ, ചപ്പാത്തിപ്പലകയ്ക്കു മുകളിൽ കുറച്ച് എണ്ണ പുരട്ടി അതിനു മുകളിൽ വച്ച് പരത്തിയാലും മതി.

പരത്തിക്കഴിഞ്ഞാൽ ദോശക്കല്ല്/ചപ്പാത്തിക്കല്ല് ചൂടാക്കി, നെയ് പുരട്ടി ഉണ്ടാക്കിയെടുക്കുക. അധികം വട്ടത്തിൽ പരത്താൻ ചിലപ്പോൾ കിട്ടിയെന്ന് വരില്ല. കുറച്ചു വട്ടമായാലും മതി. ഉണ്ടാക്കിയെടുക്കുമ്പോൾ നന്നായി വേവാൻ ശ്രദ്ധിക്കുക.

അച്ചാറോ ചമ്മന്തിയോ ഒക്കെ മതി കൂടെക്കഴിയ്ക്കാൻ. കുറുമയോ സ്റ്റൂവോ വയ്ക്കുകയും ചെയ്യാം.

വെണ്ടയ്ക്ക മോരുകറി

2010-05-07T09:31:00.004+05:30

എളുപ്പത്തിൽ ഉണ്ടാക്കാൻ പറ്റിയൊരു കറിയാണ്. എളുപ്പത്തിൽ കിട്ടുന്ന വസ്തുക്കളാണ് ഇതിൽ ഉള്ളത്. വെണ്ടയ്ക്ക ഇഷ്ടമുള്ളവർക്ക് പെട്ടെന്നുണ്ടാക്കാം. അല്ലാത്തവർക്കും ഉണ്ടാക്കിനോക്കാം.

വേണ്ടത് :-

വെണ്ടയ്ക്ക - ഏഴെട്ടെണ്ണം.
തേങ്ങ - നാലു ടേബിൾസ്പൂൺ.
ജീരകം - കാൽ ടീസ്പൂൺ.
കുരുമുളകുപൊടി - കാൽ ടീസ്പൂൺ.
പച്ചമുളക് - മൂന്ന്.
പുളിയുള്ള മോര് - കാൽ ലിറ്റർ.
ഉപ്പ്, മഞ്ഞൾപ്പൊടി ആവശ്യത്തിന്.
വറവിടാൻ, കടുക്, കറിവേപ്പില, ചുവന്ന മുളക്.

തേങ്ങയും ജീരകവും മിനുസമായി അരയ്ക്കുക. വെണ്ടയ്ക്ക കഴുകി മുറിക്കുക.
വെണ്ടയ്ക്ക, കുരുമുളകുപൊടി, ഉപ്പ്, മഞ്ഞൾപ്പൊടി എന്നിവ കുറച്ച് വെള്ളം ചേർത്ത് വേവിക്കുക. വെണ്ടയ്ക്ക വേഗം വേവും. കുക്കറിലൊന്നും വയ്ക്കരുത്. വെന്താൽ തേങ്ങ ചേർത്ത് ആവശ്യത്തിനു വെള്ളവും ചേർത്ത് തിളപ്പിക്കുക. മോരു ചേർക്കുക. തിളപ്പിച്ചാൽ നന്ന്. പുളിയുള്ള മോര് അല്ലെങ്കിൽ ശരിയാവില്ല. ഞാൻ മേമ്പൊടിയ്ക്ക് കുറച്ച് തൈര് ഒഴിച്ചു. അത് കട്ടയും വെള്ളവും പോലെ ആയി.

തിളച്ചാൽ കറിവേപ്പിലയിടുക. വാങ്ങി വറവിടുക. എളുപ്പമല്ലേ?

എരിവ് കൂടുതൽ വേണ്ടവർക്ക് കുറച്ച് കൂടുതൽ പച്ചമുളക് ഇടാം. വേണ്ടാത്തവർക്ക് കുറയ്ക്കാം.

ചോറെടുത്ത് കറിയൊഴിക്കുക, കഴിക്കുക.

കാരറ്റ് എരിശ്ശേരി

2010-04-27T20:04:00.003+05:30

കാരറ്റ് എരിശ്ശേരി എളുപ്പത്തിലുണ്ടാക്കാം. ഒരു സാദാ കൂട്ടാനാണിത്. സാമ്പാർ, കാളൻ, പുളിയിഞ്ചി, പച്ചടി എന്നീ പുളിയുള്ളതൊക്കെ ഒരുക്കിയിട്ടുണ്ടെങ്കിൽ അതിനൊപ്പം പുളിയില്ലാത്തൊരു കൂട്ടാൻ വേണമെന്ന് തോന്നിയാൽ ഉണ്ടാക്കാം.

ആവശ്യമുള്ളത്:-
കാരറ്റ് - മൂന്നെണ്ണം കഴുകി മുറിച്ചത്. തോല് അധികം ചെത്തിക്കളയരുത്. തോലിന്റെ അടുത്താണ് പോഷകം മുഴുവൻ.
തേങ്ങ - മൂന്ന് അല്ലെങ്കിൽ നാലു ടേബിൾസ്പൂൺ.
ജീരകം - കാൽ ടീസ്പൂൺ.
പരിപ്പ് - ചെറുപരിപ്പോ തുവരപ്പരിപ്പോ ആവാം. രണ്ട് ടേബിൾസ്പൂൺ. അധികം എടുത്താലും കുഴപ്പമൊന്നുമില്ല. അധികം വെള്ളം പോലെയാവില്ല അപ്പോൾ. കട്ടിയിൽ നിൽക്കും.
മുളകുപൊടി - കാൽ ടീസ്പൂണിലും കുറച്ച്. എരിവു വേണമെങ്കിൽ അളവ് കൂട്ടുക.
മഞ്ഞൾപ്പൊടിയും ഉപ്പും പാകത്തിനു ഇടുക.
വറവിടാൻ കറിവേപ്പില, കടുക്.

പരിപ്പ് കഴുകിയെടുക്കുക. അതിന്റെ കൂടെ കാരറ്റും, മഞ്ഞൾപ്പൊടി, മുളകുപൊടി എന്നിവയും ഇട്ട് വേവിക്കുക. തേങ്ങയും ജീരകവും കൂടെ അരയ്ക്കുക. കഷണങ്ങൾ വെന്താൽ ഉപ്പ് ചേർത്ത് ഇളക്കുക. തേങ്ങയും ചേർത്ത് ഇളക്കി ആവശ്യത്തിനു വെള്ളവും ചേർത്ത് തിളപ്പിയ്ക്കുക. വറവിടുക.

ചെറിയ കുട്ടികൾക്കും കൂടെ പറ്റിയ കറിയാണിത്. മുളകുപൊടിയിടാതെയുണ്ടാക്കിയാൽ മതി.

ചെറുകിഴങ്ങ് പുഴുക്ക്

2010-04-26T10:52:00.005+05:30

ചെറുകിഴങ്ങിനെക്കുറിച്ച് കൂടുതൽ ഒന്നും അറിയില്ല. അത് മണ്ണിന്നടിയിൽ ഉണ്ടാവുന്നു. ഡിസംബർ ജനുവരി മാസങ്ങളിലാണ് സാധാരണയായി കിട്ടുന്നത്. എല്ലാക്കാലത്തും ഉണ്ടാവുമോന്ന് അറിയില്ല.

കപ്പ പോലെ വെറുതേ പുഴുങ്ങിത്തിന്നാം. പുഴുക്കുവയ്ക്കാം.

പുഴുക്കുവയ്ക്കുമ്പോൾ കൂടെ മമ്പയറോ, കടലയോ, ചെറുപയറോ ഇടാം.

ഇവിടെ ചെറുകിഴങ്ങ് - ചെറുപയർ പുഴുക്കാണുണ്ടാക്കിയത്.

ചെറുകിഴങ്ങ് - എട്ട് പത്തെണ്ണം .
ചെറുപയർ - കാൽ കപ്പ്. (കുറച്ചുനേരം വെള്ളത്തിലിട്ടാൽ വേഗം വേവും).
തേങ്ങ - മൂന്ന് ടേബിൾസ്പൂൺ. (കുറച്ച് കൂടിയാലും കുഴപ്പമില്ല).
മുളകുപൊടി - കാൽ ടീസ്പൂൺ.
മഞ്ഞൾപ്പൊടി- കാൽ ടീസ്പൂണിലും കുറച്ച് കുറവ്.
ഉപ്പ്.

ചെറുകിഴങ്ങ് കഴുകിയെടുത്ത്, പുഴുങ്ങി തോലുകളയുക. അതായിരിക്കും എളുപ്പം.

ചെറുപയർ കഴുകിയെടുത്ത്, മഞ്ഞൾപ്പൊടി, മുളകുപൊടി എന്നിവയിട്ട് വേവിക്കുക. വെന്താൽ അതിലേക്ക് ഉപ്പും ചെറുകിഴങ്ങും ഇടുക.

കുറച്ചുനേരം തിളച്ച് യോജിച്ചശേഷം തേങ്ങ ഇടുക. മുകളിൽ കുറച്ച് വെളിച്ചെണ്ണ ഒഴിക്കാം. വറവിടണമെങ്കിൽ ആവാം. പുഴുക്കിന് വെള്ളം അധികം ഉണ്ടാവരുത്.

തേങ്ങ വെറുതെയിടാം. ഒന്ന് ചതച്ചെടുത്തും ഇടാം. മുളകുപൊടിയ്ക്ക് പകരം, പച്ചമുളകും തേങ്ങയും കൂടെ ചതച്ച് ഇടാം. ചുവന്ന മുളകും തേങ്ങയും ചതച്ചും ഇടാം. കൂടുതൽ സ്വാദുണ്ടാവും. എരിവ് പറ്റാത്തവർ മുളകൊന്നും ഇടാതെ പുഴുക്കുണ്ടാക്കിയാലും മതി.

മാങ്ങ ചക്കക്കുരു കൂട്ടാൻ

2010-04-20T09:54:00.007+05:30

മാങ്ങാചക്കക്കുരു കൂട്ടാൻ. നാടൻ കറിയാണിത്. മാങ്ങയും ചക്കയും ഇഷ്ടം പോലെ ഉണ്ടാവുന്ന കാലത്ത് വയ്ക്കാൻ പറ്റിയത്. എളുപ്പത്തിലുണ്ടാക്കുകയും ചെയ്യാം. ഇതിനാവശ്യമായ വസ്തുക്കളൊക്കെ എല്ലാ വീട്ടിലും ഉണ്ടാവുകയും ചെയ്യും.

മാങ്ങ - അധികം പുളിയില്ലാത്തത് രണ്ടെണ്ണം. പുളിയുണ്ടെങ്കിലും കുഴപ്പമൊന്നുമില്ല. കൂട്ടാനു പുളിയുണ്ടാവും, അത്രതന്നെ.
ചക്കക്കുരു - ഒരു പത്തുപതിനഞ്ചെണ്ണം.
തേങ്ങ - നാലു ടേബിൾസ്പൂൺ.
ജീരകം - കാൽ ടീസ്പൂൺ.
മഞ്ഞൾപ്പൊടി - കാൽ ടീസ്പൂൺ.
മുളകുപൊടി - കാൽ ടീസ്പൂൺ.
ഉപ്പ്.
വറവിടാനുള്ളത്.
കറിവേപ്പില.

മാങ്ങ തോലുകളഞ്ഞ് മുറിച്ചുവയ്ക്കുക.
തേങ്ങയും ജീരകവും ചേർത്ത് അരയ്ക്കുക.

ചക്കക്കുരു, ആദ്യം വേവിച്ച് തോലുകളഞ്ഞെടുക്കാം. അല്ലെങ്കിൽ തോലുകളഞ്ഞ് വേവിയ്ക്കാനിടാം. നിങ്ങൾക്ക് എളുപ്പം എങ്ങനെയാണോ അങ്ങനെ. കുക്കറിൽ കുറച്ചുനേരം വേവിച്ചാൽ അത് വേഗം തോലുകളഞ്ഞ് എടുക്കാം.

ചക്കക്കുരു ആദ്യം വേവിച്ചിട്ടുണ്ടെങ്കിൽ, അതും മാങ്ങാക്കഷണങ്ങളും ഉപ്പും മഞ്ഞൾപ്പൊടിയും മുളകുപൊടിയും ഇട്ട് കുറച്ച് വെള്ളവും ഒഴിച്ച് വേവാൻ വയ്ക്കുക.

അല്ലെങ്കിൽ, ചക്കക്കുരു, വെള്ളവുമൊഴിച്ച് വേവിയ്ക്കാൻ ഇടുക. അതു വെന്താൽ മാങ്ങയും ബാക്കിയുള്ളതൊക്കെയും ചേർക്കുക. മാങ്ങ പെട്ടെന്ന് വേവും.

ഒക്കെ വെന്താൽ തേങ്ങയരച്ചത് ചേർക്കുക. ആവശ്യത്തിനു വെള്ളവും ചേർക്കുക. വെന്തതിൽ വെള്ളമില്ലെങ്കിൽ മാത്രം വീണ്ടും വെള്ളം ചേർത്താൽ മതി.

തിളപ്പിക്കുക. തിളച്ചാൽ ഒന്നോ രണ്ടോ തണ്ട് കറിവേപ്പില ഇടുക. വാങ്ങിവച്ച് വറവിടുക. പച്ചമുളക് രണ്ടെണ്ണം, കഷണങ്ങൾ വേവിക്കുമ്പോൾ ചീന്തിയിടുകയും ചെയ്യാം. മുളകുപൊടി ഇടാതെ, തേങ്ങയരയ്ക്കുമ്പോൾ രണ്ട് - മൂന്ന് ചുവന്ന മുളക് ചേർത്ത് അരയ്ക്കുകയും ചെയ്യാം.

ബഹുവർണസാലഡ്

2010-04-12T10:40:00.002+05:30

സാലഡ് അഥവാ സലാഡ് ആരോഗ്യത്തിന് പറ്റിയ ഒന്നാണ്. വിവിധതരത്തിൽ സാലഡുകൾ ഉണ്ടാക്കാം. പല തരത്തിലുള്ള പഴങ്ങളും പച്ചക്കറികളും പയർവർഗ്ഗങ്ങളും പലതരത്തിൽ യോജിപ്പിച്ച് സാലഡുണ്ടാക്കാം. ചപ്പാത്തിയ്ക്കൊപ്പവും, ബിരിയാണി, പുലാവ് എന്നിവയ്ക്കൊപ്പവും ചോറിനൊപ്പവും സാലഡ് കഴിക്കാം. വെറുതെയും കഴിക്കാം.

ഇവിടെ ഉണ്ടാക്കിയ സാലഡ് എങ്ങനെ തയ്യാറാക്കി എന്നു പറയാം. എളുപ്പം ഉണ്ടാക്കാവുന്ന ഒന്നാണെന്ന് പറയേണ്ട കാര്യമില്ല. പിന്നെ ശ്രദ്ധിയ്ക്കേണ്ട കാര്യം നല്ല, കേടാകാത്ത, ദുസ്വാദില്ലാത്ത പച്ചക്കറികളും പഴങ്ങളുമൊക്കെ സാലഡിനുവേണ്ടി എടുക്കുക. എല്ലാം ഒരു കഷണമെടുത്ത് രുചിച്ചുനോക്കുക.

തക്കാളി - രണ്ടെണ്ണം.
ചെറുനാരങ്ങ - ഒരു കഷണം.
കക്കിരിക്ക - ഒന്ന്. അധികം വലുതും അധികം ചെറുതുമല്ലാത്തത്. (ചിത്രത്തിലെപ്പോലെ). കഴുകുക, തോലുകളയുക.
ഓറഞ്ച് - ഒന്ന്.
ഇഞ്ചി - ഒരു കഷണം. അധികം വലുതുവേണ്ട. തോലുകളഞ്ഞ് കഴുകിയെടുക്കുക.
വലിയ ഉള്ളി - ഒന്ന് വലുത്. തോലുകളയുക. കഴുകുക.
ഉപ്പ്.

എല്ലാം ചെറുതാക്കി അധികം കനമില്ലാതെ നീളത്തിൽ അരിയണം. ഓറഞ്ച്, തോലുകളഞ്ഞ് കുരു കളഞ്ഞ് ചെറുതാക്കി മുറിയ്ക്കുക. കുരു സാലഡിൽ ചേരരുത്. അതു കടിച്ചുപോയാല്‍പ്പിന്നെ കയ്പ്പോടു കയ്പ് ആയിരിക്കും.

അരിഞ്ഞുകഴിഞ്ഞാൽ അതിൽ ഉപ്പിടണം. എല്ലാം കൂടെ യോജിപ്പിക്കണം. പിന്നെ അതിൽ നാരങ്ങക്കഷണം പിഴിഞ്ഞ് ഒഴിച്ച് ഒന്നുകൂടെ യോജിപ്പിക്കുക. സാലഡ് തയ്യാർ.

വേണമെങ്കിൽ ഫ്രിഡ്ജിൽ വച്ച് തണുപ്പിക്കാം. കഴിക്കുന്നതിനു കുറച്ചുമുമ്പ് മാത്രം ഉണ്ടാക്കിയാൽ മതി.

കക്കിരിക്കയിലെ വെള്ളം വരും. അത് നല്ലതാണ്. ഇനി അതിഷ്ടമായില്ലെങ്കിൽ അടുത്തപ്രാവശ്യം ഉണ്ടാക്കുമ്പോൾ കക്കിരിക്ക ആദ്യം മുറിച്ച് ഉപ്പിട്ട് വെള്ളം പിഴിഞ്ഞുകളഞ്ഞതിനുശേഷം എടുക്കുക. അതത്ര നല്ല കാര്യമല്ല.

ഡു ഡു ലഡ്ഡു

2010-04-10T10:29:00.008+05:30

ലഡ്ഡു ഉണ്ടാക്കാൻ അത്ര എളുപ്പമല്ല. നല്ല ക്ഷമ വേണം. സമയം വേണം. അതൊക്കെയുണ്ടെങ്കിൽ തയാറായിക്കോളൂ. നമുക്ക് ലഡ്ഡുവുണ്ടാക്കാം.

ആദ്യം തന്നെ അതിനുള്ള വസ്തുവകകൾ ഒക്കെ ഒരുക്കിവയ്ക്കാം.

കടലപ്പൊടി/ബേസൻ - 200 ഗ്രാം.

പഞ്ചസാര - നാനൂറ് ഗ്രാം.

അണ്ടിപ്പരിപ്പ് - പത്തെണ്ണം.

ഉണക്കമുന്തിരി - 25 എണ്ണം

ഏലയ്ക്ക - എട്ട് ഏലയ്ക്ക തോലുകളഞ്ഞ് പൊടിച്ചത്.

ഡാൽഡ - കാൽക്കിലോ.

ഫുഡ് കളർ - മഞ്ഞ - കുറച്ച്

പാൽ - അല്പം.

കൽക്കണ്ടം - 50 ഗ്രാം അധികം പൊടിയല്ലാതെ പൊടിച്ചത്.

(അണ്ടിപ്പരിപ്പും മുന്തിരിയും കൽക്കണ്ടവുമൊന്നും ചിത്രത്തിൽ ഉള്ളത് മുഴുവൻ എടുത്തിട്ടില്ല.)

പഞ്ചസാരയിൽ വെള്ളമൊഴിച്ച്, അല്പം പാലുമൊഴിച്ച് ചൂടാക്കാൻ വയ്ക്കുക. പഞ്ചസാരപ്പാനിയ്ക്കു വേണ്ടിയാണ്.

കടലമാവ് കലക്കിവയ്ക്കുക. അധികം വെള്ളം വേണ്ട. അധികം കട്ടിയിലും വേണ്ട.

അണ്ടിപ്പരിപ്പ്, മുന്തിരി , വറുത്തുവയ്ക്കുക. ഡാൽഡയിൽത്തന്നെ മതി.

ഫുഡ്കളർ മൂന്നോ നാലോ നുള്ള്, പഞ്ചസാരപ്പാനി തയ്യാറായാൽ അതിലേക്കിട്ടിളക്കുക.

പാനി തയ്യാറാക്കുമ്പോൾ പാൽ ഒഴിക്കുന്നത് എന്തിനാണെന്നുവച്ചാൽ, പഞ്ചസാരയിലെ അഴുക്കെല്ലാം, മുകളിൽ പാടപോലെ പൊങ്ങിവരും.അതിനുവേണ്ടിയാണ്. അതു കോരിക്കളയുക.

പാനിയിൽ കുറച്ചു വെള്ളം വറ്റിയാൽ, പകുതി ഒരു പാത്രത്തിലേക്ക് കോരിയൊഴിക്കുക. വറ്റിക്കുന്ന പാനി കൂടുതൽ കുറുകിപ്പോയാൽ, അതിലേക്ക് ഈ പാനി ഒന്ന് തിളപ്പിച്ച് ചേർക്കാൻ ആണ് അത്.

പാനി തയ്യാറായോ? ആദ്യം എടുത്തുമാറ്റിവച്ച് പാനിയും കൂടെ ഒന്നുകൂടെ പാകത്തിനു വറ്റിച്ച് ഇതിലൊഴിക്കാൻ മറക്കണ്ട.

എന്നാൽ ഉടൻ തന്നെ ഒരു പാത്രം അടുപ്പത്തുവെച്ച് ഡാൽഡ ഒഴിച്ച് ചൂടാക്കുക.

ചൂടായാൽ അതിലേക്ക് കടലമാവ് തുളയുള്ള സ്പൂണിലേക്ക് കോരിയൊഴിക്കുക. ആ സ്പൂണിന് കണ്ണാപ്പ എന്നാണു പറയുക. എണ്ണപ്പലഹാരം ഉണ്ടാക്കുമ്പോൾ കോരിയെടുക്കാൻ ഉപയോഗിക്കുന്നത്.

അതിൽ നിന്ന് ഡാൽഡയിലേക്ക് മുത്തുകൾ പോലെ വീഴും. ആ മുത്തുകൾ മൂത്താൽ കോരിയെടുത്ത് പഞ്ചാരപ്പാനിയിലിടുക.

കടലമാവ് കലക്കിയത് മുഴുവൻ, മുത്തുകൾ ആക്കിയെടുക്കുക. ചിലപ്പോൾ ഒരുമിച്ചു കൂടിനിന്നേക്കും. അതൊക്കെ പെട്ടെന്ന് ഇളക്കി വേർതിരിക്കണം.

വേഗം വേണം.

പിന്നെ പാനിയും മുത്തുകളും ഇട്ടതിലേക്ക് അണ്ടിപ്പരിപ്പ്, മുന്തിരി, കൽക്കണ്ടം, ഏലയ്ക്കപ്പൊടി എന്നിവ ചേർക്കുക. രണ്ടു കൈയിലും അമർത്തി ഭംഗിയായി ഉരുട്ടുക. ചൂടോടെ ഉരുട്ടുക. ഇല്ലെങ്കിൽ ഉരുട്ടാൻ കിട്ടില്ല. ഉരുട്ടാൻ കഴിയാത്തത് ബാക്കി തിന്നുകയും ചെയ്യാം. അതൊന്നും സാരമില്ല.

ചൂട് നിൽക്കാനാണ് ഉരുളിയിൽ ഉണ്ടാക്കുന്നത്. കുഞ്ഞുലഡ്ഡു ആണെങ്കിൽ പതിനഞ്ചോളം എണ്ണം ഉണ്ടാവും.

ഇതത്ര ശരിയായിട്ടൊന്നുമില്ല. നിങ്ങൾ ഇതിലും നന്നായി ഉണ്ടാക്കിയെടുക്കുക. ഞങ്ങളെല്ലാം ഒത്തുകൂടിയ ഒരു വിശേഷത്തിന് വന്ന പാചകക്കാരിൽ നിന്നാണ് ഇത് പഠിച്ചത്. അന്നുണ്ടാക്കിയ മൂന്നു കിലോ കടലമാവിന്റെ ലഡ്ഡു മുഴുവൻ ഞാനാ ഉരുട്ടിയത്. എന്ത്! ആരൊക്കെയോ ഓടിവരുന്നുണ്ടെന്നോ? അതൊക്കെ എന്റെ അനിയത്തിക്കുട്ടികളാ. പിന്നെ ചില ചേച്ചിമാരും. അവരൊക്കെ സഹായിച്ചെന്ന് അവകാശപ്പെടും. അതൊന്നും നിങ്ങളു കണക്കാക്കരുത്.

എന്നാലും അവരെന്തെങ്കിലും പറഞ്ഞാലോ?

ഓടിയേക്കാം......

മാങ്ങാക്കാളൻ

2010-04-09T10:21:00.005+05:30

മാങ്ങാക്കാളൻ, മാമ്പഴക്കാളൻ, മാമ്പഴപ്പുളിശ്ശേരി, മധുരക്കാളൻ എന്നിങ്ങനെയൊക്കെയുള്ള പേരിട്ട് ഇതിനെ വിളിക്കാം. എന്തായാലും ഈ കൂട്ടാൻ അടിപൊളിയാണ്. ഉണ്ടാക്കിവെച്ചാൽ പെട്ടെന്ന് തീർന്നുപോകും. പഴുത്ത മാങ്ങ എന്നു പറഞ്ഞാൽത്തന്നെ മിക്കവർക്കും പ്രിയം. അപ്പോപ്പിന്നെ അതു വെറുതെ തിന്നുതീർക്കുന്നതിനു പകരം കൂട്ടാൻ വയ്ക്കാം. എന്നാൽ മാങ്ങയും തിന്നാം, കൂട്ടാനും കൂട്ടാം.

മാങ്ങാക്കാളൻ എളുപ്പത്തിലുണ്ടാക്കാം.

നല്ല പഴുത്ത മാങ്ങ വേണം - നാലെണ്ണം. ചിത്രത്തിൽ ഉള്ളതുപോലെ വലുതാണെങ്കിൽ നാലു മതി. അല്ലെങ്കിൽ നല്ല ചെറിയ നാടൻ മാങ്ങയാണെങ്കിൽ എട്ടെണ്ണം എടുക്കാം. നന്നായി പഴുത്തിട്ടുണ്ടെങ്കിൽ തോലു വലിച്ചുകളയാൻ പറ്റും. അല്ലെങ്കിൽ തോല് ചെത്തിക്കളയണം.

തേങ്ങ - ഒരു മുറി. അധികം വലുതും അധികം ചെറുതുമല്ലാത്ത തേങ്ങ ഒരു മുറി ചിരവിയെടുക്കുക. ഏതു കാളൻ ആയാലും തേങ്ങ നല്ലോണം വേണം.

ജീരകം - അര ടീസ്പൂൺ.

ചുവന്ന മുളക്/ വറ്റൽ മുളക് - 3 എണ്ണം.

തേങ്ങയും ജീരകവും മുളകും കൂടെ നന്നായി അരച്ചെടുക്കുക.

മഞ്ഞൾപ്പൊടി - കാൽ ടീസ്പൂൺ.
മോര്/ തൈര് - ഏകദേശം കാൽ ലിറ്റർ. മാങ്ങയ്ക്ക് പുളിയുണ്ടെങ്കിൽ പുളിയുള്ളത് ചേർക്കണ്ട. പുളി ഇഷ്ടമല്ലെങ്കിലും പുളിയില്ലാത്ത മോരോ തൈരോ ചേർക്കുന്നതാവും നല്ലത്. പക്ഷേ, കാളൻ എന്നു പറയുമ്പോൾ അതിന് കുറച്ച് പുളിയുണ്ടാവുന്നതാണ് നല്ലത്.

പച്ചമുളക് - മൂന്ന്. നീളത്തിൽ മുറിയ്ക്കുക.

വറവിടാൻ കടുക്, കറിവേപ്പില, മുളക്.

ഉലുവ വറുത്തുപൊടിച്ചത് - രണ്ടു നുള്ള്.

ഉപ്പ് - വേണ്ടതുപോലെ ചേർക്കാൻ.

ആദ്യം മഞ്ഞൾപ്പൊടി, ഉപ്പ്, പച്ചമുളക് എന്നിവ മാങ്ങയുടെ കൂടെ ഇട്ട്, കുറച്ച് വെള്ളവും ഒഴിച്ച് മാങ്ങ വേവിക്കുക.

കുക്കറിലാണ് വയ്ക്കുന്നതെങ്കിൽ മാങ്ങയിൽ വെള്ളം വേണ്ട. കൽച്ചട്ടിയിലോ പാത്രത്തിലോ വയ്ക്കുമ്പോൾ വെള്ളമില്ലാതെ പറ്റില്ല.

വെന്താൽ മോരു ചേർക്കുക.

മോരു തിളച്ചു യോജിച്ചാൽ തേങ്ങയരച്ചത് ചേർക്കുക.

തേങ്ങയും തിളച്ചാൽ ഒരു തണ്ട് കറിവേപ്പില ഇടുക.

വാങ്ങിവെച്ച് വറവിടുക.

ഉലുവപ്പൊടിയും ഇടുക.

അരയ്ക്കുമ്പോൾ പച്ചമുളക് ചേർക്കാം. അല്ലെങ്കിൽ മുളകുപൊടി ചേർക്കാം. മുളകു ചേർത്തരയ്ക്കാൻ കഴിയുമെങ്കിൽ അതാണ് നല്ലത്. മുളക് ഓരോരുത്തരുടെ ഇഷ്ടം പോലെ കൂട്ടുകയോ കുറയ്ക്കുകയോ ചെയ്യുക. വേവിക്കുമ്പോൾ പച്ചമുളക് ഇടുന്നത് മാത്രമായാലും മതി, നിങ്ങൾ എരിവ് പ്രിയർ അല്ലെങ്കിൽ.

വാഴക്കൂമ്പ് ഉപ്പേരി

2010-04-06T16:03:00.003+05:30

ഏതുകാലത്തും കിട്ടുന്നതാണ് വാഴപ്പഴം. വാഴ നട്ടുവളർത്തിയാൽ ഗുണം തന്നെ. വാഴയുടെ പഴം മാത്രമല്ല ഉപയോഗപ്രദം. വാഴയില ഏറ്റവും ഉപയോഗമുള്ള ഒന്നു തന്നെ. പിന്നെയാണ് കാമ്പും കൂമ്പും ഒക്കെ വരുന്നത്. പലരും വാഴയിലയും പഴവും അല്ലെങ്കിൽ കായയും മാത്രമെടുത്ത് കൂമ്പും കാമ്പും ഉപേക്ഷിക്കും. വാഴക്കുലയുടെ അടിയിൽ ഉള്ള/ അറ്റത്തുള്ള പൂവ് അല്ലെങ്കിൽ കൂമ്പ് കൊണ്ട് ഉപ്പേരി/തോരൻ വച്ച് അതും കൂട്ടി നല്ല സ്വാദോടെ ഊണുകഴിക്കാം. ആരോഗ്യത്തിനും നല്ലതുതന്നെ.

വാഴക്കൂമ്പ് - ഒന്ന്. ചിത്രത്തിൽ ഉള്ളപോലെ.
ഉഴുന്നുപരിപ്പ് - രണ്ട് ടീസ്പൂൺ
കടുക് - കുറച്ച്
ചുവന്ന മുളക് - ഒന്നോ രണ്ടോ. കഷണങ്ങളാക്കി മുറിയ്ക്കുക
ഉപ്പും മഞ്ഞൾപ്പൊടിയും ആവശ്യത്തിന്.
തേങ്ങ ചിരവിയത് - രണ്ട് ടേബിൾസ്പൂൺ.

വാഴക്കൂമ്പ് ഉപ്പേരി ഉണ്ടാക്കാൻ ആദ്യം തന്നെ വാഴക്കൂമ്പ്/പൂവ് എടുക്കുക. പുറമെ നിന്ന് കുറച്ച് പാളികൾ എല്ലാം നീക്കുക. എന്നിട്ട് കഴുകിയെടുത്ത് കൊത്തിയരിയുക. കൊത്തിയരിഞ്ഞുകഴിഞ്ഞാൽ അതിലേക്ക് കുറച്ച് വെളിച്ചെണ്ണ (ഒരു ടീസ്പൂൺ മതി) ഒഴിക്കുക. എന്നിട്ട് കുറച്ചുനേരം കൈകൊണ്ട് വട്ടത്തിൽ വട്ടത്തിൽ ഇളക്കിയാൽ അത് നാരോടെ കൂടിച്ചേർന്നു നിൽക്കുന്ന ഭാഗമൊക്കെ വേറെ വേറെ ആവും. കറയും ഉണ്ടാവില്ല. കാബേജ് മുറിച്ചെടുത്ത പോലെ ആവും. പിന്നെ അതിന്റെ ചെറിയ, കഷണങ്ങൾ/കോലുകൾ ഉണ്ടെങ്കിൽ എടുത്തുകളയാം.

ഒരു പാത്രം അടുപ്പത്തു തീയ്ക്കു മുകളിൽ വയ്ക്കുക. കുറച്ചു വെളിച്ചെണ്ണ ഒഴിക്കുക.

വെളിച്ചെണ്ണ ചൂടായാൽ ഉഴുന്നുപരിപ്പ് ഇടുക.

ഉഴുന്നുപരിപ്പ് ചുവന്നുവരുമ്പോഴേക്കും ചുവന്ന മുളക് പൊട്ടിച്ചത് ഇടുക.

അപ്പോൾത്തന്നെ കടുക് ഇടുക.

വറവ് ആയാൽ അതിലേക്ക് വാഴക്കൂമ്പ് മുറിച്ചുവച്ചത് ഇടുക.

ഉപ്പും മഞ്ഞൾപ്പൊടിയും ഇടാം. മുളകുപൊടി നിങ്ങൾക്കുവേണമെങ്കിൽ ഇടാം. ഇവിടെ ഇടാറില്ല.

അല്പം വെള്ളമൊഴിക്കാം.

ഒക്കെയിളക്കി അടച്ചുവയ്ക്കുക. തീ കുറച്ചേ വയ്ക്കാൻ പാടുള്ളൂ.

വെന്ത് വാങ്ങിയാൽ തേങ്ങ ചിരവിയത് ഇടണം.

ചില വാഴക്കൂമ്പിന്റെ ഉള്ളിലുള്ള ഭാഗം കയ്ക്കുമെന്ന് തോന്നുന്നു. വീട്ടിലുള്ളത്, നാടൻ വാഴകളുടേത്, അങ്ങനെ കയ്പ് തോന്നിയിട്ടില്ല. അതുകൊണ്ട് ഒട്ടും കളയാതെ മുഴുവൻ കൊത്തിയരിഞ്ഞെടുക്കാറുണ്ട്.

കാമ്പ് പെരക്ക്

2010-04-06T15:48:00.005+05:30

വാഴയുടെ ഉള്ളിലെ ഭാഗമാണ് കാമ്പ്. ട്യൂബ് പോലെയുണ്ടാവും. അത് പൊളിച്ചെടുക്കുക. പുറമെനിന്ന് കുറച്ച് പാളികൾ നീക്കണം. അങ്ങനെ ആക്കിയെടുത്താൽ കാമ്പ് പെരക്ക് ഉണ്ടാക്കാൻ തുടങ്ങാം. പെരക്ക്, പച്ചടി പോലെയാണ് ഏകദേശം. വ്യത്യാസം എന്താണെന്നു വെച്ചാൽ പച്ചടിയ്ക്ക് കഷണം വേവിക്കും, പെരക്കിനു വേവിക്കില്ല. കാമ്പ് പെരക്ക് ഉണ്ടാക്കാൻ എളുപ്പമാണ്.

വാഴക്കാമ്പ് - ഒരു കഷണം. ചിത്രത്തിൽ ഉള്ളതിന്റെ നാലിൽ ഒന്ന്.
തേങ്ങ ചിരവിയത് - മൂന്ന് ടേബിൾസ്പൂൺ.
കടുക് - കാൽ ടീസ്പൂൺ
തേങ്ങയും കടുകും അരയ്ക്കുക. വെള്ളത്തിനു പകരം മോരുവെള്ളം ഒഴിച്ച് അരയ്ക്കുക.

മുളകുപൊടി - കാൽ ടീസ്പൂണിലും അല്പം കുറവ്
പച്ചമുളക് വട്ടത്തിൽ അരിഞ്ഞത് - രണ്ടെണ്ണം. (നിർബ്ബന്ധമില്ല).
ഉപ്പ്
തൈർ - അരഗ്ലാസ്സ്.
പുളിയുള്ളത് ഇഷ്ടമാണെങ്കിൽ അത് ഒഴിക്കുക.
മോരായാലും മതി.

കാമ്പ്, വട്ടത്തിൽ, അധികം കനമില്ലാതെ മുറിക്കുക. മുറിക്കുമ്പോൾ, ഒരു വിരലുകൊണ്ട് അതിന്റെ മുകളിൽ തൊട്ടാൽ നൂല് ചുറ്റിയെടുക്കാം. അങ്ങനെയുള്ള നൂല്/നാര് കളയണം. കഴുകിയെടുക്കാം.

പിന്നെ ചെറുതായി അരിയുക. വളരെ ചെറുതാക്കുന്നതാവും നല്ലത്.

അതിലേക്ക് മുളകുപൊടിയിടുക. ഉപ്പിടുക. പച്ചമുളക് അരിഞ്ഞത് ഇടുക. തേങ്ങയരച്ചത് ചേർക്കുക. തൈർ ഒഴിക്കുക. പിന്നെ നിങ്ങൾക്ക് വേണമെങ്കിൽ വറവിടുക.

ചിലർ, കാമ്പ് ചെറുതാക്കി മുറിച്ചതിനുശേഷം, അതിൽ ഉപ്പിട്ടുവെച്ച്, കുറച്ചുനേരം കഴിഞ്ഞ് ആ വെള്ളം പിഴിഞ്ഞുകളഞ്ഞതിനുശേഷമാണ് പെരക്ക് ഉണ്ടാക്കുക. അങ്ങനെ വേണമെങ്കിൽ അങ്ങനെ ചെയ്യുക. അതിന്റെ ആവശ്യം ഇല്ലെന്നാണ് പുതിയ കണ്ടുപിടുത്തം.

സേമിയ പ്രഥമൻ

2010-03-22T21:22:00.007+05:30

സേമിയപ്പായസം എനിക്കിഷ്ടമുള്ളൊരു പായസം ആണ്. പണ്ടൊക്കെ മുറിച്ചുമുറിച്ചുള്ള സേമിയ അല്ല കിട്ടാറുണ്ടായിരുന്നത്. നീളത്തിലായിരുന്നു. ഇപ്പോ പല തരത്തിലും കിട്ടും. പായസം മിക്സ് വരെ. പണ്ട് സേമിയപ്പായസം ഉണ്ടാക്കുമ്പോൾ ഞങ്ങളായിരുന്നു അത് മുറിച്ചിരുന്നത്. അത് കുറച്ചെടുത്ത് മുറിച്ച് മുറിച്ച് ഇടുമായിരുന്നു. പൊട്ടിച്ചിടുമ്പോൾ അപ്പുറവും ഇപ്പുറവുമൊക്കെ തെറിച്ചുപോകും കഷണങ്ങൾ. ഇപ്പോ പൊട്ടിച്ചു വച്ചത് കിട്ടും. എളുപ്പമായി ജോലി. എന്നാലും പൊട്ടിച്ചിടാത്തതാണ് എനിക്കിഷ്ടം.

സേമിയ കൊണ്ട് സാധാരണയായി പാലൊഴിച്ച് പഞ്ചസാരയുമിട്ടല്ലേ പായസം വയ്ക്കുന്നത്? തേങ്ങാപ്പാലൊഴിച്ച്, ശർക്കരയുമിട്ട് പ്രഥമൻ തന്നെ ആയാലെന്താന്ന് തോന്നിയപ്പോൾ അങ്ങനെ ചെയ്തു.

കഷണങ്ങൾ ആയിട്ടുള്ള സേമിയ ആണ് കിട്ടിയത്. തേങ്ങാപ്പാലും വാങ്ങി. ഒക്കെ എളുപ്പം.

വേണ്ടത് എന്തൊക്കെയാണെന്ന് പറയാം. പായസം ഉണ്ടാക്കുന്നത് എളുപ്പമാണ്.

സേമിയ/വെർമിസെല്ലി - നൂറ് ഗ്രാം.
അണ്ടിപ്പരിപ്പും മുന്തിരിയും കുറച്ച്
നെയ്യ് - കുറച്ച്. സേമിയ വറുക്കാനും, അണ്ടിപ്പരിപ്പും മുന്തിരിയും വറവിടാനും ആവശ്യമുള്ളത്.

ശർക്കര - ചിത്രത്തിലെ ശർക്കര പോലെയുള്ളത് പത്ത് ആണി. കല്ലൊക്കെ ഉള്ളതാണെങ്കിൽ അത് അടുപ്പത്ത് വെച്ച് ഉരുക്കി അരിച്ചെടുത്താൽ നല്ലത്. പായസത്തിൽ കല്ലുകടി ഒഴിവാക്കാം.

തേങ്ങാപ്പാൽ - സാധാരണ പാലിന്റെ കട്ടിയിൽ 300 എം എൽ.
വെള്ളം ഒരു ലിറ്റർ. ചൂടുള്ളതാണ് നല്ലത്.

സേമിയ അല്പം നെയ്യൊഴിച്ച് വറുക്കുക. അധികം ചുവക്കേണ്ട കാര്യമൊന്നുമില്ല.

വറുത്തുകഴിഞ്ഞാൽ അതിലേക്ക് വെള്ളം ഒഴിച്ച് വേവിക്കുക.

വെന്തുകൊണ്ടിരിക്കുന്നു.

വെന്തോന്ന് നോക്കിയിട്ട് ശർക്കര ചേർക്കുക.

ശർക്കരയും കുറച്ചുനേരത്തോളം വേവണം. വെള്ളം ഉണ്ടാവും മിക്കവാറും. ഇല്ലെങ്കിൽ കുറച്ചുകൂടെ ഒഴിക്കാം. ശർക്കര ഇടുമ്പോൾ.

ശർക്കരയും വെന്തുയോജിച്ചാൽ തേങ്ങാപ്പാൽ ചേർക്കുക. ഇവിടെ തേങ്ങാപ്പാൽ കുറച്ചും കൂടെ ചേർത്തിരുന്നു. അതിന്റെ സ്വാദ് മുന്നിൽ നിൽക്കും.

ഇഷ്ടമാണെങ്കിൽ കുറച്ചും കൂടെ തേങ്ങാപ്പാൽ ചേർക്കാം.

തേങ്ങാപ്പാല് ചേർത്തശേഷവും കുറച്ചുനേരം വേവിക്കുക.

ആയാൽ വാങ്ങിവച്ച് അണ്ടിപ്പരിപ്പും മുന്തിരിയും നെയ്യിൽ വറുത്ത് ഇടുക.

നല്ലപോലെ തണുത്താലാണ് ഏറ്റവും സ്വാദ് തോന്നുന്നത്. വെള്ളം പാകം നോക്കിയിട്ട് ചേർക്കണം. സേമിയ ആയതുകൊണ്ട് തണുക്കുമ്പോൾ കട്ടിയാവും. ഏലയ്ക്കപ്പൊടിയും ഇടാം. തേങ്ങ പിഴിഞ്ഞിട്ട് പാലെടുക്കുകയാണെങ്കിൽ ആദ്യം വെള്ളം അധികമുള്ള പാലൊഴിച്ച് വേവിക്കുക. പിന്നെ കുറച്ച് കട്ടിയുള്ളത്. പിന്നെ വാങ്ങിവച്ചതിനുശേഷം ആദ്യം പിഴിഞ്ഞുവച്ച കട്ടിയുള്ള, കുറച്ചുമാത്രമുള്ള പാൽ ചേർക്കുക.

കൊട്ടത്തേങ്ങയും ചെറുതായി മുറിച്ച് വറവിടാം.

തേൻ‌കുഴൽ

2010-03-19T11:03:00.004+05:30

തേനുമായിട്ട് വല്യ ബന്ധമൊന്നുമില്ലെങ്കിലും ഈ പലഹാരത്തിന്റെ പേരു തേൻ‌കുഴൽ എന്നാണ്. അനിയത്തിക്കുട്ടിയുടെ വീട്ടിൽ പോയപ്പോൾ അവിടെയിരിക്കുന്നു തേൻ‌കുഴൽ. തിന്നുന്ന ജോലിയല്ലേ പിന്നെ ഉള്ളൂ. അവിടത്തെ അമ്മ പാചകനിപുണയാണ്. അവിടിരുന്ന് തിന്നുനിറച്ചതിന്റെ രുചി നാവിൽ ഉള്ളതുകൊണ്ട് ഞാനും തേൻ‌കുഴൽ തന്നെ ഉണ്ടാക്കാംന്ന് വെച്ചു. തിന്നണംന്ന് വിചാരം ഉണ്ടെങ്കിൽ ഉണ്ടാക്കാനും എളുപ്പം.

ഇതിനാവശ്യമുള്ളത് വീട്ടിൽത്തന്നെ മിക്കവാറും ഉള്ളതുതന്നെയാവും. പറയാം. ഏറ്റവും ആദ്യം ചെയ്യേണ്ടത് കുറച്ച് ഉഴുന്ന് വെള്ളത്തിൽ കുതിർത്തുവയ്ക്കണം. കുതിർക്കുന്നതിനുമുമ്പ് അളവെടുത്തില്ല. കുതിർന്ന് അരച്ചെടുത്താൽ ഉള്ള അളവേ എടുത്തുള്ളൂ. ഇതിനു വേണ്ടി ഉഴുന്ന് എടുത്തശേഷം, ബാക്കിയുള്ളത് കൊണ്ട് വേറെ എന്തെങ്കിലുമുണ്ടാക്കാം. രണ്ടോ മൂന്നോ മണിക്കൂർ കുതിർന്നാൽ മിനുസമായി വെണ്ണപോലെ അരയ്ക്കണം.

അരിപ്പൊടി - മുന്നൂറ് -300 - ഗ്രാം എടുത്തു.
അരച്ചെടുത്ത ഉഴുന്ന് - 12 ടേബിൾസ്പൂൺ.
ജീരകം - ഒരു ടീസ്പൂൺ
എള്ള് - ഒരു ടീസ്പൂൺ.
എള്ളും ജീരകവും കുറയ്ക്കണമെങ്കിൽ കുറയ്ക്കാം.
കായം പൊടി - കുറച്ച് ഇടണം
പിന്നെ ഉപ്പ്
മുളകുപൊടി - കാൽടീസ്പൂൺ - അധികം വേണമെങ്കിൽ നിങ്ങൾക്ക് ചേർക്കാം. തീരെ വേണ്ടെങ്കിൽ ഒഴിവാക്കാം.

അരിപ്പൊടിയിലേക്ക് ഉഴുന്നരച്ചതും ബാക്കിയുള്ളതും ഒക്കെക്കൂട്ടി കുഴയ്ക്കുക. ചപ്പാത്തിയ്ക്ക് കുഴയ്ക്കുന്നതുപോലെ ആവും. നല്ല കട്ടിയായിപ്പോവരുത്. അങ്ങനെ ആയാൽ ഉഴുന്ന് കുറച്ചും കൂടെ കൂട്ടണം. ഉഴുന്നരച്ചതിൽ ഉള്ള വെള്ളം മതിയാവും കൂട്ടിന്. ഇവിടെ അതുമതിയായി. വേറെ വെള്ളം കൂട്ടിയില്ല. ഉഴുന്നിൽ വെള്ളം കൂട്ടി അരയ്ക്കണം എന്നു വിചാരിച്ചിട്ട് ഒരുപാട് വെള്ളം ചേർക്കരുത്. അത് മിനുസമായി അരയാൻ പാകത്തിനുള്ള വെള്ളം മതി.

എല്ലാം യോജിപ്പിച്ച് അഞ്ചുമിനുട്ട് വയ്ക്കാം. നിർബന്ധമൊന്നുമില്ല. കുഴയ്ക്കുമ്പോൾ കുറച്ച് വെളിച്ചെണ്ണയും ചേർക്കാം. വെളിച്ചെണ്ണ വല്യൊരു ചീനച്ചട്ടിയിലോ ഉരുളിയിലോ ചൂടാവാൻ വയ്ക്കുക.

പിന്നെ നാഴിയെടുത്ത്/പ്രെസ്സ് എടുത്ത് (മുകളിൽ ഉള്ള ചില്ലാണ് ഇടേണ്ടത്. അങ്ങനെ ഒറ്റയ്ക്കുള്ള ഒരു ചില്ലും ഉണ്ടാവും. അതെടുത്താലും മതി. അപ്പോ വേഗം തീരില്ല) അതിൽ നിറച്ച് ചൂടായ വെളിച്ചെണ്ണയിലേക്ക് നേരിട്ട് പിഴിയുക. കുറേ വട്ടത്തിൽ വട്ടത്തിൽ പിഴിയരുത്. കുറച്ച് പിഴിഞ്ഞ് നിർത്തുക. അല്ലെങ്കിൽ ഒട്ടിപ്പിടിക്കുന്നിടത്ത് ശരിക്കും വേവില്ല. പിന്നെ തിരിച്ചും മറിച്ചുമൊക്കെ ഇട്ട് എടുത്തുവയ്ക്കുക. എണ്ണ നന്നായി ചൂടായാൽ തീ കുറയ്ക്കണം. പിന്നെ അടുത്തത് പിഴിഞ്ഞുകഴിഞ്ഞിട്ട് തീ കൂട്ടിയാൽ മതി. തീ കുറയ്ക്കുകയും കൂട്ടുകയും ചെയ്യേണ്ടിവരും.

വെറുതെയൊന്ന് നോക്കാൻ‌വേണ്ടി പ്ലേറ്റിലേക്കു പിഴിഞ്ഞുനോക്കി. അതാണിത്.

ഏറ്റവും കൂടുതൽ ശ്രദ്ധിക്കേണ്ടത് എണ്ണയിലേക്കാണ് പിഴിയുന്നത് എന്ന കാര്യമാണ്. അപകടങ്ങളൊന്നും ഇല്ലാതെ സൂക്ഷിക്കുക. തീ കുറച്ച്, കൈ മുകളില്‍പ്പിടിച്ച് പിഴിയുക. പിഴിയുന്നതിനിടയ്ക്ക് എണ്ണപ്പാത്രമൊന്നും തട്ടിപ്പോകാതെ സൂക്ഷിക്കുക.

പിഴിഞ്ഞുകോരിയെടുത്ത് എണ്ണയൊക്കെ പോയാൽ, തണുത്താൽ, പാത്രത്തിലോ കുപ്പിയിലോ ഇട്ട് അടച്ചുവയ്ക്കുക. അല്ലെങ്കിൽ അപ്പോത്തന്നെ തിന്നുക.

ഇതിൽ വ്യത്യാസം വേണമെങ്കിൽ കുറച്ച് കടലമാവ് ചേർക്കാം. പക്ഷേ ഉഴുന്നും അരിയും പോലെയല്ല കടലമാവ്. ആരോഗ്യത്തിനു അത്ര നല്ലതല്ല. അരിപ്പൊടിയ്ക്കു പകരം പുഴുങ്ങലരി വെള്ളത്തിലിട്ട് അരച്ചും എടുക്കാം. അപ്പോപ്പിന്നെ എന്തായാലും മുറുക്കത്തിനുവേണ്ടി കടലമാവ് കൂട്ടേണ്ടിവരും. ഉഴുന്നിലും അരിയിലും വെള്ളം ആയിരിക്കുമല്ലോ.

ചില്ല് വ്യത്യാസം ഉണ്ടെങ്കിൽ കുറച്ചും‌കൂടെ വലുപ്പം ഉണ്ടാവും. മുറുക്കിന്റെ ചില്ല് പോലുള്ള ഒരു ചില്ലുണ്ട്. അതിൽ പിഴിഞ്ഞാലും കുറച്ച് വലുപ്പക്കൂടുതൽ ഉണ്ടാവുമായിരിക്കും.

ചേമ്പ് പുളിങ്കറി

2010-03-15T10:42:00.004+05:30

പുളിങ്കറി എന്നാൽ പുളി ചേർത്തുവയ്ക്കുന്ന കറി. പുളിശ്ശേരിയിൽ മോരും പുളിങ്കറിയിൽ പുളിയും. ഒരു സാദാ കറി. ഇവിടെ പുളിങ്കറി വച്ചത് ചേമ്പുകൊണ്ടാണ്. എന്തൊക്കെ വേണംന്ന് പറയാം.

ചേമ്പ് - ചിത്രത്തിൽ ഉള്ളതിന്റെ പകുതി. (ചിത്രം കാണാത്തവർക്ക്, ഒരു വല്യ ചേമ്പിന്റെ പകുതി) - തോലുകളഞ്ഞ് കഷണങ്ങളാക്കിയത്. കഴുകിയെടുക്കുക.

തേങ്ങ ചിരവിയത് നാലു ടേബിൾസ്പൂൺ, അര ടീസ്പൂൺ ജീരകവും ചേർത്ത് നന്നായി അരച്ചത്. (കുറച്ച് അങ്ങോട്ടോ ഇങ്ങോട്ടോ ഒക്കെ ആയിപ്പോയാൽ വല്യ കുഴപ്പമില്ല).

നെല്ലിക്കാവലുപ്പത്തിൽ പുളിയെടുത്ത്, കാൽ ഗ്ലാസ്സ് വെള്ളത്തിൽ ഇട്ടുവച്ച് കുറച്ചുകഴിഞ്ഞാൽ ആ വെള്ളം മാത്രം എടുക്കുക. പുളി ചൂടുവെള്ളത്തിലിട്ടാൽ വേഗം പിഴിഞ്ഞ് വെള്ളം എടുക്കാൻ പറ്റും.

മുളകുപൊടി - കാൽ ടീസ്പൂൺ
മഞ്ഞൾപ്പൊടി - കാൽ ടീസ്പൂണിലും അല്പം കുറച്ച്
ഉപ്പ്
വറവിടാൻ - കടുക് മുളക് കറിവേപ്പില

ചേമ്പ് കഷണങ്ങൾ ഉപ്പും മഞ്ഞൾപ്പൊടി, മുളകുപൊടി എന്നിവയും ഇട്ട് ആവശ്യത്തിനുമാത്രം വെള്ളം ചേർത്ത് നല്ലോണം വേവിക്കണം. വെന്താൽ അതിൽ പുളി വെള്ളം ചേർത്ത് കുറച്ചുനേരം തിളപ്പിക്കണം. തേങ്ങ ചേർക്കുമ്പോഴോ പുളി ചേർക്കുമ്പോഴോ കറിയിൽ ആവശ്യമുള്ളത്ര വെള്ളവും ചേർക്കണം. വെന്തു കഴിഞ്ഞാൽ വെള്ളം കുറവാണെങ്കിൽ ചേർത്താൽ മതി. പുളി വെന്താൽ തേങ്ങ ചേർക്കുക. അതും തിളച്ചാൽ വാങ്ങിവെച്ച് വറവിടുക.

വ്യത്യാസം വരുത്തണമെങ്കിൽ, കഷണം വേവിക്കുമ്പോൾ, കുറച്ച് പച്ചമുളക് ചീന്തിയിടാം . പിന്നെ തുവരപ്പരിപ്പും ഇടാം. ശരിക്കുള്ള പുളിങ്കറി അങ്ങനെയാണ്.

ചേമ്പിനു കൊഴുപ്പുള്ളതുകൊണ്ട് പരിപ്പ് ഒഴിവാക്കിയെന്നേ ഉള്ളൂ. വല്യ ചേമ്പ് കിട്ടിയതുകൊണ്ട് അതെടുത്തു. ചെറിയ ചേമ്പ് ആയാലും മതി.

ചക്കപ്പപ്പടം

2010-02-23T09:39:00.006+05:30

ചക്കപ്പപ്പടം തിന്നിട്ടുണ്ടോ? ഇല്ലെങ്കിൽ ഈ വേനൽക്കാലത്ത് ചക്കപ്പപ്പടം ഉണ്ടാക്കിത്തിന്നുക. വേനൽക്കാലമായി. ഉണക്കിയെടുത്ത് സൂക്ഷിക്കുന്നതൊക്കെ ഉണ്ടാക്കാനുള്ള കാ‍ലമായി. ചക്കക്കാലമായതുകൊണ്ട് ചക്കപ്പപ്പടം തന്നെ ആയിക്കോട്ടെ ആദ്യം. അമ്മായി കുറേ ഉണ്ടാക്കിവച്ച് ഞങ്ങൾക്കൊക്കെ തരാറുണ്ടായിരുന്നു. ഇപ്രാവശ്യം ഞാൻ തന്നെ തുനിഞ്ഞിറങ്ങി. അമ്മായിയോടും മറ്റുള്ളവരോടുമൊക്കെ അഭിപ്രായം ചോദിച്ചറിഞ്ഞു. വളരെക്കുറച്ച് ഉണ്ടാക്കി. വെയിലിനും ചക്കയ്ക്കും ക്ഷാമമില്ലല്ലോ തൽക്കാലം. സമയം കൂടുതലുള്ളപ്പോൾ കൂടുതലുണ്ടാക്കാം.

ചക്കപ്പപ്പടം ഉണ്ടാക്കാൻ ആവശ്യമുള്ളത്:-

പച്ചച്ചക്കച്ചുള - കുരു കളഞ്ഞ് എടുക്കുക.
കായം പൊടി
മുളക് അല്ലെങ്കിൽ മുളകുപൊടി
ജീരകം
എള്ള്
ഉപ്പ്

ഞാൻ 25 ചുളയാണെടുത്തത്.
ഒരു ടീസ്പൂൺ മുളകുപൊടിയിട്ടു. കുറച്ച് കായം ഇട്ടു. ജീരകം ഒരു ടീസ്പൂൺ ഇട്ടു. എള്ള് രണ്ട് ടീസ്പൂൺ ഇട്ടു. ഉപ്പിട്ടു.

പപ്പടം ഉണ്ടാക്കുന്ന വിധം വളരെ എളുപ്പമാണ്.

ആദ്യം ചുള വേവിക്കണം.

അത് തണുത്താൽ അരച്ചെടുക്കണം.

എന്നിട്ട് ബാക്കി ചേരുവകളൊക്കെ ചേർക്കണം.
അല്ലെങ്കിൽ മുളകും ഉപ്പുമൊക്കെ അരയ്ക്കുമ്പോൾ ചേർക്കാം. അരയ്ക്കുമ്പോൾ ചേർത്താൽ ഒരു ഗുണം കൂടെയുണ്ട്. അവിടവിടെയായിട്ട് ആവില്ല ഒന്നും. എല്ലായിടത്തും ഒരുപോലെ ഉപ്പും മുളകുമൊക്കെ പിടിക്കും.
മുളകുപൊടിയ്ക്കും മുളകിനും പകരം പച്ചമുളക് ചേർക്കാം അരയ്ക്കുമ്പോൾ.

എല്ലാം യോജിപ്പിച്ച ശേഷം, പായയിലോ തുണിയിലോ പരത്തി വെയിലത്ത് വച്ച് ഉണക്കിയെടുക്കുക. പ്ലാസ്റ്റിക് കടലാസിൽ ആയാലും മതി. കനം കുറച്ച് പരത്താൻ കഴിയുമെങ്കിൽ നല്ലത്.

നല്ല വെയിലു വേണം. നല്ല പോലെ ഉണങ്ങുകയും വേണം.

കുറച്ചുദിവസം ഉണക്കിയെടുക്കാം. കൂടുതൽ ദിവസം ഇരിക്കണമെങ്കിൽ നല്ലപോലെ ഉണക്കുന്നതാവും നല്ലത്.

ചേരുവകളൊക്കെ ഏകദേശം ഒരു അളവുനോക്കി ഇടുന്നതാവും നല്ലത്. എരിവും ഉപ്പുമൊക്കെ. 25 ചുളയ്ക്ക് ഒരു ടീസ്പൂൺ മുളകുപൊടി ഇട്ടാൽ എരിവുണ്ട്. എരിവു തീരെ വേണ്ടെന്നുള്ളവർ മുളകൊന്നും ചേർക്കണമെന്നുമില്ല.

നന്നായി ഉണക്കിക്കഴിഞ്ഞാൽ വേണ്ടപ്പോൾ വെളിച്ചെണ്ണയിലിട്ട് വറുത്തെടുക്കുക.

കുരുമുളകുരസം

2010-02-22T08:54:00.003+05:30

അമ്മമ്മയ്ക്ക് ഇഷ്ടമുണ്ടായിരുന്നൊരു രസമാണ് ഇത്. ഉണ്ടാക്കാനും എളുപ്പം. തോന്നിയപോലെയൊന്നും ഉണ്ടാക്കുന്നത് അമ്മമ്മയ്ക്കിഷ്ടമില്ലായിരുന്നു. കൽച്ചട്ടിയിൽ ഉണ്ടാക്കണം. അരയ്ക്കാനുള്ളത് അരച്ചുചേർക്കണം എന്നൊക്കെയുണ്ടായിരുന്നു. എന്നാലേ അതിന്റെ ഗുണവും സ്വാദും ഉണ്ടാവൂ. ഞാൻ അതുപോലെയൊക്കെ ഉണ്ടാക്കി.

കുരുമുളക് രസം ഉണ്ടാക്കാൻ എളുപ്പം കഴിയും.

കുരുമുളക് പൊടി - ഒരു ടീസ്പൂൺ
ജീരകം - കാൽ ടീസ്പൂൺ അരച്ചത്
മഞ്ഞൾപ്പൊടി - കാൽ ടീസ്പൂൺ
പുളി - വലിയ നെല്ലിക്കാവലുപ്പത്തിൽ വെള്ളത്തിൽ ഇട്ട് കുറച്ചുകഴിഞ്ഞ് പിഴിഞ്ഞ് വെള്ളം എടുക്കുക. ചൂടുള്ള വെള്ളത്തിൽ ഇട്ടാൽ വേഗം പിഴിഞ്ഞെടുക്കാം. അര ഗ്ലാസ്സ് വെള്ളത്തിൽ ഇട്ടാൽ കുഴപ്പമില്ല.
ശർക്കര - ഒരു ആണി.
ഉപ്പ്
വറവിടാൻ, കടുക്, മുളക്, കറിവേപ്പില.

പുളിവെള്ളവും, കുരുമുളകുപൊടി, മഞ്ഞൾപ്പൊടി, ഉപ്പ്, എന്നിവ അടുപ്പത്ത് തിളയ്ക്കാൻ വയ്ക്കുക. കുറച്ച് വെള്ളവും ചേർക്കാം. രസമല്ലേ. വേവ് പകുതിയായാൽശർക്കര ഇടാം. ശർക്കരയും വെന്ത് യോജിച്ചാൽ ജീരകം അരച്ചത് ചേർക്കുക. അതും യോജിച്ച് തിളച്ചാൽ വറവിടുക.

കുരുമുളക് പൊടി കൂടുതൽ ചേർക്കണമെങ്കിൽ ആവാം. ഓരോരുത്തരുടെ ഇഷ്ടം പോലെ. ജീരകപ്പൊടിയും ചേർക്കാം. അരയ്ക്കുന്നതിനുപകരം.

എന്തുപാകം ചെയ്യാൻ ആണെങ്കിലും, സ്റ്റൗവിൽ കൽച്ചട്ടി വയ്ക്കുമ്പോൾ നല്ലപോലെ ശ്രദ്ധിയ്ക്കണം. തീ കുറച്ചേ എപ്പോഴും വയ്ക്കാവൂ. പിന്നെ നന്നായി തിളയ്ക്കുമ്പോൾ സ്റ്റൗ ഓഫ് ചെയ്യുകയും ചെയ്യാം. അല്ലെങ്കിൽ ചിലപ്പോൾ തിളച്ചു താഴെപ്പോകും. കൽച്ചട്ടിയുടെ ചൂടുകൊണ്ട് തീയിൽ നിന്നു മാറ്റിയാലും തിളയ്ക്കും.

ചക്ക പെരട്ടിയുപ്പേരി

2010-02-21T22:20:00.003+05:30

ചക്ക കാണാത്ത മലയാളിയുണ്ടോ? കഴിക്കാത്ത മലയാളിയുണ്ടോ? ഇഷ്ടമില്ലാത്തവർ എന്തായാലും ഉണ്ടാവും. ഇഷ്ടമുള്ളവർ അതിലേറെ ഉണ്ടാവും. ചക്കക്കാലമായി. ഇടിച്ചക്കയുടെ കാലം കഴിഞ്ഞ് മൂത്ത ചക്കയിലേക്കെത്തി. ഒരു ചക്കയ്ക്ക് എത്ര ഭാഗമുണ്ടെന്ന് അറിയാമോ?

കരൂൾ - ചക്കയുടെ മുള്ളുള്ള ഭാഗത്തിന് പറയുന്നതാണ്.
മടൽ - മുള്ളു കഴിഞ്ഞ ഭാഗം.
കൂഞ്ഞ് - നടുവിലുള്ള ഭാഗം. അവിടെയാണ് ചക്കപ്പശ/ചക്കവിളഞ്ഞി/ചക്കമുളഞ്ഞ് ഉണ്ടാവുക.
ചവിണി/ചകിണി - വെളുത്ത നൂലുപോലെയുള്ള ഭാഗം.
ചുള - ചക്കയുടെ ശരിക്കുപയോഗിക്കുന്ന ഭാഗം.
പോണ്ടി - കുരുവിന്റെ മുകളിലുള്ള വെളുത്ത ഭാഗം
തോല് - കുരുവിനു മുകളിലുള്ളത്
പിന്നെ ചക്കക്കുരു - ചക്കക്കുള്ളിലെ കുരു.

ചക്ക അപ്പാടെയും, ഭാഗം ഭാഗമായും പല വിഭവങ്ങളും ഉണ്ടാക്കാം. എന്തായാലും ചക്കക്കാലത്ത് ചക്കവിഭവമില്ലെങ്കിൽ പിന്നെന്ത് പാചകം.

ഇത് ചക്കയുപ്പേരിയാണ്. ചോറിനു മാത്രമല്ല ചായപ്പലഹാരമായും ഇതുണ്ടാക്കാം. ചക്ക പെരട്ടി ഉപ്പേരി എന്നാണ് പറയുന്നത്. ചക്ക മെഴുക്കുപുരട്ടി, ചക്കത്തോരൻ എന്നൊക്കെപ്പറയാം.

ചക്കച്ചുളയെടുത്ത്, കുരുവും, മുകളിലും താഴെയുള്ള ഭാഗവും മുറിച്ച്, നീളത്തിൽ മുറിച്ചെടുക്കുക. മൂക്കും വാലും ഉപ്പേരിയിൽ ഇടുന്നതുകൊണ്ട് കുഴപ്പമൊന്നുമില്ല.

പാത്രം അടുപ്പത്ത് വച്ച്, അതിൽ രണ്ടു ടേബിൾസ്പൂൺ വെളിച്ചെണ്ണയൊഴിക്കുക. ഒരു ടീസ്പൂൺ ഉഴുന്നിടുക. ഉഴുന്ന് ചുവന്നു വന്നാൽ കടുക്, ചുവന്ന മുളക് പൊട്ടിച്ചത് എന്നിവയിടുക. അത് പൊട്ടി പാകമായാൽ കറിവേപ്പിലയിടുക. അതിലേക്ക് ചക്കച്ചുള മുറിച്ചുവച്ചതിടുക. ഉപ്പിടുക, മഞ്ഞളിടുക. അടച്ചുവയ്ക്കുക.
തീ കുറച്ചുവെച്ച് വേവിച്ചാൽ വെള്ളം മിക്കവാറും ഒഴിക്കേണ്ടിവരില്ല. ഇനി കരിഞ്ഞുപോകും എന്നു തോന്നുന്നെങ്കിൽ അല്പം മാത്രം വെള്ളം ചേർക്കാം.

വെന്ത് പാകമായാൽ വാങ്ങിവച്ച് ചിരവിയ തേങ്ങ ചേർക്കുക.

പനീർ മസാലക്കറി

2010-01-13T16:00:00.006+05:30

പനീർ കൊണ്ടൊരു മസാലക്കറി. സാദാ മസാലക്കറി. ഉരുളക്കിഴങ്ങും കാരറ്റും ഒക്കെക്കൊണ്ടുണ്ടാക്കുന്നതിൽ പനീറും ചേർക്കുന്നുവെന്ന് വിചാരിച്ചാൽ മതി.

പനീർ വേണം - നൂറ് ഗ്രാം. അത് കഷണമല്ലെങ്കിൽ കഷണങ്ങളാക്കി എണ്ണയിലിട്ട് വറുത്തെടുക്കണം. ചുവപ്പു നിറം വരുന്നതാണ് നിങ്ങൾക്കിഷ്ടമെങ്കിൽ അങ്ങനെ, അല്ലെങ്കിൽ ഒന്ന് എണ്ണയിലിട്ട് കോരിയെടുക്കുകയാണെങ്കിൽ അങ്ങനെ.

പാചകയെണ്ണ - വെളിച്ചെണ്ണയേക്കാൾ നല്ലത് സൂര്യകാന്തിയെണ്ണയായിരിക്കും.

ഉരുളക്കിഴങ്ങ് - നാലെണ്ണം. അധികം വലുതും അധികം ചെറുതുമല്ലാത്തത്. തോലുകളഞ്ഞ് കഷ്ണങ്ങളാക്കി വേവിച്ചെടുക്കുകയോ, അല്ലെങ്കിൽ അപ്പാടെ പുഴുങ്ങി തോലുകളഞ്ഞ് കഷ്ണങ്ങളാക്കുകയോ ചെയ്യാം.

വലിയ ഉള്ളി/ സവാള - രണ്ട് . ചെറുതായി അരിഞ്ഞെടുക്കുക. അധികം വലുത് വേണ്ട.

തക്കാളി - വലുത് ഒന്ന്. ചെറുതാക്കി മുറിക്കുക

ഇഞ്ചിയും വെളുത്തുള്ളിയും ചതച്ചത് - രണ്ടും കൂടെ അര ടീസ്പൂൺ. വാങ്ങുന്ന പേസ്റ്റ് ആയാലും മതി.

പച്ചമുളക് - ഒന്നോ രണ്ടോ മുറിച്ചെടുത്തത്.

മുളകുപൊടി - കാൽടീസ്പൂൺ.

മഞ്ഞൾപ്പൊടി
ഉപ്പ്
കടുക്, ജീരകം- കാൽ ടീസ്പൂൺ വീതം
കറിവേപ്പില.
ഏതെങ്കിലും വെജിറ്റബിൾ മസാല - ഒരു ടീസ്പൂൺ. ഇല്ലെങ്കിൽ ഗരം മസാല ആയാലും മതി.

ആദ്യം തന്നെ ഒരു പാത്രത്തിൽ മൂന്ന് ടേബിൾസ്പൂൺ പാചകയെണ്ണ ചൂടാക്കാൻ വയ്ക്കണം. ചൂടായി വരുമ്പോൾ അതിലിട്ട് കടുകു പൊട്ടിക്കുക. കടുക് പൊട്ടിവരുമ്പോൾ ജീരകം ഇടണം. ജീരകം വേഗം ചൂടാവും. അപ്പോത്തന്നെ കറിവേപ്പില ഇടുക. പിന്നെ ഉള്ളിയും പച്ചമുളകും ഇടുക. തീ കുറച്ച് വഴറ്റിക്കൊണ്ടിരിക്കുക. തക്കാളി ഇടുക. തക്കാളി വെന്താൽ, ഇഞ്ചി വെളുത്തുള്ളി ചേർക്കുക. അതും യോജിച്ചാൽ മഞ്ഞൾ, മുളകുപൊടികൾ ചേർക്കണം. ഇളക്കിക്കൊണ്ടിരിക്കണം. ഒന്നിളക്കി യോജിപ്പിച്ചിട്ട് അതിലേക്ക് കാൽ ലിറ്റർ വെള്ളം ഒഴിക്കുക. തീ കൂട്ടി വയ്ക്കുക. ഉരുളക്കിഴങ്ങും പനീറും ഇടുക. ഉപ്പും ഇടുക. തിളച്ചാൽ തീ കുറച്ച് അടച്ച് കുറച്ചുനേരം വെന്ത് യോജിക്കാൻ വയ്ക്കണം. വെള്ളം തീർത്തും വറ്റണമെങ്കിൽ അങ്ങനെ. അല്ലെങ്കിൽ കുറച്ചു വെള്ളം ഉണ്ടായിക്കോട്ടെ എന്നാണെങ്കിൽ അതിനനുസരിച്ച് വയ്ക്കുക. മസാലകളും ഉപ്പും പൊടികളും ഒക്കെ എല്ലാത്തിലും യോജിക്കുന്നതുവരെ വയ്ക്കണം. വെള്ളം വേണമെന്നുണ്ടെങ്കിൽ മാത്രം വീണ്ടും ചേർക്കാം.

മുളകുപൊടിയും പച്ചമുളകും വേണമെങ്കിൽ ചേർത്താൽ മതി. മസാലപ്പൊടി കൂട്ടുകയോ കുറയ്ക്കുകയോ ചെയ്യാം. എരിവൊക്കെ അവരവരുടെ പാകമനുസരിച്ച്. പനീറും ഉരുളക്കിഴങ്ങും ഇനിയും ചെറിയ കഷണങ്ങളാക്കിയാൽ കൂടുതൽ നന്നാവും. പനീർ വറുത്ത് ഇട്ടില്ലെങ്കിലും കുഴപ്പമില്ലെന്ന് തോന്നുന്നു. ഒരിക്കൽ പരീക്ഷിച്ച് ഉറപ്പുപറയാം.

ഉണക്കലരി ചെറുപരിപ്പ് പായസം

2010-01-10T21:56:00.007+05:30

എളുപ്പത്തിൽ ഒരു പായസം. അതാണിത്. അധികം വസ്തുക്കളൊന്നും ആവശ്യമില്ല.

ആവശ്യമുള്ളത്:-

അരി - ഉണക്കലരി /ഉണങ്ങലരിയോ പച്ചരിയോ - അര ഗ്ലാസ്സ് (കാൽ ലിറ്റർ വെള്ളം കൊള്ളുന്ന ഗ്ലാസ്സിൽ).

ചെറുപരിപ്പ് (ചെറുപയർ പരിപ്പ്) - അതും അര ഗ്ലാസ്സ്. വറുത്തതോ വറുക്കാത്തതോ.

ശർക്കര - നല്ല മധുരമുള്ള കറുത്ത ശർക്കരയാണെങ്കിൽ ആറ് ആണി. അധികം മധുരം ഇല്ലാത്തതാണെങ്കിൽ ആറ് ആണി മധുരശർക്കരയ്ക്കുണ്ടാവുന്ന മധുരം കണക്കാക്കി ഇടുക.

തേങ്ങ - വലിയ തേങ്ങയുടെ ഒരു മുറിത്തേങ്ങയിൽ നിന്ന് അരമുറി ചിരവിയത്. കുറച്ച് കൂടിയാലും ഒരു കുഴപ്പവുമില്ല.

ഏലയ്ക്കപ്പൊടി- അര ടീസ്പൂൺ. (നിർബ്ബന്ധമില്ല). ഇട്ടാൽ സ്വാദ് കൂടും.

വെള്ളം കുറച്ച് തിളയ്ക്കാൻ വയ്ക്കുക. ഒരു ലിറ്ററിലും കുറച്ചധികം. അരി കഴുകിയെടുക്കുക. തിളച്ചാൽ അരിയിടുക. ഇളക്കുക. തിളച്ചാൽ തീ കുറച്ച് വയ്ക്കുക.

പകുതിവേവ് ആകുമ്പോൾ ചെറുപരിപ്പ് കഴുകിയിടുക.

ചെറുപരിപ്പും അരിയും വെന്താൽ ശർക്കര ഇടുക.

ശർക്കരയും വെന്ത് യോജിക്കാൻ ഒരു പത്ത് മിനുട്ടോളം വയ്ക്കുക.

വെന്ത് വെള്ളം വറ്റിയാൽ തേങ്ങയിട്ടിളക്കുക. ഏലയ്ക്കപ്പൊടിയുണ്ടെങ്കിൽ ഇടുക.

പഴവും മുറിച്ചിടാം വേണമെങ്കിൽ. അരിയും ചെറുപരിപ്പും വേവുമ്പോഴേക്ക് വെള്ളം ഒട്ടുമില്ലാതെ ആയിട്ടുണ്ടെങ്കിൽ, ശർക്കരയിടുമ്പോൾ കുറച്ച് തിളപ്പിച്ച വെള്ളം ഒഴിക്കാം. മിക്കവാറും ആവശ്യം വരില്ല. തീ കുറച്ചേ എല്ലാം വേവിക്കാവൂ. ഇടയ്ക്ക് ഇളക്കിക്കൊടുക്കണം.

ഒടുവിൽ ഇങ്ങനെയാവും. തണുത്താൽ ഒട്ടും വെള്ളമില്ലാതെയാവും.